Toshkent shahar, Mirzo Ulugʻbek tumani, Mustaqillik shoh koʻchasida joylashgan qurilishi tugallanmagan savdo uyi binosini foydalanishga topshirishni jadallashtirish va undan samarali foydalanishni taʼminlash maqsadida Vazirlar Mahkamasi qaror qiladi:

1. Toshkent shahar hokimligi, Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi, OAT “Aloqabank” va “ZRAS BIZNES” masʼuliyati cheklangan jamiyat muassislarining:

Toshkent shahar, Mirzo Ulugʻbek tumani, Mustaqillik shoh koʻchasida joylashgan qurilishi tugallanmagan savdo uyi binosini (keyingi oʻrinlarda obyekt deb ataladi) foydalanishga topshirishni jadallashtirish maqsadida, uni istisno tariqasida baholash qiymatida toʻgʻridan toʻgʻri “ZRAS BIZNES” MChJga sotish;

sotishdan tushgan mablagʻlarning bir qismini obyekt qurilishiga Toshkent shahar hokimligining Savdo, xizmat koʻrsatish sohasi va xalq isteʼmol mollari ishlab chiqarish departamenti tomonidan sarflangan 3 016 469 200 soʻm miqdoridagi jalb qilingan kredit va oʻz mablagʻlarini qoplash uchun Toshkent shahar hokimligining alohida hisob raqamiga yoʻnaltirish (xarajatlar miqdori pul mablagʻlarining Toshkent shahar hokimligi alohida hisob raqamiga tushishi sanasiga qarab binoni saqlash xarajatlari va kredit foizlari hisobiga oʻzgarishi mumkin);

sotishdan tushgan mablagʻlarning qolgan qismini Vazirlar Mahkamasining 2009-yil 29-yanvardagi 27-son qarori bilan tasdiqlangan Xususiylashtirishdan tushgan mablagʻlarni hisobga olish, taqsimlash va ulardan foydalanilishini nazorat qilish tartibi toʻgʻrisidagi nizomda belgilangan tartibda taqsimlash toʻgʻrisidagi takliflari maʼqullansin.

2. Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi, Toshkent shahar hokimligi:

obyektning xususiylashtirishga tegishli hujjatlar toʻplami belgilangan tartibda tayyorlanishi va baholanishini hamda baholangan narxida toʻgʻridan toʻgʻri “ZRAS BIZNES” MChJga sotish yuzasidan oldi-sotdi shartnomasi rasmiylashtirilishini;

sotishdan tushgan mablagʻlar ushbu qarorning 1-bandida koʻrsatilgan tartibda taqsimlanishini;

“ZRAS BIZNES” MChJ tomonidan shartnoma shartlari toʻliq bajarilgandan soʻng unga obyektga nisbatan mulkiy huquqni tasdiqlovchi davlat orderi berilishini taʼminlasinlar.

3. Obyektning sotib olish toʻlovlari 2014-yil 15-dekabrga qadar “ZRAS BIZNES” MChJ tomonidan toʻliq toʻlanishi hamda 2015-yil 1-yanvarga qadar qurilish ishlari yakunlanib, obyekt foydalanishga topshirilishi inobatga olinsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.