Ўзбекистон Республикаси Президентининг

Қарори

Саноат кооперациясини янада ривожлантириш ва талаб юқори бўлган маҳсулотлар ишлаб чиқаришни кенгайтириш чора-тадбирлари тўғрисида

Маҳаллий ва хорижий бозорларда талаб юқори бўлган маҳсулотлар ишлаб чиқариш учун саноатда кооперация алоқаларини ривожлантириш, хўжалик юритувчи субъектлар ўртасида ўзаро ҳамкорлик учун қулай шарт-шароитлар яратиш мамлакатимиз иқтисодиётини жадал ривожлантиришнинг энг муҳим шартлари ҳисобланади.

Ички бозордаги эҳтиёжлар ҳажмларининг таҳлили давлат томонидан қўллаб-қувватлашнинг самарали механизмларини амалга ошириш орқали саноат кооперациясини ва талаб юқори бўлган товарларнинг алоҳида турларини ишлаб чиқаришни кенгайтириш учун фойдаланилмаётган имкониятлар мавжудлигини кўрсатмоқда.

Саноат маҳсулотлари ишлаб чиқаришни янада кенгайтириш, кичик бизнес субъектларини саноат фаолиятига кенг жалб этиш, саноат кооперациясини мустаҳкамлаш ва ривожлантириш, ишлаб чиқарилаётган маҳсулотлар таннархини камайтириш мақсадида:

1. Қуйидагилар республика саноат кооперациясини ривожлантиришнинг узоқ муддатга мўлжалланган устувор йўналишлари деб ҳисоблансин:

саноат маҳсулотлари бозорининг барча қатламларидаги хўжалик юритувчи субъектларни мақсадли жалб қилиш, барча манфаатдор доираларга республикада ишлаб чиқарилаётган саноат маҳсулотларининг турлари, техник тавсифлари ва сифат кўрсаткичлари тўғрисида батафсил маълумот бериш орқали дастурий чора-тадбирларни амалга ошириш ва мунтазам равишда саноат ярмаркалари ўтказиш;

ҳамкорлар топиш, хўжалик, шу жумладан узоқ муддатли ҳамкорлик алоқаларини йўлга қўйишнинг муҳим воситаси сифатида электрон кооперация порталининг фаолиятини ташкил этиш, унда саноат маҳсулотлари етказиб бериш бўйича хўжалик шартномаларини (контрактларни) тезкорлик билан масофадан тузиш имкониятини тақдим қилиш;

технопарклар ва кичик саноат зоналарини ташкил қилиш, давлат харидлари тизими орқали маҳаллий ишлаб чиқарувчилар учун барқарор талабни шакллантиришни назарда тутадиган давлат томонидан қўллаб-қувватлаш чора-тадбирларини амалга ошириш.

2. 2019 йилда тадбиркорлик субъектлари томонидан ўзлаштирилиши тавсия этиладиган тайёр маҳсулотлар, бутловчи буюмлар, хом ашё ва материалларнинг янги турлари рўйхати (кейинги ўринларда — Рўйхат) 1-иловага мувофиқ тасдиқлансин.

Белгилаб қўйилсинки, Рўйхат Ўзбекистон Республикаси Вазирлар Маҳкамаси қарорига кўра ҳар ярим йилда камида бир марта қуйидаги таклифлар асосида янгиланади:

республика минтақаларининг табиий, минерал-хом ашё, ишлаб чиқариш ва меҳнат салоҳияти, тегишли инфратузилмаси, импорт қилинаётган маҳсулотлар ҳажмлари, таркиби ва номенклатураси, шунингдек, ишга туширилаётган йирик ишлаб чиқариш қувватларининг истиқболдаги эҳтиёжларидан келиб чиққан ҳолда, Ўзбекистон Республикаси Иқтисодиёт ва саноат вазирлигининг таклифлари;

ташқи бозорлар конъюнктурасига мувофиқ равишда Ўзбекистон Республикаси Инвестициялар ва ташқи савдо вазирлигининг таклифлари;

инновацион ғоялар, ишланмалар ва технологиялар, шу жумладан ҳар йили ўтказиладиган Халқаро инновация ярмаркаси давомида тақдим этилган инновацион ғоялар асосида Ўзбекистон Республикаси Инновацион ривожланиш вазирлигининг таклифлари;

Олдинги таҳрирга қаранг.

монополлашув ва рақобат муҳитини ривожлантириш, ўзаро бир-бирининг ўрнини тўлдирувчи товарлар ва нарх омилини инобатга олган ҳолда ички бозорнинг товарлар билан тўйинганлиги даражасини баҳолаш асосида Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитасининг таклифлари.

(2-банднинг олтинчи хатбошиси Ўзбекистон Республикаси Президентининг 2023 йил 6 июлдаги ПФ-108-сонли Фармони таҳририда — Қонунчилик маълумотлари миллий базаси, 07.07.2023 й., 06/23/108/0460-сон)

3. Ўзбекистон Республикаси Инвестициялар ва ташқи савдо вазирлиги Иқтисодиёт ва саноат вазирлиги билан биргаликда икки ой муддатда Рўйхатга киритилган лойиҳаларни амалга ошириш учун, шу жумладан Тўғридан-тўғри инвестициялар жамғармаси иштирокида инвестицияларни жалб этиш чораларини кўрсин.

4. Ўзбекистон Республикаси Иқтисодиёт ва саноат вазирлиги, Инвестициялар ва ташқи савдо вазирлиги ҳамда Молия вазирлигининг қуйидагиларни назарда тутувчи иқтисодиётда талаб юқори бўлган маҳсулотларни ишлаб чиқаришни қўллаб-қувватлаш тизимини эксперимент тариқасида жорий этиш тўғрисидаги таклифига розилик берилсин:

а) фойдаланилмаётган бино ва иншоотлар негизида янги лойиҳаларни амалга ошириш, шунингдек, технопаркларни қуриш;

б) аввало Рўйхат бўйича янги маҳсулот турларини тайёрловчи ишлаб чиқаришларни жойлаштирган ҳолда «Тошкент механика заводи» АЖнинг фойдаланилмаётган ишлаб чиқариш майдонлари ва ҳудуди негизида технопарк ташкил этиш.

Олдинги таҳрирга қаранг.

(4-банднинг «в» кичик банди Ўзбекистон Республикаси Президентининг 2023 йил 10 ноябрдаги ПФ-193-сонли Фармонига асосан чиқарилган — Қонунчилик маълумотлари миллий базаси, 11.11.2023 й., 06/23/193/0844-сон)

5. «Тошкент механика заводи» АЖнинг фойдаланилмаётган ишлаб чиқариш майдонлари ва ҳудуди негизида технопарк ташкил этишнинг молиялаштириш манбалари этиб 2019 йилга мўлжалланган инвестиция дастурида эркин иқтисодий зоналар ва кичик саноат зоналарида зарур инфратузилмани барпо этиш учун назарда тутилган 50 миллиард сўм миқдоридаги марказлашган маблағлар белгилансин.

6. Мавжуд ишлаб чиқаришларни кенгайтириш ва саноат маҳсулотларининг янги турларини ишлаб чиқаришни ўзлаштириш бўйича комиссиянинг (кейинги ўринларда — Комиссия) таркиби 2-иловага мувофиқ тасдиқлансин.

Комиссиянинг ишчи орган этиб Ўзбекистон Республикаси Иқтисодиёт ва саноат вазирлиги белгилансин.

7. Комиссияга (Б.А. Ходжаев):

талаб юқори бўлган маҳсулотлар, шу жумладан истеъмол товарларининг рўйхатини, мавжуд ишлаб чиқаришларни кенгайтириш ва маҳсулотларнинг янги турлари ишлаб чиқаришни ўзлаштириш механизмларини белгилаш, улар асосида ишлаб чиқилган инвестиция лойиҳаларини ҳар йили тасдиқланадиган манзилли рўйхатларга киритиш;

Рўйхатда кўрсатилган маҳсулотлар ишлаб чиқаришни ўзлаштиришни ўз вақтида амалга ошириш бўйича таъсирчан чоралар кўрган ҳолда, ушбу жараёнларни мониторинг ва назорат қилиш, шунингдек давлат томонидан қўллаб-қувватлашни тўхтатиш тўғрисида қарор қабул қилиш ҳуқуқи берилсин.

8. 2019 йил 1 июлдан шундай тартиб ўрнатилсинки, унга мувофиқ:

а) маҳаллий етказиб берувчиларнинг иштирокини ва нарх шаклланишида шаффофликни таъминлаш учун давлат буюртмачилари томонидан импорт товарларни харид қилиш тўғрисидаги истаклар давлат харидлари махсус ахборот порталида ҳам жойлаштирилади;

б) уч ёки ундан ортиқ иштирокчилар — маҳаллий ишлаб чиқарувчилар бўлган тақдирда давлат харидлари буюртмачининг танловига кўра маҳаллий ишлаб чиқарувчилар ўртасида амалга оширилиши мумкин;

в) буюртмачиларга Рўйхатдаги маҳсулотларни харид қилишда инвесторга, сифат бўйича, келишилган техник ва нарх кўрсаткичларига амал қилиш шарти билан, етказиб бериш вақтидан бошлаб икки йил давомида маҳсулотнинг давлат харидлари тизими орқали сотиб олинишига кафолат тақдим этувчи махсус контрактларни танлов тартиб-таомиллари орқали тузиш ҳуқуқи берилади.

9. Ўзбекистон Республикаси Иқтисодиёт ва саноат вазирлиги Молия вазирлиги, Ахборот технологиялари ва коммуникацияларини ривожлантириш вазирлиги, Давлат активларини бошқариш агентлиги, Давлат статистика қўмитаси, Монополияга қарши курашиш қўмитаси, «Ўзбекистон республика товар-хом ашё биржаси» АЖ билан биргаликда олти ой муддатда давлат харидлари махсус ахборот портали билан интеграциялашган электрон кооперация порталини ишлаб чиқсин ва уни қўллаб-қувватлашни таъминласин. Унда қуйидаги имкониятлар назарда тутилсин:

а) бир неча мезонлар ва кўрсаткичлар бўйича излаш имкониятига эга бўлган, мунтазам янгилаб бориладиган ҳамда қуйидагилар тўғрисидаги маълумотларни қамраб олувчи маълумотлар базасини шакллантириш ва жойлаштириш:

10 та белгидан иборат ТИФ ТН кодлари билан ўзаро боғлиқликда ҳар бир маҳсулот тури бўйича товар бозорининг ҳажми (ишлаб чиқариш, импорт, экспорт ҳажми) тўғрисида;

маҳаллий корхоналар томонидан ишлаб чиқарилаётган маҳсулот номенклатураси, унинг техник ва нарх кўрсаткичлари, шунингдек, саноат кооперациясини ўрнатиш бўйича таклифларни акс эттирган ҳолда, ушбу корхоналар тўғрисида;

давлат ва корпоратив буюртмачилар, шунингдек стратегик харидорлар эҳтиёжларини қондириш мақсадида келгуси давр учун харид режалари ва режа-графиклар тўғрисида;

маҳаллий корхоналар негизида ишлаб чиқариш тавсия этилаётган ўзлаштирилиши истиқболли маҳсулот турлари тўғрисида;

б) корхоналар томонидан керакли шаклларни онлайн режимда мустақил тўлдирилиши орқали маҳаллий корхоналар учун ахборотни маълумотлар базасига бепул киритиш имконияти;

в) корхоналар, етказиб берувчилар ва давлат органлари ўртасида интерактив ҳамкорлик қилиш имконияти;

г) порталнинг статистика, божхона, солиқ ва молия органларининг маълумотлар базалари билан интеграциялашганлиги.

Белгилаб қўйилсинки, Рўйхат электрон кооперация порталида, шунингдек, Ўзбекистон Республикаси Иқтисодиёт ва саноат вазирлигининг расмий веб-сайтида бепул асосда мажбурий равишда эълон қилинади.

10. Қуйидагилар электрон кооперация порталига тегишли ахборотларни тўғри ва ҳаққоний киритилиши ва уни ўз вақтида янгилаб борилиши учун масъул этиб белгилансин:

республикада ишлаб чиқарилаётган саноат маҳсулотларининг ҳажми ва техник параметрлари юзасидан — Ўзбекистон Республикаси Иқтисодиёт ва саноат вазирлиги, Давлат статистика қўмитаси, Савдо-саноат палатаси, «Ўзстандарт» агентлигининг ҳудудий бўлинмалари;

саноат маҳсулотлари импорти юзасидан — Ўзбекистон Республикаси Давлат статистика қўмитаси ва Давлат божхона қўмитаси;

келгуси давр учун давлат харидларининг режа-графиклари ва давлат харидларининг ўтган йилдаги амалдаги ҳажми юзасидан — Ўзбекистон Республикаси Иқтисодиёт ва саноат вазирлиги, Молия вазирлиги, устав фонди (капитали)даги давлат улуши 50 фоиз ва ундан ортиқ бўлган юридик шахслар;

маҳаллий корхоналар негизида ишлаб чиқариш тавсия этилаётган ўзлаштирилиши истиқболли маҳсулот турлари юзасидан — Ўзбекистон Республикаси Иқтисодиёт ва саноат вазирлиги.

11. Ўзбекистон Республикаси Иқтисодиёт ва саноат вазирлиги:

ушбу қарорнинг 10-бандида кўрсатилган маълумотларнинг электрон кооперация порталига ўз вақтида ва тўлиқ киритилиши устидан назоратни таъминласин;

бир ой муддатда Ўзбекистон Республикаси Молия вазирлиги билан келишган ҳолда Саноат ярмаркаларини ва электрон кооперация портали фаолиятини ташкил этиш тартиби тўғрисидаги низомни тасдиқласин;

икки ой муддатда Ўзбекистон Республикаси Молия вазирлиги, Давлат божхона қўмитаси, Давлат статистика қўмитаси, «Ўзстандарт» агентлиги ва Савдо-саноат палатаси билан биргаликда электрон кооперация порталига киритиладиган, шу жумладан республикада ишлаб чиқариладиган саноат маҳсулотлари, шунингдек хўжалик юритувчи субъектлар эҳтиёжлари учун импорт қилинадиган (ТИФ ТН коди 10 та белгидан иборат) маҳсулотларнинг ҳажми ва техник параметрлари тўғрисидаги маълумотларга қўйиладиган талабларни ишлаб чиқсин ва тасдиқласин.

12. Қуйидагиларга:

иқтисодиёт ва саноат вазири Б.А. Ходжаевга — саноат соҳасидаги хўжалик юритувчи субъектлар ўртасида кооперация алоқаларини кенгайтириш, Рўйхатга киритилган тайёр маҳсулотлар, бутловчи буюмлар, хом ашё ва материаллар ишлаб чиқаришни ривожлантириш жараёнини мувофиқлаштириш, шунингдек, электрон кооперация порталининг фаолият кўрсатиши, иқтисодиётда талаб юқори бўлган маҳсулотлар ишлаб чиқаришни қўллаб-қувватлаш тизимини жорий этиш бўйича экспериментни самарали амалга ошириш юзасидан;

инвестициялар ва ташқи савдо вазири С.У. Умурзоқовга — инвесторларни излаш ва уларни эркин иқтисодий зоналарга жойлаштириш, биринчи навбатда, Рўйхатга киритилган маҳсулотларни ўзлаштириш бўйича инвестиция лойиҳаларини амалга ошириш, шунингдек, иқтисодиётда талаб юқори бўлган маҳсулотлар ишлаб чиқаришни ўзлаштириш юзасидан;

«Ўзбекистон республика товар-хом ашё биржаси» АЖ раиси Ф.Ф. Ибрагимовга — электрон кооперация порталини яратиш ва унинг давлат харидлари махсус ахборот портали билан интеграциялашувини таъминлаш юзасидан;

Ўзбекистон Республикаси Савдо-саноат палатаси раиси А.И. Икрамовга — республикада ишлаб чиқарилаётган товарлар, ишлар ва хизматларнинг саноат ярмаркасини ташкил этиш, хўжалик юритувчи субъектларни харид фаолиятига жалб қилиш, харид қилиш операцияларининг доимий равишда янги ташкил этилаётган электрон кооперация портали орқали ўтказилиши юзасидан шахсий жавобгарлик юклансин.

13. Ўзбекистон Миллий ахборот агентлиги ва Ўзбекистон Миллий телерадиокомпанияси ушбу қарорнинг моҳияти ва қоидалари оммавий ахборот воситаларида кенг ёритилишини таъминласин.

14. Ўзбекистон Республикаси Иқтисодиёт ва саноат вазирлиги, Молия вазирлиги:

бир ой муддатда «Тошкент механика заводи» АЖнинг фойдаланилмаётган ишлаб чиқариш майдонлари ва ҳудуди негизида технопарк фаолиятини ташкил этиш тўғрисидаги ҳукумат қарори лойиҳасини Вазирлар Маҳкамасига киритсин;

бир ой муддатда Инвестициялар ва ташқи савдо вазирлиги, шунингдек, манфаатдор вазирлик ва идоралар, хўжалик юритувчи субъектлар билан биргаликда мавжуд ишлаб чиқаришларни кенгайтириш ва талаб юқори бўлган саноат маҳсулотлари ишлаб чиқаришни ўзлаштириш бўйича «йўл харита»ларини ишлаб чиқсин ва Вазирлар Маҳкамасига киритсин;

уч ой муддатда «Давлат харидлари тўғрисида»ги Қонунга харид қилиш тартиб-таомилларини янада такомиллаштириш, уларнинг шаффофлигини оширишни назарда тутувчи ўзгартиришлар киритиш бўйича таклифларни киритсин;

икки ой муддатда қонун ҳужжатларига мазкур қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин;

бир ой муддатда манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни мазкур қарорга мувофиқлаштирсин.

15. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президенти маслаҳатчисининг ўринбосари Г.К. Саидова зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2019 йил 1 май,

ПҚ-4302-сон

Ўзбекистон Республикаси Президентининг 2019 йил 1 майдаги ПҚ-4302-сон қарорига
1-ИЛОВА

2019 йилда тадбиркорлик субъектлари томонидан ўзлаштирилиши тавсия этиладиган ички бозорда талаб юқори бўлган ва экспортга йўналтирилган тайёр маҳсулотлар, бутловчи буюмлар, хом ашё ҳамда материалларнинг янги турлари

РЎЙХАТИ

Т/р	Маҳсулот номи	ТИФ ТН коди
I. ОЗИҚ-ОВҚАТ МАҲСУЛОТЛАРИ
1.	Маргарин	1517109000
2.	Плиткали, сутли шоколад	1806310000
3.	Макарон маҳсулотлари	1902301000
4.	Колбаса ва сосиска маҳсулотлари учун устки қоплама	3917101000, 3917109000
5.	Маккажўхори крахмали	1108120000
6.	Шакарсиз сақич	2106909801
7.	Лимон кислотаси	2918140000
8.	Қуруқ хамиртуруш	2102103100
II. ТРИКОТАЖ БУЮМЛАР, КИЙИМ-КЕЧАК, ПОЙАБЗАЛ
9.	Джинси матоси	5211420000
10.	Трикотаж мато	6004100000, 6006329000,
11.	Болалар кийим-кечаги	6111209000, 6111309000
12.	Пойабзал учун этикеткалар	4016100000
13.	Болалар пойабзали	6404110000
III. ДОРИ ВОСИТАЛАРИ
14.	Нинали шприцлар	9018311009
15.	Ветенария вакциналари	3002300000
IV. КАНЦЕЛЯРИЯ МОЛЛАРИ
16.	Канцелярия моллари	8472909900, 8205598099, 3213100000, 3407000000, 9609101000, 8213000000, 8305200000, 9017201000, 8214100000, 8211930000, 8305900000, 8305900000
V. ҚУРИЛИШ МАТЕРИАЛЛАРИ
17.	Обойлар ва шунга ўхшаш девор қопламалари	4814200000
18.	Цементлар, қурилиш аралашмалари ёки бетонлар учун тайёр қўшимчалар	3824400000
19.	Кўчага териладиган плиткалар, поллар учун қоплама	6907219009, 6907229009
20.	Сантехника маҳсулотлари учун смесителлар	8481801100
21.	Ёғоч-толали плиталар (ДСП, МДФ)	4411129000, 4411131000, 4411139000, 4411141000, 4411149000, 4411921000, 4411929000
VI. РЕЗИНАЛАР, ПЛАСТМАССАЛАР ВА УЛАРДАН ТАЙЁРЛАНГАН МАҲСУЛОТЛАР
22.	Қувурларни изоляция қилиш учун плёнкалар	3919900000
23.	Юқори босимга чидайдиган полиэтилен шланкалар	3917219000
24.	Рақам белгилари учун нур қайтарувчи плёнкалар	3919108000
25.	Узатма тасмалар	4010390000
26.	Тўқимачилик маҳсулотлари учун тугмалар	9606210000, 9606220000, 9606290000
27.	Мебель фурнитуралари	3926300000
28.	Прокладкалар, шайбалар, зичлагичлар	4016930008
29.	Ўраш учун ғалтаклар	3923409000
30.	Хавфсиз устаралар	8212101000
31.	Резинали қўлқоплар	4015190000
32.	Пластмасса ва гофраланган трубалар	3917290000
33.	Бир марталик эшитиш воситаси	8518309500
34.	Ҳимоя кўзойнаклари	9004109100, 9004109900
VII. КИМЁ ВА У БИЛАН БОҒЛИҚ ТАРМОҚЛАР МАҲСУЛОТЛАРИ
35.	Ўраш учун ёпишқоқ лента	3919900000, 3919108000
36.	Тўқимачилик саноати учун ишлатадиган бўёқлар	3204110000, 3204120000, 3204130000, 3204140000, 3204150000, 3204160000, 3204170000, 3204190000, 3204200000, 3204900000
37.	Қоғоз ва термоқоғоз (ўзи елимланадиган)	4811419000, 4811900000
38.	Кукунли бўёқ	3212900000, 3204170000
39.	Акрил полимерлар	3906909000
40.	Автомобиль йўллари ва аэропортлар учун кимёвий реагентлар	3824999608
41.	Ювиш ва тозалаш воситалари	3402209000
42.	Дезодорантлар, дезодорант-антиперспирантлар (спрей, қаттиқ, шарикли, гель ва крем кўринишда)	3307200000
43.	Синтетик каучук	40021
44.	Активлаштирилган кўмир	3802100000
45.	Болалар тагликлари	9619
46.	Сув ўтказмайдиган полимер қатламли қоғоз пакетлар	4819400000
47.	Бинолар ва автомобиллар учун хушбўйлаштирувчи ва ҳаво тозаловчи воситалар (аэрозоль ўрамда, спрейлар, геллар ва суюқ ҳаво тозаловчилар)	3307490000
48.	Полиграфик бўёқлар	3215190000
49.	Елимлар	3506100000, 3506910000, 3506990000
50.	Тиш пасталари	3306100000
51.	Шампунлар	3305100000
52.	Рангларга энергия берувчи эритмалар	3808939000
53.	Антифризлар ва музлашга қарши суюқликлар	3820000000
54.	Водород переоксиди (водород перекиси) 30%, 60%	2847000000
55.	Атир совун	3401110001
56.	Акрил ва винил полимерлар асосида тайёрланган бўёқ ва лаклар	3208209009
57.	АВС маркали ўт ўчиргичларни тўлдириш кукуни	3813000000
58.	Моторли, трансмиссияли, гидравлика мойлари	2710198200
VIII. МЕТАЛЛАР ВА УЛАРДАН ЯСАЛГАН БУЮМЛАР
59.	Печларда ишлатиладиган электродлар	8545110020
60.	Қувурлар учун фитинглар	7307998009
61.	Графит электродлари	8545110080
62.	Нефть ёки газ қувурлари учун тўғричокли қувурлар	7305110008
63.	Латун маҳсулотлари (фитинглар, газ редукторлари ва бошқалар)	7412200000, 7419999000
64.	Маҳсулот ва юклар учун аравалар (супермаркетлар, аэропортлар, автовокзаллар, темирйўл вокзаллари учун)	8716800000
65.	Металл, эмалланган, хўжалик идишлар	7323940000
66.	Металл мебель	9403208000
67.	Ҳаммом учун бурчаклар — шампунлар учун тагликлар	9403208000
IX. УСКУНАЛАР
68.	Иссиқхона ускуналари	9406903100
69.	Гидравлик, ёқилғи, қўл насослари	8413190000, 8413502000, 8413506100, 8413602000, 8413603100, 8413606100
70.	Ҳаво компрессорлари	8414805900
71.	Мобил бетон насослар	8705903000
72.	Турли қувватлардаги электр моторлар	8501
73.	Паррандачилик учун ускуналар, инкубаторлар	8436290000
74.	Чорва моллари учун ўтларни майдалаш	8436100000
75.	Газ бериш назорат тизимисиз газ горелкалари учун кранлар	8481808190
76.	Поливинилхлорид манжетли изоляцияланган ҳалқасимон учликлар	8536901000
77.	Иссиқлик алмашгичлари	8419500000
78.	Тақсимловчи шитлар	8537109900
79.	Ўртага йўналтирилган вентиляторлар	8414594000
80.	Сувни тўкадиган механизмлар	8481807900
81.	Электр пайвандлаш ускуналари	8515
82.	Бетон миксерлар (1 м3 гача)	8474310000
83.	Автомобиллар учун амортизаторлар	8708803509
84.	Турли хил ўлчамдаги ва турдаги ременлар	4010390000
85.	500 кВт гача бўлган электр ва комбинациялашган иситгич қозонлари	8403101000, 8403109000
86.	Ўт олдириш свечалари	8511100008
87.	Чироқлар, шу жумладан шахталарда ишлаш учун мўлжалланган (бош чироқ)	8513100000
88.	Электр қўл асбоблари	8467219100, 8467219900
89.	Велосипедларнинг бутловчи қисмлари	8712008000, 8712003000, 8712007000
90.	Оптик компьютер сичқончалари	8471607000
91.	Тормоз колодкалари	8708309909
92.	Телефон аппаратлари ва уларнинг бутловчи қисмлар	8517120000, 8517120000, 8517180000
93.	Светодиод (LED) линейкалар ёки (LED) панеллар	8541401000
94.	Ички ёниш двигателлари учун ҳаво фильтрлари	8421310000
95.	Компьютер клавиатураси	8471606000
96.	Кир ювиш ва қуритиш машиналари	8450, 8451, 8516808000
97.	Маиший совутгич ва музлатгичлар	8418
98.	Электр шарбат чиқаргичлар	8509400000
99.	Электр чойнаклар	8516710000

Ўзбекистон Республикаси Президентининг 2019 йил 1 майдаги ПҚ-4302-сон қарорига
2-ИЛОВА

Мавжуд ишлаб чиқаришларни кенгайтириш ва саноат маҳсулотларининг янги турларини ишлаб чиқаришни ўзлаштириш бўйича комиссия

ТАРКИБИ

Б.А. Ходжаев	—	Ўзбекистон Республикаси иқтисодиёт ва саноат вазири, комиссия раҳбари
С.У. Умурзоқов	—	Ўзбекистон Республикаси инвестициялар ва ташқи савдо вазири, комиссия раҳбарининг ўринбосари
Ш.М. Содиқов	—	Ўзбекистон Республикаси ахборот технологиялари ва коммуникацияларини ривожлантириш вазири
Ё.Э. Турсунов	—	Ўзбекистон Республикаси молия вазирининг ўринбосари
Б.А. Бегалов	—	Ўзбекистон Республикаси Давлат статистика қўмитаси раиси
М.Б. Азимов	—	Ўзбекистон Республикаси Давлат божхона қўмитаси раиси
Д.Н. Сатторов	—	«Ўзстандарт» агентлиги директори
А.И. Икрамов	—	Ўзбекистон Республикаси Савдо-саноат палатаси раиси
Ф.Ф. Ибрагимов	—	«Ўзбекистон республика товар-хом ашё биржаси» АЖ бошқаруви раиси
С.Н. Ахмедов	—	Иқтисодиёт ва саноат вазирлиги департамент бошлиғининг ўринбосари — комиссия котиби

Изоҳ: Ишчи комиссия аъзолари бошқа ишга ўтган тақдирда, унинг таркибига ушбу лавозимга янгидан тайинланган ёки зиммасига тегишли функцияларни бажариш юкланган шахслар киритилади.

(Қонун ҳужжатлари маълумотлари миллий базаси, 02.05.2019 й., 07/19/4302/3045-сон; 07.07.2023 й., 06/23/108/0460-сон; Қонунчилик маълумотлари миллий базаси, 11.11.2023 й., 06/23/193/0844-сон)