Oʻzbekiston Respublikasi Prezidentining “Oʻzbekiston Respublikasining Qurolli Kuchlarini yanada isloh qilish va rivojlantirish vazifalarini amalga oshirish boʻyicha chora-tadbirlar dasturi toʻgʻrisida” 2017-yil 24-yanvardagi PQ-2738-son qaroriga muvofiq, shuningdek Oʻzbekiston Respublikasi oliy harbiy taʼlim muassasalariga intellektual rivojlangan va har tomonlama tayyorlangan yoshlarni tanlash tizimini yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 2014-yil 3-iyundagi 141-son qarori (Oʻzbekiston Respublikasi QT, 2014-y., 6-son, 58-modda) bilan tasdiqlangan Oʻzbekiston Respublikasi oliy harbiy taʼlim muassasalariga tanlash tartibi va qabul qilish qoidalari toʻgʻrisidagi Nizomga ilovaga muvofiq oʻzgartirish va qoʻshimchalar kiritilsin.

2. Oliy harbiy taʼlim muassasalariga ega boʻlgan vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Taʼlim va ilm-fan masalalari axborot-tahlil departamentiga yuklansin.

1. 41-bandda:

a) quyidagi mazmundagi ikkinchi xatboshi qoʻshilsin:

“Mudofaa vazirligi tomonidan vazirlikning oliy harbiy taʼlim muassasalariga nomzodlarni tanlash (qoʻmondonlik taktik moto-oʻqchi va chegara boʻlinmalari (chegara guruhlari) va harbiy-havo kuchlari (aviatsiya turlari)ning harbiy mutaxassisliklari bundan mustasno) yagona tanlov asosida, kirish test sinovlari natijalari boʻyicha toʻplangan ballarga muvofiq amalga oshiriladi. Bunda kirish test sinovlari bir taʼlim muassasasi negizida yoki tegishli taʼlim muassasalarida alohida oʻtkazilishi mumkin.”;

b) ikkinchi — toʻrtinchi xatboshilar tegishli ravishda uchinchi — beshinchi xatboshilar deb hisoblansin.

2. 46-bandda:

a) quyidagi mazmundagi ikkinchi xatboshi qoʻshilsin:

“Mudofaa vazirligining oliy harbiy taʼlim muassasasida oʻtkazilgan test sinovlari natijalari ballar pasayishi tartibida, taʼlim muassasalari boʻyicha ajratilmasdan bitta vedomostda taqdim etiladi.”;

b) ikkinchi xatboshi uchinchi xatboshi deb hisoblansin.

3. Oʻzbekiston Respublikasi oliy harbiy taʼlim muassasalari roʻyxatida (Nizomga 1-ilova):

a) “Toshkent oliy umumqoʻshin qoʻmondonlik bilim yurti” soʻzlari “Oʻzbekiston Respublikasi Qurolli Kuchlar akademiyasi” soʻzlari bilan almashtirilsin;

b) “Toshkent axborot texnologiyalari universiteti huzuridagi maxsus fakultet” soʻzlari “Muhammad al-Xorazmiy nomidagi Toshkent axborot texnologiyalari universitetining maxsus fakulteti” soʻzlari bilan almashtirilsin;

v) “Toshkent oliy harbiy-texnika bilim yurti” soʻzlari “Harbiy-texnika instituti” soʻzlari bilan almashtirilsin;

g) “Toshkent yongʻin xavfsizligi oliy texnika maktabi” soʻzlari “Yongʻin xavfsizligi instituti” soʻzlari bilan almashtirilsin.