Ўзбекистон Республикаси Президентининг 1999 йил 2 мартдаги ПФ-2243-сон Фармонига мувофиқ Вазирлар Маҳкамаси қарор қилади:

1. Умумхалқ байрами 9 май — Хотира ва Қадрлаш кунини ўтказиш бўйича республика Ташкилий қўмитасининг таркиби иловага мувофиқ тасдиқлансин.

Ташкилий қўмита ўн кун муддатда ушбу санани умумхалқ байрами сифатида юксак маънавий-ахлоқий савияда ўтказиш бўйича тадбирлар ишлаб чиқсин ва уларнинг бажарилишини таъминласин.

2. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

— жойларда умумхалқ байрами 9 май — Хотира ва Қадрлаш кунини юксак савияда ўтказиш;

— фашизм устидан қозонилган ғалабага ҳисса қўшган ҳамда Ватанимиз озодлиги ва мустақиллиги учун жон берган барча ватандошларимизнинг хотирасини абадийлаштириш;

— бугун ҳам сафларимизда туриб Ватан обрў-эътиборини юксалтиришга, ёшларни маънавий-ахлоқий жиҳатдан тарбиялашга ҳисса қўшаётган барча кишиларга муносиб иззат-икром кўрсатиш;

— фахрийларга, Ватанимиз мустақиллиги ва шаънини ҳимоя қилганларнинг барчасига моддий ёрдам кўрсатиш чора-тадбирларини ишлаб чиқсинлар ва уни амалга оширсинлар.

3. 1941 — 1945 йилларда Ўзбекистон Республикаси давлат манфаатларини ҳимоя қилишдаги улкан хизматлари учун иккинчи жаҳон уруши ногиронлари ва қатнашчиларига энг кам иш ҳақининг икки баробари миқдорида бир йўла бериладиган пул мукофоти белгилансин.

Ўзбекистон Республикаси Молия вазирлиги иккинчи жаҳон уруши ногиронлари ва қатнашчиларини мукофотлаш билан боғлиқ сарф-харажатларга республика бюджетидан маблағ ажратсин.

4. Ўзбекистон Республикаси Молия вазирлиги, Марказий банки, Ижтимоий таъминот вазирлиги, Мудофаа вазирлиги, Ички ишлар вазирлиги, Миллий хавфсизлик хизмати мазкур пул мукофотларини байрам арафасида тўланишини таъминласинлар.

5. Ўзбекистон Республикаси Маданият ишлари вазирлигига 1999 йилдан бошлаб ҳар йили умумхалқ байрами 9 май — Хотира ва Қадрлаш куни арафасида Фанлар академияси, Мудофаа вазирлиги, Бадиий академия, «Маънавият ва маърифат» жамоатчилик маркази, «Нуроний», «Маҳалла» жамғармалари, Хотин-қизлар қўмитаси ва бошқа жамоат ташкилотлари билан биргаликда жойлардаги музейлар, кутубхоналар ва маданият саройларида Ватанимиз мустақиллиги ва шаънини ҳимоя қилган кишилар ҳаётини ёрқин акс эттирувчи махсус кўргазмалар, ёшлар билан учрашувлар, маърифий-бадиий кечалар ўтказишни ташкил этиш топширилсин.

6. Ўзбекистон Республикаси Олий ва ўрта махсус таълим вазирлиги, Халқ таълими вазирлиги, ўқув юртларига эга бўлган вазирликлар ҳамда идоралар ўқув дастурларига хотира ва қадрлаш дарсларининг киритилишини таъминласинлар.

7. Ўзтелерадиокомпания, Миллий ахборот агентлиги ва бошқа оммавий ахборот воситаларига умумхалқ байрами Хотира ва Қадрлаш куни тадбирларини мунтазам ёритиб бориш тавсия этилсин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ҳ.С. Кароматов зиммасига юклансин.