“O‘zbekiston Respublikasining davlat mustaqilligi asoslari to‘g‘risida”gi Qonunga muvofiq va astronomiya sohasidagi ilmiy tadqiqotlarni yanada rivojlantirish, xalqaro aloqalarni kengaytirish, shuningdek baland tog‘dagi astronomiya observatoriyalaridan samarali foydalanish maqsadida:

1. Qashqadaryo viloyati hududida joylashgan baland tog‘dagi astronomiya observatoriyalari va ularga xizmat ko‘rsatuvchi komplekslar ilovaga muvofiq O‘zbekiston Respublikasining huquqiy tasarrufiga olinsin.

2. Huquqiy tasarrufga olingan astronomiya inshootlariga rahbarlik qilish O‘zbekiston Respublikasi Fanlar akademiyasi zimmasiga yuklansin. Ularning ishini tashkil etish uchun O‘zbekiston Respublikasi Fanlar akademiyasining Mirzo Ulug‘bek nomli Astronomiya instituti tarkibida baland tog‘dagi astronomiya observatoriyalarining Kitob kompleksi tashkil etilsin.

3. O‘zbekiston Respublikasi Fanlar akademiyasi, Mirzo Ulug‘bek nomli Astronomiya instituti o‘n kun muddat ichida ushbu Farmonda ko‘rsatilgan baland tog‘da joylashgan astronomiya observatoriyalarini va ularga xizmat ko‘rsatuvchi komplekslarni 1993-yilning 1-yanvarigacha bo‘lgan holatda barcha binolari, inshootlari, shtatlari, teleskoplari, asbob-uskunalari, texnikasi, moddiy-texnikaviy va boshqa mulklari bilan birgalikda qabul qilib olsin.

4. Quyidagilar baland tog‘dagi astronomiya observatoriyalari Kitob kompleksi faoliyatining asosiy vazifalari va yo‘nalishlari qilib belgilansin:

astronomiya fanini yanada rivojlantirish, uning moddiy bazasini takomillashtirish, qulay astronomik va iqlim sharoitlaridan samarali foydalanish;

yulduzlar fizikasi va evolyutsiyasini, jahon miqyosidagi va mintaqaviy geodinamik jarayonlarni tadqiq etish, zilzilalar to‘g‘risidagi taxminlarni oldindan aniqlash, fundamental fanlarni rivojlantirish manfaatlarini ko‘zlab boshqa sayyoralarni o‘rganish;

astronomiya fani va texnologiyasi yutuqlarini xalq xo‘jaligi, fan va ta’limning turli tarmoqlariga joriy etish;

xalqaro hamkorlikni kengaytirish, tijorat faoliyatini rivojlantirish;

astronomiya sohasida kadrlar tayyorlash.

5. O‘zbekiston Respublikasi Fanlar akademiyasi, O‘zbekiston Respublikasi Fan va texnika davlat qo‘mitasi, O‘zbekiston kosmik tadqiqotlar davlat agentligi boshqa manfaatdor vazirliklar va idoralar bilan birgalikda ikki oy muddat ichida xalqaro aloqalarni saqlab qolish va kengaytirishni hisobga olib astronomiya sohasida fundamental va amaliy tadqiqotlarni yanada rivojlantirishning ilmiy-texnikaviy dasturini ishlab chiqsinlar va tasdiqlasinlar.

6. O‘zbekiston Respublikasi Moliya vazirligi huquqiy tasarrufga olingan baland tog‘dagi astronomiya observatoriyalarining Kitob kompleksini mablag‘ bilan ta’minlasin, buning uchun moliyaviy ta’minotning mavjud me’yorlariga amal qilib hamda ana shu observatoriyalar va ularga xizmat ko‘rsatuvchi komplekslar soni va xarajatlar smetasi 70 foiz qisqartirilishini nazarda tutib, qo‘shimcha mablag‘ ajratsin.

7. O‘zbekiston Respublikasi Vazirlar Mahkamasi bir oy muddat ichida baland tog‘dagi astronomiya observatoriyalari Kitob kompleksi ishini tashkil etishga oid qaror qabul qilsin.