Oʻzbekiston Respublikasi Prezidentining
Qarori
Qishloq xoʻjaligi va oziq-ovqat sohasidagi islohotlarni jadallashtirish boʻyicha qoʻshimcha chora-tadbirlar toʻgʻrisida
Qishloq xoʻjaligi va oziq-ovqat sohasida olib borilayotgan islohotlarni samarali tashkil etish, qishloq xoʻjaligini rivojlantirish va uning raqobatbardoshligini oshirish, mamlakat aholisini oziq-ovqat mahsulotlari bilan taʼminlash, qishloq xoʻjaligini davlat tomonidan qoʻllab-quvvatlashda samarali hamda yangi bozor mexanizmlarini joriy etish, agroklasterlar, fermerlar va boshqa qishloq xoʻjaligi mahsulotlarini yetishtiruvchilarga xizmatlar koʻrsatishni yangi tamoyillar asosida tashkil etish maqsadida:
Oldingi tahrirga qarang.
1. Qishloq xoʻjaligi va oziq-ovqat sohasidagi islohotlarni samarali tashkil etishni yanada jadallashtirish maqsadida Qishloq xoʻjaligi vazirligi huzurida davlat muassasasi shaklida “Qishloq xoʻjaligi va oziq-ovqat sohasidagi loyihalar markazi” loyiha ofisi (keyingi oʻrinlarda — Loyiha ofisi) tashkil etilsin.
(1-bandning birinchi xatboshisi Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
Loyiha ofisi 2024-yilda ustuvor ravishda Oʻzbekiston Respublikasi Prezidentining 2024-yil 4-martdagi PQ-109-son qarori bilan tasdiqlangan 2024-yilda strategik yoʻnalishlardagi islohotlarni amalga oshirish chora-tadbirlar rejasida nazarda tutilgan qishloq xoʻjaligi va oziq-ovqat sohalaridagi strategik islohotlarning amalga oshirilishiga eʼtibor qaratsin.
2. Quyidagilar:
“Qishloq xoʻjaligi va oziq-ovqat sohasidagi loyihalar markazi” loyiha ofisining asosiy faoliyat yoʻnalishlari 1-ilovaga muvofiq;
Qishloq xoʻjaligi va oziq-ovqat sohasini takomillashtirishning ustuvor yoʻnalishlarini amalga oshirish boʻyicha “yoʻl xaritasi” 2-ilovaga muvofiq;
“Qishloq xoʻjaligi va oziq-ovqat sohasidagi loyihalar markazi” loyiha ofisi tomonidan birinchi bosqichda faoliyati takomillashtiriladigan Qishloq xoʻjaligi vazirligining tizim tashkilotlari roʻyxati 3-ilovaga muvofiq tasdiqlansin.
Oldingi tahrirga qarang.
3. Belgilansinki:
Loyiha ofisi direktori qishloq xoʻjaligi vaziri tomonidan lavozimga tayinlanadi va lavozimidan ozod etiladi;
Loyiha ofisi shtat birliklari Qishloq xoʻjaligi vazirligi, Veterinariya va chorvachilikni rivojlantirish qoʻmitasi, Oʻsimliklar karantini va himoyasi agentligi, Qishloq xoʻjaligida bilim va innovatsiyalar milliy markazi hamda tizim tashkilotlarining amaldagi shtatlari doirasida shakllantiriladi;
Loyiha ofisi har oyda qishloq xoʻjaligi va oziq-ovqat sohasini isloh qilish holati, amalga oshirilayotgan chora-tadbirlar, islohotlarni amalga oshirishga toʻsqinlik qilayotgan omillar va ularni bartaraf etish yoʻllari toʻgʻrisida qishloq xoʻjaligi vaziriga axborot kiritib boradi;
davlat organlari rahbarlari Loyiha ofisiga har tomonlama koʻmaklashadi, shu jumladan, uning soʻroviga koʻra oʻz xodimlarining oylik ish haqi va unga tenglashtirilgan toʻlovlarni saqlab qolgan holda ekspert sifatida yuborilishini taʼminlaydi;
Qishloq xoʻjaligi vazirligining tizim tashkilotlari hamda boshqa davlat organlari Loyiha ofisi tomonidan ishlab chiqilgan taklif va tavsiyalarning belgilangan muddatlarda sifatli amalga oshirilishini taʼminlaydi.
(3-band Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
Oldingi tahrirga qarang.
4. Qishloq xoʻjaligi vaziri Loyiha ofisi faoliyatini muvofiqlashtirib, uning samarali faoliyatini taʼminlash choralarini koʻrsin.
(4-band Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
Oldingi tahrirga qarang.
5. Loyiha ofisini moliyalashtirish manbalari etib quyidagilar belgilansin:
2026-yildan boshlab Qishloq xoʻjaligi vazirligiga birinchi darajali budjet mablagʻlari taqsimlovchisi sifatida Davlat budjetidan ajratiladigan mablagʻlar;
Loyiha ofisining asoslangan takliflariga koʻra Oʻzbekiston Respublikasi Prezidenti huzuridagi Strategik rivojlanish va islohotlar agentligi hisobidan ajratiladigan mablagʻlar;
xalqaro moliya institutlari va xorijiy hukumat moliya tashkilotlari ishtirokidagi loyihalar doirasida jalb qilinadigan grant mablagʻlari;
jismoniy va yuridik shaxslarning homiylik xayriyalari;
qonunchilik hujjatlarida taqiqlanmagan boshqa manbalar.
(5-band Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
Oldingi tahrirga qarang.
6. Qishloq xoʻjaligi vazirligi ikki oy muddatda Loyiha ofisining nizomini, shuningdek, uning tuzilmasi, shtat birliklari sonini tasdiqlasin.
Bunda Loyiha ofisi xodimlariga Qishloq xoʻjaligi vazirligi markaziy apparati xodimlari uchun belgilangan mehnatga haq toʻlash va moddiy ragʻbatlantirish shartlari tatbiq etiladi.
(6-band Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
7. Qishloq xoʻjaligi vazirligi va Loyiha ofisi:
a) 2024-yilda:
Oldingi tahrirga qarang.
(7-band “a” kichik bandining ikkinchi xatboshisi Oʻzbekiston Respublikasi Prezidentining 2025-yil 21-noyabrdagi PF-223-sonli Farmoniga asosan chiqarilgan — Qonunchilik maʼlumotlari milliy bazasi, 22.11.2025-y., 06/25/223/1076-son)
qishloq xoʻjaligi sohasida sugʻurta xizmatlarini rivojlantirish boʻyicha xorijiy mamlakatlar tajribasini oʻrganish asosida ularni respublikaga joriy etish boʻyicha takliflarni ishlab chiqib, oʻrnatilgan tartibda tasdiqlash uchun Vazirlar Mahkamasiga kiritsin;
hududlarda faoliyat koʻrsatayotgan oziq-ovqat sanoati korxonalarining mavjud quvvatlaridan foydalanish holatini oʻrganish va mavjud muammolarni aniqlash;
sohada oʻz yechimini kutib turgan muammolarni bartaraf etish uchun xalqaro moliya institutlarining grant mablagʻlarini jalb qilish choralarini koʻrsin;
Loyiha ofisi uch oy muddatda yuqori nufuzga ega qishloq xoʻjaligi sohasidagi xorijiy oliy taʼlim muassasasi bilan hamkorlikda mamlakatimizda qishloq xoʻjaligi xodimlarini tayyorlash, qayta tayyorlash va ularning malakasini oshirish boʻyicha alohida ixtisoslashgan markaz faoliyatini tashkil etsin;
meva-sabzavot va oziq-ovqat mahsulotlari sifatini tekshirish va eksport ulushini oshirish uchun xalqaro moliya institutlarining 3,4 million AQSH dollari miqdoridagi grant mablagʻlari hisobidan Samarqand, Fargʻona va Toshkent viloyatlarida xalqaro talablarga mos boʻlgan 3 ta zamonaviy laboratoriya tashkil etish choralarini koʻrsin;
3-ilovada belgilangan tashkilotlar faoliyatini qayta koʻrib chiqsin va ish samaradorligini oshirish boʻyicha zarur choralar koʻrsin;
b) 2024/2025 oʻquv yilidan boshlab:
Oliy taʼlim, fan va innovatsiyalar vazirligi bilan birgalikda agrar sohadagi oliy taʼlim muassasalari talabalari bilimini, pedagoglarining malakasini oshirish hamda ilmiy-tadqiqot muassasalarining ilmiy xodimlari faoliyatini xalqaro tajribalar asosida baholash tizimini takomillashtirsin;
Toshkent davlat agrar universitetida taʼlim yoʻnalishlarini bosqichma-bosqich xalqaro akkreditatsiyadan oʻtkazsin;
v) Qishloq xoʻjaligi vazirligi tizim tashkilotlaridan 1 nafardan salohiyatli xodimlarni asosiy ishidan ajralgan holda Loyiha ofisi eksperti sifatida doimiy faoliyat olib borishi uchun yuborilishini taʼminlasin.
Bunda, ekspertlar nomzodi Loyiha ofisi bilan kelishilgan holda aniqlanadi hamda ularning ish haqi va unga tenglashtirilgan toʻlovlar tizim tashkilotlari tomonidan qoplanadi.
8. Loyiha ofisiga quyidagi huquqlar berilsin:
tegishli vazirlik va idoralar, ularning tizimidagi muassasalar, ilmiy-tadqiqot muassasalarining tajribali mutaxassislarini bozor konyunkturasidan kelib chiqib, shartnoma asosida Loyiha ofisi faoliyatiga jalb qilish;
ishlab chiqilgan loyihalarni hududiy tashkilotlar, tuman (shahar) yoki hudud misolida tajriba-sinovdan oʻtkazish;
davlat organlari va tashkilotlaridan zarur statistik, tahliliy hamda boshqa maʼlumotlarni soʻrab olish va ularning elektron axborot tizimlaridan bepul foydalanish.
9. Loyiha ofisi direktoriga xorijiy mutaxassislar, ekspert, konsultant va maslahatchilarni toʻgʻridan-toʻgʻri shartnomalar asosida jalb etish, ishga qabul qilish va ularga ish haqini milliy yoki chet el valyutasida, shu jumladan mablagʻlarni ularning xorijdagi hisobvaraqlariga oʻtkazish orqali toʻlash, shuningdek, tegishli vazirlik va idoralar, ularning tarkibiy tuzilmalari mutaxassislarini islohotlarni amalga oshirish jarayonlariga jalb qilish, ular ishtirokida ekspert komissiyalari va ishchi guruhlarini tuzish huquqi berilsin.
10. Qishloq xoʻjaligi vazirligi:
Oldingi tahrirga qarang.
Loyiha ofisi unga yuklatilgan vazifalarni bajarish uchun zarur bino bilan taʼminlasin.
(10-bandning ikkinchi xatboshisi Oʻzbekiston Respublikasi Prezidentining 2025-yil 21-noyabrdagi PF-223-sonli Farmoni tahririda — Qonunchilik maʼlumotlari milliy bazasi, 22.11.2025-y., 06/25/223/1076-son)
bir oy muddatda Loyiha ofisi faoliyatini tashkil etish, shu jumladan uni jihozlash, zarur moddiy-texnik vositalar va aloqa turlari bilan taʼminlash choralarini koʻrsin;
manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
11. Ushbu qarorning ijrosini samarali tashkil qilishga masʼul va shaxsiy javobgar etib qishloq xoʻjaligi vaziri I.Yu. Abduraxmonov belgilansin.
Mazkur qaror ijrosini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2024-yil 20-iyun,
PQ-227-son
Oʻzbekiston Respublikasi Prezidentining 2024-yil 20-iyundagi PQ-227-son qaroriga
1-ILOVA
“Qishloq xoʻjaligi va oziq-ovqat sohasidagi loyihalar markazi” loyiha ofisining asosiy faoliyat yoʻnalishlari
1. Qishloq xoʻjaligi va oziq-ovqat, shu jumladan oʻsimliklar karantini va himoyasi, veterinariya, chorvachilik va naslchilik-seleksiya, pillachilik, yaylovlardan foydalanish sohalarini isloh qilish boʻyicha chora-tadbirlar va istiqbolli tashabbuslarni ishlab chiqish.
2. Xalqaro tashkilotlar va moliya institutlari, xalqaro baholash tashkilotlari va konsalting kompaniyalari tomonidan berilgan tavsiyalarni umumlashtirish hamda maqbul tashabbuslarning samarali implementatsiya qilinishini taʼminlash.
3. Qishloq xoʻjaligi sohasida sugʻurta xizmatlarini rivojlantirish boʻyicha takliflarni shakllantirish, ushbu yoʻnalishdagi maqbul tashabbuslarning amaliyotga tatbiq qilinishini taʼminlash.
4. Qishloq xoʻjaligini davlat tomonidan qoʻllab-quvvatlash mexanizmlarini takomillashtirish, shu jumladan sohaga ajratilayotgan subsidiya mablagʻlari samaradorligining tahlili asosida ularning natijadorligini oshirish.
5. Yetakchi ekspertlar, konsultantlar, maslahatchilar va jamoatchilikni keng jalb qilgan holda sohada resurstejamkor texnologiyalarni joriy qilish va intensiv usulda mahsulot yetishtirish, shuningdek, sohada xizmat koʻrsatishni ilgʻor xorijiy tajriba asosida amalga oshirish boʻyicha takliflarni tayyorlash.
6. Qishloq xoʻjaligi va oziq-ovqat mahsulotlarini ishlab chiqarish, saqlash, qayta ishlash va sotishda yuqori qoʻshilgan qiymat zanjirini yaratish, ularni Jahon savdo tashkiloti talablariga moslashtirish, qishloq xoʻjaligida iqlim oʻzgarishiga moslashish va uning oqibatlarini yumshatish yuzasidan takliflarni ishlab chiqish.
7. Qishloq xoʻjaligi va oziq-ovqat sohasini institutsional tahlil qilish va islohotlarning asosiy yoʻnalishlarini ishlab chiqish hamda sohaga bozor tamoyillarini joriy etish.
8. Xorijiy ekspertlar va xalqaro tashkilotlarni jalb etgan holda qishloq xoʻjaligi va oziq-ovqat sohasini raqamlashtirish, oziq-ovqat xavfsizligini taʼminlash hamda xizmat koʻrsatish jarayonlariga zamonaviy axborot tizimlarini joriy etish boʻyicha yangi tashabbuslarni ishlab chiqish.
9. Qishloq xoʻjaligi va oziq-ovqat sohasida kadrlarni tayyorlash, qayta tayyorlash va ularning malakasini oshirish boʻyicha takliflarni tayyorlash.
Oʻzbekiston Respublikasi Prezidentining 2024-yil 20-iyundagi PQ-227-son qaroriga
2-ILOVA
Qishloq xoʻjaligi va oziq-ovqat sohasini takomillashtirishning ustuvor yoʻnalishlarini amalga oshirish boʻyicha
“YOʻL XARITASI”

T/r

Chora-tadbirlar nomi

Amalga oshirish mexanizmi

Amalga oshirish muddati

Masʼul vazirlik va idoralar nomi

1.

Qishloq xoʻjaligini 2030-yilgacha rivojlantirish strategiyasi doirasida amalga oshirilgan natijalar va yoʻl qoʻyilgan kamchiliklarni tahlil qilgan holda asoslantirilgan takliflarni ishlab chiqish.

1. Xalqaro ekspertlar ishtirokida Qishloq xoʻjaligini 2030-yilgacha rivojlantirish strategiyasi doirasida amalga oshirilgan islohotlarni hamda erishilgan maqsadli koʻrsatkichlarni tahlil qilish.

2024-yil iyul

Qishloq xoʻjaligi vazirligi

(I. Abduraxmonov),

Loyiha ofisi, manfaatdor vazirlik va idoralar

2. Tahlil natijalari hamda ekspertlar xulosasi asosida Qishloq xoʻjaligini 2030-yilgacha rivojlantirish strategiyasi ustuvor vazifalarini takomillashtirish boʻyicha takliflar ishlab chiqish va Vazirlar Mahkamasiga kiritish.

2024-yil noyabr

2.

Qishloq xoʻjaligi va oziq-ovqat mahsulotlarini ishlab chiqarish va yuqori qiymat zanjirini yaratish hamda ularni Jahon savdo tashkiloti talablariga moslashtirish boʻyicha uzoq muddatli dasturni ishlab chiqish va tasdiqlash.

1. Qishloq xoʻjaligi va oziq-ovqat mahsulotlarini ishlab chiqarish va yuqori qiymat zanjirini yaratish boʻyicha takliflarni ishlab chiqish.

2024-yil iyun

Qishloq xoʻjaligi vazirligi

(I. Abduraxmonov),

Loyiha ofisi,

manfaatdor vazirlik va idoralar

2. Jahon savdo tashkiloti talablariga moslashtirish boʻyicha uzoq muddatli dasturni ishlab chiqib va Vazirlar Mahkamasiga kiritish.

2024-yil sentabr

3.

Qishloq xoʻjaligi va oziq-ovqat mahsulotlarini yetishtirish samaradorligini oshirishga va ijtimoiy ahamiyatga ega mahsulot turlarini ishlab chiqarishni intensivlashtirishga doir takliflar ishlab chiqish.

1. Ijtimoiy ahamiyatga ega boʻlgan qishloq xoʻjaligi va oziq-ovqat mahsulotlarini yetishtirish samaradorligini yanada oshirish boʻyicha dasturni ishlab chiqish.

2024-yil iyul

Qishloq xoʻjaligi vazirligi

(I. Abduraxmonov),

Loyiha ofisi,

manfaatdor vazirlik va idoralar

2. Qishloq xoʻjaligi va oziq-ovqat mahsulotlarini jadal ishlab chiqarishni tashkil etish choralarini koʻrish.

Doimiy

4.

Qishloq xoʻjaligini davlat tomonidan qoʻllab-quvvatlash mexanizmlarini takomillashtirish, shu jumladan sohaga ajratilayotgan subsidiya mablagʻlari samaradorligining tahlili asosida ularning natijadorligini oshirish holatini oʻrganish va takomillashtirish boʻyicha takliflarni tayyorlash.

1. Qishloq xoʻjaligini davlat tomonidan qoʻllab-quvvatlash mexanizmlarini takomillashtirish uchun takliflarni ishlab chiqish.

2024-yil iyun

Qishloq xoʻjaligi vazirligi

(I. Abduraxmonov),

Loyiha ofisi,

manfaatdor vazirlik va idoralar

2. Sohaga Ajratilayotgan subsidiya mablagʻlari samaradorligining tahlili asosida ularning natijadorligini oshirish holatini oʻrganish va takomillashtirish boʻyicha takliflarni tayyorlash.

2024-yil avgust

5.

Qishloq xoʻjaligi va oziq-ovqat sohasida soliqqa tortish tizimi tahlilini oʻtkazish hamda qishloq xoʻjaligi va oziq-ovqat mahsulotlarini ishlab chiqaruvchilarga soliq yukini kamaytirish boʻyicha tavsiyalar tayyorlash.

1. Qishloq xoʻjaligi va oziq-ovqat sohasida soliqqa tortish tizimini tahlil qilish.

2024-yil sentabr

Qishloq xoʻjaligi vazirligi

(I. Abduraxmonov),

Soliq qoʻmitasi

(Sh. Kudbiyev),

Loyiha ofisi

2. Qishloq xoʻjaligi va oziq-ovqat mahsulotlarini ishlab chiqaruvchilarga soliq yukini kamaytirish boʻyicha tavsiyalarni ishlab chiqish.

2024-yil sentabr

6.

Qishloq xoʻjaligi ekinlarining urugʻchiligi va koʻchatchiligini rivojlantirish boʻyicha qisqa va uzoq muddatli dasturni ishlab chiqib, tasdiqlash.

Xalqaro ekspertlarni jalb qilgan holda Qishloq xoʻjaligi ekinlarining sertifikatlangan urugʻchiligi va koʻchatchiligini rivojlantirish boʻyicha dastur ishlab chiqish va tasdiqlash.

2024-yil oktabr

Qishloq xoʻjaligi vazirligi

(I. Abduraxmonov,

A. Shukurov),

Loyiha ofisi

7.

Qishloq xoʻjaligi mahsulotlarining muhim eksport bozorlari geografiyasini kengaytirish, qishloq xoʻjaligi va oziq-ovqat mahsulotlariga yoʻnaltirilgan bozorlarni topish orqali eksport ulushi oshirilishini taʼminlash.

1. Eksport bozorlari geografiyasini kengaytirish uchun tashqi bozorlarni oʻrganish.

2024-yil iyul

Qishloq xoʻjaligi vazirligi

(I. Abduraxmonov),

Loyiha ofisi,

Oʻsimliklar karantini va himoyasi agentligi

(I. Ergashev)

2. Qishloq xoʻjaligi va oziq-ovqat mahsulotlarining eksport ulushi oshirish.

Doimiy

8.

Xalqaro moliya institutlari mablagʻlarini jalb qilgan holda chorvachilikning ozuqa bazasini mustahkamlash orqali goʻsht, sut va tuxum ishlab chiqarishni kengaytirish choralarini koʻrish.

1. Chorvachilikda ozuqa bazani mustahkamlash uchun ularni toʻliq xatlovdan oʻtkazish.

2024-yil avgust

Veterinariya va chorvachilikni rivojlantirish qoʻmitasi

(B. Norqobilov),

Qishloq xoʻjaligi vazirligi

(A. Shukurov)

2. Xatlov natijalariga koʻra, ozuqa yerlaridan samarali foydalanish boʻyicha amaliy chora-tadbirlar rejasini ishlab chiqish va tasdiqlash.

2024-yil oktabr

3. Xalqaro moliya institutlari hisobidan chorva komplekslarini tashkil qilish va omuxta-yem ishlab chiqarishga mablagʻlarni jalb qilish.

2024-yil dekabr

9.

Qishloq xoʻjaligi sohasida sugʻurta xizmatlarini rivojlantirish boʻyicha takliflarni shakllantirish, ushbu yoʻnalishdagi maqbul tashabbuslarni amaliyotga tatbiq qilishni taʼminlash.

1. Qishloq xoʻjaligi sohasida sugʻurta xizmatlarini rivojlantirish boʻyicha takliflarni ishlab chiqish.

2024-yil iyul

Qishloq xoʻjaligi vazirligi

(I. Abduraxmonov),

Loyiha ofisi, manfaatdor vazirlik va idoralar

2. Sugʻurta xizmatlarini rivojlantirish boʻyicha maqbul tashabbuslarni amaliyotga tatbiq qilish.

2024-yil sentabr

10.

Qishloq xoʻjaligi va oziq-ovqat sohasida davlat-xususiy sheriklik mexanizmlarini tashkil qilish va rivojlantirish boʻyicha takliflar ishlab chiqish.

Qishloq xoʻjaligi va oziq-ovqat sohasida davlat-xususiy sheriklik mexanizmlarini tashkil qilish boʻyicha taklif ishlab chiqish.

2024-yil dekabr

Qishloq xoʻjaligi vazirligi

(A. Qosimov),

Loyiha ofisi,

manfaatdor vazirlik va idoralar

11.

Yevropa ittifoqi va Jahon banki grant mablagʻlarini jalb qilgan holda sohaga ajratilayotgan barcha subsidiyalarni xatlovdan oʻtkazib, ularning samaradorligini oshirish va JST talablariga moslashtirish boʻyicha takliflarni ishlab chiqish.

1. Subsidiyalarni xatlovdan oʻtkazish uchun xorijiy ekspertlarni jalb qilish va xatlovdan oʻtkazish.

2024-yil iyul

Qishloq xoʻjaligi vazirligi

(I. Abduraxmonov,

A. Shukurov),

Iqtisodiyot va moliya vazirligi

(I. Norqulov),

Loyiha ofisi

2. Subsidiyalar samaradorligini oshirish va Jahon savdo tashkiloti talablariga moslashtirish boʻyicha doklad (hisobot) va takliflar tayyorlash.

2024-yil oktabr

12.

Kichik xoʻjaliklar va aholi tomorqasida yetishtirilgan qishloq xoʻjaligi mahsulotlarini sotish tizimini takomillashtirish.

1. Qishloq xoʻjaligi mahsulotlarini sotishga ixtisoslashgan elektron savdo platformasini yaratish, tegishli vazirlik va idoralar hamda “Online mahalla” elektron platformasi bilan integratsiya qilish.

2024-yil sentabr

Qishloq xoʻjaligi vazirligi

(Q. Yuldashev),

Loyiha ofisi

Iqtisodiyot va moliya vazirligi

(I. Norqulov)

2. Dastlabki bosqichda davlat buyurtmachilari (tibbiyot muassasalari, bogʻcha, maktab va boshqalar) tomonidan oziq-ovqat va qishloq xoʻjaligi mahsulotlarini xarid qilish tizimini yoʻlga qoʻyish.

2024-yil dekabr

13.

Sohada erishilgan natijalar hamda davlat siyosatining istiqbolli choralarini oʻzida qamrab olgan qishloq xoʻjaligining yillik hisoboti (Agriculture annual report) chop etilishini taʼminlash.

1. Qishloq xoʻjaligiga oid barcha oxirgi 3 yillik statistik maʼlumotlarni tahlil qilgan holda amalga oshirilayotgan islohotlar natijadorligini baholash.

2024-yil iyul

Qishloq xoʻjaligi vazirligi

(A. Shukurov),

Loyiha ofisi,

manfaatdor vazirlik va idoralar

2. Tahlillar hamda baholash natijalariga koʻra qishloq xoʻjaligining yillik hisoboti (Agriculture annual report)ga takliflar ishlab chiqish.

2024-yil dekabr

14.

Yosh mutaxassislar orasidan boshqaruv kadrlarini tayyorlash uchun stajirovka va stipendiyalar dasturini joriy etish. Bunda qishloq xoʻjaligi iqtisodiyoti va marketingi, qishloq xoʻjaligi va oziq-ovqat mahsulotlari bilan savdo-sotiq qilish hamda shu kabi boshqa ustuvor yoʻnalishlarda stipendiyalarni taqdim etish va xodimlar almashinuvi boʻyicha qisqa, oʻrta va uzoq muddatli dasturlarni amalga oshirish boʻyicha takliflar tayyorlash.

1. Qishloq xoʻjaligi vazirligi tizimidagi oliy taʼlim va ilmiy tashkilotlarning yosh olimlarini xorijiy stajirovkaga yuborish boʻyicha takliflarni ishlab chiqish.

2024-yil iyul

Qishloq xoʻjaligi vazirligi

(A. Shukurov),

Oliy taʼlim, fan va innovatsiyalar vazirligi

(Q. Sharipov),

Loyiha ofisi, manfaatdor vazirlik va idoralar

2. Agrar sohadagi yosh olimlar uchun stipendiyalarni joriy qilish va tanlovlar oʻtkazish.

2024-yil sentabr

3. Boshqaruv kadrlarini tayyorlash, tanlab olingan sohadagi yosh mutaxassislarni xorijiy stajirovkaga yuborish.

2024-yil noyabr

15.

Qishloq xoʻjaligi vazirligi va uning tizim tashkilotlarining innovatsion faoliyatini qoʻllab-quvvatlash tizimini oʻrganish va takomillashtirish boʻyicha takliflarni ishlab chiqib, tasdiqlash.

Soha tashkilotlarida innovatsion faoliyatini qoʻllab-quvvatlash tizimini oʻrganish va takomillashtirish boʻyicha takliflarni ishlab chiqish va oʻrnatilgan tartibda tasdiqlash.

2024-yil dekabr

Qishloq xoʻjaligi vazirligi

(A. Shukurov),

Loyiha ofisi,

manfaatdor vazirlik va idoralar

16.

Qishloq xoʻjaligi va oziq-ovqat mahsulotlarining asosiy tarmoqlarini baholash natijalariga koʻra, ichki va xalqaro bozorlarga eksport ulushini yanada oshirish strategiyasini ishlab chiqish va uni doimiy amalga oshirish choralarini koʻrish.

1. Qishloq xoʻjaligi va oziq-ovqat mahsulotlarining asosiy tarmoqlarini, ichki va xalqaro bozorlarni oʻrganish.

2024-yil sentabr

Qishloq xoʻjaligi vazirligi

(I. Abduraxmonov),

Loyiha ofisi,

Oʻsimliklar karantini va himoyasi agentligi

(I. Ergashev),

manfaatdor vazirlik va idoralar

2. Baholash natijalariga koʻra eksport ulushini yanada oshirish strategiyasini ishlab chiqish va uni doimiy amalga oshirish choralarini koʻrish.

2025-yil yanvar

Oʻzbekiston Respublikasi Prezidentining 2024-yil 20-iyundagi PQ-227-son qaroriga
3-ILOVA
“Qishloq xoʻjaligi va oziq-ovqat sohasidagi loyihalar markazi” loyiha ofisi tomonidan birinchi bosqichda faoliyati takomillashtiriladigan Qishloq xoʻjaligi vazirligining tizim tashkilotlari
roʻyxati

T/r

Tashkilot nomi

Masʼullar

1.

Qishloq xoʻjaligida bilim va innovatsiyalar milliy markazi

Qishloq xoʻjaligi vaziri I. Abduraxmonov

(Qishloq xoʻjaligida bilim va innovatsiyalar milliy markazi direktori Sh. Otajonov)

2.

Qishloq xoʻjaligini mexanizatsiyalashtirish ilmiy-tadqiqot instituti

Qishloq xoʻjaligi vaziri oʻrinbosari A. Shukurov

(Qishloq xoʻjaligida bilim va innovatsiyalar milliy markazi direktori Sh. Otajonov,

Qishloq xoʻjaligi texnikasi va texnologiyalarini sertifikatlash va sinash markazi direktori M. Xakimov)

3.

Qishloq xoʻjaligi texnikasi va texnologiyalarini sertifikatlash va sinash markazi

4.

Sirdaryo agrotexnologiyalar texnikumi

Qishloq xoʻjaligi vaziri oʻrinbosari A. Shukurov

(Toshkent davlat agrar universiteti birinchi prorektori S. Islamov)

5.

Veterinariya va chorvachilikni rivojlantirish qoʻmitasining “Oʻzzoovettaʼminot” DUK

Veterinariya va chorvachilikni rivojlantirish qoʻmitasi raisi B. Norqobilov

(“Oʻzzoovettaʼminot” DUK rahbari O. Alimardonov)

6.

Oʻsimliklar karantini va himoyasi agentligining Agrokimyoviy tuproq tahlil markazi

Oʻsimliklar karantini va himoyasi agentligi bosh direktori I. Ergashev

(“Agrokimyoviy tuproq tahlil markazi” DM direktori V. Muxiddinov)

7.

“Oʻzbekipaksanoat” uyushmasining “Fabrictex” MCHJ

Ipakchilik va jun sanoatini rivojlantirish qoʻmitasi raisi I. Ergashev

(“Oʻzbekipaksanoat” uyushmasi raisi v.v.b. I. Sayfullayev)

(Qonunchilik maʼlumotlari milliy bazasi, 21.06.2024-y., 07/24/227/0436-son; 22.11.2025-y., 06/25/223/1076-son)