«Ўзбекистон Республикасининг давлат мустақиллиги асослари тўғрисида»ги Қонунга мувофиқ ва астрономия соҳасидаги илмий тадқиқотларни янада ривожлантириш, халқаро алоқаларни кенгайтириш, шунингдек баланд тоғдаги астрономия обсерваторияларидан самарали фойдаланиш мақсадида:

1. Қашқадарё вилояти ҳудудида жойлашган баланд тоғдаги астрономия обсерваториялари ва уларга хизмат кўрсатувчи комплекслар иловага мувофиқ Ўзбекистон Республикасининг ҳуқуқий тасарруфига олинсин.

2. Ҳуқуқий тасарруфга олинган астрономия иншоотларига раҳбарлик қилиш Ўзбекистон Республикаси Фанлар академияси зиммасига юклансин. Уларнинг ишини ташкил этиш учун Ўзбекистон Республикаси Фанлар академиясининг Мирзо Улуғбек номли Астрономия институти таркибида баланд тоғдаги астрономия обсерваторияларининг Китоб комплекси ташкил этилсин.

3. Ўзбекистон Республикаси Фанлар академияси, Мирзо Улуғбек номли Астрономия институти ўн кун муддат ичида ушбу Фармонда кўрсатилган баланд тоғда жойлашган астрономия обсерваторияларини ва уларга хизмат кўрсатувчи комплексларни 1993 йилнинг 1 январигача бўлган ҳолатда барча бинолари, иншоотлари, штатлари, телескоплари, асбоб-ускуналари, техникаси, моддий-техникавий ва бошқа мулклари билан биргаликда қабул қилиб олсин.

4. Қуйидагилар баланд тоғдаги астрономия обсерваториялари Китоб комплекси фаолиятининг асосий вазифалари ва йўналишлари қилиб белгилансин:

астрономия фанини янада ривожлантириш, унинг моддий базасини такомиллаштириш, қулай астрономик ва иқлим шароитларидан самарали фойдаланиш;

юлдузлар физикаси ва эволюциясини, жаҳон миқёсидаги ва минтақавий геодинамик жараёнларни тадқиқ этиш, зилзилалар тўғрисидаги тахминларни олдиндан аниқлаш, фундаментал фанларни ривожлантириш манфаатларини кўзлаб бошқа сайёраларни ўрганиш;

астрономия фани ва технологияси ютуқларини халқ хўжалиги, фан ва таълимнинг турли тармоқларига жорий этиш;

халқаро ҳамкорликни кенгайтириш, тижорат фаолиятини ривожлантириш;

астрономия соҳасида кадрлар тайёрлаш.

5. Ўзбекистон Республикаси Фанлар академияси, Ўзбекистон Республикаси Фан ва техника давлат қўмитаси, Ўзбекистон космик тадқиқотлар давлат агентлиги бошқа манфаатдор вазирликлар ва идоралар билан биргаликда икки ой муддат ичида халқаро алоқаларни сақлаб қолиш ва кенгайтиришни ҳисобга олиб астрономия соҳасида фундаментал ва амалий тадқиқотларни янада ривожлантиришнинг илмий-техникавий дастурини ишлаб чиқсинлар ва тасдиқласинлар.

6. Ўзбекистон Республикаси Молия вазирлиги ҳуқуқий тасарруфга олинган баланд тоғдаги астрономия обсерваторияларининг Китоб комплексини маблағ билан таъминласин, бунинг учун молиявий таъминотнинг мавжуд меъёрларига амал қилиб ҳамда ана шу обсерваториялар ва уларга хизмат кўрсатувчи комплекслар сони ва харажатлар сметаси 70 фоиз қисқартирилишини назарда тутиб, қўшимча маблағ ажратсин.

7. Ўзбекистон Республикаси Вазирлар Маҳкамаси бир ой муддат ичида баланд тоғдаги астрономия обсерваториялари Китоб комплекси ишини ташкил этишга оид қарор қабул қилсин.