Қорақалпоғистон Республикаси ва Хоразм вилоятида савдо ва хизмат кўрсатиш соҳаларини янада ривожлантириш, мазкур соҳаларда яширин иқтисодиётни қисқартиришда аҳоли фаоллигини ошириш мақсадида Вазирлар Маҳкамаси қарор қилади:

1. Қорақалпоғистон Республикаси Вазирлар Кенгаши, Хоразм вилояти ҳокимлиги ва Ўзбекистон Республикаси Солиқ қўмитасининг 2026 йил 1 июлдан бошлаб Қорақалпоғистон Республикаси ва Хоразм вилояти ҳудудидаги савдо ва хизмат кўрсатиш объектларида амалга оширилган харидлар бўйича назорат-касса техникаси орқали берилган чеклар асосида ютуқли ўйинларни ўтказиш тўғрисидаги таклифига розилик берилсин.

2. Қорақалпоғистон Республикаси ва Хоразм вилоятида савдо ва хизмат кўрсатиш объектларида берилган назорат-касса техникаси чеклари асосида ютуқли ўйинлар ўтказиш тартиби тўғрисидаги низом иловага мувофиқ тасдиқлансин.

3. Қорақалпоғистон Республикаси Вазирлар Кенгаши ва Хоразм вилояти ҳокимлиги Ўзбекистон Республикаси Солиқ қўмитаси билан биргаликда ютуқли ўйинлар ҳар ойда ўтказиб борилишини таъминласин.

4. Ўзбекистон Республикаси Солиқ қўмитаси бир ой муддатда «Солиқ» мобил иловасида «Ютуқли ўйинлар платформаси»ни ишга тушириб, унда ҳар ой якуни бўйича кейинги ойнинг 5-санасига қадар ютуқли ўйин ғолибларини инсон омилисиз аниқлаш имкониятини жорий этсин.

5. Ўзбекистон Республикаси Солиқ қўмитаси Қорақалпоғистон Республикаси Вазирлар Кенгаши, Хоразм вилояти ҳокимлиги, Ўзбекистон Миллий ахборот агентлиги ва Ўзбекистон Миллий телерадиокомпанияси билан ҳамкорликда бир ой муддатда ушбу қарорнинг мазмун-моҳияти ва аҳамиятини оммавий ахборот воситалари ҳамда ижтимоий тармоқлар орқали кенг тушунтирилишини таъминласин.

6. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

1. Ушбу Низом Қорақалпоғистон Республикаси ва Хоразм вилоятида савдо ва хизмат кўрсатиш объектларида харидни амалга оширган жисмоний шахсларга назорат-касса техникаси орқали берилган чеклар асосида ютуқли ўйинларни ташкил этиш ва ўтказиш тартибини белгилайди.

2. Ушбу Низомда қуйидаги асосий тушунчалардан фойдаланилади:

назорат-касса техникаси — фискал хотира билан жиҳозланган назорат-касса машиналари, фискал тўплагичлардаги фискал маълумотлар ёзиб олиниши ва сақланишини таъминловчи, фискал ҳужжатларни шакллантирувчи ҳамда уларнинг солиқ органларига фискал маълумотлар оператори орқали топширилишини, шунингдек, фискал ҳужжатлар назорат-касса техникасини қўллаш тўғрисидаги қонунчиликда белгиланган талабларга мувофиқ қоғозда чоп этилишини таъминловчи бошқа қурилмалар ҳамда дастурий-техник мажмуалар;

назорат-касса техникаси чеки — сотувчи ва харидор (мижоз) ўртасидаги товар сотиб олингани ёки хизмат кўрсатилганини тасдиқловчи, онлайн назорат-касса машиналари ёки виртуал касса дастурий таъминотини қўллаган ҳолда чоп этиладиган, QR-код, фискал белги ҳамда қонунчилик ҳужжатларига мувофиқ бошқа зарур маълумотлар акс эттирилган ҳужжат;

ютуқли ўйин — жисмоний шахслар ўртасида ютуқли ўйинларни ташкил этиш, ўтказиш ва натижаси бўйича ютуқларни ғолибларга бериш жараёнини ўз ичига олган ҳуқуқий, ташкилий ва техник чора-тадбирлар йиғиндиси;

ютуқли ўйинни ташкил этиш комиссияси — Ўзбекистон Республикаси Солиқ қўмитаси (кейинги ўринларда — Солиқ қўмитаси) раисининг буйруғи асосида ташкил этиладиган комиссия (кейинги ўринларда — Комиссия);

ўйин иштирокчиси — Қорақалпоғистон Республикаси ва Хоразм вилояти ҳудудида жойлашган чакана савдо, умумий овқатланиш ва хизмат кўрсатиш объектларида харидларни амалга ошириб, назорат-касса техникаси чекларини «Солиқ» мобил иловаси орқали рўйхатдан ўтказган жисмоний шахс;

ғолиб — «Солиқ» мобил иловаси орқали рўйхатдан ўтказилган назорат-касса техникаси чеклари орасидан тасодифий танлов асосида мукофотлаш мақсадида танлаб олинган жисмоний шахс.

3. Ютуқли ўйиннинг қонунчиликка мувофиқ ўтказилганини назорат қилиш ҳамда ўйин ғолибларини мукофотлаш бўйича комиссия таркиби раис, унинг ўринбосари, комиссиянинг котиби ва аъзоларидан иборат бўлиб, 5 кишидан кам бўлмаслиги керак.

4. Комиссия таркибига келишув асосида ташкилотчи, маҳаллий давлат ҳокимияти органлари, давлат органлари, шунингдек, фуқароларнинг ўзини ўзи бошқариш органларининг вакиллари киритилиши мумкин.

5. Комиссия қуйидаги ваколатларга эга:

комиссия аъзолари таркибидан комиссия раиси ва котибини сайлаш;

ютуқли ўйинни ўтказиш вақтини келишиш;

ютуқли ўйинни ўтказиш жараёнининг шаффофлигини таъминлаш чораларини кўриш;

ютуқли ўйин жараёни Солиқ қўмитасининг ижтимоий тармоқлардаги саҳифаларида, Қорақалпоғистон Республикаси ва Хоразм вилоятининг телерадиоканалларида жонли эфирда узатилишини ташкил этиш;

ютуқли ўйинга барча харид чекларининг киритилганини текшириш;

ютуқли ўйин ўтказиш билан боғлиқ низоли ҳолатларни кўриб чиқиш;

ютуқли ўйин натижалари бўйича якуний қарор қабул қилиш.

6. Комиссия қарорлари оддий кўпчилик овоз бериш йўли билан қабул қилинади ва баённома шаклида расмийлаштирилади.

7. Солиқ қўмитаси ютуқли ўйинларни ташкил этиш, харидлар учун рўйхатдан ўтказилган назорат-касса техникаси чекларини (кейинги ўринларда — харид чеклари) тасодифий танлаш ва ғолибларни аниқлаш бўйича ваколатга эга бўлган ўйин ташкилотчиси ҳисобланади.

8. Қорақалпоғистон Республикаси ва Хоразм вилоятида фаолият кўрсатаётган чакана савдо, хизмат кўрсатиш ҳамда умумий овқатланиш соҳаларидаги тадбиркорлик субъектларида амалга оширилган харидлар бўйича назорат-касса техникаси чеклари ўртасида ютуқли ўйинлар ташкил этилади.

Бунда мазкур объектлардаги харид чекларини «Солиқ» мобил иловаси орқали рўйхатдан ўтказган ҳар бир жисмоний шахс бевосита ютуқли ўйин иштирокчисига айланади.

9. «Солиқ» мобил иловасида ҳар бир жисмоний шахсга рўйхатдан ўтказилган харид чекларининг ютуқли ўйинга киритилгани ҳақида маълумот бериб борилади.

10. Харид чеклари «Солиқ» мобил иловаси орқали рўйхатдан ўтказилганда, харид чеки шакллантирилган ой учун ўйналадиган ютуқли ўйинда қатнашиш ҳуқуқини беради.

11. Ютуқли ўйин ҳар ойда Солиқ қўмитасининг «Солиқ» мобил иловасидаги «Ютуқли ўйинлар» платформаси орқали ўтказилади.

12. Танлов бир ой давомида иштирокчилар томонидан рўйхатдан ўтказилган харид чекларининг жамланмаси доирасида ўтказилиб, ғолиблар инсон омилисиз харид чекини тасодифий танлаб олиш асосида аниқланади.

13. Ютуқли ўйин платформасида рўйхатдан ўтказилган харид чеклари тўғрисидаги маълумотлар реал вақт режимида очиқ ҳамда шаффофлик принципи асосида тақдим этиб борилади.

14. Қорақалпоғистон Республикаси ва Хоразм вилоятида ҳар бир ютуқли ўйин ғолибига бош соврин сифатида автомашина тақдим этилади.

15. Қорақалпоғистон Республикаси Вазирлар Кенгаши ва Хоразм вилояти ҳокимлиги Комиссия билан келишган ҳолда, ўйин ғолибларига қўшимча совринларни ҳам бериши мумкин.

16. Ҳар ойнинг 10-санасида Комиссия томонидан танлов ғолибларини мукофотлаш тадбирлари ўтказилиб, ушбу жараёнлар ҳамда танлов ғолиблари тўғрисидаги маълумотлар Солиқ қўмитасининг ижтимоий тармоқлардаги саҳифаларида ва ҳудудий телерадиоканалларда жонли эфирда узатилади.

17. Ғолиб сифатида аниқланган шахсларга ҳар ой якуни билан харид суммасининг бир фоизини қайтариб беришнинг амалдаги тартиби сақлаб қолинади.

18. Ютуқли ўйинларни ўтказиш жараёнида ғолибларни мукофотлаш мақсадида Қорақалпоғистон Республикаси Вазирлар Кенгаши ва Хоразм вилояти ҳокимлигининг алоҳида ягона ғазна ҳисобварағида ютуқлар фонди шакллантирилади.

19. Ютуқлар фонди қуйидаги манбалар ҳисобидан шакллантирилади:

2026 йил учун Қорақалпоғистон Республикасини ижтимоий-иқтисодий ривожлантириш жамғармаси маблағлари ва Хоразм вилояти маҳаллий бюджети даромадларининг режадан орттириб бажарилган қисми;

2027 йил 1 январдан бошлаб Ўзбекистон Республикасининг республика бюджетидан ажратилган маблағлар;

ҳомийлик хайриялари;

қонунчилик ҳужжатларида тақиқланмаган бошқа манбалар.

20. Ютуқлар фонди маблағларидан бошқа мақсадларда фойдаланишга йўл қўйилмайди.

21. Ютуқлар фондининг сарфланиши учун жавобгарлик Қорақалпоғистон Республикаси Вазирлар Кенгаши ва Хоразм вилояти ҳокимлигига юклатилади.

22. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

23. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ белгиланган тартибда жавоб берадилар.