Чигитни плёнка остига эккан ҳолда Андижон технологияси бўйича ҳосил етиштириш асосида пахтачилик самарадорлигини ошириш, шунингдек 2002 йил ҳосили учун хўжаликларни полиэтилен плёнка билан ўз вақтида таъминлаш мақсадида Вазирлар Маҳкамаси қарор қилади:

1. Ўзбекистон Республикаси Қишлоқ ва сув хўжалиги вазирлиги, Макроиқтисодиёт ва статистика вазирлигининг Қорақалпоғистон Республикаси Вазирлар Кенгаши, вилоятлар ҳокимликлари билан келишилган плёнка остига чигит экиш ва 2002 йил ҳосили учун хўжаликларни полиэтилен плёнка билан таъминлаш бўйича таклифи 1-иловага мувофиқ қабул қилинсин.

2. 2002 йилда чигит экиш учун полиэтилен плёнка ишлаб чиқарувчи заводларни хом ашё (гранулалар) билан таъминлаш графиги 2-иловага мувофиқ тасдиқлансин.

3. Ўзбекистон Республикаси Ташқи иқтисодий алоқалар вазирлиги:

«Ўзкимёсаноат» компанияси ва Андижон вилояти ҳокимлиги иштирокида «Андижонполиэтилени» қўшма корхонасида (6,5 минг тонна) ва «Жиззах-пластмасса» акциядорлик жамиятида (2 минг тонна) полиэтилен плёнка ишлаб чиқариш учун 8,5 минг тонна гранула етказиб бериш юзасидан ўн кун муддатда тендер ўтказсин;

2002 йил 1 февралгача 2,85 минг тонна тайёр плёнкани белгиланган тартибда импорт бўйича харид қилсин ва 1-иловага мувофиқ вилоятлар бўйича хўжаликларга етказиб берсин.

4. «Ўзкимёсаноат» компанияси, Андижон вилояти ҳокимлиги тендер ўтказилгандан кейин бир ҳафта муддатда 15,8 минг тонна полиэтилен грануласи етказиб бериш юзасидан Шўртан газ-кимё комбинати билан контрактлар ва шартномалар тузилишини таъминласинлар, шундан:

«Жиззах-пластмасса» акциядорлик жамияти учун — импорт бўйича 2 минг тонна ва Шўртан газ-кимё комбинатидан 6,1 минг тонна;

«Андижонполиэтилени» қўшма корхонаси учун — импорт бўйича 6,5 минг тонна ва Шўртан газ-кимё комбинатидан 1,22 минг тонна;

1-иловага мувофиқ ҳажмда полиэтилен плёнка ишлаб чиқарилишини ва пахта етиштирувчи хўжаликларга ўз вақтида келтирилишини ташкил этсинлар.

6. Мазкур қарорга мувофиқ импорт бўйича келтирилаётган 2,85 минг тонна тайёр полиэтилен плёнка ва 8,5 минг тонна полиэтилен грануласи божхона тўловлари тўлашдан озод этилсин (божхонада расмийлаштирилганлик учун йиғимлардан ташқари).

7. «Ўзагромашсервис» уюшмаси, Ўзбекистон Республикаси Қишлоқ ва сув хўжалиги вазирлиги машина-трактор парклари ва хўжаликлардаги плёнка остида чигит экиш учун мавжуд махсус чигит экиш сеялкалари ва мосламаларини ва уларнинг техник ҳолатини ўн кун муддатда хатловдан ўтказсинлар ва 2002 йил 20 февралгача уларни ишга тўлиқ тайёрлаб қўйсинлар.

«Ўзқишлоқхўжаликмаш-холдинг» компанияси Ўзбекистон Республикаси Қишлоқ ва сув хўжалиги вазирлигининг буюртманомасига биноан етишмаётган сеялкалар 2002 йил 15 февралгача ишлаб чиқарилишини ва уларнинг хўжаликларга етказиб берилишини таъминласин.

8. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ҳамда Ўзбекистон Республикаси Бош вазирининг ўринбосарлари Т. Холтоев ва Р.С. Азимов зиммасига юклансин.