Ўзбекистон Республикаси Президентининг «Халқ таълимини бошқариш тизимини такомиллаштириш бўйича қўшимча чора-тадбирлар тўғрисида» 2018 йил 5 сентябрдаги ПФ-5538-сон Фармони ижросини таъминлаш, шунингдек, халқ таълими тизимидаги муассасаларни бюджетдан ташқари маблағ билан таъминлаш механизмини янада такомиллаштириш мақсадида Вазирлар Маҳкамаси қарор қилади:

1. Халқ таълими тизимидаги муассасаларнинг бюджетдан ташқари жамғармалари маблағларини шакллантириш ва улардан фойдаланиш тартиби тўғрисидаги низом 1-иловага мувофиқ тасдиқлансин.

2. Вазирлар Маҳкамасининг 1999 йил 3 сентябрдаги 414-сон қарори (Ўзбекистон Республикаси ҚТ, 1999 й., 9-сон, 51-модда) билан тасдиқланган Бюджет ташкилотларини харажатларини молиялаштириш (тўлаш) тартибига 2-иловага мувофиқ қўшимчалар киритилсин.

3. Ўзбекистон Республикаси Халқ таълими вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов ва Ўзбекистон Республикаси халқ таълими вазири Ш.Х. Шерматов зиммасига юклансин.

1. Ушбу Низом халқ таълими муассасаларининг бюджетдан ташқари жамғармаси (кейинги ўринларда жамғарма деб аталади) маблағларини шакллантириш ва улардан фойдаланиш тартибини белгилайди.

Жамғарма маблағларини шакллантириш ва улардан фойдаланиш иловага мувофиқ схема бўйича амалга оширилади.

2. Ушбу Низом халқ таълими тизимидаги давлат таълим муассасаларига нисбатан татбиқ этилади.

3. Жамғарма маблағлари қуйидаги манбалар ҳисобига шакллантирилади:

халқ таълими муассасаларининг кўчмас мол-мулкини ижарага беришдан тушган маблағлар (Ўзбекистон Республикаси Давлат активларини бошқариш агентлигининг ҳудудий органлари ҳузуридаги Давлат мулкини ижара бериш маркази давлат унитар корхоналарига 1 фоизи ва электрон савдо майдончаси операторига тўланган тўловдан ташқари);

ўқув дастурларида назарда тутилмаган (давлат таълим стандартларидан ташқари) машғулотлар бўйича қўшимча таълим беришдан олинган даромадлар;

халқ таълими муассасалари фаолият ихтисослиги бўйича товарларни (ишларни, хизматларни) реализация қилишдан олинган даромадлар;

юридик ва жисмоний шахсларнинг, шу жумладан Ўзбекистон Республикаси норезидентларининг ҳомийлик хайриялари;

халқаро молия ташкилотлари ва хорижий давлатларнинг грантлари ва техник кўмаклашиш маблағлари;

қонун ҳужжатлари билан тақиқланмаган бошқа маблағлар.

4. Жамғарма маблағлари тасдиқланган даромадлар ва харажатлар сметасида назарда тутилган мақсадлар учун молиялаштирилади.

Бунда халқ таълими муассасаси раҳбарини моддий рағбатлантириш ва Халқ таълими соҳасидаги ислоҳотларга кўмаклашиш жамғармасига йўналтириладиган маблағлар ҳисобга олиниши лозим.

Жамғарманинг даромадлар ва харажатлар сметасига тегишли ўзгартириш ва қўшимчалар фақат халқ таълими муассасаси раҳбарининг асосли ёзма мурожаати асосида умумтаълим муассасасининг Кузатув кенгаши розилиги билан амалга киритилади.

5. Жамғармага тушган маблағларнинг йил натижаси бўйича (мақсадли ҳомийлик хайрияларидан ташқари) жами суммасидан 10 фоизгача бўлган миқдори мазкур муассаса раҳбарини моддий рағбатлантириш учун йўналтирилади.

6. Юридик ва жисмоний шахслар томонидан жамғармага кўрсатилган ҳомийлик хайриялари, агар ҳомий билан аниқ мақсадлар учун йўналтирилиши келишилмаган бўлса, муассаса раҳбари ва ҳисобчиси томонидан харажатлар сметасига ўзгартириш тайёрланиб, умумтаълим муассасасининг Кузатув кенгаши розилиги билан халқ таълими муассасаси харажатларига сарфланади.

7. Жамғарма маблағларининг ҳисобини марказлаштирилган молия-бухгалтерия хизмати ёки муассасанинг бюджетдан ташқари маблағлари ҳисобини юритувчи ҳисобчи томонидан юритилади. Бунда муассасанинг бюджетдан ташқари маблағлари ҳисобини юритувчи ҳисобчи штатини сақлаш бўйича барча харажатлар бюджетдан ташқари маблағлар ҳисобига қопланади.

8. Жамғарма маблағлари бўйича даромадлар ва харажатлар сметаси муассаса раҳбари ва ҳисобчиси томонидан тайёрланиб, умумтаълим муассасасининг Кузатув кенгашига келишиш учун киритилади.

Умумтаълим муассасасининг Кузатув кенгашининг розилиги олингандан сўнг даромадлар ва харажатлар сметаси муассаса раҳбари томонидан тасдиқланади.

9. Жамғарма тушумларининг 5 фоизи (ҳомийлик хайрияларидан ташқари) Халқ таълими соҳасидаги ислоҳотларга кўмаклашиш жамғармасига белгиланган тартибда йўналтирилади.

10. Жамғарма маблағларидан мақсадли фойдаланиш Ўзбекистон Республикаси Халқ таълими вазирлигининг Ички аудит ва молиявий назорат бошқармаси ҳамда тегишли ҳудудий бўлимлар томонидан назорат қилинади.

Ўзбекистон Республикаси Молия вазирлиги Ғазначилиги ва унинг ҳудудий бўлинмалари Жамғарма маблағлари бўйича харажатлар сметаларида назарда тутилган маблағлардан мақсадли ва оқилона фойдаланиш юзасидан дастлабки ва жорий назоратни амалга оширади.

11. Жамғарма маблағларидан фақат таълим муассасаси раҳбари томонидан берилган ёзма мурожаатга асосан, барча зарур ҳужжатлар тақдим этилгандан сўнг туман (шаҳар) халқ таълими бўлими марказлаштирилган молия-бухгалтерия хизмати ёки муассасанинг бюджетдан ташқари маблағлари ҳисобини юритувчи ҳисобчи томонидан фойдаланилади.

Бунда шартномаларни имзолаш, маҳсулотлар (иш, хизматлар) турларини танлаш, маҳсулотларни (иш, хизматларни) сифатли қабул қилиб олиш таълим муассасаси раҳбари томонидан қонун ҳужжатларига мувофиқ амалга оширилади. Амалга оширилган ишлар учун таълим муассасаси раҳбари шахсан жавобгар ҳисобланади.

12. Қорақалпоғистон Республикаси Халқ таълими вазирлиги, Тошкент шаҳар халқ таълими бош бошқармаси, вилоятлар халқ таълими бошқармалари, туман (шаҳар) халқ таълими бўлимлари:

тегишлилиги бўйича халқ таълими тизимидаги муассасаларнинг жамғармаларига маблағларнинг тушумлари (пуллик хизматлар, ижара, ҳомийлик хайриялари, грантлар ва бошқалар) тўғрисидаги батафсил маълумотларни олишга;

халқ таълими тизимидаги муассасалар томонидан маблағлар ғайриқонуний сарфланганда, бюджет ва смета-штат интизомининг бузилиш ҳоллари аниқланган тақдирда, шунингдек, молиявий ҳисоботлар ва бошқа белгиланган ҳисобот тақдим этилмаганда, бу ҳақда Ўзбекистон Республикаси Халқ таълими вазирлигининг Ички аудит ва молиявий назорат бошқармасини ёки ушбу вазирлик раҳбариятини хабардор қилган ҳолда, бюджетдан ташқари маблағлар харажатларини молиялаштиришни (тўлашни) чеклаш ва зарур ҳолларда тўхтатиб қўйишга ҳақли.

Жиноят аломатлари бўлган ҳуқуқбузарликлар аниқланган тақдирда Қорақалпоғистон Республикаси Халқ таълими вазирлиги, Тошкент шаҳар халқ таълими бош бошқармаси, вилоятлар халқ таълими бошқармалари, туман (шаҳар) халқ таълими бўлимлари текшириш материалларини қонун ҳужжатларида белгиланган тартибда ҳуқуқни муҳофаза қилиш органларига топшириши лозим.

13. Жамғарма маблағларини тасарруф этиш ёки бошқа мақсадларга йўналтириш (ишлатиш) билан боғлиқ ҳар қандай кўринишдаги аралашиш тақиқланади.

14. Халқ таълими муассасаларининг раҳбарлари ва ҳисобчилари Жамғарма маблағлари тўғри шакллантирилганлиги, улардан самарали, оқилона ва тўғри фойдаланиш, мазкур маблағларнинг ҳисоб-китобининг тўғри юритилиши бўйича шахсан жавоб берадилар.

1. 15-бандда:

а) учинчи хатбошига «тақсимланади» сўзидан кейин «(халқ таълими муассасаларидан ташқари)» сўзлари қўшилсин;

б) қуйидаги мазмундаги хатбоши қўшилсин:

«Халқ таълими муассасаларининг мол-мулкини, жумладан асосий воситаларини сотишдан тушган маблағларнинг 100 фоизи Халқ таълими соҳасидаги ислоҳотларга кўмаклашиш жамғармасига йўналтирилади»;

2. 29-бандга қуйидаги мазмундаги хатбоши қўшилсин:

«Ушбу банд халқ таълими муассасаларига нисбатан татбиқ этилмайди»;

3. 35-банднинг биринчи хатбошидаги «молия органлари» сўзларидан кейин, «шунингдек вазирлик ва идораларнинг ички аудит ва молиявий назорат хизматлари ҳамда унинг ҳудудий бўлимлари» сўзлари қўшилсин.