Республика минтақалари бўйича пахтанинг селекция навларини оқилона жойлаштириш, юқори сифатли кўп тола олиш, хўжаликларни юқори сифатли уруғлар билан таъминлаш, шунингдек, пахта уруғчилигини такомиллаштириш мақсадида Вазирлар Маҳкамаси қарор қилади:

1. Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Қишлоқ ҳўжалиги вазирлиги ва Ўзбекистон Қишлоқ ҳўжалиги фанлари академиясининг пахтанинг районлаштирилган ва истиқболли навларини 1-иловага мувофиқ жойлаштириш бўйича таклифлар қабул қилинсин.

2. Қишлоқ ҳўжалиги вазирлиги (Жуманиёзов), «Ўздавпахтасаноатсотиш» уюшмаси (Зикриеев):

1996 йил 25 февралгача уруғлик пахтани тозалашни тугалласинлар;

1996 йил 10 мартгача экиладиган чигитларни навларга ажратилишини, туксизлантирилишини, уларни калибрлашни ва марказлаштирилган тартибда дорилашни таъминласинлар. Бир гектар майдонга 60 килограмм тукли ва 30 килограмм туксизлантирилган чигит ҳисобидан уларни фақат дориланган ва идишга жойлашган ҳолда Қорақалпоғистон Республикаси ва вилоятлар бўйича 2-иловага мувофиқ тарқатсинлар;

Экиш материалларининг белгиланган муддатларда вилоятлараро етказиб берилишини 3-иловага мувофиқ таъминласинлар;

Кўчма фондда қолган чигитни сақланиши ва сифати устидан назоратни кучайтирсинлар.

3. Қишлоқ ҳўжалиги вазирлиги, Ўзбекистон Қишлоқ ҳўжалиги фанлар академияси, «Ўздавпахтасаноатсотиш» уюшмаси, Қорақалпоғистон Республикаси Вазирлар Кенгаши, вилоятларнинг ҳокимликлари:

Хўжаликларда пахтанинг фақат битта, туманларда — 2 та ва вилоятларда 3-4 та селекция навларини экилишини таъминласинлар. Хўжаликлар ва туманларнинг раҳбарлари ушбу тартибга риоя қилиши учун шахсан жавобгар эканликлари тўғрисида огоҳлантирилсинлар;

Элита ва биринчи репродукция уруғлари етиштирувчи элита-уруғчилиги хўжаликлари ишини тубдан яхшиласинлар. Пахтанинг янги ва истиқболли навлари фақат илмий-тадқиқот институтларнинг экспериментал базаларида ва нав синаш участкалари жойлашган хўжаликларда синовдан ўтказилсин.

4. Экиш материалини тежамли сарфлаш мақсадида уни аниқ экувчи сеялкаларда экиш амалиётга киритилсин. «Ўзқишлоқхўжаликмашхолдинг» холдинг компанияси (Пайгин), «Ўзқишлоқхўжаликтаъминоттузатиш» давлат-кооператив қўмитаси (Жабборов) тузилган шартномаларга мувофиқ пахтачилик хўжаликларини аниқ экадиган сеялкалар билан таъминласинлар.

5. «Ўзагрокимёсервис» уюшмаси (Ҳасанов) ўн кун муддатда пахта тозалаш заводларини чигитни дориловчи воситалар билан зарур миқдорда таъминласинлар ва дорилаш устидан назоратни кучайтирсин.

Элита-уруғчилиги хўжаликларига азотли, фосфорли ва калийли ўғитларни биринчи навбатда ва пахта учун белгиланган нормадан 10 фоиз ортиқ етказиб берсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари И.Жўрабеков зиммасига юклансин.