Ўзбекистон Республикаси Президентининг 2017 йил 14 мартдаги «Иқтисодиётнинг базавий тармоқларида лойиҳа ишлари самарадорлигини ошириш чора-тадбирлари тўғрисида»ги ПҚ-2831-сонли қарорига мувофиқ, шунингдек Ўзбекистон Республикаси Вазирлар Маҳкамаси ҳузуридаги «ЎзИнжирининг» Республика лойиҳа институти (кейинги ўринларда — «ЎзИнжиниринг» РЛИ) фаолиятини самарали ташкил этиш мақсадида:

1. Ўзбекистон Республикаси Вазирлар Маҳкамаси ҳузуридаги «ЎзИнжиниринг» Республика лойиҳа институти тўғрисидаги Низом иловага мувофиқ тасдиқлансин.

2. Қуйидагилар:

Ўзбекистон Республикаси Президентининг 2017 йил 14 мартдаги «Иқтисодиётнинг базавий тармоқларида лойиҳа ишлари самарадорлигини ошириш чора-тадбирлари тўғрисида»ги ПҚ-2831-сонли қарори, шунингдек Институт ва унинг Илмий-техник кенгаши ҳақидаги низомларнинг талабларига қатъий риоя этилиши учун — «ЎзИнжиниринг» РЛИ директори;

ташаббус кўрсатиб ишлаб чиқилаётган лойиҳаларнинг ўз вақтида киритилиши, шунингдек лойиҳаолди ва лойиҳа ҳужжатларини ишлаб чиқиш ҳамда лойиҳаларни (қурилиш босқичида) техник кузатиш учун «ЎзИнжиниринг» РЛИга тақдим этиладиган ахборотнинг тўлиқлиги. сифати ва ишончлилиги учун — иқтисодиёт базавий тармоқлари, шу жумладан геология, ёқилғи-энергетика комплекси, кимё, нефт-кимё ва металлургия саноати — Ўзбекистон Республикаси Давлат геология ва минерал ресурслар қўмитаси, «Ўзбекэнерго» АЖ, «Ўзбеккўмир» АЖ, «Ўзкимёсаноат» АЖ, «Ўзметкомбинат» АЖ, «Олмалиқ КМК» АЖ, «Навоий КМК» ДК лойиҳаларининг ташаббускорлари — давлат ва хўжалик бошқаруви органларининг раҳбарлари шахсан жавоб бериши белгилаб қўйилсин.

3. Белгилансинки:

иқтисодиётнинг базавий тармоқлари корхоналарини ва ишлаб чиқариш қувватларини қуриш ҳамда модернизациялаш бўйича ишлаб чиқилган инвестиция лойиҳалари (Ўзбекистон Республикаси Президентининг 2017 йил 19 апрелдаги «Нефт-газ тармоғидаги лойиҳа ишларини ташкил этиш тартибини такомиллаштириш тўғрисида»ги ПҚ-2901-сонли қарори талабларига мувофиқ нефт-газ тармоқлари бундан мустасно) «ЎзИнжиниринг» РЛИ Илмий-техник кенгашининг ижобий хулосаси мавжуд бўлган тақдирдагина ваколатли органларга экспертизадан ўтказиш учун киритилади;

Ўзбекистон Республикаси Инвестициялар бўйича давлат қўмитаси «ЎзИнжиниринг» РЛИ билан биргаликда иқтисодиётнинг базавий тармоқлари корхоналари ҳамда ишлаб чиқариш қувватларини қуриш ва модернизациялаш бўйича инвестиция лойиҳаларини кейинчалик ваколатли органларга экспертизадан ўтказиш учун тақдим этиш ва белгиланган тартибда Ўзбекистон Республикасининг ривожланиш давлат дастурларига киритиш учун уларни синчиклаб, пухта ишлаб чиқиш бўйича ҳаракатларнинг бирга мувофиқлаштирилишини таъминлайдилар.

4. Белгилаб қўйилсинки:

«ЎзИнжиниринг» РЛИ директори Вазирлар Маҳкамасининг инвестициялар, инновацион ривожлантириш, эркин иқтисодий ва кичик саноат зоналари фаолиятини мувофиқлаштириш масалалари комплекси раҳбарининг тақдимномасига биноан Вазирлар Маҳкамаси томонидан лавозимга тайинланади ва лавозимдан озод қилинади;

«ЎзИнжиниринг» РЛИ директорининг ўринбосарлари Институт директорининг тақдимномасига биноан Вазирлар Маҳкамаси томонидан лавозимга тайинланадилар ва лавозимдан озод қилинадилар.

5. «ЎзИнжиниринг» РЛИ Вазирлар Маҳкамасининг ҳудудларни комплекс ривожлантириш ва коммунал соҳа, транспорт, капитал қурилиш, қурилиш индустрияси масалалари комплекси раҳбари билан келишилган ҳолда икки ҳафта муддатда:

Институтнинг янгиланган уставини ишлаб чиқсин ва тасдиқласин, унинг давлат рўйхатидан Ўтказилишини таъминласин хамда Институтнинг штатлар жадвалини тузсин:

Институтнинг Илмий-техник кенгаши тўғрисидаги Низомни тасдиқлаш учун киритсин.

6. Ўзбекистон Республикаси Бош вазирининг биринчи ўринбосари — «Ўзбекистон темир йўллари» акциядорлик жамияти бошқаруви раиси А.Ж. Раматов, «ЎзИнжиниринг» РЛИ Илмий-техник кенгаши тўғрисидаги тасдиқланган Низом талабларини ҳисобга олган ҳолда унинг шахсий таркиби бўйича таклиф киритсин.

7. Ўзбекистон Республикаси Давлат архитектура ва қурилиш қўмитаси ўн кун муддатда Институт зиммасига юкланган вазифаларни бажариш учун зарур бўлган лицензия битимларини «ЎзИнжиниринг» РЛИ билан белгиланган тартибда тузилишини таъминласин.

8. «ЎзИнжиниринг» РЛИ Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарор ва фармойишлари, вазирликлар ҳамда идораларнинг норматив-ҳуқуқий ҳужжатлари ва статистика ахборотлари тарқатилиши мажбурий бўлган ташкилотлар рўйхатига киритилсин.

9. Мазкур фармойишнинг ижросини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» акциядорлик жамияти бошқаруви раиси А.Ж. Раматов зиммасига юклансин.

1. Ушбу Низом Ўзбекистон Республикаси Президентининг 2017 йил 14 мартдаги «Иқтисодиётнинг базавий тармоқларида лойиҳа ишлари самарадорлигини ошириш чора-тадбирлари тўғрисида»ги ПҚ-2831-сонли қарорига мувофиқ Ўзбекистон Республикаси Вазирлар Маҳкамаси ҳузуридаги «ЎзИнжиниринг» Республика лойиҳа институтининг (кейинги ўринларда — Институт) асосий вазифалари, функциялари, ҳуқуқ ва жавобгарлиги, фаолиятининг ташкилий асосларини белгилаб беради.

2. Институт инвестициявий ва инфратузилмавий лойиҳаларнинг дастлабки ва узил-кесил техник-иқтисодий асосланиши ва ҳисоб-китобларини (ДТИА/ДТИҲ ва ТИА/ТИҲ)ларни ишлаб чиқиш ва мослаштиришни, шунингдек лойиҳа (иш ҳужжатларини) ҳамда геология, ёқилғи-энергетика комплекси, кимё, нефть-кимё ва металлургия саноати соҳасида иқтисодиётнинг базавий тармоқлари лойиҳаларини (қурилиш босқичида) техник кузатишни амалга оширади (Ўзбекистон Республикаси Президентининг 2017 йил 19 апрелдаги ПҚ-2901-сонли «Нефть-газ тармоғида лойиҳа ишларини ташкил этиш тартибини такомиллаштириш тўғрисида»ги қарори талабларига мувофиқ нефть-газ тармоғи бундан мустасно).

3. Институт ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарор ва фармойишларига, мазкур Низомга ҳамда бошқа норматив ҳужжатларга амал қилади.

4. Институт давлат муассасаси шаклидаги юридик шахс ҳисобланади, Ўзбекистон Республикасининг Давлат герби тасвирланган ва давлат тилида ўз номи ёзилган муҳрга эга бўлиб, ўз фаолиятида Ўзбекистон Республикаси Вазирлар Маҳкамасига ҳисоб беради.

5. Институт фаолиятига мутасаддилик қилиш Инвестициялар, инновацион ривожланиш, эркин иқтисодий ва кичик саноат зоналари фаолиятини мувофиқлаштириш масалалари бўйича комплекс зиммасига юкланади.

6. Институт мустақил балансга, банк ҳисобварақлари, шу жумладан валюта ҳисобварақларига, тўлиқ оператив бошқариш ҳуқуқи билан алоҳида мол-мулкка эга бўлиб, ўз мажбуриятлари бўйича мол-мулки билан жавоб беради, ўз номидан мулкий ва шахсий номулкий ҳуқуқларни қўлга киритиши ва амалга ошириши, зиммасига мажбуриятлар олиши, судларда даъвогар ва жавобгар бўлиши мумкин.

7. Ўзбекистон Республикаси Президентининг 2017 йил 14 мартдаги «Иқтисодиётнинг базавий тармоқларида лойиҳа ишлари самарадорлигини ошириш чора-тадбирлари тўғрисида»ги ПҚ-2831-сонли қарорига мувофиқ Институтнинг асосий вазифалари қуйидагилардан иборат:

лойиҳаолди ҳужжатларини, шу жумладан ДТИА/ДТИҲ ва ТИА/ТИҲларни ишлаб чиқиш, хорижий лойиҳа ташкилотлари томонидан ишлаб чиқилган лойиҳаолди ҳужжатларини Ўзбекистон Республикасининг техник тартибга солиш ва стандартлар соҳасидаги норматив ҳужжатларига мослаштириш;

лойиҳаларни техник кузатиш, иқтисодиёт базавий тармоқлари лойиҳаларининг тендер савдолари (лойиҳалаштиришга тааллуқли қисмида) ташаббускорлари билан биргаликда уларни ўтказиш ва кузатиш;

иқтисодиётнинг базавий тармоқларини таркибий ўзгартириш, геология, ёқилғи-энергетика комплекси, кимё, нефть-кимё ва металлургия саноати объектларини модернизациялаш ва техник реконструкция қилишнинг тармоқ идоралари томонидан ишлаб чиқилган концепцияларини кўриб чиқиш ва келишиш;

иқтисодиётнинг базавий тармоқлари корхоналарини қуриш ва модернизация қилиш бўйича Ўзбекистон Республикасининг ривожланиш давлат дастурига киритиш учун тақдим этилган инвестиция лойиҳаларини кўриб чиқишда иштирок этиш;

хорижий лойиҳа ва инжиниринг ташкилотларини жалб этган ҳолда, илғор хорижий тажрибага асосланган лойиҳа ишларини ташкил этишнинг прогрессив усулларини лойиҳалаш жараёнларига татбиқ этиш;

инвестиция лойиҳаларининг лойиҳа (ишчи) ҳужжатларини мустақил ишлаб чиқиш, шунингдек,

хорижий лойиҳа ташкилотлари томонидан ишлаб чиқилган лойиҳа (ишчи) ҳужжатларини мослаштириш каби йўналишларни ривожлантириш, кейинчалик иқтисодиётнинг базавий тармоқлари лойиҳалари бўйича лойиҳа ҳужжатларини ишлаб чиқишда ўз зиммасига бош пудратчи функцияларини қабул қилиш;

тўғридан тўғри фуқаролик-ҳуқуқий шартномалар асосида инвестиция лойиҳаларининг лойиҳаолди ва лойиҳа ҳужжатларини ишлаб чиқиш учун ёрдамчи пудратчилар сифатида маҳаллий ва хорижий ихтисослаштирилган лойиҳа институтларини, шунингдек етакчи мутахассисларни жалб этиш;

ишлаб чиқарилаётган маҳсулот сифати ва унумдорлигига нисбатан замонавий талабларга, энергия ва ресурсларни тежаш ҳамда экологик стандартларга жавоб берадиган илғор технологиялар ва ускуналарнинг жаҳон бозорини чуқур таҳлил қилиш, бунда истиқболсиз, маънан ва жисмонан эскирган ускуна ва технологияларни республикага олиб кириш, истисно этилади;

лойиҳалаштиришда юқори технологияли, энергия самарали илғор ускуналар ва технологияларни танлаб олиш;

Институтнинг илмий-техник кенгашида иқтисодиёт базавий тармоқларининг лойиҳаолди ҳужжатларини кўриб чиқиш;

лойиҳа, лойиҳаолди ишчи ҳужжатларини ишлаб чиқиш ва тасдиқлаш қисмида иқтисодиёт базавий тармоқларининг илмий-техник ва эксперт кенгашлари билан мустаҳкам ҳамкорлик қилиш;

чет элларда ишлаб чиқарилаётган замонавий ускуналар ва технологиялар, уларнинг техник ва ишлаб чиқариш-иқтисодий таснифлари, самарадорлиги ва амалда синалганлик даражаси тўғрисида, шунингдек, юқори технологияли ишлаб чиқарувчи ва етказиб берувчи, фаолият соҳаси бўйича технологияларни ишлаб чиқувчи ва лицензия берувчи чет эллардаги асосий шериклар тўғрисида ахборот-таҳлилий маълумотлар базасини шакллантириш ва доимо янгилаб бориш;

саноат корхоналарини қуриш, реконструкция ва модернизация қилиш бўйича хорижий инвесторлар ва компаниялардан келиб тушаётган таклифлар тўғрисидаги ахборотни йиғиш ва умумлаштириш ҳамда маҳаллий хом ашёни қайта ишлаш орқали жаҳон ва ички бозорларда талаб этиладиган рақобатдош тайёр маҳсулот ва саноат яримфабрикатлари ишлаб чиқаришга йўналтирилган янги инвестиция лойиҳаларини амалга ошириш таклифларини ишлаб чиқишда қатнашиш;

асосий технологик ускуналарнинг чекланган нарх параметрлари бўйича, шунингдек, таклиф этилаётган технологияга мувофиқ «тайёр ҳолда топшириш» лойиҳаларининг қиймати бўйича тавсиялар ишлаб чиқиш;

иқтисодиётнинг базавий тармоқларида хўжалик бошқаруви органлари, вазирликлар ва идораларнинг буюртмасига биноан инвестиция лойиҳаларининг мустақил техник–иқтисодий экспертизасини ўтказиш;

иқтисодиётнинг базавий тармоқларида лойиҳалашни ривожлантиришнинг асосий йўналишларини белгилаш, шунингдек, юқори малакали муҳандис-лойиҳачиларни тайёрлаш масалалари бўйича ихтисослаштирилган олий таълим муассасалари, иқтисодиёт базавий тармоқларининг корхоналари ва лойиҳа институтлари ўртасида ўзаро ҳамкорликни амалга ошириш.

8. Институт ўз зиммасига юкланган вазифаларга мувофиқ қуйидаги функцияларни амалга оширади:

бош пудратчи сифатида — иқтисодиётнинг базавий тармоқларидаги инвестиция лойиҳалари бўйича лойиҳаолди ҳужжатларини, шу жумладан ДТИА/ДТИҲ ва ТИА/ТИҲларни ишлаб чиқиш ва мослаштиришни амалга оширади;

Институтнинг норматив ҳужжатларига мувофиқ Илмий-техник кенгаш ишини ташкиллаштиради;

лойиҳаолди ҳужжатлари тайёрланиши, шунингдек, тармоқ идоралари, шу жумладан геология, ёқилғи-энергетика комплекси, кимё, нефть-кимё ва металлургия саноати — лойиҳаларнинг ташаббускорларидан олинадиган ахборот асосида Ҳукуматнинг тегишли қарорлари билан тасдиқланадиган иқтисодиёт базавий тармоқларидаги лойиҳаларнинг амалга оширилишини мониторинг қилади;

саноат корхоналарини қуриш, реконструкция ва модернизация қилиш бўйича хорижий инвесторлар ва компаниялардан келиб тушаётган таклифларга оид ахборотни (шу жумладан иқтисодиётнинг базавий тармоқларидаги лойиҳаларнинг ташаббускорлари — тармоқ идораларининг ахбороти асосида) йиғади ва умумлаштиради;

маҳаллий хом ашёни қайта ишлаш орқали жаҳон ва ички бозорларда талаб этиладиган рақобатдош тайёр маҳсулот ва саноат яримфабрикатлари ишлаб чиқаришга йўналтирилган янги инвестиция лойиҳаларини амалга ошириш таклифларини ишлаб чиқишда қатнашади;

иқтисодиётнинг базавий тармоқларини таркибий ўзгартириш, геология, ёқилғи-энергетика комплекси, кимё, нефть-кимё ва металлургия саноати объектларини модернизациялаш ва техник реконструкция қилишнинг тармоқ идоралари томонидан ишлаб чиқилган концепцияларини кўриб чиқиш ва келишишда, иқтисодиётнинг базавий тармоқлари корхоналарини қуриш ва модернизация қилиш бўйича Ўзбекистон Республикасининг ривожланиш давлат дастурига киритиш учун тақдим этилган инвестиция лойиҳаларини кўриб чиқишда иштирок этади;

Ўзбекистон Республикасида ҳам чет элларда ҳам ўз мутахассислари ва муҳандисларини ўқитиш ва малакасини оширишни ташкиллаштиради, бунинг учун маҳаллий ва хорижий лойиҳа ва инжиниринг компанияларининг етакчи мутахассисларини жалб этади;

инвестиция лойиҳаларининг лойиҳа (ишчи) ҳужжатларини мустақил ишлаб чиқиш, шунингдек, хорижий лойиҳа ташкилотлар томонидан ишлаб чиқилган лойиҳа (ишчи) ҳужжатларини мослаштириш каби йўналишларни ривожлантиришга қаратилган илғор хорижий тажриба асосидаги лойиҳалаштиришнинг прогрессив методологиясини лойиҳа фаолиятига жорий этади;

обуна бўлинган мунтазам хорижий ва маҳаллий нашрлар ва каталоглар асосида ахборот йиғади ва энергия тежайдиган замонавий ускуналар, технологияларни ишлаб чиқарувчилар ва лицензия берувчилар тўғрисида маълумотлар базасини шакллантиради, илғор технологиялар бозорини таҳлил қилади, кейинчалик уларни иқтисодиёт базавий тармоқларининг объектларини лойиҳалаштиришда қўллайди;

вазирликлар, идоралар, иқтисодиёт базавий тармоқларининг хўжалик бошқаруви органлари буюртмасига кўра инвестиция лойиҳаларининг мустақил техник-иқтисодий экспертизасини амалга оширади, шунингдек, таклиф этилаётган технологияларга мувофиқ асосий технологик ускуналар нархи ҳамда тайёр ҳолда топшириладиган лойиҳалар қийматининг чекланган параметрлари бўйича тавсиялар беради;

қонунчиликка мувофиқ бошқа функцияларни ҳам амалга оширади.

9. Институт қуйидаги ҳуқуқларга эга:

Институт зиммасига юкланган вазифа ва функцияларни бажариш учун вазирликлар, идоралар ва бошқа ташкилотлардан зарур ҳужжатлар, статистик, таҳлилий ҳамда бошқа маълумотларни белгиланган тартибда беғараз асосда сўраб олиш;

лойиҳаолди ва лойиҳа ҳужжатларини ишлаб чиқишда, шунингдек хорижий лойиҳа ташкилотлари томонидан ишлаб чиқилган лойиҳаларни мослаштиришда, истисно тариқасида, айрим турдаги ишларга маҳаллий ихтисослаштирилган лойиҳа ташкилотлари билан тўғридан тўғри субпудрат шартномалари тузиш, шунингдек, институт зиммасига юкланган вазифалар билан боғлиқ ишларни бажариш учун хорижий лойиҳа ва инжиниринг ташкилотлари билан тўғридан тўғри контрактлар тузиш;

ўрнатилган тартибда тасдиқланган техник топшириқларнинг энергия самарадорлиги, лойиҳаларда фойдаланилган технологиялар ва ускуналарнинг замонавийлик талабларига, ишлаб чиқиш учун тақдим этилган лойиҳаолди ҳужжатларнинг параметрлари мос келмаган тақдирда — уларни буюртмачиларга пухта ишлаб чиқиш учун қайтариш;

амалга оширилаётган фаолият доирасида лойиҳа ташкилотлари, вазирликлар, идоралар ҳамда бошқа ташкилотларнинг, жумладан хорижнинг юқори малакали мутахассисларини маслаҳатчи ва экспертлар сифатида жалб этиш;

ўз ходимларини етакчи маҳаллий лойиҳа институтларига ва хорижий инжиниринг компанияларининг ўқув марказларига, шунингдек, уларнинг малакасини ошириш учун ишлаб чиқариш корхоналарига юбориш;

Институт негизида ўз ходимларини ўқитиш ва малакасини ошириш учун, шунингдек, шартнома асосида бошқа ташкилотларнинг мутахассислари учун курслар ташкил қилиш;

иқтисодиёт базавий тармоқларининг инвестициявий инфратузилмавий лойиҳаларини ўз вақтида ва сифатли ишлаб чиқиш, мослаштиришни таъминлаш, шунингдек, лойиҳаолди ҳужжатларини ўз вақтида илгари суриш масалалари бўйича лойиҳа ташкилотларининг иштирокида йиғилишлар ўтказиш;

шартнома асосида маркетинг тадқиқотларини ўтказиш, институт зиммасига юкланган вазифаларни бажариш билан боғлиқ консалтинг хизмати ва бошқа хизматлар кўрсатиш;

стратегик муҳим лойиҳалар бўйича лойиҳаолди ва лойиҳа ҳужжатларини ишлаб чиқиш учун вазирликлар, идоралар ва ташкилотларнинг юқори малакали мутахассисларини жалб этган ҳолда муваққат ишчи гуруҳларни, шу жумладан шартнома асосида тузиш;

белгиланган тартибда ноширлик фаолиятини амалга ошириш, ахборот материаллари, даврий нашрлар ва бошқа босма маҳсулотлар чоп этиш ва тарқатиш;

Ўзбекистон Республикасининг ҳар йилги ривожланиш давлат дастурларини, шунингдек, иқтисодиёт тармоқларини энг яқин ва узоқ муддатли истиқболда ривожлантириш дастурларини шакллантиришда лойиҳаларнинг техник иқтисодий параметрларини кўриб чиқишда иштирок этиш ва уларни келишиб олишда таклифлар киритиш;

консорциумлар ташкил этиш ёки консорциумларда қатнашиш, шунингдек, иқтисодиёт базавий тармоқларининг лойиҳаларини ишлаб чиқиш ва амалга оширишда биргаликда иштирок этиш учун етакчи маҳаллий ва хорижий инжиниринг компаниялари билан қўшма корхоналар ҳамда ўзига қарашли шуъба корхоналар ва филиалларни ташкил этиш;

иқтисодиёт базавий тармоқларининг объектларини лойиҳалаш ва қуриш соҳасида мавжуд норматив базани такомиллаштириш юзасидан таклиф ва тавсиялар киритиш;

зарур ҳолларда, иқтисодиёт базавий тармоқларининг объектларини лойиҳалашда, шунингдек, Ўзбекистон Республикасининг техник тартибга солиш соҳасидаги қурилиш нормалари ва стандартларига мувофиқлаштирмаган ҳолда лойиҳаларни хорижий буюртмачилар ва инвесторларнинг сўровномалари асосида мослаштириш ҳамда Ўзбекистон Республикаси Вазирлар Маҳкамасининг келишувида хорижий ва халқаро стандартлар ва нормативларни қўллаш;

халқаро молия институтлари (кейинги ўринларда — ХМИ) томонидан молиялаштириладиган инвестиция лойиҳаларини амалга ошириш учун маслаҳатчилар сифатида жалб этиладиган компаниялар ва мутахассислар мониторингини амалга ошириш, иқтисодиёт базавий тармоқларида инвестиция лойиҳаларини амалга ошириш қисмида техник иқтисодий асосларни (кейинги ўринларда — ТИА) ишлаб чиқиш ва ҳисоботларни тайёрлаш, бошқариш ва назорат қилиш қоидалари ва талаблари доирасида халқаро маслаҳатчиларни танлаш бўйича хизматлар кўрсатиш;

ТИАни ишлаб чиқиш ва бош пудратчи, консорциум иштирокчиси ёки субпудратчи сифатида ҳисоботларни тайёрлаш бўйича хизматлар кўрсатиш учун халқаро маслаҳатчини аниқлашга тендер савдоларида иштирок этиш;

тендер савдоларини ташкил этиш ва ўтказишда тендер таркиби ва лойиҳа ҳужжатлари бўйича маслаҳатлар бериш;

Институтнинг сифат менежменти тизимини ривожлантириш ва такомиллаштириш, сертификатлаштирувчи органлар томонидан сертификация аудитларини ўтказишга зарур маблағлар ажратиш, маслаҳат ёрдами кўрсатиш учун маслаҳатчиларни жалб этиш, шунингдек, Институт сифат менежменти тизимининг фаолият юритиши ва такомиллаштирилиши учун масъул бўлган ходимларни моддий рағбатлантириш;

ҳар қандай мураккаблик даражасидаги лойиҳа ишларини амалга ошириш учун зарур лицензион дастурлар ва тизимларни, шунингдек, истисно тариқасида, зарур ускуналарни уларнинг тайёрловчилари ёки расмий дилерлари билан тўғридан тўғри шартномалар бўйича харид қилиш;

Институтнинг ривожланишини таъминлаш учун халқаро молия институтлари ва донор ташкилотларнинг грантларини жалб этиш;

ваколатли органлар ва ташкилотлар билан биргаликда меҳнат хавфсизлиги ва уни муҳофаза қилиш бўйича халқаро стандартлар тизимини ва бошқа стандартларни жорий этиш;

ихтисослаштирилган ташкилотлар билан ҳамкорликда анжуманлар, шу жумладан халқаро анжуманларни ташкиллаштириш, шунингдек, Ўзбекистон бозорида ва чет элларда ўз хизматларини илгари суриш мақсадида халқаро анжуманлар, кўргазмалар ва конференцияларда иштирок этиш;

Институт хоналарини белгиланган тартибда ижарага бериш.

10. Институт ўз зиммасига юкланган вазифа ва функцияларнинг самарали бажарилиши юзасидан жавобгар бўлади.

15. Институтнинг ишлаб чиқариш жараёнлари билан банд бўлган асосий таркибий бўлинмалари қуйидагилардан иборат:

лойиҳа бош муҳандислари раҳбарлик қиладиган тармоқ бюролари;

лойиҳа бош архитектори бюроси;

базавий тармоқларни ривожлантириш истиқболлари бўлими;

илмий техникавий ва ахборот-таҳлилий ишланмалар бўлими;

ТИАни баҳолаш бўлими;

ахборот коммуникация технологиялари бўлими;

лойиҳаларни тайёрлаш ва лойиҳа ҳужжатларини экспертизадан ўтказиш мониторинги ва уларни мувофиқлаштириш гуруҳи;

илғор технологиялар ва ускуналарнинг маълумотлар базасини шакллантириш бўйича ахборот-таҳлил бўлими;

танлов савдоларини тайёрлаш ва ўтказиш бўлими;

смета ишлари бўлими;

лойиҳаларни чиқариш бўлими;

молия-шартнома бўлими;

лойиҳаларнинг молиявий-иқтисодий таҳлили бўлими.

Институт ишлаб чиқариш бўлинмалари (бўлимлари) сони ва номланиши мазкур Низом 20-бандининг бешинчи хатбошига мувофиқ ўзгартирилиши мумкин.

Лойиҳа бош муҳандислари ва лойиҳа бош архитекторлари мақомига кўра етакчи бўлим бошлиғига тенглаштирилади

16. Институт фаолияти:

лойиҳаолди ва лойиҳа ҳужжатларини ишлаб чиқишга, лойиҳа қидирув ишларини амалга оширишга ва лойиҳалар амалга оширилишини техник кузатишга шартнома асосида ажратилган инвестициявий ва инфратузилмавий лойиҳалар буюртмачиларининг маблағлари;

Институт томонидан қонунчиликка мувофиқ ўз фаолият билан олинган даромадлар;

халқаро молия институтлари ва донор ташкилотларнинг грантлари ҳисобидан молиялаштирилади.

17. Ўзбекистон Республикаси Вазирлар Маҳкамасининг 1996 йил 12 апрелдаги «Давлат ҳокимияти ва бошқаруви органлари, суд органлари ва нотариал конторалар ходимлари меҳнатига ҳақ тўлаш бўйича тариф сеткасини жорий этиш тўғрисида»ги 147-сон қарорининг 4-иловасига мувофиқ Ўзбекистон Республикаси давлат бошқаруви органлари ходимлари учун белгиланган меҳнатга ҳақ тўлаш шартлари Институт ходимларига жорий этилади.

18. Солиқлар ва бошқа мажбурий тўловлар тўлангандан кейин қолган фойда Институт ихтиёрида қолади ва у қуйидаги мақсадларга мутаносиб равишда йўналтирилади:

40 фоизи — Институтнинг моддий-техника базасини мустаҳкамлашга;

50 фоизи — Институтнинг ижтимоий ривожланиш ва ходимларни моддий рағбатлантириш жамғармасини шакллантиришга;

10 фоизи — захира жамғармасини шакллантиришга.

19. Институтга директор раҳбарлик қилади.

Институт директори Вазирлар Маҳкамасининг Инвестициялар, инновацион ривожланиш, эркин иқтисодий ва кичик саноат зоналари фаолиятини мувофиқлаштириш масалалари комплекси раҳбарининг тақдимномасига биноан Вазирлар Маҳкамаси томонидан лавозимга тайинланади ва ундан озод қилинади.

Институт директорининг ўринбосарлари Институт директорининг тақдимномасига биноан Вазирлар Маҳкамаси томонидан лавозимга тайинланадилар ва ундан озод қилинадилар.

Институт директори мақомига кўра вазир ўринбосарига тенглаштирилади.

20. Институт директори:

Институт фаолиятига умумий раҳбарликни амалга оширади ҳамда Институт зиммасига юкланган вазифа ва функцияларининг бажарилиши юзасидан шахсан жавобгар ҳисобланади;

Институт номидан ишончномасиз ҳаракат қилади, шу жумладан унинг манфаатларини ҳимоя қилади ва Ўзбекистон Республикасининг барча ташкилотларида ва ундан ташқарида битимлар тузади;

Институт номидан учинчи шахслар билан битим ва шартномалар тузади;

Ўзбекистон Республикаси Вазирлар Маҳкамасининг Инвестициялар, инновацион ривожланиш, эркин иқтисодий ва кичик саноат зоналари фаолиятини мувофиқлаштириш масалалари комплекси раҳбари билан келишган ҳолда, зарурат бўлганда, Институт ходимлари сони ва тузилмасига ўзгартиришлар киритади;

Ўзбекистон Республикаси Вазирлар Маҳкамасининг Инвестициялар, инновацион ривожланиш, эркин иқтисодий ва кичик саноат зоналари фаолиятини мувофиқлаштириш масалалари комплекси раҳбари билан келишган ҳолда сўнгги ҳисобот давридаги бухгалтерия ҳисоботининг маълумотлари асосида аниқлаштириладиган Институт жами мулки қийматининг 25 ва ундан кўпроқ фоизи миқдорига тенг суммада битимлар тузиш тўғрисида қарор қабул қилади;

сўнгги ҳисобот давридаги бухгалтерия ҳисоботининг маълумотлари асосида аниқлаштириладиган Институт жами мулки қийматининг 25 фоиздан камроқ миқдорига тенг суммада битимлар тузиш тўғрисида қарор қабул қилади;

Институт асосий воситалари ва товар-моддий бойликлари қийматини балансдан чиқариш тўғрисида қарор қабул қилади;

«ЎзИнжиниринг» РЛИнинг штат жадвалини мустақил равишда тасдиқлайди ва белгиланган ходимлар умумий сони доирасида унга ўзгартиришлар киритади;

Институтнинг харажатлар сметасини тасдиқлайди;

Институт таркибий бўлинмалари тўғрисидаги низомни тасдиқлайди.

Институт ходимларининг лавозим мажбуриятларини тасдиқлайди;

Институт ходимларига юксак малака, профессионализм ва иш сифати учун ҳар ойлик ва ҳар чораклик устамалар, бирйўла бериладиган, шу жумладан лойиҳаолди ва лойиҳа ишлари юқори сифат билан ўтказилганлиги учун мукофотлар белгилайди, шунингдек, амалдаги қонунчиликка мувофиқ Институт қайта ташкил этилган пайтда илгари амал қилиб келган устамалар (рағбатлантириш коэффиценти)ни сақлаб қолади, бу устамалар Институт даромадлари доирасида тўлаб борилади, шунингдек, ходимлар томонидан ўзларига топширилган вазифаларни бажариш натижадорлигини ҳисобга олган ҳолда уларни қайта кўриб чиқади;

лойиҳаолди ва лойиҳа ҳужжатларини ишлаб чиқиш бўйича тузилган шартномаларга мувофиқ зарур мутахассислар кесимида ишлаб чиқариш ходимларини шартнома асосида талаб этиладиган миқдорда қўшимча жалб этади;

Институт ходимларини белгиланган тартибда лавозимга тайинлайди ва ундан озод қилади;

ўз ваколати доирасида Институт ходимлари томонидан бажарилиш мажбурий бўлган буйруқ ва фармойишлар чиқаради, кўрсатмалар беради;

директор қонунчиликка мувофиқ бошқа ваколатларни ҳам амалга оширади.

21. Институтни қайта ташкил этиш ва тугатиш қонунчиликда белгиланган тартибда амалга оширилади.