Oʻzbekiston Respublikasi Prezidentining
Qarori
Ommaviy va professional futbolni har tomonlama rivojlantirishning qoʻshimcha chora-tadbirlari toʻgʻrisida
Mamlakatimizda futbolning ommaviyligini yanada oshirish, istiqbolli va iqtidorli futbolchilarni tanlash hamda professional darajada tayyorlashning yangi tizimini yoʻlga qoʻyish, trener va hakamlarni xalqaro talablar asosida tayyorlash va mahoratini yuksaltirish, futbol infratuzilmasini yaxshilash hamda oʻrnatilgan standartlarga moslashtirish maqsadida:
1. Quyidagilar futbolni yanada ommalashtirish va rivojlantirishning qoʻshimcha yoʻnalishlari etib belgilansin:
Xalqaro futbol assotsiatsiyalari federatsiyasi (FIFA)ning aholi, ayniqsa yoshlar oʻrtasida futbolni yanada ommalashtirishga qaratilgan maxsus dasturlari asosida har yili mahalla yoshlari oʻrtasida, jumladan maktabgacha taʼlim tashkilotlarida “Ommaviy futbol” (Grassroots) festival va musobaqalari, umumiy oʻrta taʼlim maktablari oʻquvchilari oʻrtasida “Maktablarda futbol”, oliy taʼlim muassasalari talabalari oʻrtasida “Talabalar ligasi” respublika musobaqalarini oʻtkazish;
yoshlarning futbolga qiziqishini oshirish, bu boradagi targʻibot ishlarini yanada kuchaytirish, ularning futbol bilan shugʻullanishi uchun yetarli shart-sharoitlarni yaratish;
ayollar oʻrtasida futbolni rivojlantirish, bu borada uzoq yillarga moʻljallangan istiqbolli reja va dasturlarni ishlab chiqish va amalga oshirish;
jismoniy imkoniyati cheklangan va nogironligi boʻlgan shaxslarning futbol bilan shugʻullanishi uchun zarur shart-sharoitlarni yaratish hamda ular oʻrtasida muntazam musobaqalar tashkil etish;
terma jamoalar va professional futbol klublari uchun sifatli sport zaxirasini yaratish, iqtidorli futbolchilarni aniqlash, tanlash va saralash (seleksiya)ning raqamlashtirilgan tizimini joriy qilish;
futbol infratuzilmasini moddiy-texnik jihatdan yanada yaxshilash hamda xalqaro talablarga moslashtirish;
futbol boʻyicha malakali trenerlar, hakamlar va mutaxassislarni tayyorlash, ularning malakasini oshirish va qayta tayyorlash tizimini yanada takomillashtirish, oʻquv-uslubiy qoʻllanmalar ishlab chiqish;
hududlarda futbol klublari, bolalar va oʻsmirlar, ommaviy futbolni rivojlantirish maqsadida chet ellik mutaxassislarni jalb etish va xalqaro hamkorlikni yanada kengaytirish;
ommaviy axborot vositalari va ijtimoiy tarmoqlarda futbolni targʻib qilish hamda bu jarayonda yuqori darajali axborot va multimedia mahsulotlaridan foydalanishni yanada kengaytirish.
2. Belgilab qoʻyilsinki:
a) har yili Oʻzbekiston futbol assotsiatsiyasi mablagʻlari hisobidan:
mart — iyun oylarida mahalla yoshlari hamda qizlari oʻrtasida “Ommaviy futbol” dasturi doirasida futbol festivallari;
10-dekabr — Butunjahon futbol kuni munosabati bilan aholi oʻrtasida ommaviy “fleshmob” tadbirlari;
sentabr — may oylarida umumiy oʻrta taʼlim maktablarida “Maktablarda futbol” dasturi doirasida futbol musobaqalari, mahorat saboqlari va festivallari oʻtkazib boriladi;
b) har yili sentabr — may oylarida oliy taʼlim muassasalarida Oʻzbekiston talabalar sporti assotsiatsiyasi mablagʻlari hisobidan moliyalashtiriladigan “Talabalar ligasi” dasturi doirasida uch bosqichli respublika futbol musobaqalari oʻtkaziladi.
3. Oʻzbekiston futbol assotsiatsiyasi (A. Azizov) Yoshlar siyosati va sport vazirligi (A. Ikramov), Maktabgacha va maktab taʼlimi vazirligi (H. Umarova) hamda Oliy taʼlim, fan va innovatsiyalar vazirligi (I. Abduraxmonov) bilan birgalikda bir oy muddatda:
“Ommaviy futbol”, “Maktablarda futbol” va “Talabalar ligasi” dasturlari doirasida futbol tadbirlarini oʻtkazishning yagona tartibini tasdiqlasin;
ushbu musobaqalar va turnirlarga puxta tayyorgarlik koʻrish va yuqori saviyada oʻtkazish boʻyicha chora-tadbirlar rejasini qabul qilsin;
mazkur musobaqalar va turnirlarni oʻtkazish jarayoni mahalliy va xorijiy ommaviy axborot vositalari hamda boshqa kommunikatsiya manbalarida keng yoritilishini taʼminlasin.
4. Oliy taʼlim, fan va innovatsiyalar vazirligi (I. Abduraxmonov) Oʻzbekiston futbol assotsiatsiyasi (A. Azizov) bilan birgalikda ikki oy muddatda:
davlat oliy taʼlim muassasalarida ularning moddiy-texnika bazasidan kelib chiqib, futbol boʻyicha doimiy faoliyat yurituvchi seksiyalar faoliyatini yoʻlga qoʻysin;
davlat oliy taʼlim muassasalaridagi mavjud sport inshootlari va futbol maydonlarining doimiy faoliyat koʻrsatishini taʼminlash choralarini koʻrsin;
har bir davlat oliy taʼlim muassasasining futbol va futzal boʻyicha jamoalarini shakllantirsin hamda ularning “Talabalar ligasi” dasturi doirasida oʻtkaziladigan respublika musobaqalarida toʻliq ishtirok etishini taʼminlasin;
oliy taʼlim muassasalari reytingini aniqlashda mazkur band talablari inobatga olinishini nazarda tutsin.
5. Quyidagilar:
futbol boʻyicha hududiy va milliy terma jamoalar hamda professional futbol klublari uchun sifatli sport zaxirasini yaratish maqsadida Yoshlar siyosati va sport vazirligi tizimidagi futbol mahorat maktablari amaldagi moliyalashtirish tartibini saqlab qolgan holda Oʻzbekiston futbol assotsiatsiyasi tasarrufiga oʻtkazilsin va ular futbol akademiyalari sifatida qayta tashkil etilsin;
Qoraqalpogʻiston Respublikasi, viloyatlar va Toshkent shahrida Oʻzbekiston futbol assotsiatsiyasi huzuridagi futbol maktablari (keyingi oʻrinlarda — futbol maktablari) tashkil qilinsin;
Yoshlar siyosati va sport vazirligi tizimidagi ayrim sport maktablari va ixtisoslashtirilgan sport maktablarining futbol maydonlari futbol maktablari balansiga oʻtkazilsin;
moslashtirilgan binolarda joylashtirilgan, past samarali futbol maktablarini optimallashtirish hisobiga ularning mol-mulki, sport anjomlari va trener kadrlari futbol maktablari moddiy-texnika va oʻquv bazasini mustahkamlashga yoʻnaltirilsin.
6. Belgilansinki:
futbol maktablari sport yoʻnalishidagi maktabdan tashqari sport-taʼlim muassasasi hisoblanadi;
futbol maktablari direktorlari, direktorlarning sport ishlari boʻyicha oʻrinbosarlari, trenerlari mehnatiga haq toʻlash, shuningdek, ularning mehnatini ragʻbatlantirishga sport maktablari xodimlari mehnatiga haq toʻlash va ragʻbatlantirishda belgilangan sharoitlar tatbiq etiladi;
futbol maktablari tibbiyot xodimlari mehnatiga haq toʻlash Vazirlar Mahkamasining 2005-yil 21-dekabrdagi “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi 276-son qaroriga muvofiq amalga oshiriladi, shuningdek, ularni moddiy ragʻbatlantirishda sport maktablari uchun belgilangan moddiy ragʻbatlantirish shartlari qoʻllaniladi;
kelgusi yillarda futbol maktablari professional futbol klublariga bosqichma-bosqich biriktiriladi.
7. Quyidagilar:
a) futbol maktablarining asosiy vazifalari etib belgilansin:
yuqori iqtidorga ega boʻlgan yosh futbolchilarni saralab olish (seleksiya) tizimini yoʻlga qoʻyish, bolalar va oʻsmirlarni futbol bilan muntazam shugʻullanishga jalb etish;
bolalar va oʻsmirlar oʻrtasida ularning sogʻligʻini mustahkamlashga, har tomonlama jismoniy kamol topishiga va sogʻlom turmush tarziga intilishni shakllantirishga yoʻnaltirilgan sport va tarbiyaviy ishlar olib borish;
bolalar va oʻsmirlarda futbol bilan shugʻullanish qobiliyatini erta aniqlash va ularda futbolga boʻlgan barqaror qiziqishni rivojlantirish;
futbol mashgʻulotlarini oʻtkazish uchun malakali trenerlar tarkibini tanlash, oʻquv-tarbiya tizimini tashkil etishning eng yangi usullarini qoʻllagan holda sport zaxirasi va yuqori mahoratli futbolchilar tayyorlash yuzasidan oʻquv-mashq jarayonini yoʻlga qoʻyish;
barcha yosh toifalari boʻyicha futbol akademiyalari va klublariga mahoratli sportchilarni yetkazib berish;
tajriba almashish maqsadida turli futbol tashkilotlari bilan hamkorlikni rivojlantirish, futbolchilarning sport mahoratini, shuningdek, trenerlar va boshqa mutaxassislarning kasb malakasini oshirish;
b) futbol maktablarini moliyalashtirish manbalari etib belgilansin:
Qoraqalpogʻiston Respublikasi budjeti, viloyatlar va Toshkent shahri mahalliy budjetlari mablagʻlari;
faoliyat ixtisosligi boʻyicha tovarlarni (ishlarni, xizmatlarni) realizatsiya qilishdan va maktabning ustavidagi vazifalarga muvofiq boʻlgan boshqa faoliyat turlaridan olingan daromadlar;
asosiy mashgʻulotlar oʻtkazilmaydigan vaqtda boʻsh turgan mol-mulkni ijaraga berishdan tushgan daromadlar;
yuridik va jismoniy shaxslarning homiylik xayriyalari;
qonunchilik hujjatlarida taqiqlanmagan boshqa manbalar.
8. Oʻzbekiston futbol assotsiatsiyasi (A. Azizov):
a) uch oy muddatda:
futbol maktablari va futbol akademiyalarining ustavini tasdiqlash, shuningdek, ularni belgilangan tartibda davlat roʻyxatidan oʻtkazish;
LexUZ sharhiQarang: Oʻzbekiston Respublikasi Prezidentining 2019-yil 4-dekabrdagi PF-5887-son “Oʻzbekistonda futbolni rivojlantirishni mutlaqo yangi bosqichga olib chiqish chora-tadbirlari toʻgʻrisida” Farmoni, Vazirlar Mahkamasining 2023-yil 9-sentabrdagi 458-son “Oʻzbekiston futbol assotsiatsiyasi tizimidagi futbol akademiyalari va futbol maktablari faoliyatini tashkil etish chora-tadbirlari toʻgʻrisida”gi qarori.
futbol maktablari va futbol akademiyalarini zamonaviy pedagogik texnologiyalarni egallagan malakali trenerlar hamda pedagog kadrlar bilan bosqichma-bosqich toʻldirish choralarini koʻrsin;
b) Oʻzbekiston Milliy olimpiya qoʻmitasi bilan birgalikda futbol maktablari va futbol akademiyalarida sportchilarni tayyorlash sifati yuzasidan doimiy nazoratni amalga oshirsin;
v) Kambagʻallikni qisqartirish va bandlik vazirligi hamda Iqtisodiyot va moliya vazirligi bilan birgalikda futbol maktablari va futbol akademiyalarining boshqaruv, texnik, xizmat koʻrsatuvchi va oʻquv-yordamchi xodimlarining shtat jadvalini ishlab chiqsin va tasdiqlasin;
g) Maktabgacha va maktab taʼlimi vazirligi bilan birgalikda umumiy oʻrta taʼlim maktablarining oʻquvchilarini futbol maktablari va futbol akademiyalarida shugʻullanish uchun jalb etish choralarini koʻrsin.
9. Oʻzbekiston futbol assotsiatsiyasi (A. Azizov) Yoshlar siyosati va sport vazirligi (A. Ikramov) bilan birgalikda uch oy muddatda Vazirlar Mahkamasining “Oʻzbekiston futbol assotsiatsiyasi huzuridagi futbol akademiyalari hamda futbol maktablarining boshqaruv, texnik, xizmat koʻrsatuvchi va oʻquv-yordamchi xodimlarini qoʻshimcha moddiy ragʻbatlantirish chora-tadbirlari toʻgʻrisida”gi qarori loyihasini Hukumatga kiritsin.
Oldingi tahrirga qarang.
10. Oʻzbekiston futbol assotsiatsiyasi hamda Sport vazirligining 2023-yil 1-iyuldan boshlab quyidagilarni nazarda tutuvchi takliflari maʼqullansin:
(10-bandning birinchi xatboshisi Oʻzbekiston Respublikasi Prezidentining 2024-yil 24-dekabrdagi PF-226-sonli Farmoni tahririda — Qonunchilik maʼlumotlari milliy bazasi, 25.12.2024-y., 06/24/226/1060-son)
nodavlat futbol maktablari va futbolni rivojlantirish sohasida faoliyat yuritayotgan boshqa nodavlat tashkilotlar (nodavlat futbol muassasalari) uchun Oʻzbekiston futbol assotsiatsiyasi aʼzosi boʻlishi talabi oʻrnatiladi;
Oʻzbekiston futbol assotsiatsiyasi tomonidan nodavlat futbol muassasalarining reytingi yuritiladi hamda reyting natijalari keng jamoatchilikka eʼlon qilib boriladi.
Oldingi tahrirga qarang.
11. Sport vazirligi (A. Ikramov) hamda Oʻzbekiston futbol assotsiatsiyasi (A. Azizov) quyidagilarni amalga oshirsin:
(11-bandning birinchi xatboshisi Oʻzbekiston Respublikasi Prezidentining 2024-yil 24-dekabrdagi PF-226-sonli Farmoni tahririda — Qonunchilik maʼlumotlari milliy bazasi, 25.12.2024-y., 06/24/226/1060-son)
Xorvatiya, Yaponiya va boshqa davlatlarning tajribasini malakali mutaxassislarni jalb qilgan holda oʻzbek futboliga tatbiq etish. Bunda, Oʻzbekiston futbol assotsiatsiyasi hamda hududiy bolalar-oʻsmirlar futbol akademiyalarining “texnik direktor” lavozimiga xorijiy davlatlarning tajribasi va tizimini joriy qilish boʻyicha malakali mutaxassislarni jalb qilish;
Xalqaro futbol assotsiatsiyalari federatsiyasi (FIFA), Osiyo futbol konfederatsiyasi talablariga muvofiq futbol uchrashuvlarida adolat va shaffoflikni taʼminlash maqsadida VAR (Video Assistant Referee, video yordamchi hakam) tizimidan foydalanishni yanada kengaytirish.
Oldingi tahrirga qarang.
(11-bandning toʻrtinchi xatboshisi Oʻzbekiston Respublikasi Prezidentining 2024-yil 28-maydagi PF-83-sonli Farmoniga asosan chiqarilgan — Qonunchilik maʼlumotlari milliy bazasi, 29.05.2024-y., 06/24/83/0373-son)
12. Belgilab qoʻyilsinki:
sport maktablari va ixtisoslashtirilgan sport maktablarining futbol boʻyicha trenerlariga bosqichma-bosqich Osiyo futbol konfederatsiyasining trenerlar taʼlimi boʻyicha talablari joriy etiladi;
Oʻzbekiston futbol assotsiatsiyasi sport maktablari va ixtisoslashtirilgan sport maktablarining futbol guruhlari faoliyatini samarali tashkil etish hamda iqtidorli futbolchilarni seleksiya qilish orqali ularni keyingi bosqichdagi futbol maktablari va akademiyalariga yoʻnaltirib borish yuzasidan doimiy monitoring oʻrnatsin.
13. “Oʻzmetkombinat” AJ (R. Pirmatov), “Olmaliq KMK” AJ (A. Xursanov), “Navoiy KMK” AJ (Q. Sanaqulov) va “Oʻzbekneftgaz” AJ (B. Sidiqov)larning futbolni rivojlantirishga homiylik xayriya yordamini koʻrsatish toʻgʻrisidagi taklifiga rozilik berilsin.
Vazirlar Mahkamasi (A.N. Aripov):
bir oy muddatda futbol boʻyicha Oʻzbekiston Superligasi va Proligasining professional futbol klublarini homiy tashkilotlarga biriktirsin;
Oʻzbekiston olimpiya terma jamoasining 2024-yil Parij shahri (Fransiya) va 2028-yil Los-Andjeles shahri (AQSH)da boʻlib oʻtadigan yozgi Olimpiya oʻyinlarida ishtirok etishini taʼminlash maqsadida Oʻzbekiston Milliy olimpiya qoʻmitasi huzuridagi “OLYMPIC Professional futbol klubi”ni qoʻshimcha moliyaviy qoʻllab-quvvatlash boʻyicha zarur chora-tadbirlarni belgilab borsin.
Bunda, Oʻzbekiston futbol assotsiatsiyasi, uning hududiy boʻlinmalari, Oʻzbekiston Professional futbol ligasi va professional futbol klublarining faoliyatini moliyalashtirishga yuridik shaxslar tomonidan yoʻnaltiriladigan homiylik va xayriya yordami shaklidagi mablagʻlar summasi foyda soligʻini hisoblashda soliq solinadigan foydadan chegirib tashlanadi.
14. Oʻzbekiston futbol assotsiatsiyasi (A. Azizov) Yoshlar siyosati va sport vazirligi (A. Ikramov), Iqtisodiyot va moliya vazirligi (Sh. Kudbiyev), Davlat aktivlarini boshqarish agentligi (A. Ortiqov) bilan birgalikda uch oy muddatda Oʻzbekiston Superligasi va Proligasining professional futbol klublariga homiylik va xayriya koʻrsatgan, shuningdek, ommaviy savdolarga qoʻyilgan futbol klublarini sotib olgan investorlarni davlat tomonidan qoʻllab-quvvatlash hamda ularga qoʻshimcha yengilliklar yaratish yuzasidan takliflarni kiritsin.
15. 2026-yil 1-aprelga qadar Oʻzbekiston futbol assotsiatsiyasi, uning hududiy boʻlinmalari, Oʻzbekiston Professional futbol ligasi, Oʻzbekiston futbol hakamlari markazi, professional futbol klublari va akademiyalari belgilangan tartibda shakllantiriladigan roʻyxatga asosan futbol boʻyicha sport obyektlarining moddiy-texnika bazasini mustahkamlash uchun zarur boʻlgan, Oʻzbekiston Respublikasida ishlab chiqarilmaydigan sport asbob-uskunalari va texnologiyalari, inventarlari, translyatsiya qilish bilan bogʻliq barcha asbob-uskunalar va texnikalar, farmakologiya mahsulotlari, sport ozuqalari, futbol (futzal) maydonlari uchun sunʼiy oʻtlar, shokpad, granulalar, maxsus yelim va maxsus professional sport kiyimlari, maxsus texnika va transport vositalarini olib kirganlik uchun bojxona bojini toʻlashdan ozod qilinsin.
16. Ustav fondida davlat ulushi 50 foiz va undan ortiq boʻlgan professional futbol klublariga sport asbob-uskunalari, inventarlari, farmakologiya mahsulotlari, sport ozuqalari, futbol (futzal) maydonlari uchun sunʼiy oʻtlar, shokpad, granulalar, maxsus yelim, maxsus professional sport kiyimlarini, istisno tariqasida, toʻgʻridan-toʻgʻri shartnoma asosida xarid qilishga ruxsat berilsin.
17. Oʻzbekiston futbol assotsiatsiyasi huzurida yuridik shaxs maqomiga ega boʻlmagan Oʻzbekiston futbolini qoʻllab-quvvatlash jamgʻarmasi (keyingi oʻrinlarda — Jamgʻarma) tashkil etilsin.
18. Quyidagilar Jamgʻarma mablagʻlarini shakllantirishning manbalari etib belgilansin:
Davlat budjetidan ajratiladigan mablagʻlar;
“Oʻzmetkombinat” AJ, “Olmaliq KMK” AJ, “Navoiy KMK” AJ va “Oʻzbekneftgaz” AJlarning homiylik mablagʻlari;
jismoniy va yuridik shaxslarning, shu jumladan Oʻzbekiston Respublikasi norezidentlarining homiylik xayriyalari;
Jamgʻarmaning vaqtincha boʻsh turgan mablagʻlarini tijorat banklari depozitlariga joylashtirishdan olinadigan daromadlar;
xalqaro moliya tashkilotlari va xorijiy davlatlarning grantlari va texnik koʻmaklashish mablagʻlari;
qonunchilik hujjatlarida taqiqlanmagan boshqa manbalar.
19. Iqtisodiyot va moliya vazirligi (Sh. Kudbiyev) 2023-yildan boshlab har yili Jamgʻarmani qoʻllab-quvvatlash uchun Davlat budjetidan 25 milliard soʻm yoʻnaltirsin.
20. Belgilansinki, Jamgʻarma mablagʻlari quyidagi maqsadlarga sarflanadi:
ommaviy va professional futbolni rivojlantirish, zamonaviy asbob-uskuna va jihozlar xarid qilish;
futbol mutaxassislarini ilgʻor oʻqitish metodikalari va innovatsiyalarga oʻrgatish tizimini yoʻlga qoʻyish xarajatlarini qoplash, shu jumladan xorijdan jalb etilgan mutaxassislarni ragʻbatlantirish;
zamonaviy futbol texnologiyalarini xarid qilish va joriy etish;
futbol boʻyicha mahalliy mutaxassislarning tajribasini xorijiy mamlakatlarda oshirish bilan bogʻliq xarajatlarni qoplash;
alohida namuna koʻrsatgan terma jamoalarni moddiy ragʻbatlantirish, iqtidorli yoshlarni futbolga jalb etish, yangi futbolchilar avlodining ishonchli zaxirasini shakllantirish;
Oʻzbekiston futbolchilari, trenerlar va hakamlar tarkibining professional mahoratini oshirishda chet el futbol klublari va federatsiyalari bilan xalqaro hamkorlikni rivojlantirish;
yuqori mahoratli futbolchilar va sport zaxirasini tayyorlashning samarali metodlarini ishlab chiqish boʻyicha ilmiy-metodik tadqiqotlar oʻtkazishda koʻmaklashish.
21. Yoshlar siyosati va sport vazirligi (A. Ikramov) Raqamli texnologiyalar vazirligi (Sh. Shermatov), Iqtisodiyot va moliya vazirligi (Sh. Kudbiyev), Adliya vazirligi (A. Toshqulov), Oʻzbekiston futbol assotsiatsiyasi (A. Azizov) bilan birgalikda maxsus ishchi guruhni tashkil qilgan holda 2023-yil yakuniga qadar ilgʻor xorij tajribasi asosida futbolni moliyalashtirish tizimini kengaytirishda bukmekerlik faoliyatini amalga oshirish boʻyicha takliflarni Vazirlar Mahkamasiga kiritsin.
22. Oʻzbekiston futbol assotsiatsiyasi (A. Azizov) Yoshlar siyosati va sport vazirligi (A. Ikramov) bilan birgalikda 2023-yil yakuniga qadar:
respublika hududlaridagi barcha turdagi davlat va nodavlat taʼlim muassasalari, klublarida futbol bilan shugʻullanayotgan, shuningdek, tuman (shahar), viloyat va respublika sport va ommaviy jismoniy tarbiya tadbirlarining kalendar rejasiga kiritilgan musobaqalarda qatnashuvchi futbolchilar toʻgʻrisidagi yagona maʼlumotlar bazasini shakllantirsin va uning Xalqaro futbol assotsiatsiyalari federatsiyasi (FIFA)ning FIFA-CONNECT platformasiga integratsiya qilinishini taʼminlasin;
joylarda futbol bilan shugʻullanayotgan, shuningdek, musobaqalarda qatnashuvchi barcha futbolchilar toʻgʻrisidagi maʼlumotlarni toʻliq raqamlashtirsin va yagona maʼlumotlar bazasini yaratsin.
Bunda, yagona maʼlumotlar bazasini yaratish, ishga tushirish va keyinchalik texnik qoʻllab-quvvatlash Jamgʻarma mablagʻlari hisobidan amalga oshiriladi.
23. Raqamli texnologiyalar vazirligi (Sh. Shermatov) uch oy muddatda Oʻzbekiston futbol assotsiatsiyasi murojaatiga asosan futbol boʻyicha Superliga, Proliga va Oʻzbekiston kubogi musobaqalari oʻtkaziladigan oʻyingohlarni Oʻzbekiston futbol hakamlari markazi bilan bogʻlaydigan optik tolali aloqa liniyalari bilan taʼminlasin.
24. Yoshlar siyosati va sport vazirligi (A. Ikramov) Oliy taʼlim, fan va innovatsiyalar vazirligi (I. Abduraxmonov), Oʻzbekiston futbol assotsiatsiyasi (A. Azizov), Oʻzbekiston davlat jismoniy tarbiya va sport universiteti bilan birgalikda:
a) 2023/2024 oʻquv yiliga qadar xalqaro tajriba asosida Oʻzbekistonda futbolchilarni tayyorlash modelini ishlab chiqsin;
b) 2023-yildan boshlab har yili:
futbol sohasidagi xalqaro tashkilotlarning olimlari, mutaxassislari ishtirokida seminar-treninglar, shuningdek, ilmiy-amaliy konferensiyalar va anjumanlar oʻtkazish choralarini koʻrsin;
Oʻzbekiston davlat jismoniy tarbiya va sport universitetining futbol yoʻnalishi boʻyicha talabalari bitiruv oldi amaliyotini hududiy futbol akademiyalari va professional futbol klublarida tashkil etsin;
Milliy va xorijiy professional futbol klublari mutaxassislarini Oʻzbekiston davlat jismoniy tarbiya va sport universitetining futbol boʻyicha dars jarayonlariga jalb qilsin.
25. Quyidagilar:
Oʻzbekiston futbol assotsiatsiyasi tasarrufidagi sport-taʼlim muassasalari va inshootlarini rekonstruksiya qilish va kapital taʼmirlashning manzilli roʻyxati 1-ilovaga muvofiq;
Oʻzbekiston futbol assotsiatsiyasi huzuridagi futbol maktablari roʻyxati 2-ilovaga muvofiq;
Professional futbol klublari huzuridagi faoliyati maqbullashtirilayotgan futbol maktablari roʻyxati 3-ilovaga muvofiq tasdiqlansin.
26. Toshkent viloyati, Yuqori Chirchiq tumanida joylashgan “Doʻstlik” stadionida Xalqaro futbol assotsiatsiyalari federatsiyasi (FIFA) tomonidan 2022-2023-yillarda 4 ta zamonaviy futbol maydoni qurish uchun 4,2 million AQSH dollari miqdoridagi mablagʻlar ajratilganligi maʼlumot uchun qabul qilinsin.
Oldingi tahrirga qarang.
Yoshlar siyosati va sport vazirligi, Qurilish va uy-joy kommunal xoʻjaligi vazirligi, Oʻzbekiston futbol assotsiatsiyasi va Toshkent viloyati hokimligining 2024-2025-yillarda Toshkent viloyati, Yuqori Chirchiq tumanida joylashgan “Doʻstlik” stadioni hududida futbol boʻyicha barcha yosh toifasidagi terma jamoalar shugʻullanishi uchun budjet mablagʻlari hisobidan moliyalashtiriladigan Terma jamoalar markazini qurish toʻgʻrisidagi taklifiga rozilik berilsin.
(26-bandning ikkinchi xatboshisi Oʻzbekiston Respublikasi Prezidentining 2024-yil 28-maydagi PF-83-sonli Farmoni tahririda — Qonunchilik maʼlumotlari milliy bazasi, 29.05.2024-y., 06/24/83/0373-son)
Bunda, Terma jamoalar markazida 280 oʻrinli zamonaviy mehmonxona, mini-futbol uchun yopiq sport maneji, ilmiy-tadqiqot, tibbiyot va reabilitatsiya markazi, suzish havzasi, oshxona binolari qurilishi, shuningdek, ushbu binolarda Respublika bolalar-oʻsmirlar futbol akademiyasi joylashtirilishi inobatga olinsin.
27. Qurilish va uy-joy kommunal xoʻjaligi vazirligi (B. Zakirov) mazkur qaror asosida qurilishi va taʼmirlanishi koʻzda tutilgan inshootlarning loyiha hujjatlarini ishlab chiqishda eng maqbul meʼmoriy hamda texnik yechimlar qoʻllanilishini, ularni innovatsion texnologiyalarga asoslangan, energiya tejamkor va tez barpo etiladigan yengil konstruksiya va materiallardan qurish, shinamlik va ekologik xavfsizlik talablariga muvofiqlik yuzasidan loyiha-smeta hujjatlarini kompleks ekspertizadan oʻtkazishni taʼminlasin va qurilish-montaj ishlarining sifatli bajarilishi ustidan doimiy davlat arxitektura-qurilish nazoratini oʻrnatsin.
Oldingi tahrirga qarang.
Belgilansinki, mazkur qaror asosida qurilishi va taʼmirlanishi koʻzda tutilgan inshootlarning loyiha hujjatlari Sport vazirligi hamda Oʻzbekiston futbol assotsiatsiyasi bilan kelishiladi.
(27-bandning ikkinchi xatboshisi Oʻzbekiston Respublikasi Prezidentining 2024-yil 24-dekabrdagi PF-226-sonli Farmoni tahririda — Qonunchilik maʼlumotlari milliy bazasi, 25.12.2024-y., 06/24/226/1060-son)
28. Iqtisodiyot va moliya vazirligi (Sh. Kudbiyev) 2023-2024-yillarda Davlat budjeti mablagʻlari hisobidan mazkur qarorning 1-ilovasi bilan tasdiqlangan Oʻzbekiston futbol assotsiatsiyasi tasarrufidagi sport-taʼlim muassasalari va inshootlarini rekonstruksiya qilish va kapital taʼmirlashning manzilli roʻyxatiga muvofiq qurilish-taʼmirlash ishlarini olib borish uchun zarur mablagʻlar ajratilishini nazarda tutsin.
Oldingi tahrirga qarang.
29. Kambagʻallikni qisqartirish va bandlik vazirligi (B. Musayev) Sport vazirligi hamda Oʻzbekiston futbol assotsiatsiyasining talabnomalariga koʻra oʻrnatilgan toʻlovlarni undirmagan holda Oʻzbekiston Respublikasiga sport turlari boʻyicha chet ellik trener, sportchi va boshqa mutaxassislarni jalb etishga ruxsatnomalar, shuningdek, mazkur chet el fuqarolariga Oʻzbekiston Respublikasi hududida mehnat faoliyatini amalga oshirish huquqiga tasdiqnomalar berilishi (uzaytirilishi)ni belgilangan tartibda taʼminlasin.
(29-band Oʻzbekiston Respublikasi Prezidentining 2024-yil 24-dekabrdagi PF-226-sonli Farmoni tahririda — Qonunchilik maʼlumotlari milliy bazasi, 25.12.2024-y., 06/24/226/1060-son)
30. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari hududiy futbol assotsiatsiyalarining rahbarlari etib belgilansin.
Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari:
hududiy futbol assotsiatsiyalari, shuningdek, futbol maktablari infratuzilmasi va moddiy-texnik bazasini yanada mustahkamlash, ularni zamonaviy asbob-uskuna va jihozlar bilan taʼminlash choralarini koʻrsin;
turli yosh toifasidagi hududiy terma jamoalar oʻquv-mashgʻulot markazlarini Xalqaro futbol assotsiatsiyalari federatsiyasi (FIFA) talablariga muvofiq barpo etish uchun Qoraqalpogʻiston Respublikasi budjetining, viloyatlar va Toshkent shahri mahalliy budjetlarining qoʻshimcha mablagʻlari, jismoniy va yuridik shaxslarning homiylik xayriyalari hamda qonunchilik hujjatlarida taqiqlanmagan boshqa manbalar hisobidan mablagʻ ajratilishini taʼminlasin;
har bir tuman (shahar)da kamida bittadan erkaklar, ayollar futboli va mini-futbol boʻyicha futbol jamoalari tashkil etilishi va ularning musobaqalarda muntazam ishtirokini taʼminlasin.
31. Oʻzbekiston Milliy axborot agentligi (A. Koʻchimov), Oʻzbekiston Milliy teleradiokompaniyasi (A. Xadjayev) Yoshlar siyosati va sport vazirligi hamda Oʻzbekiston futbol assotsiatsiyasi bilan birgalikda mazkur qarorning mazmun-mohiyati va amaliy ahamiyatini yoritishga oid maqolalar, brifinglar, tematik telekoʻrsatuvlar tashkil etsin.
32. Yoshlar siyosati va sport vazirligi manfaatdor tashkilotlar bilan birgalikda uch oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
33. Mazkur qarorning ijrosini samarali tashkil qilishga masʼul va shaxsiy javobgar etib Yoshlar siyosati va sport vaziri A.I. Ikramov hamda Oʻzbekiston futbol assotsiatsiyasi raisi A.A. Azizov belgilansin.
Qaror ijrosini muhokama qilib borish, masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining maslahatchisi O.Q. Abduraxmonov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2023-yil 7-aprel,
PQ-115-son
Oʻzbekiston Respublikasi Prezidentining 2023-yil 7-apreldagi PQ-115-son qaroriga
1-ILOVA
1-ILOVA
Oʻzbekiston futbol assotsiatsiyasi tasarrufidagi taʼlim muassasalari va inshootlarini rekonstruksiya qilish va kapital taʼmirlashning
manzilli roʻyxati
Oldingi tahrirga qarang.
T/r | Obyekt manzili va nomi | Amalga oshirish muddati | Oʻlchov birligi | Loyiha quvvati, jami | 2023-yilda foydalanishga topshiriladigan quvvat | Obyektning dastlabki hisob-kitob qiymati (mln soʻm) | Dasturga kiritish uchun asos |
Jami: | 164 000,0 | ||||||
Qoraqalpogʻiston Respublikasi | |||||||
1. | Nukus shahridagi “Turon” oʻyingohini xalqaro talablarga mos ravishda rekonstruksiya qilish | 2023-yil | obyekt | 1 | 1 | 20 000,0 | Oʻzbekiston Respublikasi Prezidentining Qoraqalpogʻiston Respublikasiga tashrifi bayoni (07.03.2022-y., 02-RA 1-3183-son) |
2. | Nukus shahri futbol akademiyasining mavjud bino va inshootlarini mukammal taʼmirlash | 2024-yil | obyekt | 1 | 1 | 3 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Andijon viloyati | |||||||
3. | Andijon futbol akademiyasining mavjud bino va inshootlarini rekonstruksiya qilish (120 oʻrinli yotoqxona va sunʼiy qoplamali stadion — 70x110 m qurish) | 2024-yil | yotoq oʻrin | 60 | 60 | 9 500,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Buxoro viloyati | |||||||
4. | Buxoro viloyati futbol akademiyasini rekonstruksiya qilish (oshxona, kiyinish xonalarini qurish va hududni obodonlashtirish) | 2024-2025-yillar | obyekt | 1 | 1 | 2 500,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Qashqadaryo viloyati | |||||||
5. | Qashqadaryo viloyati futbol akademiyasini qurish (154 oʻrinli yotoqxona, oshxona, 24x48 m oʻlchamdagi sport zal va 110x78 m oʻlchamdagi sunʼiy qoplamali oʻyingoh, 110x78 m oʻlchamdagi tabiiy qoplamali oʻyingoh) | 2024-2025-yillar | yotoq oʻrin | 154 | 154 | 20 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
obyekt | 1 | 1 | |||||
Navoiy viloyati | |||||||
6. | Navoiy viloyati futbol akademiyasining mavjud bino va inshootlarini rekonstruksiya qilish (70x100 m oʻlchamdagi sunʼiy qoplamali futbol maydoni qurish, yotoqxona va oʻquv binosini mukammal taʼmirlash) | 2024-yil | obyekt | 1 | 1 | 4 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Namangan viloyati | |||||||
7. | Namangan futbol akademiyasini qurish (154 oʻrinli yotoqxona, oshxona va hududni obodonlashtirish), 2-bosqich | 2024-yil | yotoq oʻrin | 154 | 154 | 12 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Samarqand viloyati | |||||||
8. | Samarqand viloyati futbol akademiyasiga yengil konstruksiyali sendvich paneldan 24x48 m oʻlchamdagi sport zali qurish | 2024-yil | obyekt | 1 | 1 | 7 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Sirdaryo viloyati | |||||||
9. | Sirdaryo viloyati futbol akademiyasining mavjud bino va inshootlarini rekonstruksiya qilish (40x60 m oʻlchamdagi sunʼiy qoplamali oʻyingoh qurish, mavjud bino va inshootlarini mukammal taʼmirlash) | 2024-yil | obyekt | 1 | 1 | 5 500,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Surxondaryo viloyati | |||||||
10. | Surxondaryo viloyati futbol akademiyasining mavjud bino va inshootlarini rekonstruksiya qilish (90 oʻrinli yotoqxona, 70x100 m oʻlchamdagi sunʼiy qoplamali futbol maydoni qurish, oshxona, mavjud bino va inshootlarini mukammal taʼmirlash) | 2024-2025-yillar | yotoq oʻrin | 90 | 90 | 10 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Toshkent viloyati | |||||||
11. | Toshkent viloyati futbol akademiyasini rekonstruksiya qilish, mavjud bino va inshootlarini mukammal taʼmirlash (24x48 m oʻlchamdagi sport zalini qurish, oʻquv binosi, yotoqxona va oshxona binolarini mukammal taʼmirlash) | 2024-2025-yillar | obyekt | 1 | 1 | 15 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
12. | Yuqori Chirchiq tumani, Maʼnaviyat koʻchasi, 83-uyda joylashgan “Doʻstlik” stadioni hududida Terma jamoalar markazini qurish (280 oʻrinli zamonaviy mehmonxona, mini-futbol uchun yopiq sport maneji, ilmiy-tadqiqot, tibbiyot va reabilitatsiya markazi, suzish havzasi, oshxona binolarini qurish) | 2025-yil | obyekt | 1 | 1 | 40 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Fargʻona viloyati | |||||||
13. | Fargʻona viloyati futbol akademiyasining mavjud bino va inshootlarini rekonstruksiya qilish (60x88 m oʻlchamdagi sunʼiy qoplamali futbol maydoni qurish, mavjud bino va inshootlarini mukammal taʼmirlash) | 2024-yil | obyekt | 1 | 1 | 5 500,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Xorazm viloyati | |||||||
14. | Xorazm viloyati futbol akademiyasining mavjud bino va inshootlarini rekonstruksiya qilish (24x48 m oʻlchamli sendvich panelli sport zali qurish) | 2024-yil | obyekt | 1 | 1 | 7 000,0 | Oʻzbekiston Respublikasi Prezidentining 2019-yil 4-dekabrdagi PF-5887-son Farmonining 5-ilovasi |
Toshkent shahri | |||||||
15. | Futbol boʻyicha Respublika oliy sport mahorat maktabining sport bazasini hamda maʼmuriy binosini mukammal taʼmirlash | 2024-yil | obyekt | 1 | 1 | 3 000,0 | Oʻzbekiston Respublikasi Prezidentining 2021-yil 5-noyabrdagi PQ-5281-son qarorining 1-ilovasi |
(1-ilova Oʻzbekiston Respublikasi Prezidentining 2024-yil 24-dekabrdagi PF-226-sonli Farmoni tahririda — Qonunchilik maʼlumotlari milliy bazasi, 25.12.2024-y., 06/24/226/1060-son)
Oʻzbekiston Respublikasi Prezidentining 2023-yil 7-apreldagi PQ-115-son qaroriga
2-ILOVA
2-ILOVA
Oʻzbekiston futbol assotsiatsiyasi huzurida yangidan tashkil etiladigan futbol maktablari
ROʻYXATI
Oldingi tahrirga qarang.
|
T/r |
Futbol maktablari nomi |
Futbol maktablarining yuridik manzili |
|
1. |
Qoraqalpogʻiston Respublikasi futbol maktabi |
Nukus shahri, Yedige koʻchasi, 16-uy |
|
2. |
Andijon viloyati futbol maktabi |
Andijon shahri, Boʻston dahasi, Usmon Yusupov koʻchasi |
|
3. |
Buxoro viloyati futbol maktabi |
Buxoro shahri, Pridastgir koʻchasi, 9-uy |
|
4. |
Jizzax viloyati futbol maktabi |
Jizzax shahri, Bobur mahallasi, Olimpiada koʻchasi, 4-uy |
|
5. |
Qashqadaryo viloyati futbol maktabi |
Shahrisabz shahri, Buyuk Ipak yoʻli koʻchasi, 122-uy |
|
6. |
Navoiy viloyati futbol maktabi |
Karmana tumani, Bishkent MFY |
|
7. |
Namangan viloyati futbol maktabi |
Davlatobod tumani, Islom Karimov koʻchasi, 17a-uy |
|
8. |
Samarqand viloyati futbol maktabi |
Pastdargʻom tumani, Balxyon mahallasi, Samarqand shohkoʻchasi, 48-uy |
|
9. |
Sirdaryo viloyati futbol maktabi |
Guliston shahri, Sayxun koʻchasi, raqamsiz uy |
|
10. |
Surxondaryo viloyati futbol maktabi |
Jarqoʻrgʻon tumani, Surxon sohil mahallasi, Paxtakor stadioni |
|
11. |
Toshkent viloyati futbol maktabi |
Yuqori Chirchiq tumani, Qorasuv MFY, Hamkorlik koʻchasi, 36-uy |
|
12. |
Fargʻona viloyati futbol maktabi |
Fargʻona shahri, S. Timur koʻchasi, 26a-uy |
|
13. |
Xorazm viloyati futbol maktabi |
Yangibozor tumani, Kuxinur koʻchasi, 1-uy |
|
14. |
Toshkent shahri futbol maktabi |
Shayxontohur tumani, Islom Karimov koʻchasi, 98a-uy |
(2-ilova Oʻzbekiston Respublikasi Prezidentining 2023-yil 12-iyundagi PF-92-sonli Farmoni tahririda — Qonunchilik maʼlumotlari milliy bazasi, 13.06.2023-y., 06/23/92/0366-son)
Oʻzbekiston Respublikasi Prezidentining 2023-yil 7-apreldagi PQ-115-son qaroriga
3-ILOVA
3-ILOVA
Professional futbol klublari huzuridagi faoliyati maqbullashtirilayotgan futbol maktablari
ROʻYXATI
|
T/r |
Futbol maktabi nomi |
Futbol maktabining yuridik manzili |
Futbol maktabi faoliyatiga oid qoidalar |
|
1. |
Buxoro viloyati futbol assotsiatsiyasi huzuridagi (28-son) futbol maktabi |
Buxoro viloyati, Buxoro shahri, I. Moʻminov koʻchasi, 9-uy |
Mazkur futbol maktabi tugatilib, Buxoro viloyati futbol maktabiga birlashtiriladi |
|
2. |
“Mashʼal” professional futbol klubiga biriktirilgan Kasbi tumanidagi futbol maktabi |
Qashqadaryo viloyati, Kasbi tumani, Mugʻlon shaharchasi, A. Navoiy koʻchasi |
Mazkur futbol maktablari faoliyati tugatilib, Qashqadaryo viloyati futbol maktabiga birlashtiriladi |
|
3. |
“Nasaf” professional futbol klubiga biriktirilgan Nishon tumanidagi futbol maktabi |
Qashqadaryo viloyati, Nishon tumani, Nurli koʻchasi, 3-uy |
(Qonunchilik maʼlumotlari milliy bazasi, 08.04.2023-y., 07/23/115/0201-son; 13.06.2023-y., 06/23/92/0366-son; 29.05.2024-y., 06/24/83/0373-son; 25.12.2024-y., 06/24/226/1060-son)
