Sportning gimnastika turlarini yanada rivojlantirish, gimnast-sportchilarning mahorat va malaka darajasini muttasil oshirib borish uchun qulay shart-sharoitlar yaratish, shuningdek, respublika aholisining keng qatlamlari, ayniqsa yoshlar va qizlar oʻrtasida sportning gimnastika turlarini faol targʻib etish hamda ommalashtirish maqsadida:

1. Oʻzbekiston Respublikasi Madaniyat va sport ishlari vazirligi va Oʻzbekiston Gimnastika federatsiyasining:

Oʻzbekiston Respublikasi Madaniyat va sport ishlari vazirligi huzuridagi Badiiy gimnastika boʻyicha respublika ixtisoslashtirilgan bolalar-oʻsmirlar olimpiya zaxirasi sport maktabi nomini Oʻzbekiston Respublikasi Yoshlar siyosati va sport vazirligi huzuridagi Gimnastika boʻyicha ixtisoslashtirilgan respublika bolalar-oʻsmirlar olimpiya zaxirasi sport maktabi deb oʻzgartirish;

Oʻzbekiston Gimnastika federatsiyasi huzurida Sportning gimnastika turlari boʻyicha murabbiylar va hakamlar respublika maktabini tashkil etish toʻgʻrisidagi takliflariga rozilik berilsin.

2. Oʻzbekiston Respublikasi Sport vazirligi huzuridagi Gimnastika boʻyicha ixtisoslashtirilgan respublika bolalar-oʻsmirlar olimpiya zaxirasi sport maktabining yangilangan tuzilmasi 1-ilovaga muvofiq tasdiqlansin.

3. Gimnastika boʻyicha ixtisoslashtirilgan respublika bolalar-oʻsmirlar olimpiya zaxirasi sport maktabida — 7 yoshdan 18 yoshgacha boʻlgan taʼlim oluvchi oʻquvchi-sportchilarning umumiy kontingenti 132 nafarni tashkil etgani holda, oʻqish muddati 11 yil boʻlib, har yili 12 nafar iqtidorli oʻquvchi-sportchilar qabul qilinishi belgilab qoʻyilsin.

4. Quyidagilar Gimnastika boʻyicha ixtisoslashtirilgan respublika bolalar-oʻsmirlar olimpiya zaxirasi sport maktabining asosiy vazifalari etib belgilansin:

badiiy gimnastika, sport gimnastikasi va trampolin bilan shugʻullanish uchun zarur sport mahoratiga ega isteʼdodli va istiqbolli bolalarni puxta tanlab olish, ular tanlagan sport turida ularning qobiliyatlari, sportdagi salohiyati, kasbiy koʻnikmalari va mahoratini rivojlantirish;

badiiy gimnastika, sport gimnastikasi va trampolin sohasida eng yangi ilmiy-metodik tavsiya hamda yutuqlar asosida respublikaning terma jamoalari uchun sport zaxirasi va yuqori darajali sportchilarni tayyorlash boʻyicha oʻquv-mashgʻulot jarayonini samarali tashkil etish va amalga oshirish;

yuqori darajali sportchilarni tayyorlash boʻyicha oʻquv-mashgʻulot jarayonini tashkil etish uchun zarur boʻlgan zamonaviy moddiy-texnik bazani yaratish va malakali hakamlar tarkibini shakllantirish;

sportchilar va hakamlar tarkibining kasbiy mahoratini oshirish sohasida muntazam asosda tajriba almashishni tashkil etish orqali xorijiy gimnastika maktablari, akademiyalari va klublari bilan hamkorlikni rivojlantirish.

5. Belgilansinki, Sportning gimnastika turlari boʻyicha murabbiylar va hakamlar respublika maktabi:

nodavlat sport oʻquv-metodik taʼlim muassasasi hisoblanadi;

taʼlim jarayonida Oʻzbekiston davlat jismoniy tarbiya va sport universitetining kadrlar, ilmiy-metodik va resurs salohiyati, shuningdek sportchilarni tayyorlashning takomillashtirilgan metodikasidan maksimal ravishda foydalanadi;

Oʻzbekiston Respublikasi Sport vazirligi, Milliy olimpiya qoʻmitasi, Oʻzbekiston Gimnastika federatsiyasining hududiy boʻlinmalari, sportning gimnastika turlarini ommalashtirayotgan sport maktablari, shuningdek professional sport klublarining buyurtmalariga koʻra sportning gimnastika turlari boʻyicha murabbiylar va hakamlarni tayyorlash, qayta tayyorlash va malakasini oshirish, shuningdek ularni oʻqitishni amalga oshiradi.

6. Oʻzbekiston Respublikasi Vazirlar Mahkamasi bir hafta muddatda sportning gimnastika turlarini yanada rivojlantirish hamda Gimnastika boʻyicha respublika ixtisoslashtirilgan bolalar-oʻsmirlar olimpiya zaxirasi sport maktabi faoliyatini tashkil etish chora-tadbirlari toʻgʻrisidagi qarorni puxta ishlab chiqsin va qabul qilsin.

7. Oʻzbekiston Respublikasi Prezidentining “Badiiy gimnastika boʻyicha respublika ixtisoslashtirilgan bolalar-oʻsmirlar olimpiya zaxirasi sport maktabini tashkil etish toʻgʻrisida” 2011-yil 27-avgustdagi PQ-1608-sonli qaroriga 2-ilovaga muvofiq oʻzgartirishlar kiritilsin.

8. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari A. Ikramov va U. Rozuqulov zimmasiga yuklansin.

1. Nomidagi, kirish qismidagi, 1-bandidagi, 3-bandining birinchi — uchinchi xatboshidagi, 5-bandining ikkinchi — toʻrtinchi xatboshidagi, 6-bandining ikkinchi — oltinchi xatboshidagi, 7,11-bandlaridagi, 12-bandining ikkinchi va toʻrtinchi xatboshilaridagi, 13-bandidagi “badiiy” soʻzi chiqarib tashlansin.

2. 2-bandi quyidagi tahrirda bayon etilsin:

“2. Belgilansinki:

gimnastika boʻyicha RIBOʻOZSM internati boʻlgan maktabdan tashqari sport-taʼlim muassasasi hisoblanadi, uning oʻquvchi-sportchilari turar joy, toʻrt mahal ovqatlanish, sport anjomlari va maxsus libos, sport uskunalari hamda inventarlari bilan taʼminlanadi;

gimnastika boʻyicha RIBOʻOZSMda — 7 yoshdan 12 yoshgacha boʻlgan taʼlim oluvchi oʻquvchi-sportchilarning umumiy kontingenti 60 nafarni tashkil etgan holda, oʻqish muddati 5 yil boʻlib, har yili 12 nafar iqtidorli oʻquvchi-sportchilar qabul qilinadi;

gimnastika boʻyicha RIBOʻOZSM oʻquvchi-sportchilarining umumtaʼlim dasturlari boʻyicha taʼlim olishlari Toshkent shahrining yaqin atrofda joylashgan umumtaʼlim maktablarida amalga oshiriladi.”.

3. 4-bandi va 1-ilovasi oʻz kuchini yoʻqotgan deb hisoblansin.