Vazirlar Mahkamasining “O‘zbekiston Respublikasi Vazirlar Mahkamasi huzuridagi Geodeziya, kartografiya va davlat kadastri bosh boshqarmasi faoliyatini tashkil etish to‘g‘risida” 1996-yil 31-yanvardagi 44-son qaroriga muvofiq, O‘zbekiston Respublikasi Davlat kadastrlari yagona tizimining faoliyat ko‘rsatishini ta’minlash maqsadida Vazirlar Mahkamasi qaror qiladi:

1. Quyidagilar tasdiqlansin:

O‘zbekiston Respublikasi Davlat kadastrlari yagona tizimini tashkil etish va uni yuritish tartibi to‘g‘risidagi Nizom (1-ilova);

2. Vazirliklar, davlat qo‘mitalari, idoralar, joylardagi davlat hokimiyati organlari O‘zbekiston Respublikasi Davlat kadastrlarining yagona tizimiga kiritish uchun “O‘zgeodezkadastr” bosh boshqarmasi tomonidan belgilanadigan va tegishli davlat va tarmoq kadastrlarini yuritish to‘g‘risidagi nizomlardagi turlar, hajmlar va muddatlarda zarur ma’lumotlarni “O‘zgeodezkadastr” bosh boshqarmasiga taqdim etsinlar.

3. “O‘zgeodezkadastr” bosh boshqarmasi manfaatdor vazirliklar, davlat qo‘mitalari va idoralar bilan birgalikda Davlat kadastrlari yagona tizimiga kiruvchi mavjud kadastrlarni takomillashtirish va yangilarini tashkil etishga oid tadbirlarning (3-ilova*) bajarilishini ta’minlasin.

4. Mazkur qarorning bajarilishini nazorat qilish Bosh vazirning birinchi o‘rinbosari I.H. Jo‘rabekov zimmasiga yuklansin.

1. Davlat kadastrlari yagona tizimi (DKYaT) davlat va tarmoq kadastrlarining barcha turlarini birlashtiruvchi ko‘p maqsadli axborot tizimidir. Davlat kadastrlari yagona tizimida belgilangan chegaralardagi yer ustining har bir hisobga olingan kadastr uchastkasiga hujjatlashtirilgan ma’lumotlar hamda yer, suv, o‘rmon, foydali qazilmalar, binolar, inshootlar va boshqalardan iborat tabiiy va xo‘jalik resurslari to‘g‘risidagi ma’lumotlar, ularning geografik o‘rni, huquqiy va xo‘jalik maqomi ko‘rsatilgan holda, mavjud bo‘lishi kerak.

2. Davlat kadastrlari yagona tizimi O‘zbekiston Respublikasining tabiiy-iqtisodiy potensialini yagona umumdavlat, yaxlit va kompleks hisobga olishni, baholashni ta’minlash maqsadida tashkil etiladi va yuritiladi.

3. Davlat kadastrlari yagona tizimini tashkil etish va yuritish bilan bog‘liq munosabatlar qonunchilik va normativ hujjatlar bilan, shuningdek mazkur Nizom bilan tartibga solib boriladi.

4. Belgilangan tartibga muvofiq aniqlangan obyektlar va yer uchastkalarining huquqiy maqomi to‘g‘risidagi ma’lumotlar, topografiya-geodeziya materiallari, statistik hisobga olish ma’lumotlari, davlat va tarmoq kadastrlari ma’lumotlari Davlat kadastrlari yagona tizimining asosini tashkil etadi. Davlat kadastrlari yagona tizimi doirasida hududlarni kompleks baholash uchun zarur bo‘lgan ma’lumotlar ham jamlanadi.

5. Davlat kadastrlari yagona tizimi davlat hokimiyati va boshqaruvi organlarini, yuridik va jismoniy shaxslarni ularning faoliyatlari uchun zarur bo‘lgan hududlar va ko‘chmas mulklar to‘g‘risidagi ma’lumotlar va asoslashlar bilan tezkor ta’minlash uchun mo‘ljallangan.

6. Davlat kadastrlari yagona tizimining ma’lumotlari va asoslashlari davlat boshqaruvining barcha organlari, yuridik va jismoniy shaxslar, shu jumladan, xorijiy yuridik va jismoniy shaxslar uchun majburiy kuchga egadir. Kadastr hujjatlari mulkchilik va xo‘jalik yuritishning barcha shakllaridagi obyektlar to‘g‘risidagi huquqiy, iqtisodiy va texnik ma’lumotlarning asl manbai sifatida qabul qilinishi kerak.

7. Quyidagilar Davlat kadastrlari yagona tizimining obyektlari hisoblanadilar:

tabiiy resurslar (er, suv, o‘rmon, foydali qazilmalar va b.);

binolar va inshootlar, transport va muhandislik kommunikatsiyalari;

geodeziya tarmog‘i shoxobchalari;

Davlat kadastrlari yagona tizimi vazifalarini hal etish uchun zarur bo‘lgan boshqa elementlar.

8. Davlat kadastrlari yagona tizimi obyektlari to‘g‘risidagi ma’lumotlar respublika uchun yagona texnologiya (1-ilova) bo‘yicha:

davlat yer kadastri bo‘yicha — joylardagi davlat hokimiyati organlari, O‘zbekiston Respublikasi Yer resurslari davlat qo‘mitasi, Vazirlar Mahkamasi huzuridagi Geodeziya, kartografiya va davlat kadastri bosh boshqarmasi;

davlat suv kadastri bo‘yicha — “Gidrometeorologiya xizmati markazi” (tabiiy suv manbaalari), Davlat geologiya qo‘mitasi (yer osti suvlari), Melioratsiya va suv xo‘jaligi vazirligi (suv resurslaridan foydalanish va yerlarning meliorativ holati);

davlat o‘rmon kadastri bo‘yicha — Davlat o‘rmon qo‘mitasi;

foydali qazilma konlari davlat kadastri bo‘yicha — Davlat geologiya qo‘mitasi;

alohida qo‘riqlanadigan tabiiy hududlar kadastri bo‘yicha — Davlat tabiatni muhofaza qilish qo‘mitasi va O‘zbekiston FA;

hayvonot dunyosi, o‘simliklar, baliqlar kadastri bo‘yicha — O‘zbekiston FA;

binolar va inshootlar kadastri bo‘yicha — joylardagi davlat hokimiyati organlari va “O‘zgeodezkadastr” Bosh boshqarmasi;

davlat shaharsozlik kadastri bo‘yicha — joylardagi davlat hokimiyati organlari va “Davarxitektqurilish” qo‘mitasi tomonidan takdim etiladi.

Davlat kadastrlari yagona tizimiga kiruvchi kadastrlar tarkibi qonunchilikka muvofiq kengaytirilishi mumkin.

Davlat va tarmoq kadastrlarini joriy etish tartibi tegishli nizomlar bilan belgilanadi.

9. Davlat kadastrlari yagona tizimi axborotidan:

iqtisodiy islohotlarni amalga oshirish;

hududlarni kompleks ijtimoiy-iqtisodiy rivojlantirish dasturlari va prognozlarini tuzish;

tabiiy resurslar va ko‘chmas mulkni kompleks hisobga olish, baholash va monitoring qilish;

davlat tasarrufidan chiqarish va xususiylashtirish vazifalarini hal etish;

xo‘jalik yuritish subyektlarining tabiiy obyektlar va hududlarga yetkazgan zararlarini baholash;

hududlar haqida ma’lumotlar talab qiluvchi boshqa faoliyatni amalga oshirish maqsadlarida foydalaniladi.

10. Davlat kadastrlari yagona tizimi o‘zi haqidagi Nizomga muvofiq faoliyatni amalga oshiruvchi O‘zbekiston Respublikasi Vazirlar Mahkamasi huzuridagi Geodeziya, kartografiya va davlat kadastri bosh boshqarmasining Davlat kadastri xizmati tomonidan joriy etiladi.

11. Quyidagilar Davlat kadastrlari yagona tizimining asosiy prinsiplari hisoblanadi:

respublikaning barcha hududlarini qamrab olish;

markazlashgan rahbarlik (2-ilova);

kadastr axborotlarini ishlab chiqish va taqdim etish texnologiyasining birligi;

kadastr tizimlari barcha turlarini yer kadastri negizida shakllantirish;

avtomatlashtirilgan geoaxborot texnologiyalarini qo‘llanish;

ma’lumot va asoslarning obyektivligi, to‘liqligi, aniqligi va ishonchliligi;

axborotlarni to‘ldirib va yangilab borishdagi uzluksizlik;

cheklangan doiradagi foydalanuvchilar uchun ma’lumotlarning maxfiyligi.

12. Amaldagi kadastrlar va axborotlar tizimi doirasida — olingan obyektlarning hisobi va ro‘yxatdan o‘tkazilishi natijalari Davlat kadastrlari yagona tizimiga “O‘zgeodezkadastr” tomonidan va tegishli davlat va tarmoq kadastrlarini yuritish to‘g‘risidagi nizomlar bilan belgilanadigan tartibda vazirliklar va idoralar tomonidan bepul beriladi.

13. Davlat kadastri xizmatining va ma’lumotlarni taqdim etuvchi organlarning mansabdor shaxslari Davlat kadastrlari yagona tizimi ma’lumotlarining ishonchliligi uchun qonunchilikka muvofiq javob beradilar.

14. Davlat kadastrlari yagona tizimini tashkil etish va yuritish bilan bog‘liq ishlar davlat budjeti hisobidan mablag‘ bilan ta’minlanadi.

Davlat va tarmoq kadastrlari