Mamlakatimizda bolalarning dam olishini tashkil etish, oromgohlarda ularni sogʻlomlashtirish chora-tadbirlarini yanada kuchaytirish, bu boradagi ishlarni tizimli ravishda yoʻlga qoʻyish va muvofiqlashtirib borish maqsadida Vazirlar Mahkamasi qaror qiladi:

1. Quyidagilar:

Respublika oromgohlarida bolalarning dam olishini tashkil etish va sogʻlomlashtirish Konsepsiyasi 1-ilovaga;

Bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruh (keyingi oʻrinlarda Muvofiqlashtiruvchi guruh deb yuritiladi) tarkibi 2-ilovaga*;

Bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruh tuzilmasi 3-ilovaga;

Bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruh toʻgʻrisidagi nizom 4-ilovaga muvofiq tasdiqlansin.

2. Quyidagilar Muvofiqlashtiruvchi guruhning asosiy vazifalari etib belgilansin:

bolalar oromgohlarida maishiy, kommunal, transport va tibbiy taʼminotning barcha tizimlari ishonchli va uzluksiz faoliyat koʻrsatishi boʻyicha chora-tadbirlar kompleksini amalga oshirish;

bolalar oromgohlariga yondosh hududlarda sodir boʻlishi mumkin boʻlgan tabiiy va texnogen tusdagi favqulodda vaziyatlarning oldini olish chora-tadbirlarini koʻrish;

bolalarni oromgohlarga olib borish va ularni dam olishdan keyin olib qaytishda transport xizmati xavfsizligini, shuningdek yongʻin xavfsizligini taʼminlash;

bolalar oromgohlarida jamoat tartibini saqlash va huquqbuzarlik holatlarining oldini olish, shuningdek bolalar, tarbiyachilar va xizmat koʻrsatuvchi xodimlar xavfsizligini taʼminlash boʻyicha profilaktika chora-tadbirlarini koʻrish;

bolalar oʻrtasida sogʻlom turmush tarzini shakllantirish, ularga sifatli tibbiy xizmat koʻrsatishni tashkil etish, oromgohlarni zarur dori-darmonlar va tibbiy vositalar bilan taʼminlash;

barcha oromgohlarda bolalarning yashash, ovqatlanish va dam olish joylariga qoʻyiladigan sanitariya-gigiyena talablariga qatʼiy rioya etilishi, shuningdek oziq-ovqat mahsulotlari sifati va normalari ustidan kuchli nazoratni taʼminlash;

oromgohlarda bolalarni vatanparvarlik, umuminsoniy va milliy qadriyatlar ruhida tarbiyalash, ularda erkin fikrlash qobiliyatini shakllantirishga qaratilgan taʼlim-tarbiyaviy ishlarni tashkil etish;

bolalarning oʻqishdan tashqari vaqtini sermazmun oʻtkazish, ularning ham jismoniy, ham ruhiy jihatdan hordiq chiqarishlarini taʼminlash, turli sport musobaqalarini oʻtkazish va bu orqali bolalar sportini ommalashtirish;

oromgohlarda oʻtkaziladigan madaniy-maʼrifiy va sport tadbirlarida respublikadagi taniqli madaniyat, fan, adabiyot va sanʼat xodimlari hamda sportchilarning ishtirokini taʼminlash;

oromgohlarga jalb etiladigan bolalar salmogʻini yildan yilga oshirib borishni nazarda tutgan holda, ularga koʻrsatiladigan xizmatlar sifatini yaxshilab borish;

bolalarning dam olishini tashkil etish va sogʻlomlashtirish yuzasidan amalga oshirilayotgan ishlarni doimiy ravishda monitoring qilib borish, mazkur yoʻnalishdagi ishlarni yanada takomillashtirish yuzasidan zarur chora-tadbirlarni amalga oshirish;

bolalar oromgohlarining moddiy-texnika bazasini rivojlantirish boʻyicha tadbirlar rejasini ishlab chiqish va amalga oshirish, zarur hollarda, mazkur yoʻnalishdagi ishlarni yanada takomillashtirish yuzasidan Oʻzbekiston Respublikasi Vazirlar Mahkamasiga takliflar kiritish.

3. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlariga:

oromgohlar faoliyat samaradorligini oshirishga doir tashkiliy masalalarni oʻz vaqtida hal etish, xavfsizlik va tibbiy xizmat, shuningdek bolalarning mazmunli dam olishini taʼminlash boʻyicha hududiy Muvofiqlashtiruvchi guruhlarni tuzsinlar;

hududiy Muvofiqlashtiruvchi guruhlar mazkur qarorning 2-bandida belgilangan vazifalardan kelib chiqib, faoliyat yoʻnalishlarini belgilasin hamda guruh aʼzolarining shaxsiy masʼuliyati va javobgarligi kuchaytirilsin;

bolalar oromgohlarini yangi mavsumga har tomonlama tayyorlash maqsadida ularni toʻliq xatlovdan oʻtkazsinlar hamda mavjud kamchiliklarni bartaraf etish va yetarli shart-sharoitlar yaratish yuzasidan zaruriy chora-tadbirlarni amalga oshirsinlar;

bolalarning oromgohlarda dam olishlarini tashkil etish va sogʻlomlashtirish boʻyicha koʻrilgan chora-tadbirlar toʻgʻrisida Muvofiqlashtiruvchi guruhga muntazam ravishda axborot berib borsinlar.

4. Tasarrufida bolalar oromgohlari boʻlgan vazirliklar, idoralar va xoʻjalik birlashmalari rahbarlariga:

oromgohlarning samarali faoliyat koʻrsatishi, xavfsizlik va tibbiy xizmat, shuningdek bolalarning mazmunli dam olishini taʼminlash boʻyicha zaruriy tashkiliy chora-tadbirlarni koʻrsinlar;

bir oy muddatda oʻz normativ-huquqiy hujjatlarini ushbu qarorga muvofiqlashtirsinlar;

bolalar oromgohlarining moddiy-texnika bazasini mustahkamlash boʻyicha kompleks chora-tadbirlar belgilab, amalga oshirsinlar.

5. Oʻzbekiston Respublikasi Vazirlar Mahkamasining 2011-yil 18-iyundagi 383-f-son farmoyishi oʻz kuchini yoʻqotgan deb hisoblansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Aripov zimmasiga yuklansin.

Mustaqillikning ilk yillaridan boshlab yoshlarni har tomonlama barkamol avlod etib tarbiyalash davlat siyosatining eng ustuvor yoʻnalishlaridan biri etib belgilab olindi.

Mazkur yoʻnalishda mamlakatimizda Muhtaram Prezidentimiz Islom Karimov rahbarligida keng miqyosdagi islohotlar amalga oshirilib, bu boradagi ishlar koʻlami yil sayin kengayib va takomillashib bormoqda.

Amalga oshirilgan saʼy-harakatlar oʻzining samarasini berib, yoshlarimiz bilim darajasi oshmoqda, ularning jismoniy holati yildan yilga rivojlanib bormoqda, yoshlarimizning jahon maydonlaridagi turli jabhalarda erishayotgan yutuqlari sharafiga davlatimiz bayrogʻi baland koʻtarilib, uning nufuzi ortib bormoqda.

Mamlakatimizda bolalarning dam olishini tashkil etish va sogʻlomlashtirish sohasida erishilgan yutuqlar ham bu borada Hukumatimiz tomonidan amalga oshirilayotgan ishlar natijasidir.

Shu bilan birga, oromgohlarga jalb etiladigan bolalar salmogʻini koʻpaytirish, ularga koʻrsatiladigan xizmatlar sifatini oshirish, oromgohlar nufuzini yanada yuksaltirish maqsadi – ushbu yoʻnalishdagi ishlarni kompleks ravishda takomillashtirish va rivojlantirishni, shuningdek uning doimiy faoliyat yurituvchi tizimini yaratishni taqozo etmoqda.

Mazkur Konsepsiyada bolalarning dam olishini tashkil etish va sogʻlomlashtirish asosiy tushunchalari, maqsad va vazifalari, oromgohlar turlari va yoʻnalishlari, oromgohlarda bolalarga koʻrsatiladigan xizmatlar hamda erishiladigan natijalar oʻz aksini topgan.

Konsepsiya oʻsib kelayotgan avlodni bolalarning dam olishini tashkil etish va sogʻlomlashtirish hamda har tomonlama barkamol avlod etib tarbiyalashning asosiy talab, mezon va gʻoyalarining mamlakat miqyosidagi toʻlaqonli tizimini belgilaydi.

Konsepsiya Oʻzbekiston Respublikasining “Taʼlim toʻgʻrisida”gi, “Kasaba uyushmalari, ularning huquqlari va faoliyatining kafolatlari toʻgʻrisida”gi, “Bola huquqlarining kafolatlari toʻgʻrisida”gi qonunlariga, Birlashgan Millatlar Tashkilotining “Bola huquqlari toʻgʻrisidagi Konvensiya”siga asoslangan holda ishlab chiqilgan.

Konsepsiya bolalarning dam olishini tashkil etish va sogʻlomlashtirishni yanada takomillashtirish va rivojlantirishga yoʻnaltirilgan faoliyatda hamda turli darajadagi dastur va rejalarni ishlab chiqishda asos boʻlib xizmat qiladi.

Ushbu Konsepsiya, mulkchilik shaklidan qatʼi nazar, barcha turdagi oromgohlar faoliyatiga tatbiq etiladi.

Bolalarning dam olishini tashkil etish va sogʻlomlashtirish — bu sanitariya-gigiyena, sanitariya-epidemiologiya hamda xavfsizlik talablariga toʻliq javob beradigan va qulay sharoitda bolalarning belgilangan kundalik hayot tarziga rioya etishi, sifatli ovqatlanishi, ijodiy salohiyatining rivojlanishi, sogʻlom turmush tarzi koʻnikmalarining shakllanishi, dam oldirilishi, salomatliklarining tiklanishi va mustahkamlanishi, jismoniy tarbiya, sport va turizm bilan shugʻullanishlarini taʼminlovchi kompleks tadbirlar majmuidir.

Dam olish — bolalar organizmining jismoniy va ruhiy funksiyalari tiklanishiga, uning faolligini oshirishga yoʻnaltirilgan maxsus ijtimoiy tadbirlar majmuidir.

Sogʻlomlashtirish — bolalarning jismoniy va ruhiy salomatligini yaxshilash, ratsional ovqatlanish hamda sogʻligʻini mustahkamlashga yoʻnaltirilgan tibbiy, gigiyenik, jismoniy tarbiya tadbirlarining majmuidir.

Bolalarning dam olishini tashkil etish va sogʻlomlashtirishning asosiy maqsadi — bolalarning oʻqishdan tashqari vaqtini sermazmun oʻtkazish, ularning ham jismoniy, ham ruhiy jihatdan hordiq chiqarishlarini taʼminlash, ular ongiga milliy gʻoyani, vatanparvarlik tuygʻularini hamda milliy va umuminsoniy qadriyatlarni singdirish orqali har tomonlama barkamol avlodni voyaga yetkazishdan iboratdir.

Mazkur maqsadga erishish uchun amalga oshiriladigan vazifalar quyidagilardan iboratdir:

bolalarning dam olishini tashkil etish va sogʻlomlashtirishni tashkil etish va amalga oshirishning mukammal tizimini yaratish, respublika oromgohlar tarmogʻini takomillashtirish va rivojlantirish;

bolalarning dam olishini tashkil etish va sogʻlomlashtirish yuzasidan har yili rejalar ishlab chiqish, zarur moliyaviy mablagʻlar manbalarini aniqlash va jalb etish orqali ushbu rejalarni toʻliq amalga oshirish;

bolalarning dam olishini tashkil etish va sogʻlomlashtirish boʻyicha kompleks chora-tadbirlar rejasini ishlab chiqish, unda bajarish muddatlari va masʼullarni aniq koʻrsatish, ushbu reja ijrosini muntazam ravishda nazorat qilib borish;

bolalarning dam olishini tashkil etish va sogʻlomlashtirishni tashkil etish yuzasidan vazirlik, idora, tashkilot va mahalliy davlat hokimiyati organlari faoliyatini muvofiqlashtirib borish va oʻzaro hamkorligini taʼminlash, ularning taklif va tashabbuslarini qoʻllab-quvvatlash va ommalashtirish;

mazkur yoʻnalishda hududlarda amalga oshirilayotgan ishlarni joyining oʻziga chiqqan holda oʻrganib, doimiy ravishda monitoring qilib borishni yoʻlga qoʻyish, ularni yanada takomillashtirish boʻyicha tegishli choralarni amalga oshirish;

bolalarda bugungi kundagi “ommaviy madaniyat”ning turli illatlariga qarshi mafkuraviy immunitetni shakllantirish, ular ongiga umuminsoniy va milliy qadriyatlarni singdirishga qaratilgan dasturlarni amalga oshirish, bu boradagi ishlarga davlat va jamoat tashkilotlarini keng jalb etish.

Oromgohlar faoliyatining asosiy tamoyillari quyidagilardan iborat:

bolalar hayoti va sogʻligʻi xavfsizligini taʼminlagan hamda ratsional ovqatlanishni tashkil etgan holda, ularning sifatli dam oldirilishi va sogʻlomlashtirilishini tashkil etish;

bolalar manfaatlarining ustuvorligi, ularning ijodiy rivojlanishi hamda oʻz imkoniyatlarini toʻliq namoyon etishlari uchun zarur shart-sharoitlar yaratish;

ijtimoiy meʼyorlar va oromgoh qoidalariga rioya qilgan holda, pedagog va yetakchilarning bolalar shaxsini rivojlantirish va ularning koʻngilli dam olishlarini taʼminlash borasidagi tashabbuslarini qoʻllab-qavatlash;

bolalarning dam olishini tashkil etish va sogʻlomlashtirish mobaynida bolalar ongiga umuminsoniy va milliy qadriyatlarni singdirish, ularda mafkuraviy immunitetni shakllantirishga qaratilgan maʼnaviy-maʼrifiy chora-tadbirlar amalga oshirilishiga alohida eʼtibor qaratish.

Har bir oromgoh jamoasi oʻz tashkiliy-pedagogik faoliyatining yoʻnalishlarini yuqori darajadagi tegishli tashkilotlar tavsiya va koʻrsatmalari asosida mustaqil ravishda ishlab chiqadi.

U oʻz ichiga sogʻlomlashtirish, rivojlantirish, taʼlim-tarbiyaviy va bolalarni ijtimoiy tiklash dasturlarini ishlab chiqish, bolalarni ijtimoiylashtirish, ular oʻrtasida oʻzaro hamkorlikning rivojlanishi uchun sharoitlar yaratish kabilarni qamrab oladi.

Oromgohlar 2 turga ajratiladi:

Statsionar oromgohlar — statsionar baza asosida qurilgan yoki vaqtinchalik ijaraga olingan obyektlarda tashkil etilib, unda bolalar smena davomida yashaydi.

Mazkur oromgohlar statsionar oromgohlar joylashuvi, taʼminoti va kun tartibini tashkil etishning sanitariya talablariga asosan faoliyat olib boradi.

Kunduzgi oromgohlar — umumtaʼlim maktablari, akademik litsey va kasb-hunar kollejlari, sport, ijtimoiy xizmat koʻrsatish, sanatoriy-kurort muassasalari, klublar qoshida vaqtinchalik tashkil etilib, unda bolalar faqatgina kunduz kuni dam oldiriladi va sogʻlomlashtiriladi.

Ushbu oromgohlar faoliyati taʼtil davrida bolalarning kunduz kuni dam olishlarini taʼminlash va sogʻlomlashtirish oromgohlari joylashuvi, taʼminoti va kun tartibini tashkillashtirishning gigiyena talablariga muvofiq yuritiladi.

Oromgohlar bolalarning yoshini eʼtiborga olgan holda, tarbiyaviy ishlarning mazmuni boʻyicha quyidagi ixtisoslashgan yoʻnalishlarda tashkil etilishi mumkin:

1. Intellektual rivojlantirish oromgohlari. Oromgohlar fan olimpiadalari, taʼlim sohasining turli darajadagi musobaqalari gʻoliblari boʻlgan 10 — 14 yoshdagi bolalarni dam oldirish va sogʻlomlashtirish uchun yoʻnaltirilgan boʻlib, unda bir yoki bir nechta fanlar yoxud tillar chuqurlashtirilgan tarzda oʻrganilishiga eʼtibor beriladi.

2. Sport-sogʻlomlashtirish oromgohlari. Oromgohlar 8 — 18 yoshdagi bolalar va oʻsmirlar uchun sport yoʻnalishidagi oʻquv muassasalari tarbiyalanuvchilarining oʻquv-mashq jarayonini davom ettirishlari, ularning sport mahoratini takomillashtirish, jismoniy tayyorgarlik darajasini oshirish, sogʻligʻini mustahkamlashga yoʻnaltirilgan boʻlib, unda bolalarning yoshi va sport turining oʻziga xos xususiyatlari asosida har xil guruhlar tuzilishi mumkin.

3. Sanatoriy-sogʻlomlashtirish oromgohlari. Oromgohlar yurak qon-tomir tizimining kasallanishi, nafas olish, ovqat hazm qilish organlari, tayanch-harakat apparatining oʻziga xos boʻlmagan xususiyatlari bilan betob boʻlib turadigan 7 — 14 yoshdagi bolalarni dam oldirish va sogʻlomlashtirish uchun tashkil etiladi.

4. Mehnat va dam oldirish oromgohlari. Oromgohlar umumtaʼlim maktablari, akademik litsey va kasb-hunar kollejlari 15 — 18 yoshdagi oʻquvchilarining ijtimoiy foydali mehnati dam oldirish va sogʻlomlashtirish bilan birga qoʻshib olib borilishiga yoʻnaltiriladi. Unda bolalar ijtimoiy foydali mehnatga tayyorlanadi, ularning mehnat koʻnikmalari shakllantiriladi. Oʻquvchilarning qiziqishlari va ehtiyojlarini moddiy jihatdan qoʻllab-quvvatlash va ragʻbatlantirish oromgohni tashkil etishning asosiy sharti hisoblanadi.

5. Harbiy-sport oromgohlari. Oromgohlar 12 — 17 yoshdagi bolalarni harbiy-vatanparvarlik ruhida tarbiyalash, yoshlarni Vatan mudofaasiga, Oʻzbekiston Respublikasi Qurolli kuchlari saflarida xizmat qilishga tayyorlash maqsadida tashkil etiladi.

6. Ekologik-biologik, oʻlkashunoslik oromgohlari. Oromgohlarda 7 — 14 yoshdagi bolalar uchun sayyohlik-oʻlkashunoslik va ekskursiya ishlarining serqirrali turlari tashkil etiladi, ularga mamlakatimizning tabiiy, ijtimoiy-iqtisodiy va tarixiy jihatdan oʻziga xos jihatlari chuqur oʻrgatiladi.

7. Ixtisoslashgan bolalar oromgohlari. Oromgohlar 7 — 14 yoshdagi bolalarda yetakchilik va faollikni shakllantirish, ularning ijtimoiy moslashuv koʻnikmalarini oshirishga yoʻnaltiriladi.

Bolalarning dam olishini tashkil etish va sogʻlomlashtirishni amalga oshirish boʻyicha mutasaddi tashkilotchilarning taklif va tashabbuslari bilan boshqa yoʻnalishlarda ham oromgohlar faoliyati yoʻlga qoʻyilishi mumkin.

Oromgohlarda bolalarga koʻrsatiladigan xizmatlar quyidagilardan iboratdir:

1. Jamoat tartibini saqlash va xavfsizlikni taʼminlash, aloqa va transport xizmatlari. Bunda:

oromgohlar va ularning atrofidagi hududlarda jamoat tartibini saqlash va xavfsizlikni taʼminlash boʻyicha ichki ishlar organlari xodimlarining doimiy navbatchiligi tashkil etiladi;

bolalarning daryo, anhor yoki suv havzasi boʻyida boʻlishlari, sayrga chiqishlari oromgoh yetakchisi yoki tarbiyachisi kuzatuvisiz boʻlishiga yoʻl qoʻyilmaydi;

har bir oromgohda yongʻin chiqish va tabiiy ofat ehtimoliga qarshi bolalarni koʻchirish rejasi ishlab chiqiladi va shunga asosan tayyorgarlik koʻriladi;

bolalar yongʻin xavfsizligi va jarohatlanishning oldini olish talablariga javob beruvchi turar joy bilan taʼminlanadi;

oromgoh hududida begona kishilarning boʻlishi yoki yashashiga mutlaqo yoʻl qoʻyilmaydi;

oromgohlardagi bolalar hamda ularga xizmat koʻrsatayotgan xodimlarning yuzaga kelishi mumkin boʻlgan favqulodda vaziyatlar boʻyicha hushyorligini oshirish yuzasidan profilaktik tadbirlar oʻtkaziladi;

har bir oromgoh shaharlararo telefon bilan taʼminlanadi, agar oromgoh joylashgan hududga telefon tarmogʻi oʻtkazilmagan boʻlsa, u holda uyali aloqa vositasi bilan taʼminlanadi;

bolalar belgilangan joydan texnik jihatdan soz boʻlgan transport vositalarida yoʻl patrul xizmati kuzatuvida oromgohlarga olib boriladi va olib kelinadi;

bolalarni sayohat, ekskursiya va safarlarga yoki oromgoh tomonidan oʻtkaziladigan boshqa tadbirlarga olib borish va olib kelish uchun transport vositalari ajratiladi.

2. Oromgohlarni tibbiy yordam bilan taʼminlash, Davlat sanitariya nazoratini oʻrnatish, oziq-ovqat mahsulotlari bilan taʼminlash hamda sifatini nazorat qilib borish xizmatlari. Bunda:

har bir oromgohda tibbiy punkt tashkil etilib, u tez tibbiy yordam koʻrsatish uchun zarur boʻlgan barcha dori-darmonlar va tibbiy asbob-uskunalar bilan taʼminlanadi;

bolalarga doimiy tez tibbiy yordam koʻrsatish uchun shay boʻlgan tibbiyot muassasalari oldindan belgilab qoʻyiladi;

bolalar oromgohga yuborilishidan oldin shifokor va tibbiyot hamshirasi tomonidan tibbiy koʻrikdan oʻtkaziladi, tibbiy hujjatlar tekshiriladi, agarda bolada biror kasallik alomati aniqlansa, uning oromgohga joʻnatilishiga ruxsat berilmaydi;

bolalarning yoshi va mavjud kasalliklarini eʼtiborga olgan holda kun tartibi ishlab chiqiladi, ratsional ovqatlantirish tashkil etiladi va muntazam ravishda nazorat qilib boriladi;

bolalarning sogʻligʻi muntazam ravishda kuzatib boriladi, ular shifokor tomonidan reja asosida tibbiy tekshiruvdan oʻtkazilib boriladi;

bolalar uzluksiz ravishda oziq-ovqat mahsulotlari bilan taʼminlanadi, ularning sifati va belgilangan meʼyorlarga mosligi doimiy ravishda nazorat qilib boriladi;

mavsumiy kasalliklar (oʻtkir ichak kasalliklari) koʻpayishi mumkin boʻlgan oylarda tibbiyot xodimlari tomonidan kasallikning oldini olish va zarur boʻlganda davolash ishlari tashkil etiladi;

yuqumli kasalliklar aniqlangan taqdirda, bu haqda sogʻliqni saqlash muassasalariga va Sanitariya-epidemiologik osoyishtalik va jamoat salomatligi xizmatining hududiy boʻlinmalariga belgilangan tartibda maʼlum qilinadi va bemor bola oromgoh rahbari nazoratida shifoxonaga yotqiziladi;

oromgoh oshxonasi ishi ustidan nazorat olib boriladi, taomnoma tuzishda shifokor ishtirok etadi, tayyor ovqatlar kaloriyasi tekshirib boriladi, tashqaridan keltirilgan oziq-ovqat mahsulotlari shifokor ruxsatisiz bolalarga berilmaydi;

oziq-ovqat mahsulotlarining sifati, saqlanishi, idish-tovoq va texnologik jihozlarni yuvishda sanitariya-gigiyena talablariga rioya etilishi qattiq nazoratga olinadi;

bolalar bilan sogʻlom turmush tarzi boʻyicha mutaxassislar ishtirokida davra suhbatlari, uchrashuvlar, savol-javoblar, davolash-profilaktik, sanitar-gigiyenik va epidemiyaga qarshi tadbirlar oʻtkaziladi, bolalarning yoshini eʼtiborga olgan holda, ular oʻrtasida turli yuqumli kasalliklarning oldini olish boʻyicha sanitariya-oqartuv ishlar olib boriladi;

oromgoh joylashgan hudud sanitariya-gigiyena talablariga javob beradigan holda tartibga keltiriladi va tozalanadi;

tibbiyot xodimlarining bolalar salomatligi va oromgohda sanitariya-gigiyena talablariga rioya etilishi uchun, oromgoh rahbarining oromgoh hududi tozaligi uchun javobgar shaxs ekanliklari belgilab qoʻyiladi;

oromgohlarda koʻrsatilayotgan tibbiy xizmatlarning monitoringi olib boriladi.

3. Taʼlim-tarbiyaviy xizmatlar. Bunda:

har bir oromgohda kutubxona yoki axborot-resurs markazi ishi tashkil etiladi, bolalar kitoblar, jurnal va gazetalar bilan taʼminlanadi;

bolalarning qiziqishlari va iqtidorlari boʻyicha toʻgaraklar, bolalar studiyalari, kompyuter sinflari, mahorat darslari tashkil etiladi;

olimpiadalar, viktorinalar, bilimlar tanlovlari, texnik va badiiy ijodiyot koʻrgazmalari oʻtkaziladi, fan va sanʼat arboblari bilan uchrashuvlar uyushtiriladi;

bolalarning yoshi va salomatligiga mos keluvchi ijtimoiy foydali va pedagogik maqsadga muvofiq mehnat turlari tashkil etiladi;

xizmat koʻrsatuvchi xodimlar, ayniqsa, pedagog va yetakchilarni oromgoh faoliyatiga jalb etishda ularning oʻz kasbini puxta egallaganligi, bola shaxsini hurmat qilishi, ijodkorligi, tashabbuskorligi, fidoyiligiga eʼtibor qaratiladi.

4. Maʼnaviy-maʼrifiy va madaniy xizmatlar. Bunda:

oromgoh hududi, binolari, maʼnaviyat va maʼrifat xonalari noanʼanaviy va qiziqarli ravishda, milliy va umuminsoniy qadriyatlarga asoslangan holda oʻziga xos jihozlanadi va bezatiladi;

bolalarda mafkuraviy immunitetni shakllantirish, ularni vatanparvarlik va milliy gʻoya ruhida tarbiyalashga qaratilgan davra suhbatlari, uchrashuvlar oʻtkaziladi;

bolalarning yoshiga qarab, ular stol usti oʻyinlari hamda oʻyinchoqlar bilan taʼminlanadi;

madaniyat va sanʼat toʻgʻrisida suhbatlar, oʻqilgan kitoblar, namoyish etilgan kinofilmlarning muhokamasi oʻtkaziladi, badiiy va ilmiy-ommabop kinofilmlar, multfilmlar, slaydlar, videofilmlar namoyish etiladi;

yosh tomoshabinlar teatri va boshqa ijodiy jamoalarning bolalar uchun spektakllari, konsert dasturlari namoyish etiladi, bolalarning muzeylar, koʻrgazmalarga tashriflari uyushtiriladi;

bolalarning yoshi, qiziqish va qobiliyatlarini eʼtiborga olib, milliy musiqa madaniyati, tasviriy sanʼat, xalq hunarmandchiligi, jahon madaniyati va sanʼati durdonalari boʻyicha mashgʻulotlar oʻtkaziladi;

turli millatga mansub bolalar uchun yangi doʻstlar orttirish, til oʻrganish va doʻstlik klublari tashkil etiladi;

jismoniy yoki ruhiy rivojlanishida nuqsoni boʻlgan bolalarda jismoniy va aqliy mehnatga birday hurmat uygʻotish, ularda mehnatsevarlik va yaratuvchanlik xislatlarini shakllantirishga qaratilgan mahorat darslari tashkil etiladi;

isteʼdodli bolalar bilan ishlashda ularning oʻz iqtidorlarini namoyon etishlariga sharoit yaratib beriladi va ular namunasida boshqa tengdoshlarining imkoniyatlari ham kashf etiladi;

har bir tadbir oʻtkazilishiga yuqori talab va masʼuliyat bilan yondashgan holda oromgohdagi barcha narsalar bolalar yoshiga mos, ularning qiziqishlari, dunyoqarashlari va ehtiyojlaridan kelib chiqib tayyorlanadi;

oromgoh tartib-qoidalariga amal qilish, odob-axloq meʼyorlarini bajarish va yuksak intizomli boʻlish har bir tarbiyalanuvchiga tushuntiriladi;

oromgoh hududi bolalar dunyosiga mos ravishda turli banner va shiorlar bilan bezatiladi.

5. Jismoniy tarbiya va sport sohasidagi xizmatlar. Bunda:

bolalar uchun ertalabki gigiyenik hamda davolash gimnastikasi oʻtkaziladi;

sport oʻyinlari hamda mashgʻulotlarini oʻtkazish uchun sport maydonchalari tayyorlanadi, ular sport inventarlari bilan taʼminlanadi;

suzish, yugurish, yurish, futbol, voleybol, tennis, shaxmat, stol tennisi va sportning boshqa turlari boʻyicha sport musobaqalari hamda mashgʻulotlar tashkil etiladi;

sportning ommaviy turlari bilan bir qatorda bolalarning yoshini, bilim darajalari, salomatliklari va jismoniy imkoniyatlarini hisobga olgan holda, maxsus mashgʻulotlar ham oʻtkaziladi;

bolalarning oʻzlariga maʼqul boʻlgan sport seksiyalariga qatnashishi, turli musobaqalarda ishtirok etishi taʼminlanadi, mazkur tadbirlar belgilangan tartibdagi tibbiy koʻrik ostida amalga oshirilib, bu jarayon tibbiyot xodimlarining nazoratida boʻlishi muhimdir.

6. Sayyohlik va ekskursiya xizmatlari. Bunda:

bolalarni sayyohlik safarlari va ekskursiyalarga olib chiqishdan oldin ularda ekstremal holatda oʻzini tutish koʻnikmalari shakllantiriladi, xavfsizlik qoidalari tushuntiriladi;

ishlab chiqilgan va tasdiqlangan yoʻnalishlar boʻyicha turli ekskursiyalar (shahar boʻylab, shahardan tashqarida, dam olish kuni yoʻnalishlari va boshqalar) uyushtiriladi;

oʻlkashunoslik, yosh tabiatshunoslik va ekologik yoʻnalishlarda amaliy mashgʻulotlar oʻtkaziladi, bu jarayonda bolalar tabiat hodisalarini kuzatishlari va taqqoslashlari, ekologik muammolarni amaliyotda oʻrganishlari va muhokama etishlari, bevosita tajriba oʻtkazishlari mumkin.

Bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruh tashkil etiladi.

Mazkur Muvofiqlashtiruvchi guruh zimmasiga bolalarning dam olishini tashkil etish va sogʻlomlashtirishni taʼminlashga doir barcha chora-tadbirlarni tashkil etish, bu borada vazirliklar, idoralar, tashkilotlar va mahalliy davlat hokimiyati organlari faoliyatini muvofiqlashtirib borish, mazkur yoʻnalishda joylarda amalga oshirilayotgan ishlarni tahliliy oʻrganib, ularni yanada takomillashtirish va rivojlantirish yuzasidan zarur chora-tadbirlarni amalga oshirish, zarur hollarda, Oʻzbekiston Respublikasi Vazirlar Mahkamasiga takliflar kiritish vazifalari yuklanadi.

Bolalarning dam olishini tashkil etish va sogʻlomlashtirishni amalga oshirish ishlariga davlat tashkilotlari bilan birga jamoat tashkilotlari ham keng jalb etiladi.

Bolalarning dam olishini tashkil etish va sogʻlomlashtirish borasida amalga oshirilayotgan keng koʻlamdagi ishlar ommaviy axborot vositalarida muntazam ravishda yoritib boriladi.

Mazkur Konsepsiyada belgilangan vazifalarni amalga oshirish orqali quyidagi natijalarga erishiladi:

Bolalarning dam olishini tashkil etish va sogʻlomlashtirishning respublika miqyosidagi tizimi yaratiladi;

oromgohlarni yangidan qurish, kapital taʼmirlash, rekonstruksiya qilish, ularning moddiy-texnik bazasini yaxshilab borish tufayli respublika oromgohlar tarmogʻi takomillashtiriladi;

bolalarni tizimli ravishda dam olishini tashkil etish va sogʻlomlashtirish qamrovi yildan-yilga ortib boradi;

bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruh darajasida oromgohlarda xizmat koʻrsatish borasidagi vazifalar va ularning ijrochilari aniq belgilanganligi sababli xizmat koʻrsatish darajasi va sifati yaxshilanadi;

yosh avlodda hozirgi davrdagi “ommaviy madaniyat”ning turli illatlariga qarshi mafkuraviy immunitet shakllantiriladi.

1. Mazkur Nizom Bolalarning dam olishini tashkil etish va sogʻlomlashtirish chora-tadbirlarini ishlab chiqish, ularni amalga oshirish yuzasidan tizimli nazorat va monitoringni taʼminlash boʻyicha Muvofiqlashtiruvchi guruhi (keyingi oʻrinlarda Muvofiqlashtiruvchi guruh deb yuritiladi)ning asosiy maqsadi va vazifalari, huquqlari, faoliyatini tashkil etish tartiblarini belgilaydi.

2. Muvofiqlashtiruvchi guruh oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmon, qaror va farmoyishlariga, Oʻzbekiston Respublikasi Vazirlar Mahkamasining qaror va farmoyishlariga, boshqa normativ-huquqiy hujjatlarga, shuningdek mazkur Nizomga amal qiladi.

3. Muvofiqlashtiruvchi guruh tomonidan oʻziga yuklangan vazifalarni samarali tashkil etish yuzasidan qabul qilingan qarorlar ijrosini taʼminlash guruh aʼzolari uchun majburiy hisoblanadi.

4. Muvofiqlashtiruvchi guruhning asosiy maqsadi oromgohlarda bolalarning sifatli dam olishini tashkil etish va sogʻlomlashtirish orqali har tomonlama barkamol avlodning voyaga yetishiga koʻmaklashishdan iborat.

5. Quyidagilar Muvofiqlashtiruvchi guruhning asosiy vazifalari hisoblanadi:

bolalar oromgohlarida maishiy, kommunal, transport va tibbiy taʼminotning barcha tizimlari ishonchli va uzluksiz faoliyat koʻrsatishi boʻyicha chora-tadbirlar kompleksini amalga oshirish;

bolalar oromgohlariga yondosh hududlarda sodir boʻlishi mumkin boʻlgan tabiiy va texnogen tusdagi favqulodda vaziyatlarning oldini olish chora-tadbirlarini koʻrish;

bolalarni oromgohlarga olib borish va ularni dam olishdan keyin olib qaytishda transport xizmati xavfsizligini, shuningdek yongʻin xavfsizligini taʼminlash;

bolalar oromgohlarida jamoat tartibini saqlash va huquqbuzarlik holatlarining oldini olish, shuningdek bolalar, tarbiyachilar va xizmat koʻrsatuvchi xodimlar xavfsizligini taʼminlash boʻyicha profilaktika chora-tadbirlarini koʻrish;

bolalar oʻrtasida sogʻlom turmush tarzini shakllantirish, ularga sifatli tibbiy xizmat koʻrsatishni tashkil etish, oromgohlarni zarur dori-darmonlar va tibbiy vositalar bilan taʼminlash;

barcha oromgohlarda bolalarning yashash, ovqatlanish va dam olish joylariga qoʻyiladigan sanitariya-gigiyena talablariga qatʼiy rioya etilishi, shuningdek oziq-ovqat mahsulotlari sifati va normalari ustidan kuchli nazoratni taʼminlash;

oromgohlarda bolalarni vatanparvarlik, umuminsoniy va milliy qadriyatlar ruhida tarbiyalash, ularda erkin fikrlash qobiliyatini shakllantirishga qaratilgan taʼlim-tarbiyaviy ishlarni tashkil etish;

bolalarning oʻqishdan tashqari vaqtini sermazmun oʻtkazish, ularning ham jismoniy, ham ruhiy jihatdan hordiq chiqarishlarini taʼminlash, turli sport musobaqalarini oʻtkazish va bu orqali bolalar sportini ommalashtirish;

oromgohlarda oʻtkaziladigan madaniy-maʼrifiy va sport tadbirlarida respublikadagi taniqli madaniyat, fan, adabiyot va sanʼat xodimlari hamda sportchilarning ishtirokini taʼminlash;

oromgohlarga jalb etiladigan bolalar salmogʻini yildan yilga oshirib borishni nazarda tutgan holda, ularga koʻrsatiladigan xizmatlar sifatini yaxshilab borish;

bolalarning dam olishini tashkil etish va sogʻlomlashtirish yuzasidan amalga oshirilayotgan ishlarni doimiy ravishda monitoring qilib borish, mazkur yoʻnalishdagi ishlarni yanada takomillashtirish yuzasidan zarur chora-tadbirlarni amalga oshirish;

bolalar oromgohlarining moddiy-texnika bazasini rivojlantirish boʻyicha tadbirlar rejasini ishlab chiqish va amalga oshirish, zarur hollarda, mazkur yoʻnalishdagi ishlarni yanada takomillashtirish yuzasidan Oʻzbekiston Respublikasi Vazirlar Mahkamasiga takliflar kiritish.

6. Muvofiqlashtiruvchi guruh quyidagi huquqlarga ega:

vazirlik, idora, tashkilot va mahalliy davlat hokimiyati organlariga bolalarni dam oldirish va sogʻlomlashtirish ishlarini sifatli tashkil etish maqsadida tegishli yoʻnalishlar boʻyicha topshiriqlar berish;

bolalarni oromgohlarda dam olishini tashkil etish va sogʻlomlashtirish chora-tadbirlari uchun korxona, tashkilot va muassasalarning homiylik mablagʻlarini jalb etish, ushbu mablagʻlarni maqsadli ishlar uchun yoʻnaltirish hamda sarflanishini nazorat qilib borish;

tegishli vazirlik, idora, tashkilot va mahalliy davlat hokimiyati organlari rahbar xodimlarining oromgohlar faoliyatini tashkil etish borasida amalga oshirilayotgan ishlari toʻgʻrisidagi hisobotlarini eshitish;

vazirlik, idora va tashkilotlardan Muvofiqlashtiruvchi guruhga yuklangan vazifalarning bajarilishini taʼminlash uchun zarur axborotlarni soʻrab olish;

tegishli vazirlik, idora va tashkilotlar mutaxassislari, oliy taʼlim muassasalari professor-oʻqituvchilarini bolalarni dam olishini tashkil etish va sogʻlomlashtirish boʻyicha uslubiy materiallar tayyorlash uchun jalb etish;

joylarda oromgohlar faoliyatiga masʼul boʻlgan mansabdor shaxslarning lavozimiga qonunchilik talablari buzilishiga yoʻl qoʻyganlarga nisbatan belgilangan tartibda choralar koʻrish toʻgʻrisida tegishli organlarga takliflar kiritish.

7. Muvofiqlashtiruvchi guruh oʻziga yuklangan vazifalar ijrosining samarali amalga oshirilishi yuzasidan javobgar hisoblanadi.

8. Oʻzbekiston Respublikasining Bosh vaziri – Muvofiqlashtiruvchi guruh raisi, Oʻzbekiston Respublikasi Bosh vazirining oʻrinbosari va Oʻzbekiston Kasaba uyushmalari Federatsiyasi Kengashi raisi – Muvofiqlashtiruvchi guruh raisining oʻrinbosarlari hisoblanadi.

Muvofiqlashtiruvchi guruhning aʼzolari tegishli vazirlik, idora va tashkilotlar vakillari, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlaridan iborat boʻladi.

Muvofiqlashtiruvchi guruh tarkibi Vazirlar Mahkamasi tomonidan tasdiqlanadi.

Muvofiqlashtiruvchi guruh aʼzolari boshqa ishga oʻtgan taqdirda uning tarkibiga ularning lavozimiga yangidan tayinlangan (saylangan) shaxslar kiritiladi.

9. Muvofiqlashtiruvchi guruhi raisi guruh faoliyatini boshqaradi, uning majlislarini olib boradi, majlislar bayonlarini tasdiqlaydi.

10. Muvofiqlashtiruvchi guruh faoliyatida qarorlar qabul qilishda aʼzolarning tenghuquqliligi va kollegiallik tamoyillariga amal qilinadi.

11. Muvofiqlashtiruvchi guruh majlislari yiliga kamida ikki marta oʻtkaziladi, Muvofiqlashtiruvchi guruh raisi tomonidan yoki aʼzolarning taklifiga koʻra navbatdan tashqari majlislar chaqirilishi mumkin.

12. Muvofiqlashtiruvchi guruh majlislari unda aʼzolarining koʻpchiligi ishtirok etganda vakolatli hisoblanadi.

Muvofiqlashtiruvchi guruh qarorlari majlisda ishtirok etayotganlarning yarmidan koʻpi qoʻllab-quvvatlaganda qabul qilingan hisoblanadi, ovozlar teng boʻlganda raisning ovozi hal qiluvchi hisoblanadi.

13. Zarurat boʻlganda, Muvofiqlashtiruvchi guruh majlisiga koʻrib chiqilayotgan masalalar xarakteriga qarab, vazirliklar, idoralar, xoʻjalik birlashmalari, jamoat tashkilotlari, korxona, muassasa va tashkilotlar rahbarlari taklif etiladi.

14. Muvofiqlashtiruvchi guruh oʻz faoliyatini tizimli ravishda yoʻlga qoʻyish, belgilangan vazifalarni oʻz vaqtida va sifatli bajarish maqsadida 5 ta asosiy yoʻnalish boʻyicha Ishchi guruhlar tuzadi.

1-ishchi guruh. “Oromgohlarda taʼlim-tarbiyaviy ishlarni tashkil etish, ularni malakali pedagog va yetakchilar bilan taʼminlash”.

Ishchi guruh:

oromgohlarni malakali pedagog xodimlar bilan taʼminlaydi, ular uchun qisqa muddatli oʻquv kurslari tashkil etadi;

oromgohlarning axborot-resurs markazlarini Oʻzbekiston Respublikasi Prezidentining kitoblari, badiiy adabiyotlar, gazeta va jurnallar bilan taʼminlaydi;

bolalarni vatanparvarlik, umuminsoniy va milliy qadriyatlar ruhida tarbiyalash, ularda erkin fikrlash qobiliyatini shakllantirishga qaratilgan uslubiy qoʻllanmalar tayyorlaydi va har bir oromgohga yetkazadi;

taʼlim yoʻnalishlari boʻyicha turli tanlovlar, bolalar ongini rivojlantirishga qaratilgan oʻyinlar oʻtkazish, toʻgaraklar tashkil etish ishlarini yoʻlga qoʻyadi.

2-ishchi guruh. “Bolalarga malakali tibbiy xizmat koʻrsatish, oromgohlarda oziq-ovqat mahsulotlari sifatini, sanitariya-gigiyena talablariga rioya etilishini nazorat qilish”.

Ishchi guruh:

oromgohlarni yetarli miqdordagi barcha zarur dori-darmon vositalari, shu jumladan, ilon va qoraqurt zahriga qarshi zardoblar bilan taʼminlaydi;

oromgohlarni malakali tibbiyot xodimlari bilan taʼminlaydi, ular uchun qisqa muddatli oʻquv kurslari tashkil etadi;

oromgohlarda oziq-ovqat mahsulotlari va ichimlik suvining sifatini hamda sanitariya-gigiyena talablariga rioya etilishini oʻrganib boradi hamda aniqlangan kamchiliklarning zudlik bilan bartaraf etilishini tashkil qiladi;

bolalar bilan sogʻlom turmush tarzi boʻyicha davra suhbatlari, savol-javoblar, davolash-profilaktik, sanitariya-gigiyenik va epidemiyaga qarshi tadbirlar oʻtkazadi, bolalarning yoshini eʼtiborga olgan holda, ular oʻrtasida turli yuqumli kasalliklarning oldini olish boʻyicha sanitariya-gigiyenaga doir tushuntirish ishlarini olib boradi.

3-ishchi guruh. “Bolalarni vatanparvarlik ruhida tarbiyalashga qaratilgan maʼnaviy-maʼrifiy tadbirlar va sport musobaqalarini oʻtkazish, ularga madaniy xizmat koʻrsatishni tashkil etish”.

Ishchi guruh:

madaniy-maʼrifiy tadbirlarni oʻtkazish maqsadida har bir oromgoh boʻyicha alohida dastur ishlab chiqilishini va amalga oshirilishini taʼminlaydi;

oromgohlarga madaniyat va fan xodimlari, yozuvchi va shoirlar, mashhur sportchilarning tashrifini tashkil etib, bolalar bilan uchrashuvlar, davra suhbatlari, badiiy kechalar, savol-javoblar, mahorat darslari oʻtkazadi;

oromgohlarda mumtoz va estrada sanʼatkorlarining chiqishlarini, milliy konsert namoyishlarini tashkil etadi;

oromgohlarda oʻzbek milliy kinofilmlari namoyishlarini oʻtkazadi;

bolalar oʻrtasida turli sport musobaqalarini tashkil etadi.

Ishchi guruh:

bolalarni dam olishini tashkil etish va sogʻlomlashtirish davomida oromgohlarda jamoat tartibini saqlash va xavfsizlikni taʼminlash borasidagi ishlarni tashkil etadi;

oromgohlardagi bolalar hamda ularga xizmat koʻrsatayotgan xodimlarning yuzaga kelishi mumkin boʻlgan favqulodda vaziyatlar boʻyicha hushyorligini oshirish yuzasidan profilaktik tadbirlar oʻtkazilishini taʼminlaydi;

har bir oromgohga ichki ishlar xodimlarini biriktirib, ularning doimiy ravishda navbatchiligini tashkil etadi;

mahalla posbonlari va faollarini jamoat tartibini saqlash va xavfsizlikni taʼminlash ishlariga jalb etadi;

bolalarning belgilangan joylardan oromgohlarga borib-kelishlarini taʼminlaydi, bunda yoʻl harakati xavfsizligi xodimlari kuzatuvini tashkil etadi;

oromgohlarga bolalarni olib borayotgan va olib kelayotgan har bir transport vositasining texnik jihatdan soz boʻlishini muntazam ravishda nazorat qilib boradi;

oromgohlarga olib boradigan yoʻllarning xavfsizlik nuqtai nazaridan soz boʻlishini taʼminlaydi;

yuzaga keladigan favqulodda vaziyatlar va tabiiy ofatlarning oldini olish barcha zarur choralarni koʻradi;

tektonik hududda joylashgan yoki sel kelishi xavfi boʻlgan oromgohlar faoliyatini vaqtincha yopish choralari koʻrilishini taʼminlaydi;

ichki ishlar, favqulodda vaziyatlar xodimlari uchun qisqa muddatli oʻquv mashgʻulotlari yoki oʻquv kurslari tashkil etadi;

bolalar uchun yoʻl harakati qoidalariga rioya etish boʻyicha oʻquv mashgʻulotlari olib borilishini taʼminlaydi.

Ishchi guruh:

oromgohlarda elektr energiyasi va tabiiy gaz uzluksizligini taʼminlaydi, favqulodda holatlarda elektr energiyasi oʻchib qolganda qoʻshimcha choralardan foydalanish imkoniyatini yaratadi, bu borada har bir hududda Shtablar tashkil etib, ularning faoliyatini nazorat qilib boradi;

oromgohlarda toza ichimlik suvi taʼminotini tashkil etadi, chekka hududlarda joylashgan oromgohlarga ichimlik suvining maxsus transport vositalari orqali uzluksiz ravishda yetkazib berilishini taʼminlaydi;

oromgohlarda obodonlashtirish ishlari olib borilishini tashkil etadi, obodonlashtirish uchun zarur boʻlgan maxsus transport vositalari xizmatlarini tashkil etadi.

15. Har biri Ishchi guruh rahbari huzurida tegishli vazirlik va tashkilotlar mutaxassislaridan iborat tarkibda jamoatchilik asosida faoliyat olib boradigan monitoring guruhlari tashkil etiladi. Ularning asosiy vazifasi Ishchi guruhlar tomonidan amalga oshirilayotgan ishlar toʻgʻrisida tahliliy axborotlar tayyorlab, Muvofiqlashtiruvchi guruh masʼul kotibiga taqdim etib borishdan iborat.

16. Ishchi guruhlar bolalarni dam olishini tashkil etish va sogʻlomlashtirish boʻyicha oʻz yoʻnalishi boʻyicha belgilangan ishlarni amalga oshirish, zudlik bilan hal etish lozim boʻlgan vazifalarni bajarish va nazorat qilish boʻyicha malakali mutaxassislardan iborat guruhlar tuzishi va ularning faoliyatini yoʻlga qoʻyishi mumkin.

17. Joylarda bolalarni dam olishini tashkil etish va sogʻlomlashtirishni tashkil etish, Muvofiqlashtiruvchi guruh topshiriqlarining ijrosini oʻz vaqtida va sifatli bajarish maqsadida Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari rahbarligida hududiy Muvofiqlashtiruvchi guruhlar tashkil etiladi.

Hududiy Muvofiqlashtiruvchi guruhlar:

bolalarni dam olishini tashkil etish va sogʻlomlashtirishni tashkil etish boʻyicha joylardagi hududiy idora va tashkilotlar faoliyatini muvofiqlashtirib boradi;

bolalarni dam olishini tashkil etish va sogʻlomlashtirish rejasini amalga oshirish uchun talab etiladigan moliyaviy mablagʻlar manbalarini aniqlashtiradi;

oromgohlarning moddiy-texnik bazasini rivojlantirish, ularni rekonstruksiya qilish, kapital va joriy taʼmirlash chora-tadbirlarini amalga oshiradi;

oromgohlarni belgilangan meʼyorlar asosida, uzluksiz ravishda sifatli oziq-ovqat hamda goʻsht mahsulotlari bilan taʼminlashni muvofiqlashtiradi;

oromgohlarni zarur inventarlar bilan taʼminlash choralarini amalga oshiradi;

bolalarni dam olishini tashkil etish va sogʻlomlashtirish chora-tadbirlari ijrosini toʻliq va sifatli bajarish yuzasidan homiylik mablagʻlarini jalb etadi va ularning maqsadli sarflanishini nazorat qiladi;

joylardagi oromgohlar faoliyatini takomillashtirish yuzasidan takliflar tayyorlaydi va koʻrib chiqish uchun Muvofiqlashtiruvchi guruhga taqdim etadi.

18. Muvofiqlashtiruvchi guruh majlisiga materiallar guruh aʼzolari, hududiy guruhlar, tegishli vazirlik, idora va tashkilotlar tomonidan taqdim etilgan maʼlumotlar, shuningdek oromgohlarning bolalarni qabul qilishga tayyorligi holatini oʻrganish materiallari asosida tayyorlanadi.

Muvofiqlashtiruvchi guruh majlisi kun tartibining har bir masalasi boʻyicha hujjatlar paketida guruh qarorini qabul qilish uchun zarur boʻlgan materiallar (tahliliy maʼlumotnomalar, jadvallar va boshqalar) hamda Muvofiqlashtiruvchi guruh qarori loyihasi mavjud boʻlishi lozim.

19. Muvofiqlashtiruvchi guruh majlisiga materiallarni guruh masʼul kotibi tayyorlaydi, shuningdek u Muvofiqlashtiruvchi guruh qarorlarining ijrosi monitoringini yuritadi va uning natijalarini Muvofiqlashtiruvchi guruh rahbariyatiga koʻrib chiqish uchun taqdim etadi.