Respublika aholisining salomatligini va oilaning tinchligini mustahkamlash maqsadida Vazirlar Mahkamasi qaror qiladi:

1. “Sogʻlom avlod uchun” jamgʻarmasi, Oʻzbekiston Respublikasi Sogʻliqni saqlash vazirligi va “Ekosan” jamgʻarmasining yosh avlodni sogʻlomlashtirish muammolarini kompleks hal etish toʻgʻrisidagi takliflari qoʻllab quvvatlansin.

Oʻzbekiston Respublikasining yosh avlodni sogʻlomlashtirish dasturi ilovaga* muvofiq tasdiqlansin.

2. “Sogʻlom avlod uchun” jamgʻarmasi va Oʻzbekiston Respublikasi Sogʻliqni saqlash vazirligiga yosh avlodni sogʻlomlashtirish dasturini roʻyobga chiqarishni muvofiqlashtirish va nazorat qilish funksiyasi yuklatilsin.

3. Sogʻliqni saqlash vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari homiladorlarga tibbiy yordam koʻrsatuvchi va bolalar obyektlari ustunlik bilan qurilishini nazarda tutsinlar, ular qurilishini, odatda, mavjud koʻp ixtisosli viloyat, shahar va tuman markaziy kasalxonalari negizida amalga oshirsinlar. “Oʻzistiqbolstat” davlat qoʻmitasi tegishli limitlar ajratishni nazarda tutsin.

4. Sogʻliqni saqlash vazirligi, “Sogʻlom avlod uchun” jamgʻarmasi, Qizil Yarim oy jamiyati Qoraqalpogʻiston Respublikasi Vazirlar Kengashi, viloyatlar va tumanlar hokimliklari bilan birgalikda sogʻliqni saqlash birlamchi boʻgʻinlari (feldsherlik-akusherlik punktlari, qishloq davolash ambulatoriyalari, qishloq uchastka kasalxonalari) negizida homiladorlarga va kichik yoshdagi bolalarga tibbiy-ijtimoiy yordam koʻrsatish boʻyicha doimiy ishlovchi guruhlar tashkil etsinlar.

5. Din ishlari qoʻmitasi xotin-qizlarga eʼtiborning muhimligi, oilani oqilona tashkil etish, goʻdak bolalarni ona suti bilan oziqlantirish, boʻlajak onalar va yosh avlodning salomatligi uchun ota-onalar va jamiyatning masʼuliyati toʻgʻrisida tushuntirish ishlari olib borish yoʻli bilan yosh avlodni sogʻlomlashtirish dasturini roʻyobga chiqarishda diniy tashkilotlarning hamkorligini taʼminlasin.

6. Xalq taʼlimi vazirligi, Oliy va oʻrta maxsus taʼlim vazirligi Sogʻliqni saqlash vazirligi bilan birgalikda umumiy taʼlim maktablari yuqori sinflarining, oʻrta maxsus va oliy oʻquv yurtlarining oʻquv dasturlariga oʻsmirlar gigiyenasini, oʻgʻil va qiz bolalar organizmi rivojlanishining anatomo – fiziologik xususiyatlarini oʻrganish masalalarini joriy etsinlar. Tegishli darsliklar va qoʻllanmalar bilan taʼminlasinlar.

7. Vazirliklar, davlat qoʻmitalari, idoralar, Qoraqalpogʻiston Respublikasi, Vazirlar Kengashi, viloyatlar va Toshkent shahar hokimliklari, jamoat jamgʻarmalari, mulkchilik shaklidan qati nazar, korxonalar, yosh avlodni sogʻlomlashtirish dasturini roʻyobga chiqarishga koʻmaklashsinlar.

8. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining ijtimoiy masalalar, Fan va madaniyat majmuiga yuklatilsin.