Давлат ҳокимияти ва бошқарув органлари аппаратини янада такомиллаштириш ва уларга сарфланадиган харажатларни қисқартириш мақсадида Вазирлар Маҳкамаси қарор қилади:

1. 1994 йил 1 январдан бошлаб:

— вазирликлар, давлат қўмиталари ва идоралар марказий аппарати ходимларининг сони 1-иловага мувофиқ;

— вилоятлар ва Тошкент шаҳар ҳокимликлари аппарати, уларнинг бошқармалари ва бўлимлари ходимларининг сони 2-иловага мувофиқ;

— туманлар ва шаҳарлар ҳокимликлари аппарати ва уларнинг бўлимлари ходимларининг сони 3-иловага мувофиқ;

— вазирлар, давлат қўмиталари раислари ва идоралар раҳбарларининг ўринбосарлари сони 4-иловага мувофиқ қисқартирилсин.

2. Харажатлари ўзларига қарашли ташкилотларнинг ажратмалари ҳисобига қопланадиган корпорациялар, концернлар, уюшмалар, компаниялар ҳамда давлат ва хўжалик бошқарувининг бошқа органлари раҳбарларига бошқарув марказий аппаратлари тузилмасини, шунингдек, ўзларига қарашли ташкилотлар ва корхоналар бошқарув аппаратини пухта ўрганиб чиқиш, уларнинг ходимлари сонини ва уларга сарфланадиган харажатларни 15 фоизгача қисқартириш масаласини кўриб чиқиш тавсия этилсин.

3. Бюджетдан маблағ билан таъминланадиган республика бошқарув органлари эгаллаган бинолар ва иншоотларга сарфланадиган харажатларни тартибга солиш, ана шу мақсадлар учун ажратиладиган маблағлардан оқилона ва тежаб фойдаланиш мақсадида Тошкент шаҳар ҳокимлиги Ўзбекистон Республикаси Давлат мулки қўмитаси билан биргаликда ушбу мақсадларга мўлжалланган харажатларнинг (кейинчалик уларни индексация қилишни ҳисобга олган ҳолда) чегараланган меъёрларини белгиланган тартибда ишлаб чиқсин ва тасдиқласин.

4. Ўзбекистон Республикаси Молия вазирлиги давлат бошқарув органларига сарфланадиган харажатларни маблағ билан таъминлашни улар аппаратлари ходимлари сонини ушбу қарор билан назарда тутилган қисқартиришни ҳисобга олган ҳолда амалга оширсин.

5. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, вазирликлар, идоралар ҳамда давлат ва хўжалик бошқарувининг бошқа органлари бошқарув аппарати ходимлари сонининг қисқартирилиши бўйича амалга оширилган тадбирларнинг натижалари тўғрисида 1994 йил 1 февралгача Ҳукуматга ахборот берсинлар.

6. Қарорнинг бажарилишини назорат қилиш Бош вазирнинг ўринбосарлари зиммасига юклатилсин.