Aholini muayyan ijtimoiy himoyalashga oid tadbirlarni ro‘yobga chiqarishda kam ta’minlangan oilalarga davlat madadini, fuqarolar o‘z-o‘zini boshqaruv organlarining keng va faol ishtirokini kuchaytirish maqsadida:

1. Qo‘rg‘onlar, qishloqlar, ovullar va mahallalarning fuqarolar o‘z-o‘zini boshqaruv barcha organlarida kam ta’minlangan oilalarga moddiy yordam berish maxsus jamg‘armalari tashkil etilsin.

Shu maqsadda O‘zbekiston Respublikasi Moliya vazirligi, O‘zjamg‘armabank ikki hafta muddat ichida fuqarolar o‘z-o‘zini boshqaruv organlariga yuridik shaxs huquqi berib, jamg‘arma bankning tegishli bo‘limlarida maxsus hisobvaraqalari ochsinlar.

2. Quyidagilar kam ta’minlangan oilalarga moddiy yordam berish maxsus jamg‘armalarini tashkil etishning asosiy manbalari qilib belgilansin:

— ilovaga muvofiq miqdorda 1994-yilning IV choragiga mo‘ljallangan respublika budjeti mablag‘lari;

— mahalliy budjetlarning mablag‘lari;

— budjetdan tashqari manbalar — jamoat va xayriya jamg‘armalari, korxonalar va xo‘jaliklarning mablag‘lari, fuqarolarning ixtiyoriy xayr-ehsonlari va boshqalar.

3. Qo‘rg‘onlar, qishloqlar, ovullar, mahallalarning, fuqarolar o‘z-o‘zini boshqaruv organlari 1994-yilning 1-oktabridan boshlab kam ta’minlangan oilalarga moddiy yordamning ana shu jamg‘armalari mablag‘laridan har oylik to‘lovlar to‘lasinlar.

4. Belgilansinki, kam ta’minlangan oilalarga moddiy yordam qo‘rg‘on, qishloq, ovul, shaharlardagi mahallalar fuqarolar yig‘ini, yig‘inni chaqirish imkoni bo‘lmaganda esa qo‘rg‘onlar, qishloqlar, ovullar mahallalari, ko‘chalar, turar joylar fuqarolari vakillari yig‘ilishining qaroriga ko‘ra tayinlanadi.

kam ta’minlangan oilalarga moddiy yordam miqdorlari O‘zbekiston Respublikasi Prezidenti qarorlari bilan belgilanadi;

O‘z-o‘zini boshqaruv organlariga ajratilgan va foydalanilmagan budjet mablag‘lari olib qo‘yilmaydi va fuqarolar yig‘ini (yig‘ilishi)ning qaroriga binoan aholi turar joylarini obodonlashtirish, gazlashtirish va suv bilan ta’minlashga, shuningdek boshqa ijtimoiy muammolarni hal etishga sarflanishi mumkin.

5. Kam ta’minlangan oilaga moddiy yordam tayinlash va to‘lashga oid qaror qabul qilish chog‘ida ijtimoiy adolat, ro‘y-rostlik, keng oshkoralik qoidalariga rioya etilishi, ajratilgan mablag‘lar aniq maqsadni ko‘zlab va samarali foydalanilishi uchun majburiy shartlar bo‘lishi zarur.

O‘zbekiston Respublikasining Vazirlar Mahkamasi bir hafta muddat ichida kam ta’minlangan oilalarga moddiy yordam berish uchun mablag‘ topish va undan foydalanish yo‘llari to‘g‘risida, ana shu mablag‘ni qaysi maqsadlar uchun ajratish va to‘lash tartibi haqida qaror qabul qilsin.

6. Qoraqalpog‘iston Respublikasi Vazirlar Kengashi, viloyatlar va Toshkent shahri hokimlari:

bir oy muddat davomida shaharlar, qo‘rg‘onlar, qishloqlar va ovullardagi mahallalarning joylashishini, ularning chegaralarini, shuningdek oilalar va aholi sonini aniqlasinlar;

shu yilning 1-dekabrida O‘zbekiston Respublikasi Adliya vazirligiga kam ta’minlangan oilalarga moddiy yordam berish uchun ajratiladigan mablag‘larni taqsimlash va ulardan samarali foydalanish amaliyotini takomillashtirishga doir takliflarni taqdim etsinlar.

7. Kam ta’minlangan oilalarga to‘lash uchun mo‘ljallangan budjet va budjetdan tashqari mablag‘lardan aniq maqsadni ko‘zlab foydalanilishini nazorat qilish shaxsan Qoraqalpog‘iston Respublikasi Vazirlar Kengashining raisi, viloyatlar, shaharlar va tumanlarning hokimlari, shuningdek O‘zbekiston Respublikasi Moliya vazirligining Nazorat-taftish bosh boshqarmasi zimmasiga yuklansin.

O‘zbekiston Respublikasi Moliya vazirligi ajratilayotgan budjet va budjetdan tashqari mablag‘lar fuqarolar o‘z-o‘zini boshqaruv organlarining maxsus hisobvaraqalariga to‘liq va o‘z vaqtida o‘tkazilayotganligini, ana shu mablag‘lardan aniq maqsadni ko‘zlab foydalanilayotganligini muntazam tekshirib, taftish qilsin va har chorakda Hukumatga ma’lum qilsin.

8. Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari, vazirliklar, idoralar, uyushmalar, konsernlar, korporatsiyalar, korxonalar va tashkilotlar, xayriya jamg‘armalari va tadbirkorlik tuzilmalari mavjud imkoniyatlardan kelib chiqib, o‘z mablag‘lari hisobidan kam ta’minlangan oilalarga butun choralar bilan qo‘shimcha ijtimoiy yordam bersinlar.

O‘zbekiston Respublikasi Moliya vazirligi bir hafta muddat ichida kam ta’minlangan oilalarga moddiy yordamning ana shu jamg‘armalariga mablag‘ o‘tkazayotgan xo‘jalik tashkilotlari uchun imtiyozli soliq solish tartibini ishlab chiqsin.

9. O‘zbekiston Respublikasi Moliya vazirligi Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari bilan birgalikda 1995-yilgi budjetning loyihasini tuzish chog‘ida shu yilning IV choragida budjet mablag‘larini taqsimlash tajribasini hisobga olgan holda kam ta’minlangan oilalarga yordam berish uchun zarur mablag‘larni va ana shu mablag‘larni topish manbalarini aniqlasinlar.

10. Ommaviy axborot vositalari kam ta’minlangan oilalarga har oylik moddiy yordam tayinlash va to‘lash tartibi to‘g‘risida televideniye, radio orqali va matbuotda tushuntirish ishlarini faol olib borsinlar, fuqarolar o‘z-o‘zini boshqaruv organlarining aholini ijtimoiy jihatdan himoyalashga oid faoliyati haqida jamoatchilikni keng xabardor qilsinlar.