Oʻzbekiston Respublikasi Vazirlar Mahkamasining

qarori

Yoshlarning oʻquv markazlarida xorijiy tillarni oʻqish xarajatlari uchun subsidiya ajratish hamda oʻquv markazlarini ragʻbatlantirish chora-tadbirlari toʻgʻrisida

Oʻzbekiston Respublikasi Prezidentining “Oʻzbekiston Respublikasi Prezidentining yoshlar bilan ochiq muloqotida belgilangan vazifalarni amalga oshirishga doir chora-tadbirlar toʻgʻrisida” 2025-yil 26-martdagi PF-61-son Farmoni va “Yoshlarni xorijiy tillarga oʻqitish tizimi samaradorligini oshirish boʻyicha qoʻshimcha chora-tadbirlar toʻgʻrisida” 2024-yil 27-iyundagi PQ-239-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Yoshlarning oʻquv markazlarida xorijiy tillarni oʻqish xarajatlari bir qismi uchun subsidiya ajratish tartibi toʻgʻrisidagi nizom 1-ilovaga muvofiq;

Oʻquv markazlari reytingini shakllantirish va reyting asosida oʻquv markazlarini ragʻbatlantirish tartibi toʻgʻrisidagi nizom 2-ilovaga muvofiq tasdiqlansin.

2. Belgilansinki, Oʻzbekiston Respublikasi Yoshlar ishlari agentligi tomonidan 2025 — 2030-yillarda 100 ming nafargacha yoshlarning oʻquv markazlarida xorijiy tillarni oʻqish xarajatlari uchun subsidiya ajratiladi.

3. Oʻzbekiston Respublikasi Yoshlar ishlari agentligi, “Oʻzbekiston Respublikasi Prezidentining 5 ta tashabbusi loyiha ofisi” nodavlat notijorat tashkiloti tomonidan oʻquv markazlari haqida maʼlumotlar yuritiladigan “yonda.uz” elektron platformasi va uning mobil ilovasi (keyingi oʻrinlarda — elektron platforma) yaratilgani maʼlumot uchun qabul qilinsin.

4. Oʻzbekiston Respublikasi Yoshlar ishlari agentligi Yoshlarga oid davlat siyosatini qoʻllab-quvvatlash jamgʻarmasiga ajratilgan mablagʻlar doirasida elektron platforma orqali quyidagi imkoniyatlarni yaratsin hamda elektron platformaning doimiy ish faoliyatida boʻlishini taʼminlasin:

oʻquv markazlarida yoshlarning xorijiy tillarni oʻrganish uchun oʻquv mashgʻulotida qatnashishini qayd etib borish;

oʻqish xarajati uchun toʻlovlarni onlayn toʻlov tizimlari orqali amalga oshirish;

oʻquv markazlari reytingini shakllantirish va eʼlon qilish.

5. Oʻzbekiston Respublikasi Yoshlar ishlari agentligi Raqamli texnologiyalar vazirligi bilan birgalikda ikki oy muddatda “Raqamli hukumat” tizimi idoralararo integratsiyalashuv platformasi orqali:

Oliy taʼlim, fan va innovatsiyalar vazirligi huzuridagi Bilim va malakalarni baholash agentligining “Milliy sertifikatlar” elektron platformasini;

Soliq qoʻmitasining “Tadbirkorlarning barqarorlik reytingi” hamda “Ijara shartnomalarini hisobga qoʻyish” elektron platformalarini;

Kambagʻallikni qisqartirish va bandlik vazirligining “Yagona milliy mehnat tizimi” idoralararo dasturiy-apparat kompleksini;

Adliya vazirligining “Litsenziya” axborot tizimini belgilangan tartibda elektron platformaga integratsiya qilish choralarini koʻrsin.

6. Vazirlar Mahkamasining “Xalqaro imtihon tizimlari boʻyicha yuqori ball (daraja) toʻplagan yoshlarga oʻqish va imtihon topshirish xarajatlarini toʻliq qoplab berish tartibini joriy etish toʻgʻrisida” 2021-yil 13-apreldagi 209-son qaroriga 3-ilovaga muvofiq oʻzgartirishlar va qoʻshimcha kiritilsin.

7. Oʻzbekiston Respublikasi Yoshlar ishlari agentligi manfaatdor vazirlik va idoralar bilan birgalikda 2026-yil 1-avgustga qadar ushbu qarorga muvofiq joriy etiladigan yoshlarning xorijiy tillarni oʻqish xarajatlari uchun subsidiya ajratish hamda oʻquv markazlarini ragʻbatlantirish bilan bogʻliq jarayonlarni puxta tahlil qilgan holda, uni takomillashtirish yuzasidan asoslangan takliflarni Vazirlar Mahkamasiga kiritsin.

8. Ushbu qarorning bajarilishini nazorat qilish Oʻzbekiston Respublikasi Yoshlar ishlari agentligi direktori A.Z. Saʼdullayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 8-oktabr,

632-son

Vazirlar Mahkamasining 2025-yil 8-oktabrdagi 632-son qaroriga
1-ILOVA

Yoshlarning oʻquv markazlarida xorijiy tillarni oʻqish xarajatlari bir qismi uchun subsidiya ajratish tartibi toʻgʻrisida

NIZOM

1-bob. Umumiy qoidalar

1. Ushbu Nizom xorijiy tillar (ingliz, nemis, fransuz, yapon, koreys va xitoy tili)ni oʻrganayotgan yoshlarning nodavlat taʼlim tashkilotlarida oflayn shaklda amalga oshiriladigan oʻqish xarajatlarining bir qismi uchun subsidiya ajratish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

ariza beruvchi — xorijiy tillarni oʻqish xarajati uchun subsidiya olish istagidagi oʻn toʻrt yoshga toʻlgan va oʻttiz yoshdan oshmagan Oʻzbekiston Respublikasi fuqarolari yoki fuqaroligi boʻlmagan shaxslar;

“2+6” dasturi — ushbu Nizomga 1-ilovada belgilangan xorijiy tillarni bilish boʻyicha ballning (darajaning) kamida minimal koʻrsatkichli sertifikatiga ega boʻlgan ariza beruvchi oʻquv markazi tomonidan unga xorijiy tilni oʻqitish xizmatini koʻrsatgani uchun dastlabki ikki oy uchun oʻqish xarajatini oʻz hisobidan toʻlaganda, keyingi olti oygacha oʻqish xarajati uchun Oʻzbekiston Respublikasi Yoshlar ishlari agentligi (keyingi oʻrinlarda — Yoshlar ishlari agentligi)ning Yoshlarga oid davlat siyosatini qoʻllab-quvvatlash jamgʻarmasiga ajratilgan mablagʻlar doirasida subsidiya ajratilishini nazarda tutuvchi dastur;

davomat — oʻquv markazlarida tahsil olayotgan yoshlarning darslarga qatnashganini kunlik elektron nazorat qilish tizimi;

sertifikat — ushbu Nizomga 1-ilovadagi xorijiy tillarni bilish darajasini belgilovchi, maxsus seriya raqamiga ega hujjat;

oʻquv markazi — Oʻzbekiston Respublikasi hududida belgilangan tartibda davlat roʻyxatidan oʻtkazilgan holda xorijiy tillarni oʻqitish faoliyatini amalga oshiruvchi nodavlat taʼlim tashkiloti;

oʻqish xarajati — oʻquv markaziga ariza beruvchini xorijiy tilga oʻqitish xizmatini koʻrsatganlik uchun toʻlanadigan toʻlov;

elektron platforma — ariza beruvchilarning oʻquv markazlarida xorijiy tilni oʻrganish uchun oʻquv mashgʻulotida qatnashishini qayd etib boruvchi, ularning xorijiy tilni oʻqish xarajati uchun subsidiya ajratiladigan oʻquv markazlari roʻyxati, shuningdek, ushbu oʻquv markazlari reytingi eʼlon qilib boriladigan elektron platforma va uning mobil ilovasi.

3. “2+6” dasturiga muvofiq yoshlarga har oy yakuni boʻyicha quyidagi miqdorda subsidiya ajratiladi:

Toshkent shahrida — bazaviy hisoblash miqdorining 2 baravarigacha;

Qoraqalpogʻiston Respublikasi va viloyatlar markazlarida — bazaviy hisoblash miqdorining 1,5 baravarigacha;

tuman (shahar)larda — bazaviy hisoblash miqdorining 1 baravarigacha.

4. Yoshlar ishlari agentligi tomonidan 2025-2026-yillarda oʻquv markazlarida xorijiy tillarni oʻrganadigan 20 ming nafargacha, 2031-yilga qadar har yili 20 ming nafargacha yoshlarga oʻqish xarajatlari uchun subsidiya ajratiladi.

Bunda tegishli yilda subsidiya ajratilgan yoshlar soni 20 ming nafardan oshgan taqdirda, oʻsha yil uchun subsidiya ajratish keyingi yilga qadar toʻxtatiladi.

5. Ariza beruvchiga quyidagi davlat ijtimoiy yordamlari doirasida muqaddam xorijiy tilni oʻrganish uchun mablagʻ ajratilgan boʻlsa, ushbu ariza beruvchiga “2+6” dasturi doirasida aynan shu xorijiy tilni oʻrganish xarajati uchun subsidiya ajratish rad etiladi:

Vazirlar Mahkamasining “Xalqaro imtihon tizimlari boʻyicha yuqori ball (daraja) toʻplagan yoshlarga oʻqish va imtihon topshirish xarajatlarini toʻliq qoplab berish tartibini joriy etish toʻgʻrisida” 2021-yil 13-apreldagi 209-son qaroriga muvofiq ariza beruvchiga ushbu xorijiy til boʻyicha imtihon topshirish xarajatlari qoplab berilgan boʻlsa;

Vazirlar Mahkamasining “Yoshlar muammolarini oʻrganish va hal etish tizimini yanada takomillashtirish chora-tadbirlari toʻgʻrisida” 2022-yil 7-iyundagi 312-son qaroriga muvofiq ariza beruvchiga xorijiy tilni oʻqish xarajati uchun “Yoshlar daftari” jamgʻarmasi hisobidan subsidiya ajratilgan boʻlsa.

6. Ushbu Nizomga muvofiq ariza beruvchilarga faqat bitta xorijiy tilni oʻqish xarajati uchun subsidiya ajratiladi.

2-bob. Yoshlarning xorijiy tillarni oʻqish xarajati uchun subsidiya ajratiladigan oʻquv markazlari roʻyxatini shakllantirish

7. Ariza beruvchilarning xorijiy tilni oʻqish xarajati uchun:

oʻquv markazlarining reytingini shakllantirish uchun belgilangan tartibda elektron platforma orqali roʻyxatdan oʻtgan;

ariza beruvchilarning oʻquv mashgʻulotlarida qatnashganini kunlik elektron nazorat qilish imkonini beruvchi elektron platformaga integratsiya qilingan oʻquv markazlariga “2+6” dasturi doirasida subsidiya ajratiladi.

8. Ariza beruvchilarning xorijiy tilni oʻqish xarajati uchun subsidiya ajratiladigan oʻquv markazlari roʻyxati Yoshlar ishlari agentligi tomonidan shakllantiriladi va elektron platforma orqali eʼlon qilib boriladi.

9. Ushbu roʻyxatga kiritish uchun oʻquv markazlari elektron platforma orqali Yoshlar ishlari agentligiga quyidagi hujjatlarni yuboradi:

nodavlat taʼlim xizmatlarini koʻrsatish faoliyati boʻyicha litsenziya yoki xabarnoma qabul qilingani toʻgʻrisidagi tasdiqnoma (integratsiyalashgan axborot tizimlari orqali);

xorijiy tilni oʻqitish uchun mulk huquqi yoki ijara huquqi asosida faoliyat yuritishi (bino yoki xonaning kadastr raqami) toʻgʻrisidagi maʼlumotlar (pdf formatda);

oʻquv markazida xorijiy tilni oʻqitish faoliyatini amalga oshiruvchi kamida “B2” darajadagi yoki unga tenglashtirilgan darajadagi milliy yoxud xalqaro sertifikatga ega boʻlgan oʻqituvchilar, shuningdek, tahsil olayotgan oʻquvchilari haqidagi maʼlumotlar (pdf formatda);

xorijiy tilni oʻqitish faoliyatini amalga oshirishda foydalaniladigan oʻquv xonalari, jihozlari va inventarlar (nomi va soni) toʻgʻrisida maʼlumot (pdf formatda).

10. Oʻquv markazi tomonidan yuborilgan hujjatlar va maʼlumotlar ushbu Nizomning 7 va 9-bandlariga muvofiq boʻlgan taqdirda, Yoshlar ishlari agentligi elektron platforma orqali oʻquv markaziga bu haqida xabarnoma yuboradi.

11. Oʻquv markazining oʻquvchilar davomatini kunlik nazorat qilish tizimi elektron platforma bilan integratsiya qilinib, oʻquv markazi tomonidan ommaviy oferta shartlari qabul qilingandan soʻng ushbu oʻquv markazi ariza beruvchilarni xorijiy tilga oʻqitish xarajati uchun subsidiya ajratiladigan oʻquv markazlari roʻyxatiga kiritiladi.

3-bob. Yoshlarning xorijiy tillarni oʻqish xarajati uchun subsidiya ajratish tartibi

12. Oʻquv markazlarida yoshlarning xorijiy tillarni oʻqish xarajati uchun subsidiya ushbu Nizomga 2-ilovadagi sxemaga muvofiq ajratiladi.

13. Ariza beruvchi oʻz xohishiga koʻra yagona identifikatsiya tizimi (One ID) orqali elektron platformaga kirib, avtorizatsiyadan oʻtadi va sertifikatni yuboradi.

Bunda ushbu sertifikatni u berilgan sanadan boshlab bir kalendar yil ichida yuborish talab etiladi, ushbu muddat oʻtgandan soʻng yuborilganda “2+6” dasturi doirasida oʻqish xarajati uchun subsidiya ajratilishi rad etiladi.

14. Sertifikat ushbu Nizomga 1-ilovadagi roʻyxatga muvofiq boʻlganda, uning haqiqiyligi tasdiqlanganda va ushbu Nizomda belgilangan muddatda yuborilganda, ariza beruvchi xorijiy tilni oʻqitish faoliyatini amalga oshiruvchi oʻquv markazlaridan birini va unda faoliyat yurituvchi oʻqituvchini ixtiyoriy ravishda tanlaydi va oʻzi oʻrganishni istagan xorijiy tilning nomi, xorijiy tilni oʻrganish vaqti va umumiy muddatini belgilab, xorijiy tilni oʻqitish xizmatini koʻrsatish haqidagi shartnomani (keyingi oʻrinlarda — shartnoma) bir tomonlama imzolaydi.

15. Ariza beruvchining taklifi oʻquv markazi tomonidan maʼqullanganda, oʻquv markazi yetti kun ichida shartnomani imzolaydi.

16. Ariza beruvchining xorijiy tilni oʻrganish uchun oʻquv mashgʻulotiga qatnashishi elektron platformada qayd etib boriladi.

Bunda ariza beruvchi dastlabki ikki oy davomida xorijiy tilni oʻqish xarajatini oʻz hisobidan elektron platforma orqali oʻquv markazining tegishli bank hisobvaragʻiga toʻlaganda, uning keyingi olti oygacha boʻlgan oʻqish xarajati oʻquv markazi tomonidan elektron platforma orqali yuborilgan hisob-fakturaga asosan, ariza beruvchining davomatiga mutanosib ravishda Yoshlar ishlari agentligining Yoshlarga oid davlat siyosatini qoʻllab-quvvatlash jamgʻarmasiga ajratilgan mablagʻlar doirasida oʻquv markazining tegishli bank hisobvaragʻiga shartnomada belgilangan muddatlarda oʻtkazib boriladi.

Ushbu toʻlovlarning amalga oshirilgani haqida ariza beruvchining elektron platformadagi shaxsiy kabinetiga xabarnoma yuboriladi.

4-bob. Yakunlovchi qoidalar

17. Ariza beruvchi ushbu Nizom talablari ijrosiga masʼul davlat organlari va boshqa tashkilotlar xodimlarining xatti-harakatlari (harakatsizligi) yuzasidan qonunchilik hujjatlarida belgilangan tartibda shikoyat qilishi mumkin.

18. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Yoshlarning oʻquv markazlarida xorijiy tillarni oʻqish xarajatlari bir qismi uchun subsidiya ajratish tartibi toʻgʻrisidagi nizomga
1-ILOVA

Yoshlarning “2+6” dasturi doirasida oʻquv markazlarida xorijiy tillarni oʻqish xarajatiga subsidiya ajratilishi uchun ushbu yoshlar tomonidan taqdim etiladigan sertifikatlar

ROʻYXATI

T/r	Sertifikatlar nomi	Muvofiqlik darajalari						Oʻqish xarajati qoplanishi uchun lozim boʻlgan ballning (darajaning) minimal koʻrsatkichi
		Common European Framework of Reference (CEFR) shkalasi boʻyicha
		A1	A2	B1	B2	C1	C2
I. Ingliz tili
1.	Chet tilini bilish darajasini aniqlash boʻyicha milliy sertifikat (Bilim va malakalarni baholash agentligi)			B1	B2	C1		B1
2.	International English Language Testing System — IELTS	2.0	3.0	4.0-5.0	5.5-6.5	7.0-8.0	8.5-9.0	4.0-5.0
3.	Cambridge Assessment English (KET, PET, FCE, CAE, CPE)		KET 120 — 139	PET 140 — 159	FCE 160 — 179	CAE 180 — 199	CPE 200 — 220	PET 140 — 159
4.	Cambridge Assessment English Linguaskill	A1	A2	B1	B2	C1		B1
5.	International Test of English Proficiency iTEP Academic — Plus	A1	A2	B1	B2	C1	C2	B1
6.	“Ibrat farzandlari” loyihasining maxsus sertifikati	A1	A2	B1	B2			B2
II. Fransuz tili
7.	Chet tilini bilish darajasini aniqlash boʻyicha milliy sertifikat (Bilim va malakalarni baholash agentligi)			B1	B2	C1		B1
8.	Diplôme dʼEtudes en Langue Française (DELF)			B1	B2			B1
9.	Test de Connaissance du Français (TCF)	A1	A2	B1	B2	C1	C2	B1
10.	“Ibrat farzandlari” loyihasining maxsus sertifikati	A1	A2	B1	B2			B1
III. Nemis tili
11.	Chet tilini bilish darajasini aniqlash boʻyicha milliy sertifikat (Bilim va malakalarni baholash agentligi)			B1	B2	C1		B1
12.	Goethe-Zertifikat	A1	A2	B1	B2	C1	C2	B1
13.	Test Deutsch als Fremdsprache (Test DAF)				TDN 3 (B2.1), TDN 4 (B2.2 — C1.1)	TDN 5 (C1.2)		TDN 3
14.	“Ibrat farzandlari” loyihasining maxsus sertifikati	A1	A2	B1	B2			B1
IV. Xitoy tili
15.	Chet tilini bilish darajasini aniqlash boʻyicha milliy sertifikat (Bilim va malakalarni baholash agentligi)			B1	B2	C1		B1
16.	Hanyu Shuiping Kaoshi (HSK)			HSK 3	HSK 4	HSK 5	HSK 6	HSK 3
17.	“Ibrat farzandlari” loyihasining maxsus sertifikati	A1	A2	B1	B2			B1
V. Yapon tili
18.	Chet tilini bilish darajasini aniqlash boʻyicha milliy sertifikat (Bilim va malakalarni baholash agentligi)			B1	B2	C1		B1
19.	Japanese-Language Proficiency Test (JLPT)		N5	N4	N3	N2	N1	N4
20.	“Ibrat farzandlari” loyihasining maxsus sertifikati	A1	A2	B1	B2			B1
VI. Koreys tili
21.	Chet tilini bilish darajasini aniqlash boʻyicha milliy sertifikat (Bilim va malakalarni baholash agentligi)			B1	B2	C1		B1
22.	Test of Proficiency in Korean (TOPIK II)			Level 3 120 — 149	Level 4 150 — 189	Level 5 190 — 229	Level 6 230 — 300	Level 3 120 — 149
23.	“Ibrat farzandlari” loyihasining maxsus sertifikati	A1	A2	B1	B2			B1

Yoshlarning oʻquv markazlarida xorijiy tillarni oʻqish xarajatlari bir qismi uchun subsidiya ajratish tartibi toʻgʻrisidagi nizomga
2-ILOVA

Yoshlarning oʻquv markazlarida xorijiy tillarni oʻqish xarajatlari bir qismi uchun subsidiya ajratish

SXEMASI

Bosqichlar	Subyektlar	Tadbirlar	Bajarish muddati
Bosqichlar	Subyektlar	Tadbirlar	Bajarish muddati

1-bosqich	Oʻquv markazi	Ariza beruvchilarning xorijiy tilni oʻqish xarajati uchun subsidiya ajratiladigan oʻquv markazlari roʻyxatiga kiritishni soʻrab elektron platforma orqali ariza yuboradi.	Oʻz xohishiga koʻra

2-bosqich	Yoshlar ishlari agentligi	Ariza qoldirgan oʻquv markazlari tomonidan taqdim etilgan hujjatlarni oʻrganib, belgilangan talablarga muvofiq deb topilgan oʻquv markazlariga oʻquvchilarining oʻquv mashgʻulotlarida qatnashganini kunlik nazorat qilish imkonini beruvchi elektron tizimini Yoshlar ishlari agentligining elektron platformasiga integratsiya qilinganidan soʻng oʻqish xarajati uchun subsidiya ajratilishi haqida xabarnoma yuboradi.	10 kun ichida

3-bosqich	Yoshlar ishlari agentligi	Oʻquv markazi oʻquvchilarining oʻquv mashgʻulotlarida qatnashganini kunlik nazorat qilish imkonini beruvchi elektron tizimini belgilangan tartibda Yoshlar ishlari agentligining elektron platformasiga integratsiya qilib, ommaviy oferta shartlari maʼqullangandan soʻng ushbu oʻquv markazini ariza beruvchilarni xorijiy tilga oʻqitish xarajati uchun subsidiya ajratiladigan oʻquv markazlari roʻyxatiga kiritadi.	Doimiy

4-bosqich	Ariza beruvchi	Xorijiy tilni bilish darajasini tasdiqlovchi sertifikatni ilova qilgan holda oʻquv markazida xorijiy tilni oʻqish xarajatlari uchun subsidiya ajratishni soʻrab elektron platforma orqali ariza yuboradi.	Sertifikat berilgan sanadan boshlab bir yil mobaynida

5-bosqich	Yoshlar ishlari agentligi	Ariza beruvchi tomonidan yuborilgan sertifikatni verifikatsiyadan oʻtkazadi. Sertifikatning haqiqiyligi tasdiqlangandan soʻng ariza beruvchiga oʻquv markazi bilan ikki tomonlama shartnoma imzolash imkonini yaratib beradi.	7 ish kuni ichida

6-bosqich	Ariza beruvchi / oʻquv markazi	1. Ariza beruvchi elektron platforma orqali shartnoma shaklini (xorijiy til yoʻnalishi, oʻquv markazi, oʻqituvchi, dars kunlarini tanlash orqali) toʻldiradi va yagona identifikatsiya tizimi (One ID) orqali shartnomani bir tomonlama imzolab, oʻquv markaziga yuboradi.	1. Doimiy.
6-bosqich	Ariza beruvchi / oʻquv markazi	2. Oʻquv markazi ariza beruvchi tomonidan bir tomonlama imzolab yuborilgan shartnomani koʻrib chiqib, shartnomani imzolaydi yoki asoslantirilgan holda rad etadi.	2. 7 kun ichida.

7-bosqich	Ariza beruvchi	Oʻquv markazi bilan tuzilgan shartnoma shartlariga muvofiq dastlabki ikki oylik oʻqish xarajatini oʻz hisobidan elektron platforma orqali oʻquv markaziga toʻlaydi.	Shartnomada belgilangan muddatda

8-bosqich	Yoshlar ishlari agentligi	Oʻz mablagʻlari hisobidan oʻquv markazida ikki oy davomida tahsil olgan ariza beruvchilarning uchinchi oydan boshlab toʻlovlarini oʻquv markazi tomonidan elektron platforma orqali yuborilgan hisob-fakturaga asosan ariza beruvchining davomatiga mutanosib ravishda Yoshlarga oid davlat siyosatini qoʻllab-quvvatlash jamgʻarmasi mablagʻlari hisobidan oʻquv markazining tegishli bank hisobvaragʻiga shartnomada belgilangan muddatlarda oʻtkazib boradi. Ushbu toʻlovlarning amalga oshirilganligi haqida ariza beruvchining elektron platformadagi shaxsiy kabinetiga xabarnoma yuboradi.	Shartnomada belgilangan muddatda

Vazirlar Mahkamasining 2025-yil 8-oktabrdagi 632-son qaroriga
2-ILOVA

Oʻquv markazlari reytingini shakllantirish va reyting asosida oʻquv markazlarini ragʻbatlantirish tartibi toʻgʻrisida

NIZOM

1-bob. Umumiy qoidalar

1. Ushbu Nizom xorijiy tillarni oʻqitishga ixtisoslashgan nodavlat taʼlim tashkilotlari (keyingi oʻrinlarda — oʻquv markazlari) reytingini shakllantirish, yuritish va ushbu reytingda yuqori oʻrinlarni egallagan oʻquv markazlarini ragʻbatlantirish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

“2+6” dasturi — oʻqish xarajati qoplanishi uchun xorijiy tillarni bilish boʻyicha lozim boʻlgan ballning (darajaning) minimal koʻrsatkichli sertifikatiga ega boʻlgan yosh fuqaro oʻquv markazi tomonidan unga xorijiy tilni oʻqitish xizmatini koʻrsatgani uchun dastlabki ikki oy uchun oʻqish xarajatini oʻz hisobidan toʻlaganda, keyingi olti oygacha oʻqish xarajati uchun Oʻzbekiston Respublikasi Yoshlar ishlari agentligi (keyingi oʻrinlarda — Yoshlar ishlari agentligi)ning Yoshlarga oid davlat siyosatini qoʻllab-quvvatlash jamgʻarmasiga ajratilgan mablagʻlar doirasida subsidiya ajratilishini nazarda tutuvchi dastur;

barqarorlik reytingi — Oʻzbekiston Respublikasi Soliq qoʻmitasining “Tadbirkorlarning barqarorlik reytingi” elektron platformasi orqali aniqlanadigan oʻquv markazlarining barqarorlik reytingi;

kompensatsiya — Vazirlar Mahkamasining 2021-yil 13-apreldagi 209-son qaroriga muvofiq Yoshlar ishlari agentligi tomonidan xalqaro imtihon tizimlari boʻyicha yuqori ball (daraja) toʻplagan yoshlarga imtihon topshirish xarajatlarini qoplash uchun toʻlab beriladigan toʻlov;

olis va chekka hududlar — Vazirlar Mahkamasining 2025-yil 10-iyuldagi 426-son qarori bilan tasdiqlangan Yoshlar ishlari agentligi huzuridagi Yoshlar tadbirkorligini rivojlantirish davlat maqsadli jamgʻarmasi mablagʻlari hisobidan biznes loyihalarni moliyalashtirish tartibi toʻgʻrisidagi nizomga 3-ilovaga muvofiq belgilangan Qoraqalpogʻiston Respublikasi va viloyatlardagi olis va chekka hududlar;

elektron platforma — ariza beruvchilarning oʻquv markazlarida xorijiy tilni oʻrganishi uchun oʻquv mashgʻulotida qatnashishini qayd etib boruvchi, ularning xorijiy tilni oʻrganish xarajati uchun subsidiya ajratiladigan oʻquv markazlari roʻyxati, shuningdek, ushbu oʻquv markazlari reytingi eʼlon qilib boriladigan elektron platforma va uning mobil ilovasi;

3. Ushbu Nizomga muvofiq Yoshlar ishlari agentligi tomonidan elektron platforma orqali oʻquv markazlari reytingi (keyingi oʻrinlarda — reyting) yuritiladi va eʼlon qilib boriladi (maktabgacha, umumiy oʻrta, oʻrta maxsus, kasbiy, oliy, oliy taʼlimdan keyingi taʼlim berish faoliyatini amalga oshiruvchi nodavlat taʼlim tashkilotlari bundan mustasno).

Bunda ushbu reyting respublika, hudud, tuman (shahar) hamda olis va chekka hududlardagi oʻquv markazlari kesimida shakllantiriladi.

2-bob. Reytingni shakllantirish uchun oʻquv markazlarini elektron platforma orqali roʻyxatdan oʻtkazish

4. Oʻquv markazlarining reytingini shakllantirish uchun ularni roʻyxatdan oʻtkazishda barqarorlik reytingi shkalasi boʻyicha kamida “S” koʻrsatkichga ega boʻlishi talab etiladi.

Oʻquv markazlari elektron platforma orqali roʻyxatdan oʻtkazish uchun Yoshlar ishlari agentligiga quyidagi hujjatlarni yuboradi:

nodavlat taʼlim xizmatlarini koʻrsatish faoliyati boʻyicha litsenziya yoki xabarnoma qabul qilingani toʻgʻrisidagi tasdiqnoma (integratsiyalashgan axborot tizimlari orqali);

xorijiy tilni oʻqitish uchun mulk huquqi yoki ijara huquqi asosida faoliyat yuritishi (bino yoki xonaning kadastr raqami) toʻgʻrisidagi maʼlumotlar (pdf formatda);

oʻquv markazida xorijiy tilni oʻqitish faoliyatini amalga oshiruvchi oʻqituvchilar haqidagi maʼlumotlar (pdf formatda).

Ushbu bandda nazarda tutilgan hujjatlar va maʼlumotlarni yuborgan oʻquv markazlari elektron platforma orqali roʻyxatdan oʻtkaziladi va ushbu Nizomda belgilangan tartibda ularning reytingi shakllantirib boriladi.

3-bob. Oʻquv markazlari reytingini shakllantirish tartibi

5. Oʻquv markazlari reytingi quyidagi koʻrsatkichlar asosida har oy yakuni boʻyicha ballarni jamlash orqali shakllantirib boriladi:

a) “2+6” dasturi doirasida xorijiy tilni oʻqish xarajati uchun Yoshlar ishlari agentligi tomonidan subsidiya ajratilgan har bir yosh fuqaro kompensatsiya olganda — 3 ball;

b) “2+6” dasturi doirasida xorijiy tilni oʻqish xarajati uchun Yoshlar ishlari agentligi tomonidan subsidiya ajratilgan har bir yosh fuqaro kamida “B2” darajadagi yoki unga tenglashtirilgan darajadagi milliy yoxud xalqaro sertifikat olganda — 3 ball;

v) oʻquv markazida oʻz hisobidan tahsil olgan har bir yosh fuqaro kompensatsiya olganda — 2 ball;

g) oʻquv markazida faoliyat olib borayotgan har bir oʻqituvchi malaka toifasi hamda xorijiy tilni bilish boʻyicha kamida “B2” darajadagi yoki unga tenglashtirilgan darajadagi milliy yoxud xalqaro sertifikatga ega boʻlganda — 1 ball;

d) barqarorlik reytingi boʻyicha — jami 100 ballgacha.

Bunda ushbu bandning “a”, “b”, “v” va “g” kichik bandlarida nazarda tutilgan ballar doimiy ravishda oʻzaro qoʻshib boriladi, “d” kichik bandidagi har bir kalendar kunda shakllangan ballarning bir oy davomidagi oʻrtacha koʻrsatkichini “a”, “b”, “v” va “g” kichik bandlaridagi ballarga qoʻshish orqali reyting aniqlanadi hamda ushbu bir oylik reyting ballari oy yakuni boʻyicha elektron platforma orqali jamoatchilikka eʼlon qilib boriladi.

Ushbu bandda nazarda tutilgan ball berish uchun asos boʻlgan holatlar yuzaga kelganda, tegishli axborot tizimlari bilan elektron platformaning integratsiyasi orqali oʻquv markazining ballari real vaqt rejimida avtomatik tarzda shakllantiriladi.

6. Oʻquv markazlarining bir yillik reytingi har yili 1-yanvar holatiga koʻra aniqlanadi.

Bunda oʻquv markazining yillik reytingi ushbu Nizomning 5-bandi “a”, “b”, “v” va “g” kichik bandlarida nazarda tutilgan ballarning yil davomidagi oʻzaro yigʻindisiga “d” kichik bandidagi har oyda shakllanadigan ballarning oʻrtacha koʻrsatkichini qoʻshish orqali aniqlanadi.

Ushbu bir yillik reyting ballari elektron platforma orqali jamoatchilikka eʼlon qilinadi hamda har yili 1-yanvardan boshlab reyting ballari “0” balldan boshlab qayta shakllantiriladi.

4-bob. Eʼtirozlarni koʻrib chiqish

7. Reyting ballarining shakllantirilishi boʻyicha oʻquv markazida eʼtirozlar mavjud boʻlganda, elektron platformadagi oʻz shaxsiy kabineti orqali Yoshlar ishlari agentligiga murojaat qiladi.

8. Ushbu eʼtirozlar Yoshlar ishlari agentligi tomonidan oʻn ish kuni davomida belgilangan tartibda koʻrib chiqiladi va natijasi boʻyicha:

eʼtirozlar asosli deb topilganda, elektron platformadagi maʼlumotlarga tegishli tuzatishlar kiritilgan holda oʻquv markazining ballari qayta shakllantiriladi;

eʼtirozlar asossiz deb topilganda, reyting ballari oʻzgarishsiz qoldirilib, bu haqida oʻquv markazining shaxsiy kabinetiga tegishli tushuntirish yuboriladi.

5-bob. Reytingda yuqori natijalarni qayd etgan oʻquv markazlarini ragʻbatlantirish

9. Olis va chekka hududlardagi oʻquv markazlari kesimida shakllantiriladigan reytingning yillik natijalari boʻyicha eng yuqori ball olgan 100 tagacha oʻquv markazlariga kelasi olti oy davomida oʻz faoliyatini amalga oshirish maqsadida ijara shartnomasiga asosan har bir oy uchun bazaviy hisoblash miqdorining 10 baravarigacha miqdorda ijara toʻlovlari har oy yakuni bilan oʻquv markazi tomonidan taqdim etiladigan ijara toʻlovini tasdiqlovchi hujjatlarga muvofiq Yoshlarga oid davlat siyosatini qoʻllab-quvvatlash jamgʻarmasiga ajratilgan mablagʻlar doirasida kompensatsiya qilinadi.

Bunda ushbu bandda nazarda tutilgan ijara shartnomasining haqiqiyligi tegishligicha Oʻzbekiston Respublikasi Soliq qoʻmitasining “Ijara shartnomalarini hisobga qoʻyish” elektron tizimi maʼlumotlari asosida tasdiqlangan boʻlishi lozim.

6-bob. Yakunlovchi qoidalar

10. Oʻquv markazlari ushbu Nizom talablari ijrosiga masʼul davlat organlari va boshqa tashkilotlar xodimlarining xatti-harakatlari (harakatsizligi) yuzasidan qonunchilik hujjatlarida belgilangan tartibda shikoyat qilishi mumkin.

11. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2025-yil 8-oktabrdagi 632-son qaroriga
3-ILOVA

1. Nomidagi “oʻqish va” soʻzlari chiqarib tashlansin.

2. 1-bandda:

ikkinchi xatboshidagi “oʻqish va” soʻzlari chiqarib tashlansin;

uchinchi xatboshidagi “Oʻqish va imtihon” soʻzlari “Imtihon” soʻzi bilan almashtirilsin.

3. 2-bandda:

ikkinchi xatboshidagi “oʻqish va” soʻzlari chiqarib tashlansin;

toʻrtinchi xatboshi chiqarib tashlansin;

beshinchi xatboshi toʻrtinchi xatboshi deb hisoblansin.

4. 1-ilovada:

a) nomi va 1-banddagi “oʻqish va” soʻzlari chiqarib tashlansin;

b) 2-bandda:

ikkinchi va toʻrtinchi xatboshilardagi “oʻqish va” soʻzlari chiqarib tashlansin;

oltinchi xatboshi chiqarib tashlansin;

yettinchi — toʻqqizinchi xatboshilar tegishlicha oltinchi — sakkizinchi xatboshilar deb hisoblansin;

v) 3-bandda:

birinchi xatboshidagi “oʻqish va” soʻzlari chiqarib tashlansin;

“v” kichik bandining birinchi xatboshisidagi “oʻqish yoki” soʻzlari chiqarib tashlansin;

g) 5-bandning birinchi xatboshisidagi “Oʻqish va imtihon” soʻzlari “Imtihon” soʻzi bilan almashtirilsin;

d) 6-bandda:

birinchi xatboshidagi “va oʻqish uchun” soʻzlari chiqarib tashlansin;

“v” kichik bandning ikkinchi xatboshisi quyidagi tahrirda bayon etilsin:

“oʻn olti yoshga toʻlmagan shaxsning ota-onasi tomonidan berilsa — oʻn olti yoshga toʻlmagan shaxsning tugʻilganlik toʻgʻrisidagi guvohnomasi maʼlumotlari va jismoniy shaxsning shaxsiy identifikatsiya raqami (JSHSHIR) Yoshlar ishlari agentligi tomonidan integratsiyalashgan maʼlumotlar bazasi orqali tekshiriladi;”;

“g” kichik band chiqarib tashlansin;

e) 13-bandda:

birinchi xatboshidagi “oʻqish va” soʻzlari chiqarib tashlansin;

“b” kichik bandi chiqarib tashlansin;

j) 15-banddagi “oʻqish va” soʻzlari chiqarib tashlansin;

z) 16-banddagi “15 kalendar kun” soʻzlari “12 ish kuni” soʻzlari bilan almashtirilsin;

i) 17-bandning “b” kichik bandi chiqarib tashlansin;

k) 18-bandning ikkinchi xatboshisi quyidagi tahrirda bayon etilsin:

“Bunda maxsus sertifikat haqiqiyligi masʼul vakolatli tashkilot tomonidan 30 kun muddat oʻtib tasdiqlanganda, ariza beruvchi mazkur Reglament talablariga muvofiq takroran murojaat qilgandan soʻng unga imtihon uchun kompensatsiya toʻlab beriladi.”;

l) 1-ilovada:

nomidagi “Oʻqish va imtihon” soʻzlari “Imtihon” soʻzi bilan almashtirilsin;

3-bosqichda:

“Tadbirlar” ustunidagi “oʻqish va” soʻzlari chiqarib tashlansin;

“Bajarish muddati” ustunidagi “15 kunda” soʻzlari “12 ish kunida” soʻzlari bilan almashtirilsin;

4-bosqichning “Tadbirlar” ustunidagi “oʻqish va” soʻzlari chiqarib tashlansin;

m) 2-ilovada:

“II. Oʻn olti yoshga toʻlmagan shaxs va uning qonuniy vakili haqidagi maʼlumotlar:” boʻlimi quyidagi mazmundagi 2.1.4-band bilan toʻldirilsin:

“
2.1.4. 16 yoshga toʻlmagan shaxsning shaxsiy identifikatsiya raqami (JSHSHIR):	-
	”;

IV boʻlim chiqarib tashlansin.

5. 2-ilova quyidagi tahrirda bayon etilsin:

“Vazirlar Mahkamasining 2021-yil 13-apreldagi 209-son qaroriga
2-ILOVA

Imtihon topshirish xarajati kompensatsiya qilinadigan xalqaro imtihon tizimlari

ROʻYXATI

T/r	Xalqaro imtihon tizimlarining nomi	Bilish darajasi aniqlanadigan xorijiy til	Umumiy imtihon balli (darajasi)	Imtihon topshirish xarajati kompensatsiya qilinishi uchun toʻplanishi lozim boʻlgan yuqori ballning (darajaning) minimal koʻrsatkichi	Imtihon topshirish xarajatini kompensatsiya qiluvchi
2021-yil 1-maydan boshlab imtihon topshirish xarajati kompensatsiya qilinadigan xalqaro imtihon tizimlari
1.	International English Language Testing System (IELTS)	Ingliz tili	1 — 9	7	Yoshlar ishlari agentligi
2.	Test of English as a Foreign Language internet Based Test (TOEFL) iBT	Ingliz tili	0 — 120	94*
3.	Graduate Management Admission Test (GMAT)	-	Verbal/Quantative (200 — 800) Integrated reasoning (1 — 8) Analytical writing (0,5 — 6)	Imtihon natijalari (Verbal/Quantative) boʻyicha nisbat koʻrsatkichi (percentile) 75 va undan yuqori boʻlganda
4.	Graduate Record Examinations (GRE)	-	Verbal (0 — 170) Quantative (0 — 170) Writing (0,5 — 6)	Imtihon natijalarining har biri (Verbal, Quantative, Writing) boʻyicha nisbat koʻrsatkichi (percentile) 75 va undan yuqori boʻlganda
5.	Scholastic Assessment Test (SAT)**	-	400 — 1600	1200
2022-yil 1-yanvardan boshlab imtihon topshirish xarajati kompensatsiya qilinadigan xalqaro imtihon tizimlari
6.	Cambridge Assessment English (CAE, CPE, BEC)	Ingliz tili	A1-S1	C1 (CAE advanced, CPE proficiency, BEC higher)	Yoshlar ishlari agentligi
7.	Test DAF	Nemis tili	TDN 3 — 5	TDN 4
8.	Goethe-Zertifikat	Nemis tili	A1-S1	C1
9.	DELF/DALF	Fransuz tili	DELF A1-DALF C2	DALF C1
10.	Test de Connaissance du Français (TCF)	Fransuz tili	A1-S1	S1
11.	DELE/SIELE	Ispan tili	A1-S1	C1
12.	CELI/CILS/AIL	Italyan tili	-	CELI 4, CILS Tre, DALI C1
13.	Türkçe Yeterlik Sınavı (TYS)	Turk tili	A1-S1	C1 (71 — 88)
14.	Test of Proficiency in Korean (TOPIK I-II)	Koreys tili	Level 1 — 6	Level 5 (190 — 229)
15.	Japanese-Language Proficiency Test (JLPT)	Yapon tili	N5-N1	N2
16.	Chinese Proficiency Test (HSK)	Xitoy tili	HSK 1 — 6	HSK 5
17.	ALPT/APT/E-TOAFL/ACTFL	Arab tili	A1-S1	C1
18.	Test of Russian as a Foreign Language (TORFL/ TRKI)	Rus tili	A1-S1	TRKI III-IV (C1)

Izoh.

*Ushbu imtihon turi boʻyicha ariza beruvchi taʼlim sohasida xizmat koʻrsatuvchi vakolatli xalqaro tashkilotlarning rasmiy roʻyxatidan oʻtgan test markazlariga (authorized test centers) tashrif buyurmasdan, tashkilot vakillarining bevosita nazorati ostida topshirmasdan, masofadan (Remote, Home Edition va boshqa turlari) imtihon topshirganda nutq qobiliyati (speaking) boʻyicha imtihon natijasi 16 ball va undan yuqori boʻlganda kompensatsiya toʻlab beriladi.

** Ariza beruvchining ushbu sertifikat boʻyicha qoʻlga kiritilgan natijalarini verifikatsiya qilish uchun elektron platforma (www.collegeboard.org) orqali Yoshlar ishlari agentligiga yuborish bilan bogʻliq xarajatlari toʻlov kvitansiyasiga muvofiq Agentlik tomonidan ariza beruvchiga imtihon topshirish xarajatiga qoʻshib toʻlab beriladi.”.

(Qonunchilik maʼlumotlari milliy bazasi, 09.10.2025-y., 09/25/632/0914-son)