Ер-сув ресурсларидан оқилона фойдаланиш асосида барқарор шоли етиштиришни таъминлаш, шунингдек республика истеъмолчилари ва аҳолисининг гуручга бўлган эҳтиёжини янада тўлароқ қондириш мақсадида Вазирлар Маҳкамаси қарор қилади:

1. Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Иқтисодиёт вазирлиги, Қишлоқ ва сув хўжалиги вазирлиги ҳамда «Ўздонмаҳсулот» давлат-акциядорлик корпорациясининг шоли етиштирувчи хўжаликлар билан тузилган контрактация шартномалари асосида тайёрланган 2003 йил ҳосили учун шоли экиладиган майдонлар, товар ва уруғлик шоли етиштириш ҳамда уларни давлат ресурсларига сотиш прогноз ҳажмлари тўғрисидаги таклифлари 1 ва 2-иловаларга мувофиқ қабул қилинсин.

2. Қорақалпоғистон Республикаси Вазирлар Кенгаши ҳамда вилоятлар ва туманлар ҳокимликлари, Ўзбекистон Республикаси Қишлоқ ва сув хўжалиги вазирлиги, «Ўздонмаҳсулот» давлат-акциядорлик корпорацияси, Ўзбекистон Қишлоқ хўжалиги илмий-ишлаб чиқариш маркази шоли етиштирувчи хўжаликларга шолининг серҳосил, тезпишар навларини экишни мақбул агротехника муддатларида ўз вақтида ўтказишда амалий ёрдам кўрсатсинлар.

3. «Ўздонмаҳсулот» давлат-акциядорлик корпорацияси, Ўзбекистон Республикаси Қишлоқ ва сув хўжалиги вазирлиги Қорақалпоғистон Республикаси хўжаликларини:

Сурхондарё, Сирдарё, Тошкент ва Хоразм вилоятларининг шоли етиштирувчи хўжаликларидаги мавжуд захиралар ҳисобига 2,8 минг тонна ҳажмида;

тегишли ишлов берилгандан кейин уруғлик мақсадида фойдаланиш учун давлат ресурсларидан 6,6 минг тонна товар шоли бериш ҳисобига уруғлик шоли билан таъминласинлар

4. Ўзбекистон Республикаси Иқтисодиёт вазирлиги жорий йил ҳосилидан шоли харид қилиш ҳажмларини ҳисобга олган ҳолда 2003 йилда давлат ресурслари ҳисобига шоли ва гуруч етиштириш ҳамда уларни тақсимлашнинг тасдиқланган балансига тегишли ўзгартиришлар киритсин.

5. Ўзбекистон Республикаси Қишлоқ ва сув хўжалиги вазирлиги, Молия вазирлиги, Ўзбекистон Қишлоқ хўжалиги илмий-ишлаб чиқариш маркази:

шоли етиштиришни янада ривожлантириш, уруғчиликни ривожлантириш ва серҳосил навлар яратиш мақсадида навлар муаллифлари ва оригинаторларини рағбатлантириш механизмини бир ой муддатда ишлаб чиқсинлар ва тасдиқласинлар;

2003 йил 1 августгача товар ва уруғлик мақсадлари учун сотиб олинадиган шолининг харид (шартномавий) нархлари бўйича таклиф киритсинлар.

6. «Ўздонмаҳсулот» давлат-акциядорлик корпорацияси, Ўзбекистон Республикаси Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси 2003 йил 1 августгача шоличилик хўжаликларига республика дон қабул қилиш корхоналари томонидан харид қилинадиган товар шоли қиймати умумий суммасининг 50 фоизгачаси миқдорида босқичма-босқич аванс бериб боришни амалга оширсинлар.

7. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон Республикаси Бош вазирининг ўринбосари Н.С. Юсупов зиммасига юклансин.