Hujjat kuchini yo‘qotgan " " 01.10.2020

PDF-faylidagi rasmiy manba

Oʻzbekiston aloqa va axborotlashtirish AGENTLIGI BOSh DIREKTORINING

TAKSOFON ORQALI TELEFON ALOQA XIZMATLARINI KOʻRSATISh QOIDALARINI TASDIQLASh TOʻGʻRISIDA

[Oʻzbekiston Respublikasi Adliya vazirligi tomonidan 2010-yil 6-sentabrda roʻyxatdan oʻtkazildi, roʻyxat raqami 2140]

LexUZ sharhi

Mazkur buyruq Oʻzbekiston Respublikasi axborot texnologiyalari va kommunikatsiyalarini rivojlantirish vazirining 2020-yil 30-iyundagi 208-mh-sonli “Telekommunikatsiya xizmatlarini koʻrsatish qoidalarini tasdiqlash toʻgʻrisida”gi buyrugʻiga (roʻyxat raqami 3275, 30.06.2020-y.) asosan 2020-yil 1-oktabrdan oʻz kuchini yoʻqotadi.

Oʻzbekiston Respublikasining “Telekommunikatsiyalar toʻgʻrisida”gi Qonuniga (Oʻzbekiston Respublikasi Oliy Majlisining Axborotnomasi, 1999-y., 9-son, 219-modda) hamda Oʻzbekiston Respublikasi Vazirlar Mahkamasining 2004-yil 7-maydagi 215-son “Oʻzbekiston aloqa va axborotlashtirish agentligi faoliyatini takomillashtirish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2004-y., 19-son, 220-modda) qaroriga muvofiq buyuraman:

1. Taksofon orqali telefon aloqa xizmatlarini koʻrsatish qoidalari ilovaga muvofiq tasdiqlansin.

2. Oʻzbekiston pochta va telekommunikatsiyalar agentligi tomonidan 1998-yil 2-iyunda tasdiqlangan Taksofonlardan telefon aloqasi xizmatlarini taqdim etish va ulardan foydalanish qoidalari (roʻyxat raqami 445, 1998-yil 11-iyun) oʻz kuchini yoʻqotgan deb hisoblansin.

3. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Bosh direktor X. MUHITDINOV

2010-yil 3-avgust,

Oʻzbekiston aloqa va axborotlashtirish agentligi bosh direktorining 2010-yil 3-avgustdagi 290-son buyrugʻiga
ILOVA

Taksofon orqali telefon aloqa xizmatlarini koʻrsatish

Mazkur Qoidalar Oʻzbekiston Respublikasining Fuqarolik kodeksi (Oʻzbekiston Respublikasi Oliy Majlisining Axborotnomasi, 1996-y., 2-songa ilova), Oʻzbekiston Respublikasining “Telekommunikatsiyalar toʻgʻrisida”gi (Oʻzbekiston Respublikasi Oliy Majlisining Axborotnomasi, 1999-y., 9-son, 219-modda), “Isteʼmolchilarning huquqlarini himoya qilish toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-y., 5-6-son, 59-modda), “Xoʻjalik yurituvchi subyektlar faoliyatining shartnomaviy-huquqiy bazasi toʻgʻrisida”gi (Oʻzbekiston Respublikasi Oliy Majlisining Axborotnomasi, 1998-y., 9-son, 170-modda) qonunlariga muvofiq taksofonlardan telefon aloqasi xizmatlarini taqdim etish va ulardan foydalanishning tartib va shartlarini belgilaydi.

I. Umumiy qoidalar

1. Ushbu Qoidalarda quyidagi tushunchalar qoʻllaniladi:

axborot-maʼlumot xizmati — foydalanuvchilarga, ularning tashabbusiga koʻra, ogʻzaki (tovushli) yoki vizual soʻrov shaklida ifodalangan axborotni (bir telefon bogʻlanish chegarasida) taqdim etuvchi xizmat;

mahalliy telefon aloqasi — bir aholi punkti yoki maʼmuriy tuman doirasida joylashgan foydalanuvchilar oʻrtasidagi telefon orqali bogʻlanish;

taksofon — telefon aloqani oʻrnatish, foydalanuvchilarga soʻzlashuvlar va qoʻshimcha xizmatlarni taqdim etish uchun moʻljallangan, foydalanuvchilar bilan naqd pul va naqd pulsiz toʻlov vositalari (maxsus jeton, toʻlov kartasi) yordamida darhol hisob-kitob qilish qurilmasidan iborat boʻlgan, shu jumladan, soʻzlashuv punktlarida oʻrnatiladigan oxirgi abonent telefon qurilmasi;

taksofon orqali telefon aloqadan foydalanuvchi (keyingi oʻrinlarda foydalanuvchi deb yuritiladi) — taksofon orqali telefon aloqa xizmatlarining isteʼmolchisi hisoblangan yuridik yoki jismoniy shaxs;

taksofon orqali telefon aloqa xizmatlari provayderi (keyingi oʻrinlarda provayder deb yuritiladi) — operator tarmogʻi orqali foydalanuvchilarga taksofon orqali telefon aloqa xizmatlarini koʻrsatuvchi operator bilan shartnoma tuzgan yuridik shaxs;

telekommunikatsiya operatori (keyingi oʻrinlarda operator deb yuritiladi) — mulk huquqi yoki boshqa ashyoviy huquq asosida telekommunikatsiyalar tarmogʻiga ega boʻlgan, uning ishlashi va rivojlanishini taʼminlovchi hamda telekommunikatsiya xizmatlarini koʻrsatuvchi yuridik shaxs;

telekommunikatsiyalar tarmogʻidan foydalanish — taksofonlardan telefon aloqasi xizmatlarini taqdim etish uchun provayderga telekommunikatsiya vositalari va inshootlaridan foydalanish imkoniyatini yaratish;

toʻlov kartasi — kodlangan maʼlumotni saqlaydigan, tarmoq foydalanuvchisini identifikatsiya qilish va chaqiruvni initsiatsiya qilish imkoniyatini beruvchi toʻlov vositasi;

shaharlararo telefon aloqasi — Oʻzbekiston Respublikasining turli maʼmuriy tumanlari doirasida (shahar tarkibidagi tumanlardan tashqari) joylashgan foydalanuvchilar oʻrtasidagi telefon orqali bogʻlanish;

xalqaro telefon aloqasi — Oʻzbekiston Respublikasi hududida joylashgan foydalanuvchi va boshqa davlat hududida joylashgan foydalanuvchi oʻrtasidagi telefon orqali bogʻlanish.

2. Operatorlar va provaydyerlarning faoliyati qonun hujjatlarida nazarda tutilgan hollarda litsenziyalash amalga oshiriladi.

3. Taksofonlar koʻchalarda, maydonlarda, bozorlarda, aloqa boʻlimlarida, aeroportlarda, vokzallarda, metro bekatlarida, avtobus bekatlarida, doʻkonlarda, oʻquv yurtlarida, shahar jamoat transporti bekatlarida, tibbiyot va davolash muassasalarida, maxsus jihozlangan soʻzlashuv punktlarida, mahalliy davlat hokimiyati organlari va fuqarolarning oʻzini oʻzi boshqarish organlarining bino va inshootlarida hamda boshqa joylarda kelishuv asosida oʻrnatilishi mumkin. Taksofonlar alohida turuvchi hamda ixcham holatda joylashtirilgan boʻlishi mumkin.

4. Oʻrnatilgan taksofonlar ushbu turdagi telekommunikatsiya vositalariga qoʻyiladigan texnik talablarga, standartlarga, sanitariya va yongʻinga qarshi norma va qoidalariga mos kelishi kerak.

5. Taksofonlar, kabina va yarim kabinalarning joylashtirilishi va jihozlanishi foydalanish uchun qulaylikni, zarur yoritilganlikni, tashqi shovqin va atmosfera yogʻingarchiliklari taʼsirlarining chegaralashini, soʻzlashuvlarning sir saqlanishini taʼminlashi kerak.

6. Taksofonlar oʻrnatilgan joylarda quyidagilar boʻlishi shart:

taksofondan foydalanish boʻyicha yoʻriqnoma;

taksofonlarni ekspluatatsiya qiluvchi operator yoki provayder toʻgʻrisida axborot (nomi, manzili, telefon nomyerlari);

taqdim etiladigan xizmatlar tarifi toʻgʻrisida axborot;

maʼlumot koʻrinishidagi axborot (favqulodda tezkor xizmatlar hamda taksofonlarni taʼmirlash xizmatining telefon nomyerlari, yaqin atrofda joylashgan taksofonning manzili va boshqalar);

maxsus jetonlar va toʻlov kartalarini sotib olish joylari toʻgʻrisidagi axborot.

7. Operator tomonidan taksofonlarga telefon nomyerlari ajratilgan hollarda, shunday taksofonlardan kiruvchi chaqiruvlarni qabul qilib olish uchun foydalanish mumkin.

II. Foydalanuvchilarga taksofon orqali koʻrsatiladigan telefon aloqa xizmati

8. Taksofon orqali quyidagi pullik xizmat turlari koʻrsatiladi:

mahalliy telefon soʻzlashuvlari;

shaharlararo telefon soʻzlashuvlari;

xalqaro telefon soʻzlashuvlari;

axborot-maʼlumot xizmati operatorlari bilan telefon aloqasi.

9. Taksofondan quyidagi favqulodda tezkor xizmatlarni chaqirish bepul amalga oshiriladi:

yongʻin xavfsizligi xizmati;

ichki ishlar organlari;

(9-bandning uchinchi xatboshisi Oʻzbekiston Respublikasi axborot texnologiyalari va kommunikatsiyalarini rivojlantirish vazirining 2019-yil 29-iyuldagi 201-mh-sonli (roʻyxat raqami 2140-1, 05.08.2019-y.) buyrugʻi tahririda — Qonun hujjatlari maʼlumotlari milliy bazasi, 05.08.2019-y., 10/19/2140-1/3622-son)

tez tibbiy yordam;

gaz tarmogʻining avariya xizmati;

Oʻzbekiston Respublikasi Favqulodda vaziyatlar vazirligining qutqaruv xizmati.

III. Operatorning huquq va majburiyatlari

10. Operator quyidagi huquqlarga ega:

provayder shartnoma shartlarini buzganda provayderning telekommunikatsiya tarmogʻidan foydalanishini toʻxtatib qoʻyish;

provayder tomonidan keltirilgan zararlar oʻrnini shartnomaga muvofiq qoplanishini talab qilish;

provayderning noqonuniy harakatlari ustidan qonun hujjatlariga muvofiq shikoyat qilish.

Operator tomonidan taksofon orqali telefon aloqa xizmatlari bevosita koʻrsatilgan holda, operator quyidagi huquqlarga ega:

foydalanuvchilarga xizmatlarni koʻrsatish;

foydalanuvchilarga taksofon orqali telefon aloqa xizmatlarini koʻrsatish boʻyicha texnik siyosatni mustaqil ravishda belgilash va tashkiliy tadbirlarni amalga oshirish.

Operator qonun hujjatlariga muvofiq boshqa huquqlarga ham ega boʻlishi mumkin.

11. Operator quyidagilarga majburdir:

oʻz faoliyatini qonun hujjatlariga muvofiq amalga oshirish;

tuzilgan shartnoma asosida provayderga telekommunikatsiya tarmogʻidan foydalanishini taqdim etish;

shartnomaning bajarilmaganligi yoki lozim darajada bajarilmaganligi uchun provaydyerlarga yetkazilgan zararlarni qoplash;

provaydyerlarni telekommunikatsiya tarmoqlaridan normal foydalanish rejimi buzilishiga olib kelishi mumkin boʻlgan tarmoqdagi taʼmirlash-sozlash va profilaktika ishlarining boshlanish vaqti va davomiyligi toʻgʻrisida xabardor qilish;

provaydyerlarning shikoyatlarini, agar tuzilgan shartnomada boshqacha holat nazarda tutilmagan boʻlsa, 15 kundan koʻp boʻlmagan muddatda koʻrib chiqish.

12. Operator tomonidan taksofon orqali telefon aloqa xizmatlari bevosita koʻrsatilgan holda, operator quyidagilarga majburdir:

foydalanuvchini taksofon orqali sifatli telefon aloqa xizmatlaridan foydalanishini taʼminlash;

taksofonlar, kabinalar va yarim kabinalarni soz holatda saqlanishini taʼminlash;

taksofon orqali telefon aloqa xizmatlarini koʻrsatish tartibi va shartlari oʻzgarganligi toʻgʻrisidagi axborotni foydalanuvchilarga taqdim etish;

foydalanuvchilar uchun qulay boʻlgan (savdo tarmogʻi, aloqa boʻlimi va hokazo) joylarda maxsus jeton yoki toʻlov kartalari sotilishini taʼminlash;

foydalanuvchilarning shikoyatlarini qonun hujjatlarida belgilangan muddatlarda koʻrib chiqish.

Operator zimmasida qonun hujjatlariga muvofiq boshqa majburiyatlar ham boʻlishi mumkin.

IV. Provayderning huquq va majburiyatlari

13. Provayder quyidagi huquqlarga ega:

operator tomonidan shartnoma shartlari buzilgan taqdirda operator xizmatlarini rad etish;

operatordan uzilishlarda yoki telekommunikatsiya tarmogʻidan lozim darajada foydalanilmaganda toʻlovlarning qayta hisoblanishini talab qilish;

foydalanuvchilarga taksofon orqali telefon aloqa xizmatlarini koʻrsatish boʻyicha texnik siyosatni mustaqil ravishda belgilash va tashkiliy tadbirlarni amalga oshirish;

operator yoki foydalanuvchining aybi bilan yetkazilgan moddiy zarar qoplanishini talab qilish;

oʻz huquqlari buzilgan taqdirda vakolatli davlat organlariga yoki sudga murojaat qilish.

Provayder qonun hujjatlariga muvofiq boshqa huquqlarga ham ega boʻlishi mumkin.

14. Provayder quyidagilarga majburdir:

oʻz faoliyatini qonun hujjatlariga muvofiq amalga oshirish;

telekommunikatsiya tarmogʻidan foydalanish uchun operatorga toʻlovni oʻz vaqtida amalga oshirish;

operatorning ish sifatini pasaytirishga yoki telekommunikatsiya tarmoqlarini shikastlantirishga qaratilgan xatti-harakatlar qilmaslik;

foydalanuvchini taksofon orqali sifatli telefon aloqa xizmatlaridan foydalanishini taʼminlash;

taksofonlar, kabinalar va yarim kabinalar soz holatda saqlanishini taʼminlash;

taksofon orqali telefon aloqa xizmatlarini koʻrsatish tartibi va shartlari oʻzgarganligi toʻgʻrisidagi axborotni foydalanuvchilarga taqdim etish;

foydalanuvchilar uchun qulay boʻlgan (savdo tarmogʻi, aloqa boʻlimi va hokazo) joylarda maxsus jeton yoki toʻlov kartalari sotilishini taʼminlash;

foydalanuvchilarning shikoyatlarini qonun hujjatlarida belgilangan muddatlarda koʻrib chiqish.

Provayder zimmasida qonun hujjatlariga muvofiq boshqa majburiyatlar ham boʻlishi mumkin.

V. Foydalanuvchilarning huquq va majburiyatlari

15. Foydalanuvchi quyidagi huquqlarga ega:

operator yoki provayder tomonidan ushbu Qoidalarga muvofiq oʻz vaqtida va sifatli xizmat koʻrsatilishidan foydalanish;

taksofonlarni ekspluatatsiya qiluvchi operator yoki provayderni taksofonlarning sifatsiz ishlashi, kabina va yarim kabinalarning qoniqarsiz holati toʻgʻrisida arz qilish;

taksofon orqali telefon aloqa xizmatlarini taqdim etish bilan bogʻliq takliflar va daʼvolar bilan operatorga yoki provayderga murojaat qilish;

operatorning yoki provayderning aybi bilan telefon aloqa xizmatlari koʻrsatilmaganligi yoki sifatsiz koʻrsatilganligi natijasida keltirilgan zarar oʻrnini qoplanishini talab qilish.

16. Foydalanuvchi quyidagilarga majburdir:

mazkur Qoidalarga rioya qilish;

taksofondan foydalanish boʻyicha yoʻriqnomaga muvofiq foydalanish, taksofonlar, kabinalar yoki yarim kabinalarning shikastlanishiga yoʻl qoʻymaslik;

taqdim etilgan soʻzlashuv toʻlovi uchun taksofonlarning ushbu tipi uchun moʻljallangan naqd pul va naqd pulsiz toʻlov vositalaridan (maxsus jeton, toʻlov kartasi) foydalanish;

operatorga yoki provayderga yetkazilgan zararni qonun hujjatlariga muvofiq qoplash.

VI. Taksofon orqali telefon aloqa xizmatiga haq toʻlash

17. Taksofon orqali telefon aloqa xizmatiga haq toʻlash uchun maxsus jeton, toʻlov kartasi, tanga va milliy valyutaning tegishli kupyurasi ishlatiladi.

Toʻlov kartasida quyidagilar koʻrsatilgan boʻlishi kerak:

kartani tayyorlagan yuridik shaxs (firma) nomi;

xizmatlar uchun avans toʻlovining miqdori;

kartani tayyorlash uchun buyurtma bergan operator yoki provayderning maʼlumot (bogʻlanish) uchun telefonlari;

kartadan foydalanish qoidalari;

kartaning identifikatsion raqami.

18. Taksofon orqali mahalliy, shaharlararo va xalqaro telefon aloqasi xizmati uchun tariflar qonun hujjatlariga muvofiq belgilanadi.

19. Taksofon orqali shaharlararo va xalqaro telefon aloqasining tarifikatsiya birligining oʻlchovi hamda tarifikatsiya birligining toʻliq boʻlmagan birligini toʻlash tartibi operator yoki provayder tomonidan foydalaniladigan kommutatsiya texnikasining texnik imkoniyatlariga bogʻliq holda belgilanadi. Bunda tarifikatsiya birligi bir minutdan koʻp boʻlmasligi kerak.

20. Taksofon orqali telefon soʻzlashuvining davomiyligi chaqiriluvchi abonent yoki abonent qurilmasining javobidan to chaqiruvchi yoki chaqiriluvchi abonentning yoki abonent qurilmasining uzilishigacha hisoblanadi.

21. Chaqiriluvchi shaxsning javobiga tenglashtirilgan, javob signali telefon soʻzlashuvi davomiyligi hisobining boshlanishi boʻlgan, abonent qurilmasiga quyidagilar kiradi:

maʼlumotlar uzatish apparaturasi (modem va boshqalar);

faksimil apparati;

avtojavob bergich bilan jihozlangan abonent qurilmasi;

chaqiriluvchi abonentga maxsus signalizatsiya tizimi yordamida telefon apparati trubkasining koʻtarilishini imitatsiya qilish vositasida chaqiruvchi abonent nomerini aniqlash imkonini beradigan maxsus qurilma bilan taʼminlangan telefon apparati;

abonent boʻlmaganda uning oʻrnini bosadigan va axborot almashinuvini taʼminlaydigan (yoki imitatsiya qiladigan) boshqa abonent qurilmasi.

VII. Yakuniy qoidalar

22. Mazkur Qoidalar talablarining buzilishida aybdor shaxslar qonun hujjatlarida belgilangan tartibda javobgarlikka tortiladilar.

23. Mazkur Qoidalar Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi bilan kelishilgan.

Oʻzbekiston Respublikasi Monopoliyadan chiqarish va raqobatni rivojlantirish Davlat qoʻmitasi raisi J. ISMAILOV

2010-yil 3-avgust.

(Oʻzbekiston Respublikasi qonun hujjatlari toʻplami, 2010-y., 35-36-son, 310-modda; Qonun hujjatlari maʼlumotlari milliy bazasi, 05.08.2019-y., 10/19/2140-1/3622-son)