Talaba yoshlarda mustaqillik gʻoyalariga sodiqlik, milliy qadriyatlarimiz va urf-odatlarimizga hurmat, yuksak insoniylik va bagʻrikenglik fazilatlarini shakllantirish, ularda yot gʻoya va mafkuralarga nisbatan immunitet va tanqidiy fikrlashni, kitobxonlik madaniyatini shakllantirish, shuningdek, iqtidorli talaba yoshlarning intellektual salohiyatini rivojlantirish, ularning mustaqil Vatanimizning ilmiy-texnik taraqqiyotiga munosib hissa qoʻshishi uchun tegishli imkoniyatlar yaratish, respublikamiz ilm-fani yutuqlarini ommalashtirish orqali mamlakatimiz ilmiy maktablari xalqaro miqyosda eʼtirof etilishiga koʻmaklashish, yoshlarning ilmiy-tadqiqot faoliyati samaradorligi va natijadorligini oshirishga qoʻshimcha shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta taʼlim vazirligi hamda Respublika Maʼnaviyat va maʼrifat markazining Oʻzbekiston Respublikasi Oliy va oʻrta maxsus taʼlim vazirligi huzurida Talabalar ilmiy-maʼrifiy markazini (keyingi oʻrinlarda Markaz deb ataladi) tashkil etish toʻgʻrisidagi taklifi maʼqullansin.

2. Markaz davlat muassasasi shaklida tashkil etiladi va mustaqil balansga, Oʻzbekiston Respublikasi Moliya vazirligining Gʻaznachiligida shaxsiy gʻaznachilik hisobvaraqalariga, shuningdek Oʻzbekiston Respublikasining Davlat gerbi tasviri tushirilgan muhrga ega boʻladi.

3. Quyidagilar Markazning asosiy vazifalari etib belgilansin:

talaba yoshlarda umuminsoniy va milliy qadriyatlarga hurmat, yot gʻoya va mafkuralarga nisbatan immunitet va tanqidiy fikrlashni shakllantirish, buyuk ajdodlarimizning ilmiy-maʼrifiy merosini oʻrganish, kitobxonlik madaniyatini rivojlantirish, yoshlar tarbiyasiga oid dolzarb mavzularda metodik qoʻllanmalar ishlab chiqish boʻyicha tizimli faoliyatni tashkil etish;

yoshlarning ilmiy-maʼrifiy sohadagi qiziqish va intilishlarini rivojlantirishga yoʻnaltirilgan maʼnaviy-maʼrifiy tadbirlar, ilmiy-amaliy anjumanlar, madaniy-maʼrifiy koʻrgazmalar va taqdimotlar tashkil etish;

fan va texnologiyalarning zamonaviy yutuqlari bilan talaba yoshlarni, yosh olim va professor-oʻqituvchilarni tizimli tanishtirish uchun xalqaro va mahalliy ilmiy-texnik axborot bazalari, xorijiy va milliy davriy ilmiy nashrlardan foydalanish imkoniyatlarini yaratish;

yoshlarning ilmiy-tadqiqot faoliyat olib borishi uchun ilmiy munozara-klublar, ilmiy loyihalarni ishlab chiqish va amalga oshirish guruhlarini shakllantirish, ularning samarali faoliyatini taʼminlash uchun tegishli sharoitlarni yaratish;

fundamental fanlarning zamonaviy tendensiyalari, iqtisodiyot sohalari va tarmoqlarining ilmiy-texnik muammolari boʻyicha yoshlarni ilmiy-tadqiqot ishlariga jalb etishga koʻmaklashish;

yoshlarning zamonaviy axborot-kommunikatsiya texnologiyalarini rivojlantirish sohasidagi faoliyatini qoʻllab-quvvatlash, shuningdek ular tomonidan ishlab chiqilgan dasturiy mahsulotlarga mualliflik guvohnomalarini rasmiylashtirish, ommalashtirish va tijoratlashtirish jarayonlarida koʻmaklashish;

mahalliy va xorijiy yetuk mutaxassislar ishtirokida masofaviy on-layn ilmiy muloqotlar, mahorat darslari, seminar-treninglar va malaka oshirish kurslarini oʻtkazish, shuningdek dolzarb mavzularda ilmiy-amaliy konferensiya va seminarlar, ilmiy-maʼrifiy yoʻnalishdagi tanlovlar tashkil etish va oʻtkazish.

4. Oʻzbekiston Respublikasi Oliy va oʻrta maxsus taʼlim vazirligi huzuridagi Talabalar ilmiy-maʼrifiy markazining tuzilmasi ilovaga muvofiq tasdiqlansin.

Oʻzbekiston Respublikasi Oliy va oʻrta maxsus taʼlim vazirligi Moliya vazirligi hamda Bandlik va mehnat munosabatlari vazirligi bilan kelishgan holda Markaz xodimlarining lavozim va shtat birliklarini hamda ularning cheklangan umumiy sonini belgilangan tartibda ishlab chiqsin va tasdiqlasin.

Oʻzbekiston Respublikasi Oliy va oʻrta maxsus taʼlim vaziriga Markazning tasdiqlangan xodimlarning cheklangan umumiy soni doirasida uning tuzilmasiga oʻzgartirish kiritish vakolati berilsin.

Markaz xodimlariga Oʻzbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash va moddiy ragʻbatlantirish shartlari qoʻllanilishi belgilansin.

5. Oʻzbekiston Respublikasi Oliy va oʻrta maxsus taʼlim vazirligi Respublika Maʼnaviyat va maʼrifat markazi bilan birgalikda uch oy muddatda Markaz vazifalaridan kelib chiqib uning faoliyatini rivojlantirish kompleks dasturini ishlab chiqsin va tasdiqlasin.

Bunda, Buyuk Britaniya, Janubiy Koreya va Rossiya Federatsiyasidagi oʻxshash markazlar faoliyati chuqur oʻrganib chiqilsin hamda ularning ilgʻor tajribasi Markaz faoliyatini rivojlantirish dasturida inobatga olinsin.

6. Quyidagilar Markazni moliyalashtirish manbalari etib belgilansin:

Oʻzbekiston Respublikasi Davlat budjeti mablagʻlari;

Oʻzbekiston Respublikasi Fan va texnologiyalar agentligi tomonidan oʻtkaziladigan tanlovlar natijalari boʻyicha ajratiladigan grantlar;

xoʻjalik faoliyatidan va shartnoma asosida xizmatlar koʻrsatishdan tushadigan tushumlar, xalqaro moliyaviy institutlar, xorijiy tashkilotlar, donor mamlakatlar va tashkilotlarning grantlari, shuningdek homiylik xayriyalari va qonun hujjatlarida taqiqlanmagan boshqa manbalar.

7. Toshkent shahri hokimligi hamda Oʻzbekiston Respublikasi Oliy va oʻrta maxsus taʼlim vazirligining Markaz qurilishi uchun Toshkent shahri, Olmazor tumani, Talabalar shaharchasi hududidagi Universitet koʻchasi boʻyidan 3,0 ga yer maydoni ajratib berish toʻgʻrisidagi taklifi qabul qilinsin.

8. Markaz uchun bino qurilishi boʻyicha quyidagilar:

Toshkent shahar hokimligi huzuridagi “Yagona buyurtmachi xizmati” injiniring kompaniyasi — buyurtmachi etib;

“Arhidea pro” MChJ — bosh loyiha tashkiloti etib;

bosh pudratchi belgilangan tartibda tanlov asosida belgilansin.

10. Belgilab qoʻyilsinki, Markaz binosini kompyuter va multimedia hamda boshqa zarur texnika vositalari, inventar va mebellar bilan jihozlash belgilangan normativlarga muvofiq, qurilish ishlarining tegishli bosqichlari tugallanishiga koʻra, ularni sotib olish xarajatlarini loyiha-smeta hujjatlariga kiritish yoʻli bilan bosh pudratchi tomonidan amalga oshiriladi.

11. Toshkent shahar hokimligi huzuridagi “Yagona buyurtmachi xizmati” injiniring kompaniyasi 2018-yil 1-sentabrgacha qurilish va jihozlash ishlari tugallanishini taʼminlasin.

12. Oʻzbekiston Respublikasining Investitsiyalar boʻyicha davlat qoʻmitasi mazkur obyekt qurilishi doirasida Oʻzbekiston Respublikasida ishlab chiqarilmaydigan belgilangan tartib asosida olib kiriladigan qurilish materiallari, asbob-uskunalar, butlovchi buyumlar va jihozlarni sotib olish boʻyicha shartnomalarni oʻn kun muddatda ekspertizadan oʻtkazsin.

13. Oʻzbekiston Respublikasi Davlat arxitektura va qurilish qoʻmitasi loyiha-smeta hujjatlarini davlat ekspertizasidan oʻtkazishni va qurilish-montaj ishlarini bajarish sifati yuzasidan davlat arxitektura-qurilish nazoratini taʼminlasin.

14. Oʻzbekiston Respublikasi Iqtisodiyot vazirligi, “Oʻzqurilishmateriallari” AJ, “Oʻzmetkombinat” AJ buyurtmachi tomonidan taqdim etilgan tasdiqlangan loyiha-smeta hujjatlari asosida loyiha tashkilotining asoslangan hisob-kitoblariga binoan obyektni qurish va hududini obodonlashtirish uchun talab etiladigan metall prokati va sement mahsulotlarini toʻgʻridan toʻgʻri shartnomalar boʻyicha imtiyozli narxlarda ajratsinlar.

15. Oʻzbekiston Respublikasi Moliya vazirligi:

Markazning bino va inshootlarini qurish va jihozlash ishlari yakunlanishi bilan Markazni saqlab turish bilan bogʻliq xarajatlar uchun zarur mablagʻlarni Oʻzbekiston Respublikasi Davlat budjetining xarajatlar parametrida “Ijtimoiy soha” tarmogʻi boʻyicha ajratiladigan mablagʻlar doirasida ajratsin;

Markazga 2 ta, shu jumladan 1 ta xizmat va 1 ta maxsus yengil avtotransport vositasini saqlashga limit ajratsin.

16. Oʻzbekiston Respublikasi Tashqi ishlar vazirligi:

xorijiy mamlakatlarda faoliyat olib borayotgan oʻxshash muassasalar bilan xalqaro hamkorlikni oʻrnatish va rivojlantirishda Markazga koʻmaklashsin;

Oʻzbekiston Respublikasi Oliy va oʻrta maxsus taʼlim vazirligining murojaatiga muvofiq Markazni tashkil etish, uning faoliyatini rivojlantirish hamda istiqbolda oʻtkaziladigan tadbirlarda (konferensiyalar, simpoziumlar, forumlar va shu kabilar) ishtirok etadigan xorijiy mutaxassislarga vizalar konsullik va boshqa yigʻimlar undirilmasdan rasmiylashtirilishini taʼminlasin.

17. Oʻzbekiston Respublikasi Ichki ishlar vazirligi Markaz buyurtmanomalariga binoan Markazni tashkil etish, faoliyatini rivojlantirish hamda ushbu muassasa tomonidan istiqbolda oʻtkaziladigan tadbirlar doirasida ishtirok etadigan tegishli xorijiy mutaxassislarga koʻp martalik vizalar berilishini va ularning muddati uzaytirilishini, shuningdek ularning Oʻzbekiston Respublikasida vaqtinchalik yashash joyida vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini davlat bojlarini undirmasdan taʼminlasin.

18. Markaz kutubxonani shakllantirish uchun bosma va kitob mahsulotlarining (ijtimoiy-siyosiy, ilmiy-maʼrifiy, oʻquv-metodik va davriy) bepul nazorat nusxalarini (1 nusxada) oladigan tashkilotlar roʻyxatiga kiritilsin xamda mualliflik huquqi doirasida ularning elektron nusxalari taqdim etilsin.

19. Markaz faoliyatini ilmiy-metodik jihatdan qoʻllab-quvvatlash, xalqaro aloqalarni rivojlantirish, yoshlarning ilmiy-tadqiqot ishlarini muvofiqlashtirish boʻyicha barcha oliy taʼlim muassasalari ilmiy ishlar boʻyicha prorektorlari Kengashi tashkil etilsin.

Kengashning asosiy vazifalari etib quyidagilar belgilansin:

Markaz faoliyatining tashkiliy va ilmiy-metodik taʼminotini amalga oshirish, yoshlarni ilmiy izlanishlar olib borish metodologiyasi, fundamental fanlarning zamonaviy tendensiyalari bilan tizimli tanishtirib borish, ularni iqtisodiyot sohalari va tarmoqlarining ilmiy-texnik muammolari boʻyicha ilmiy-tadqiqot ishlariga jalb etilishida koʻmaklashish;

ilmiy-amaliy konferensiya, seminarlarni tashkil etish, shuningdek ilmiy-maʼrifiy tadbirlarda fan, madaniyat va sanʼat sohalarida xorijiy davlatlarning yetakchi olim va mutaxassislarni jalb etishda amaliy yordam koʻrsatish;

yoshlarning ilmiy va ijodiy munozara-klublar, ilmiy loyihalarni ishlab chiqish va amalga oshirish guruhlari faoliyatiga ilmiy rahbarlik qilish va maslahat berish, shuningdek ularning innovatsion, ilmiy-tadqiqot, ijodiy ishlari natijalarini ommalashtirish va amaliyotga joriy etilishida koʻmaklashish;

yoshlarning mavjud salohiyatlarini namoyon etishlari uchun turli ilmiy, ijodiy va maʼrifiy yoʻnalishda tanlovlar tashkil etish, xalqaro va respublika miqyosida oʻtkazilgan tanlov, olimpiada, koʻrgazmalarda yuqori natijalarga erishgan iqtidorli talabalar va yosh olimlar faoliyatini ommalashtirish.

20. Vazirlik va idoralar bir oy muddatda oʻzlari qabul qilgan normativ-huquqiy hujjatlarini ushbu qarorga muvofiqlashtirsinlar.

21. Mazkur qarorning bajarilishini nazorat qilish Oʻzbekiston Respublikasi Oliy va oʻrta maxsus taʼlim vaziri I.U. Madjidov zimmasiga va Oʻzbekiston Respublikasi Vazirlar Mahkamasining Taʼlim, ilm-fan va yoshlar siyosati masalalari axborot-tahlil departamentiga yuklansin.