Ишлаб чиқариш қувватларидан янада тўлиқ фойдаланиш ва янги корхоналар қурилиши ҳисобига маҳсулот ишлаб чиқариш ҳажмлари узлуксиз ўсиб бораётган шароитларда республиканинг ривожланаётган халқ хўжалигини электр энергияси билан таъминлашнинг ишончлилигини ошириш мақсадида Вазирлар Маҳкамаси қарор қилади:

1. Ўзбекистон Республикаси Энергетика ва электрлаштириш вазирлигининг 800 минг кВт қувватга эга бўлган Толимаржон ГРЭСининг 1-энергия блокида қурилиш-монтаж ишларини 1998 йилда тугаллаш ва ишга тушириш-созлаш ишларини 1999 йилнинг II чорагида бажариш тўғрисидаги таклифи қабул қилинсин.

2. Ўзбекистон Республикаси Энергетика ва электрлаштириш вазирлиги 1-энергия блокини монтаж қилиш ва ишга тушириш-созлаш ишларининг тугалланишини таъминловчи ишга тушириладиган комплекснинг 1-иловага* мувофиқ қурилаётган объектларини асбоб-ускуналар, қурилиш конструкциялари ва материаллари билан бутлаш тадбирларини ва йириклаштирилган жадвалларини бир ой муддатда ишлаб чиқсин ва тасдиқласин.

3. Ўзбекистон Республикаси Ташқи иқтисодий алоқалар вазирлиги Ўзбекистон Республикаси Энергетика ва электрлаштириш вазирлигининг ваколатли ташкилотлари томонидан тақдим этиладиган контрактлар ва шартномаларнинг белгиланган тартибда тезкорлик билан кўриб чиқилишини ва рўйхатдан ўтказилишини таъминласин.

4. Ўзбекистон Республикаси Энергетика ва электрлаштириш вазирлигига унинг монтаж ва ишга тушириш-созлаш ишлари, мураккаб технология асбоб-ускуналарини тафтиш қилиш ва модернизациялаш, Толимаржон ГРЭС 1-энергия блокини ишга тушириш ва фойдаланиш режимини ишлаб чиқишда қатнашиш, маҳаллий ходимларни ўқитиш ва тайёрлаш учун қуввати 800 минг кВт бўлган блокларда ишлаш тажрибасига эга бўлган ихтисослаштирилган ташкилотларни юқори малакали ходимлари билан биргаликда МДҲ мамлакатларидан контрактлар бўйича тендер асосида жалб қилишга, шунингдек станция ходимларини стажировкадан ўтказиш ва ўқитиш учун МДҲ мамлакатларининг худди шундай станцияларига юборишига рухсат этилсин.

5. Толимаржон ГРЭСининг 1-энергия блоки қурилиши ишларини мувофиқлаштириш учун 2-иловага* мувофиқ таркибда Республика штаби ташкил этилсин. Республика штаби Толимаржон ГРЭСида ишларни бажариш учун республика корхоналари ва ташкилотларини, улар қайси идорага бўйсунишидан қатъи назар жалб этсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И. Х. Жўрабеков зиммасига юклансин.