«Ўзқишлоқхўжаликмаш-холдинг» холдинг компаниясининг «ЎзКейсТрактор» қўшма корхонаси томонидан «Кейс Нью-Холланд» компаниясининг тракторлар балансировкаси ва хавфсизлиги тизимини, шунингдек қишлоқ хўжалиги асбоб-ускуналари билан агрегатлаш учун осма ва тиркама асбоб-ускуналар тизимини ишлаб чиқариш маҳаллийлаштирилган.

Шу билан бирга, бутловчи буюмлар ишлаб чиқаришни амалга оширишда мамлакатимиз ишлаб чиқарувчилари салоҳиятидан тўлиқ даражада фойдаланилмади.

Маҳаллий хом ашё негизида тайёр маҳсулот, бутловчи буюмлар ва материаллар ишлаб чиқаришни маҳаллийлаштириш Дастурини, шу жумладан рақобатбардош маҳсулот ишлаб чиқаришни таъминловчи иштирокчи корхоналар сонини кенгайтириш йўли билан янада мақбуллаштириш мақсадида, шунингдек Ўзбекистон Республикаси Президентининг «2006—2008 йилларда маҳаллий хом ашё негизида тайёр маҳсулот, бутловчи буюмлар ва материаллар ишлаб чиқаришни маҳаллийлаштириш Дастури тўғрисида» 2006 йил 22 июндаги ПҚ-386-сон қарорига ҳамда Вазирлар Маҳкамасининг 2004 йил 13 августдаги 391-сон қарорига мувофиқ Вазирлар Маҳкамаси қарор қилади:

1. Иқтисодиёт вазирлиги ва «Ўзқишлоқхўжаликмаш-холдинг» холдинг компанияси томонидан ишлаб чиқилган, 2008 йилда маҳаллийлаштириш даражасини 34 фоизгача етказишни таъминлайдиган «Кейс Нью-Холланд» компаниясининг универсал-ҳайдов тракторлари узеллари ва деталларини ишлаб чиқаришни маҳаллийлаштиришни чуқурлаштириш бўйича тадбирлар 1-иловага мувофиқ маъқуллансин.

2. «Кейс Нью-Холланд» компаниясининг универсал-ҳайдов тракторлари узеллари ва деталларини ишлаб чиқаришни маҳаллийлаштиришни чуқурлаштириш бўйича тадбирларнинг бажарилишини сўзсиз таъминлаш юзасидан шахсий жавобгарлик «Ўзқишлоқхўжаликмаш-холдинг» холдинг компанияси бошқаруви раиси зиммасига юклансин.

3. Маҳаллий хом ашё негизида тайёр маҳсулот, бутловчи буюмлар ва материаллар ишлаб чиқаришни маҳаллийлаштириш Дастури амалга оширилишини таъминлаш бўйича Махсус комиссиянинг:

Ўзбекистон Республикаси Президентининг 2006 йил 22 июндаги ПҚ-386-сон қарори билан маъқулланган Тайёр маҳсулот турлари, материаллар ва хом ашё ишлаб чиқаришни маҳаллийлаштириш лойиҳалари рўйхатига «Кейс Нью-Холланд» компаниясининг универсал-ҳайдов тракторларини ишлаб чиқариш бўйича лойиҳани киритиш йўли билан 2-иловага мувофиқ қўшимчалар киритиш тўғрисидаги;

2007 йил учун белгиланган маҳаллийлаштириш даражаси бажарилган тақдирда 2008 йилда кўрсатиб ўтилган лойиҳа муддатини узайтириш тўғрисидаги таклифи қабул қилинсин.

4. Ўзбекистон Республикаси Президентининг 2006 йил 22 июндаги ПҚ-386-сон қарори 2-бандига мувофиқ «ЎзКейсТрактор» ва «ЎзКейсМаш» қўшма корхоналарига 2009 йил 1 январгача бўлган муддатда солиқлар ва божхона тўловлари бўйича имтиёзлар берилганлиги маълумот учун қабул қилинсин.

5. «ЎзКейсТрактор» ва «ЎзКейсМаш» қўшма корхоналарининг 2007-2008 йилларда «Кейс Нью-Холланд» компаниясининг 250 та универсал-ҳайдов тракторини, шунингдек 180 та «Кейс-1200» пневматик универсал сеялкани Ўзбекистон Республикаси Президентининг 2006 йил 22 июндаги ПҚ-386-сон қарори билан берилган солиқлар ва божхона тўловлари бўйича имтиёзлар суммаси доирасида камайтирилган амалдаги қийматидан паст нарх бўйича сотиш тўғрисидаги таклифи маъқуллансин.

6. «ЎзКейсТрактор» ва «ЎзКейсМаш» қўшма корхоналарига Ўзбекистон Республикаси Президентининг 2006 йил 22 июндаги ПҚ-386-сон қарори доирасида солиқлар ва божхона тўловлари бўйича имтиёзлар бериш натижасида бўшайдиган маблағларни ушбу қарорнинг 5-бандида кўрсатилган маҳсулотларнинг амалдаги қиймати ва уларни сотиш нархи ўртасидаги тафовутларни қоплаш учун йўналтиришига рухсат этилсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Э.Р. Шаисматов зиммасига юклансин.

Рўйхатга қуйидаги мазмундаги 10-1-позиция қўшилсин: