Oʻzbekiston Respublikasi Prezidentining
Farmoni
Umummilliy totuvlik va xorijdagi vatandoshlar bilan aloqalarni mustahkamlashni yangi bosqichga olib chiqishga oid chora-tadbirlar toʻgʻrisida
[Koʻchirma]
Mamlakatimizda umummilliy totuvlik, birdamlik va hamjihatlikni mustahkamlash, barcha fuqarolarga teng huquq va imkoniyatlar yaratish, koʻp millatli xalqimizning jonajon Oʻzbekistonimiz farovonligiga daxldorligini kuchaytirish, xorijdagi vatandoshlar bilan aloqalarni rivojlantirish, shuningdek, “Oʻzbekiston — 2030” strategiyasida belgilangan vazifalarning izchil amalga oshirilishini taʼminlash maqsadida qaror qilaman:
I. Ustuvor vazifalar
1. Jamiyatda umummilliy totuvlik va xorijdagi vatandoshlar bilan aloqalarni mustahkamlashning ustuvor vazifalari etib quyidagilar belgilansin:
(a) millatlararo munosabatlarni uygʻunlashtirish, jamiyatda doʻstlik, oʻzaro hamjihatlik, bagʻrikenglik va birdamlikni mustahkamlash orqali yagona fuqaroviy oʻzlikni shakllantirish;
(b) Oʻzbekistonda yashovchi barcha millat va elatlarning huquqlari hamda qonuniy manfaatlarini taʼminlash orqali ularning umummilliy taraqqiyotga daxldorligini kuchaytirish;
(v) xorijdagi vatandoshlar jamoalari va oʻzbek diasporalarining milliy oʻzligini saqlashga koʻmaklashish hamda ularning ijtimoiy va iqtisodiy salohiyatini Vatanimiz rivojiga safarbar etishni qoʻllab-quvvatlash;
(g) xalq diplomatiyasi mexanizmlari orqali xorijiy mamlakatlar bilan ijtimoiy-madaniy va doʻstlik aloqalari hamda Oʻzbekistonning xalqaro maydondagi ijobiy imijini mustahkamlash.
II. Sohani tubdan isloh qilish
2. Oʻzbekiston Respublikasi Madaniyat vazirligi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasi negizida Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi (keyingi oʻrinlarda — Qoʻmita) tashkil etilsin.
3. Belgilansinki:
(a) Qoʻmita millatlararo munosabatlar hamda xorijdagi vatandoshlar masalalari sohasida davlat siyosatini amalga oshiruvchi, davlat organlari va tashkilotlarning ushbu yoʻnalishdagi faoliyatini muvofiqlashtiruvchi vakolatli respublika ijro etuvchi hokimiyat organi hisoblanadi;
(b) Qoʻmita Oʻzbekiston Respublikasi Prezidenti Administratsiyasi hamda Vazirlar Mahkamasiga bevosita hisobdordir;
(v) Qoʻmitaga Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan rais rahbarlik qiladi;
(g) Qoʻmita raisining Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan ikki nafar oʻrinbosari boʻladi;
(d) joylarda millatlararo munosabatlar va xorijdagi vatandoshlar bilan ishlash masalalari Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlarining jamoat va diniy tashkilotlar bilan aloqalar boʻyicha oʻrinbosarlari zimmasiga yuklanadi va ular ushbu masalalar boʻyicha Qoʻmita oldida hisobdordir;
(e) Qoʻmita Oʻzbekiston Respublikasi Madaniyat vazirligi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasining huquq va majburiyatlari boʻyicha huquqiy vorisi hisoblanadi.
III. Umummilliy totuvlikni mustahkamlashga qaratilgan chora-tadbirlar
4. Qoʻmita va milliy madaniy markazlarning umummilliy birdamlikni taʼminlash choralarini kuchaytirishga qaratilgan quyidagi takliflari maʼqullansin:
(a) har yili “Oʻzbekiston yagona Vatan!” shiori ostida yurtimizdagi barcha millat va elatlar vakillarining oʻzaro tengligi, birdamligini, ularning Yangi Oʻzbekiston taraqqiyotiga qoʻshayotgan hissasini eʼtirof etuvchi anjuman tashkil etish;
(b) Qoraqalpogʻiston Respublikasi, viloyatlar markazlari va Toshkent shahrida bittadan koʻchalarni barcha millat va elatlarning madaniyati, urf-odatlari va anʼanalarini, oʻzaro uygʻunlashgan millatlararo munosabatlarni ifodalagan “Oʻzbekiston madaniy boyligi” nomli koʻchalar sifatida tashkil etish;
(v) “Birgalikda kuchmiz” shiori ostida turli millat va elatlar vakillaridan iborat eko-volontyorlar ishtirokida ekologik aksiyalarni oʻtkazib borish orqali dolzarb masalalarni hal etishda daxldorlikni anglash tuygʻularini kuchaytirish;
(g) turli etno-madaniy guruhlarga mansub taniqli shaxslar ishtirokida umummilliy hamjihatlikni taʼminlashga qaratilgan loyihalar, dasturlarni amalga oshirish;
(d) turli millat va elatlar vakillarining Oʻzbekiston tarixi va bugungi kundagi barqaror rivojlanishiga qoʻshayotgan hissasi haqida hikoya qiluvchi filmlar va turkum koʻrsatuvlar yaratish.
IV. Xorijdagi vatandoshlar bilan aloqalarni mustahkamlashning yangi mexanizmlari
5. Vazirlar Mahkamasi Birlashgan Millatlar Tashkiloti Taraqqiyot dasturining “Xorijdagi vatandoshlar orqali bilimlarni transfer qilish” (TOKTEN) dasturi namunasida xorijdagi vatandoshlarning Yangi Oʻzbekiston iqtisodiy qudratiga qoʻshayotgan hissasini yanada oshirish maqsadida innovatsion ijtimoiy-iqtisodiy rivojlanish va ekologik barqarorlikni taʼminlashga xizmat qiladigan inson kapitali transferini amalga oshirsin, bunda yuqori malakali mutaxassislarni barcha sohalarda sunʼiy intellektni tatbiq etish uchun taʼlim, sogʻliqni saqlash tashkilotlariga, qishloq xoʻjaligi va xususiy sektor korxonalariga yoʻnaltirishga qaratilgan aniq tashkiliy-huquqiy mexanizmlarni belgilasin.
6. Qoʻmita Investitsiyalar, sanoat va savdo vazirligi, Tashqi ishlar vazirligi, Iqtisodiyot va moliya vazirligi, Markaziy bank va Savdo-sanoat palatasi bilan birgalikda uch oy muddatda mamlakat ijtimoiy-iqtisodiy hayotida xorijdagi vatandoshlar ishtirokini ragʻbatlantirishga qaratilgan aniq asoslantirilgan takliflarni Vazirlar Mahkamasiga kiritsin. Bunda:
(a) xorijdagi vatandoshlar, diaspora vakillarining toʻgʻridan-toʻgʻri investitsiyalar kiritishini qoʻllab-quvvatlash;
(b) xorijdagi vatandoshlarning xayriya pul mablagʻlarini ijtimoiy foydali va maqsadli loyihalarni moliyalashtirishga toʻgʻridan-toʻgʻri yoʻnaltirish;
(v) xorijdagi vatandoshlar, diaspora vakillarining kapital bozoriga investitsiyalar kiritishini ragʻbatlantirish;
(g) xorijdagi vatandoshlar, diaspora vakillari turizmini rivojlantirish masalalari nazarda tutiladi.
7. Qoʻmita va “Vatandoshlar” jamoat fondi vasiylik kengashining tadbirkorlik platformalarini yaratish, jamiyat hayotini ijtimoiy-iqtisodiy rivojlantirish, ekologik barqarorlik, sifatli taʼlim kabi masalalarda oʻzaro fikr-mulohaza almashish maqsadida ekspertlik va ilmiy doiralar vakillari hisoblangan xorijdagi vatandoshlarning doimiy muloqoti koʻrinishida “Uz Global Think” forumini oʻtkazish boʻyicha takliflari maʼqullansin.
8. Qoʻmita “Vatandoshlar” jamoat fondi bilan birgalikda:
(a) har yili xorijdagi vatandoshlarning “Uz Global Think” forumini tashkil etsin va unda ilgari surilgan fikrlar asosida mamlakatimizning barqaror rivojlanish maqsad va vazifalariga xizmat qiluvchi takliflarni shakllantirib, Vazirlar Mahkamasiga kiritib borsin;
(b) 2025-yil 1-sentabrga qadar birodar hududlar, doʻstlik jamiyatlarini xorijiy davlatlar bilan ijtimoiy-madaniy aloqalarni rivojlantirishda “madaniy koʻprik”ka aylantirish, xalq diplomatiyasi vositasida Oʻzbekistonning xalqaro imijini mustahkamlash choralarini nazarda tutuvchi normativ-huquqiy hujjat loyihasini Vazirlar Mahkamasiga kiritsin.
9. Quyidagilar:
(a) Madaniyat vazirligida millatlararo munosabatlar va xorijdagi vatandoshlar bilan ishlash boʻyicha vazifalarning qisqarishi hisobiga 3 ta boshqaruv shtat birligi Qoʻmita tuzilmasiga oʻtkazilsin;
(b) Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlarining jamoat va diniy tashkilotlar bilan aloqalar boʻyicha oʻrinbosarlari kotibiyatlariga millatlararo munosabatlar va xorijdagi vatandoshlar bilan aloqalarni mustahkamlash vazifalari yuklatilsin;
(v) Madaniyat vazirligi tuzilmasidagi “Oʻzbekiston” jurnali tahririyati” davlat muassasasi Qoʻmita tuzilmasiga oʻtkazilsin;
(g) Qoʻmitaning tashkiliy tuzilmasi 1-ilovaga muvofiq tasdiqlansin.
V. Qoʻmita huquqlari
10. Belgilansinki, Qoʻmita oʻziga yuklatilgan vazifalarni bajarish uchun quyidagi huquqlarga ega:
(a) Qoʻmita vakolatiga kiruvchi masalalar yuzasidan davlat organlari va tashkilotlaridan statistik, tahliliy materiallar, xulosalar va boshqa maʼlumotlarni soʻrash va bepul olish;
(b) davlat organlari va boshqa tashkilotlar, ilmiy-tadqiqot va taʼlim muassasalari, xalqaro tashkilotlar, xorijdagi vatandoshlar orasidan yuqori malakali mutaxassislarni hamda ekspertlarni, shu jumladan, shartnoma asosida jalb qilish;
(v) umummilliy totuvlik va xorijdagi vatandoshlar bilan aloqalarni mustahkamlashga doir tashabbuslar bilan chiqish va takliflar kiritish.
12. Qoʻmita raisiga quyidagi huquqlar berilsin:
(a) Qoʻmita tarkibiy tuzilmalari oʻrtasida aniq vazifa va funksiyalarni taqsimlash;
(b) Qoʻmita tuzilmasiga boshqaruv xodimlarining belgilangan umumiy shtatlar soni va mehnatga haq toʻlash fondi doirasida oʻzgartirishlar kiritish;
(v) Qoʻmita tarkibiy tuzilmasini tasdiqlash, xodimlarni lavozimga tayinlash va lavozimidan ozod qilish, shuningdek, ularni ragʻbatlantirish.
VI. Farmon ijrosini tashkil etish, taʼminlash va nazorat
13. Vazirlar Mahkamasi bir hafta muddatda “Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi faoliyatini tashkil etish toʻgʻrisida”gi Oʻzbekiston Respublikasi Prezidenti qarori loyihasini Oʻzbekiston Respublikasi Prezidenti Administratsiyasiga kiritsin.
14. Oʻzbekiston Respublikasi Prezidentining ayrim hujjatlariga 2-ilovaga muvofiq oʻzgartirish va qoʻshimchalar kiritilsin.
15. Oʻzbekiston Respublikasi Prezidentining ayrim hujjatlari 3-ilovaga muvofiq oʻz kuchini yoʻqotgan deb hisoblansin.
16. Qoʻmita Adliya vazirligi, boshqa manfaatdor vazirlik va idoralar bilan birgalikda uch oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida takliflarni Vazirlar Mahkamasiga kiritsin.
17. Farmon ijrosini nazorat qilish, ijro uchun masʼul tashkilotlar faoliyatini muvofiqlashtirish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti maslahatchisi R.Q. Davletov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2025-yil 19-mart,
PF-52-son
Oʻzbekiston Respublikasi Prezidentining 2025-yil 19-martdagi PF-52-son Farmoniga
1-ILOVA
1-ILOVA
Millatlararo munosabatlar va xorijdagi vatandoshlar masalalari boʻyicha qoʻmitaning
TASHKILIY TUZILMASI
Millatlararo munosabatlar va xorijdagi vatandoshlar masalalari boʻyicha qoʻmita | |||||||||||||||
“Oʻzbekiston” jurnali tahririyati” davlat muassasasi | |||||||||||||||
Oʻzbekiston Respublikasi Prezidentining 2025-yil 19-martdagi PF-52-son Farmoniga
2-ILOVA
2-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirish va qoʻshimchalar
1. Oʻzbekiston Respublikasi Prezidentining 2019-yil 15-noyabrdagi “Millatlararo munosabatlar sohasida Oʻzbekiston Respublikasi davlat siyosati konsepsiyasini tasdiqlash toʻgʻrisida”gi PF-5876-son Farmonida:
a) 2-bandning toʻrtinchi xatboshisidagi “Madaniyat vazirligi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasi” soʻzlari “Millatlararo munosabatlar va xorijdagi vatandoshlar masalalari boʻyicha qoʻmitasi” soʻzlari bilan almashtirilsin;
b) 3-band oʻz kuchini yoʻqotgan deb hisoblansin;
v) 12-band oʻz kuchini yoʻqotgan deb hisoblansin;
g) 1-ilovaning 8-bandi “a” kichik bandining toʻrtinchi xatboshisi, 10-bandi “a” kichik bandining birinchi xatboshisi hamda “b” kichik bandidagi “Madaniyat vazirligi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasi” soʻzlari “Millatlararo munosabatlar va xorijdagi vatandoshlar masalalari boʻyicha qoʻmitasi” soʻzlari soʻzlari bilan almashtirilsin;
d) 4-ilova oʻz kuchini yoʻqotgan deb hisoblansin.
2. Oʻzbekiston Respublikasi Prezidentining 2022-yil 21-dekabrdagi “Yangi Oʻzbekiston maʼmuriy islohotlarini amalga oshirish chora-tadbirlari toʻgʻrisida”gi PF-269-son Farmoniga 4-ilovaning 3-pozitsiyasi chiqarib tashlansin.
3. Oʻzbekiston Respublikasi Prezidentining 2023-yil 25-yanvardagi “Respublika ijro etuvchi hokimiyat organlari faoliyatini samarali yoʻlga qoʻyishga doir birinchi navbatdagi tashkiliy chora-tadbirlar toʻgʻrisida”gi PF-14-son Farmonida:
a) 1-ilovada:
“Jami boshqaruv shtat birliklari soni” ustunidagi “53 724” raqami “53 735” raqamiga, “Davlat budjeti hisobidan” ustunidagi “49 263” raqami “49 274” raqamiga almashtirilsin;
“16. Madaniyat vazirligi” boʻlimi quyidagi tahrirda bayon etilsin:
“ | ||||
16. Madaniyat vazirligi | ||||
Madaniyat vazirligi | 623 | 623 | ||
shu jumladan, vazir oʻrinbosarlari soni | 4 | 4 | ||
1. | Kinematografiya agentligi | 40 | 40 | |
shu jumladan, direktor oʻrinbosarlari soni | 2 | 2 | ||
”; | ||||
quyidagi mazmundagi “37. Millatlararo munosabatlar va xorijdagi vatandoshlar masalalari boʻyicha qoʻmita” boʻlimi bilan toʻldirilsin:
“ | ||||
37. Millatlararo munosabatlar va xorijdagi vatandoshlar masalalari boʻyicha qoʻmita | ||||
1. | Millatlararo munosabatlar va xorijdagi vatandoshlar masalalari boʻyicha qoʻmita | 30 | 30 | |
shu jumladan, rais oʻrinbosarlari soni | 2 | 2 | ||
”; | ||||
b) 2-ilovada:
16-bandning 16.1-kichik bandi chiqarib tashlansin;
quyidagi mazmundagi 37-band bilan toʻldirilsin:
“37. Millatlararo munosabatlar va xorijdagi vatandoshlar masalalari boʻyicha qoʻmita”;
v) 2a-ilovada:
16.1-pozitsiya chiqarib tashlansin;
quyidagi mazmundagi 37-pozitsiya bilan toʻldirilsin:
“ | |||
37. | Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi | Millatlararo munosabatlar qoʻmitasi | KMOS |
”. |
4. Oʻzbekiston Respublikasi Prezidentining 2023-yil 25-dekabrdagi “Madaniyat va sanʼat sohasida davlat boshqaruvi takomillashtirilganligi munosabati bilan Oʻzbekiston Respublikasi Prezidentining ayrim hujjatlariga oʻzgartirishlar va qoʻshimcha kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-214-son Farmoniga 1-ilovaning 2 va 11-bandlari chiqarib tashlansin.
5. Oʻzbekiston Respublikasi Prezidentining 2023-yil 27-iyuldagi “Maʼmuriy islohotlar doirasida madaniyat va turizm sohasida davlat boshqaruvini samarali tashkil qilish chora-tadbirlari toʻgʻrisida”gi PF-114-son Farmoniga 4-ilovaning matni quyidagi tahrirda bayon etilsin:
“Madaniyat vazirligining
tashkiliy tuzilmasi
Madaniyat vazirligi | |||||||||||||||||||||||||||||||||||||||||||
Kinematografiya agentligi | “Oʻzbekkonsert” davlat muassasasi | “Oʻzbekiston simfonik orkestri” davlat muassasasi | |||||||||||||||||||||||||||||||||||||||||
“Oʻzbeksirk” davlat muassasasi | “Mukarrama Turgʻunboyeva nomidagi “Bahor” davlat raqs ansambli” davlat muassasasi | “Respublika baxshichilik sanʼati markazi” davlat muassasasi, “Yusufjon qiziq Shakarjonov nomidagi respublika askiya sanʼati markazi” davlat muassasasi | |||||||||||||||||||||||||||||||||||||||||
Yunus Rajabiy nomidagi Oʻzbekiston milliy musiqa sanʼati akademiyasi | “Xalqaro festivallar direksiyasi” davlat muassasasi | ||||||||||||||||||||||||||||||||||||||||||
“Iqtidorli yoshlarni qoʻllab-quvvatlash markazi” davlat muassasasi | |||||||||||||||||||||||||||||||||||||||||||
“Oʻzbek milliy maqom sanʼati markazi”, Baxshichilik sanʼatiga ixtisoslashtirilgan respublika maktab-internati, Buxoro, Fargʻona va Urganch maqom sanʼatiga ixtisoslashtirilgan maktab-internatlari | “Oʻzbekiston davlat filarmoniyasi” davlat muassasasi | ||||||||||||||||||||||||||||||||||||||||||
“Binolardan foydalanish va ularni ekspluatatsiya qilish direksiyasi” davlat muassasasi | |||||||||||||||||||||||||||||||||||||||||||
“Xalqlar doʻstligi” sanʼat saroyi, Islom Karimov nomidagi Fargʻona viloyati teatr va konsert saroyi, “Surxondaryo sanʼat saroyi” davlat muassasasi | |||||||||||||||||||||||||||||||||||||||||||
Davlat teatrlari, teatr studiyalari | “Guliston” va “Teatr” jurnallari birlashgan tahririyati” davlat muassasasi | ||||||||||||||||||||||||||||||||||||||||||
Madaniyatshunoslik va nomoddiy madaniy meros ilmiy-tadqiqot instituti | “Madaniyat taʼlimi markazi” davlat muassasasi | Qoraqalpogʻiston Respublikasi Madaniyat vazirligi, viloyatlar va Toshkent shahar madaniyat boshqarmalari | |||||||||||||||||||||||||||||||||||||||||
Respublika markaziy koʻzi ojizlar kutubxonasi | Oliy taʼlim muassasalari va filiallari, qayta tayyorlash va malaka oshirish markazlari, professional taʼlim muassasalari, bolalar musiqa va sanʼat maktablari | Tuman (shahar) madaniyat boʻlimlari | |||||||||||||||||||||||||||||||||||||||||
Madaniyat markazlari | |||||||||||||||||||||||||||||||||||||||||||
”. | |||||||||||||||||||||||||||||||||||||||||||
6. Oʻzbekiston Respublikasi Prezidentining 2021-yil 26-martdagi “Maʼnaviy-maʼrifiy ishlar tizimini tubdan takomillashtirish chora-tadbirlari toʻgʻrisida”gi PQ-5040-son qaroriga 1-ilovaning yigirma toʻqqizinchi xatboshisidagi “Millatlararo munosabatlar va xorijiy mamlakatlar bilan doʻstlik aloqalari qoʻmitasi” soʻzlari “Millatlararo munosabatlar va xorijdagi vatandoshlar masalalari boʻyicha qoʻmitasi” soʻzlari bilan almashtirilsin.
7. Oʻzbekiston Respublikasi Prezidentining 2021-yil 11-avgustdagi “Vatandoshlar” jamoat fondini tashkil etish toʻgʻrisida”gi PQ-5220-son qarorida:
a) 1-banddagi “Vazirlar Mahkamasi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasi” soʻzlari “Millatlararo munosabatlar va xorijdagi vatandoshlar masalalari boʻyicha qoʻmitasi” soʻzlari bilan almashtirilsin;
b) 10-bandning beshinchi xatboshisidagi “Millatlararo munosabatlar va xorijiy mamlakatlar bilan doʻstlik aloqalari qoʻmitasi” soʻzlari “Millatlararo munosabatlar va xorijdagi vatandoshlar masalalari boʻyicha qoʻmitasi” soʻzlari bilan almashtirilsin;
v) ilovaning matni quyidagi tahrirda bayon qilinsin:
“Vatandoshlar” jamoat fondi Vasiylik kengashining
TARKIBI
1. | Lavozimi boʻyicha | — | Oʻzbekiston Respublikasi Oliy Majlisi Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisi, Vasiylik kengashi raisi |
2. | Lavozimi boʻyicha | — | Millatlararo munosabatlar va xorijdagi vatandoshlar masalalari boʻyicha qoʻmitasi raisi, Vasiylik kengashi raisi oʻrinbosari |
3. | Baxtiyor Saidov | — | tashqi ishlar vaziri |
4. | Kongratbay Sharipov | — | oliy taʼlim, fan va innovatsiyalar vaziri |
5. | Ozodbek Nazarbekov | — | madaniyat vaziri |
6. | Adxam Ikramov | — | sport vaziri |
7. | Bexzod Musayev | — | Migratsiya agentligi direktori |
8. | Umid Shadiyev | — | Turizm qoʻmitasi raisi |
9. | Alisher Saʼdullayev | — | Yoshlar ishlari agentligi direktori |
10. | Qudratilla Rafikov | — | Oʻzbekiston Kasaba uyushmalari federatsiyasi kengashi raisi |
11. | Shavkat Ayupov | — | Oʻzbekiston Fanlar akademiyasi prezidenti |
12. | Sirojiddin Saidov | — | Oʻzbekiston Yozuvchilar uyushmasi raisi |
13. | Adxam Bekmurodov | — | “El-yurt umidi” jamgʻarmasi direktori v.b. |
14. | Bobur Bekmurodov | — | “Yuksalish” umummilliy harakati raisi |
15. | Eldor Tulyakov | — | “Taraqqiyot strategiyasi” markazi ijrochi direktori |
16. | Akmal Nuridinov | — | Oʻzbekiston Badiiy akademiyasi raisi |
17. | Olimjon Davlatov | — | Alisher Navoiy nomidagi xalqaro jamoat fondi ijrochi direktori, adabiyotshunos olim |
18. | Yodgor Sagdiyev | — | Oʻzbek milliy akademik drama teatri direktori |
19. | Mahmud Toir | — | Oʻzbekiston xalq shoiri, Oʻzbekiston Yozuvchilar uyushmasi Toshkent viloyati boʻlimi rahbari |
20. | Erkin Komilov | — | Oʻzbekiston xalq artisti |
Izoh:
“Vatandoshlar” jamoat fondining Vasiylik kengashi aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklatilgan shaxslar kiritiladi.
“Vatandoshlar” jamoat fondining Vasiylik kengashi qarori bilan uning tarkibiga xorijdagi vatandoshlar kiritilishi mumkin”.
Oʻzbekiston Respublikasi Prezidentining 2025-yil 19-martdagi PF-52-son Farmoniga
3-ILOVA
3-ILOVA
Oʻzbekiston Respublikasi Prezidentining oʻz kuchini yoʻqotgan deb eʼtirof etilayotgan ayrim hujjatlari
ROʻYXATI
1. Oʻzbekiston Respublikasi Prezidentining 2017-yil 19-maydagi “Millatlararo munosabatlar va xorijiy mamlakatlar bilan doʻstlik aloqalarini yanada takomillashtirish chora-tadbirlari toʻgʻrisida”gi PF-5046-son Farmoni.
2. Oʻzbekiston Respublikasi Prezidentining 2017-yil 23-maydagi “Oʻzbekiston Respublikasi Madaniyat vazirligi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasi faoliyatini tashkil etish toʻgʻrisida”gi PQ-2993-son qarori.
(Qonunchilik maʼlumotlari milliy bazasi, 21.03.2025-y., 06/25/52/0262-son)
