Toshkent shahrining transport qatnovi zich bo‘lgan magistral ko‘chalarida harakat xavfsizligini ta’minlash maqsadida Vazirlar Mahkamasi qaror qiladi:

1. Toshkent shahrining Ichki ishlar bosh boshqarmasi Davlat avtomobil nazorati boshqarmasining mavjud yo‘l-patrul rotasi negizida xodimlar soni va tuzilmasi 1 va 2-ilovalarga muvofiq bo‘lgan yo‘l-patrul xizmati alohida maxsus batalyoni tashkil etilsin.

2. O‘zbekiston Respublikasi Ichki ishlar vazirligiga ana shu maqsadlar uchun qo‘shimcha ravishda 144 nafar xodim ajratilsin.

3. O‘zbekiston Respublikasi moliya vazirligi Toshkent shahar Ichki ishlar bosh boshqarmasi Davlat avtomobil nazorati yo‘l-patrul xizmati alohida maxsus batalyonining qo‘shimcha ravishda ajratilgan xodimlari va uning moddiy-texnika ta’minoti xarajatlarini mablag‘ bilan ta’minlasin.

4. O‘zbekiston Respublikasi Moliya vazirligi, “O‘zulgurjibirjasavdo” uyushmasi, Toshkent shahar hokimligi 1995-yil budjetida Toshkent shahrining magistral ko‘chalarida yo‘l harakati xavfsizligini ta’minlash uchun asbob-uskunalarni ishlab chiqarish, yetkazib berishga va sarflanadigan materiallarga O‘zbekiston Respublikasi Ichki ishlar vazirligi tomonidan tuziladigan shartnomalarni taqdim etiladigan hisob-kitoblarga muvofiq, ularni respublika korxonalarida tayyorlash imkoniyatlarini ishlab chiqqan holda, mablag‘ bilan ta’minlashni nazarda tutsinlar.