Ўзбекистон Республикаси Президентининг «Ўзбекистон Республикаси ижодкорлари жамғармасини тузиш тўғрисида» 1991 йил 22 октябрдаги Фармонига мувофиқ Вазирлар Маҳкамаси қарор қилади:

1. Республика ижодий уюшмаларининг Ўзбекистон ижодкорлари жамғармасининг таъсис конференциясини 1992 йил январь ойида ўтказиш тўғрисидаги таклифи қабул қилинсин. Таъсис конференциясини тайёрлаш ва ўтказиш бўйича ташкилий Қўмитанинг илова* қилинаётган таркибига розилик билдирилсин.

Жамғарманинг сайланган бошқарувига бир ой муддат ичида Ўзбекистон Республикаси ижодкорлари жамғармаси тўғрисидаги Низомни тайёрлаш ва тасдиқлаш учун Вазирлар Маҳкамасига киритиш топширилсин.

2. Ўзбекистон Республикаси ижодкорлари жамғармаси аппарати ходимларининг сони 7 кишидан иборат қилиб белгилансин. Ўзбекистон Республикаси Молия вазирлиги меҳнатга ҳақ тўлаш миқдорини, шартнома асосида Ўзбекистон Республикаси Автомобиль транспорти вазирлиги томонидан таъминланадиган битта енгил автомашинани сақлаш учун ажратиладиган маблағни ва лимитни белгиласин.

Ўзбекистон Республикаси Иқтисодиёт қўмитаси, Моддий-техника таъминоти давлат-кооператив қўмитаси ва Алоқа вазирлиги республика ижодкорлари жамғармаси бошқарувининг талабномасига мувофиқ биркитилган номенклатура бўйича зарур моддий-техника ресурслари ажратсинлар.

Белгилаб қўйилсинки, жамғарма бошқаруви аппаратини сақлаш ва моддий-техника таъминоти харажатлари Фармонга мувофиқ Вазирлар Маҳкамаси резервидан ажратилган 3 миллион сўм ҳисобидан амалга оширилади.

3. Тошкент шаҳар ижроия қўмитаси Ўзбекистон Республикаси ижодкорлари жамғармасига зарур жой ажратиш масаласини кўриб чиқсин ва белгиланган тартибда ҳал этсин.

4. Ўзбекистон саноат-қурилиш банки ва Ўзбекистон Республикаси Ташқи иқтисодий фаолият миллий банки совет ва чет эл фуқароларидан, корхоналар, муассасалар ва ташкилотлардан сўм ҳисобида ва хорижий валютада келиб тушадиган маблағларни ҳисобга ўтказиш учун Ўзбекистон Республикаси ижодкорлари жамғармасининг махсус счётларини очсинлар.

5. Ўзбекистон Республикаси Давлат телевидение ва радио-эшиттириш компанияси, рўзномалар ва журналларнинг таҳририятлари жамғарма фаолиятини кенг тарғиб қилишни ҳамда ажратилган маблағлардан мақсадли фойдаланишда ошкораликни таъминласинлар.