Қишлоқ хўжалиги ҳамда ветеринария ва чорвачилик соҳаларидаги раҳбар, мутахассислар, олий таълим ҳамда илмий-тадқиқот муассасалари раҳбар ва илмий кадрларини узлуксиз касбий ривожлантириш тизими самарадорлигини таъминлаш, уларнинг касбий билим, кўникма ва маҳоратини мунтазам ошириб бориш, малакасини ошириш ва қайта тайёрлаш тизимини такомиллаштириш, шунингдек, ходимларнинг касбий, педагогик малака ва маҳоратини узлуксиз ошириш мақсадида:

1. Қуйидагилар ташкил этилсин:

а) Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази (кейинги ўринларда — Миллий марказ) тизимида қуйидагилар негизида давлат муассасаси шаклида Қишлоқ хўжалиги соҳаси кадрларининг малакасини ошириш ва қайта тайёрлаш институти (кейинги ўринларда — Институт):

Тошкент давлат аграр университети ҳузуридаги Педагог кадрларни қайта тайёрлаш ва малакасини ошириш тармоқ маркази;

Тошкент давлат аграр университети ҳузуридаги «Агробизнес ва бошқарув» йўналиши бўйича агросаноат мажмуи учун раҳбар ва мутахассис кадрларни қайта тайёрлаш ва уларнинг малакасини ошириш маркази;

Халқаро қишлоқ хўжалиги университети ҳузуридаги Қишлоқ хўжалиги соҳасида кадрларни қайта тайёрлаш ва уларнинг малакасини ошириш тармоқ маркази;

Озиқ-овқат технологияси ва муҳандислиги халқаро институти ҳузуридаги Агробизнес субъектлари салоҳиятини ошириш маркази;

б) Ветеринария ва чорвачиликни ривожлантириш қўмитаси ҳузурида қуйидагилар негизида давлат муассасаси шаклида Ветеринария ва чорвачилик соҳасида педагог ҳамда мутахассис кадрларни қайта тайёрлаш ва уларнинг малакасини ошириш институти (кейинги ўринларда — Ветеринария соҳасида кадрлар малакасини ошириш институти):

Самарқанд давлат ветеринария медицинаси, чорвачилик ва биотехнологиялар университети ҳузуридаги Педагог кадрларни қайта тайёрлаш ва уларнинг малакасини ошириш тармоқ маркази;

Самарқанд давлат ветеринария медицинаси, чорвачилик ва биотехнологиялар университети ҳузуридаги Кадрларни қайта тайёрлаш ва уларнинг малакасини ошириш маркази.

2. Қишлоқ хўжалиги соҳаси кадрларининг малакасини ошириш ва қайта тайёрлаш институти ҳамда Ветеринария ва чорвачилик соҳасида педагог ҳамда мутахассис кадрларни қайта тайёрлаш ва уларнинг малакасини ошириш институтининг асосий вазифалари ва фаолият йўналишлари 1-иловага мувофиқ тасдиқлансин.

3. Белгилансинки, Институт ва Ветеринария соҳасида кадрлар малакасини ошириш институти тегишлича мазкур қарорнинг 1-бандида назарда тутилган таълим ташкилотларининг барча ҳуқуқ ва мажбуриятлари бўйича ҳуқуқий вориси ҳисобланади.

4. Қишлоқ хўжалиги соҳаси кадрларининг малакасини ошириш ва қайта тайёрлаш институти ҳамда Ветеринария ва чорвачилик соҳасида педагог ҳамда мутахассис кадрларни қайта тайёрлаш ва уларнинг малакасини ошириш институтида ташкил этиладиган қайта тайёрлаш ва малака ошириш йўналишлари 2-иловага мувофиқ тасдиқлансин.

5. Шундай тартиб ўрнатилсинки, унга мувофиқ Қишлоқ хўжалиги вазирлиги марказий аппарати, тизим ташкилотлари, ҳудудий таркибий бўлинмалар ходимлари ва унинг тизимидаги ташкилотлар раҳбар ва мутахассис кадрлари ҳар уч йилда камида бир марта малака ошириш курсларида ўқитилиши шарт.

6. Институт ва Ветеринария соҳасида кадрлар малакасини ошириш институтида қайта тайёрлаш ва малака ошириш курсларини муваффақиятли тамомлаган тингловчиларга қатъий ҳисобда турадиган давлат намунасидаги ҳужжат ҳисобланадиган сертификат берилади.

7. Белгилансинки:

а) Институтнинг умумий штат бирликлари сони 23 та (профессор-ўқитувчилар таркиби ҳамда техник ва хизмат кўрсатувчи ходимлардан ташқари) этиб белгиланади, шундан:

10 та штат бирлигини сақлаш Давлат бюджети ҳисобидан;

13 та штат бирлигини сақлаш Институтнинг бюджетдан ташқари маблағлари ҳисобидан амалга оширилади;

б) Ветеринария соҳасида кадрлар малакасини ошириш институтининг умумий штат бирликлари сони 15 та (профессор-ўқитувчилар таркиби ҳамда техник ва хизмат кўрсатувчи ходимлардан ташқари) этиб белгиланади, шундан:

8 та штат бирлигини сақлаш Давлат бюджети ҳисобидан;

7 та штат бирлигини сақлаш Ветеринария соҳасида кадрлар малакасини ошириш институтининг бюджетдан ташқари маблағлари ҳисобидан амалга оширилади;

в) Институт ва Ветеринария соҳасида кадрлар малакасини ошириш институтининг ходимларига қонунчилик ҳужжатларида давлат олий таълим муассасалари ходимлари учун белгиланган меҳнатга ҳақ тўлаш, моддий рағбатлантириш ва ижтимоий ҳимоя шартлари татбиқ этилади.

Бунда меҳнатга ҳақ тўлаш шартлари бўйича Институт ва Ветеринария соҳасида кадрлар малакасини ошириш институтининг директори — олий таълим муассасаси ректорига, директор ўринбосари — олий таълим муассасаси проректорига тенглаштирилади.

8. Қишлоқ хўжалиги вазирлиги (И. Абдурахмонов) ҳамда Ветеринария ва чорвачиликни ривожлантириш қўмитаси (Б. Норқобилов) 2025 йил 1 январга қадар Институт ва Ветеринария соҳасида кадрлар малакасини ошириш институтига нуфузли хорижий олий таълим ташкилотларини битирган ватандошлар ва чет эллик мутахассисларни, шунингдек, ушбу муассасаларнинг методик хизмат кўрсатиш бўлимларига юқори малакали ва тажрибали кадрларни жалб қилсин.

9. Қишлоқ хўжалиги вазирлиги ҳамда Ветеринария ва чорвачиликни ривожлантириш қўмитаси икки ой муддатда тегишлича Институт ва Ветеринария соҳасида кадрлар малакасини ошириш институтининг тузилмаси ва штат жадвалини ҳамда уставини тасдиқласин.

10. Белгилаб қўйилсинки:

Институтга Миллий марказнинг тавсиясига кўра қишлоқ хўжалиги вазири томонидан лавозимга тайинланадиган ва лавозимидан озод этиладиган директор раҳбарлик қилади;

Ветеринария соҳасида кадрлар малакасини ошириш институтига Ветеринария ва чорвачиликни ривожлантириш қўмитаси раиси томонидан лавозимга тайинланадиган ва лавозимидан озод этиладиган директор раҳбарлик қилади.

11. Қишлоқ хўжалиги вазирлиги ҳамда Ветеринария ва чорвачиликни ривожлантириш қўмитаси Олий таълим, фан ва инновациялар вазирлиги билан биргаликда икки ой муддатда Институт ва Ветеринария соҳасида кадрлар малакасини ошириш институтининг ўқув режалари ва дастурларини тасдиқласин.

12. «Эл-юрт умиди» жамғармаси Қишлоқ хўжалиги вазирлиги ҳамда Ветеринария ва чорвачиликни ривожлантириш қўмитаси билан биргаликда Институт ва Ветеринария соҳасида кадрлар малакасини ошириш институтининг маҳаллий профессор-ўқитувчиларини «Эл-юрт умиди» жамғармаси маблағлари ҳисобидан хорижий етакчи олий таълим ва илмий-тадқиқот муассасаларига малака ошириш, стажировка ва ўқишга юбориш чораларини кўрсин.

13. Қишлоқ хўжалиги вазири ҳамда Ветеринария ва чорвачиликни ривожлантириш қўмитаси раисига зарур ҳолларда тегишлича Институт ва Ветеринария соҳасида кадрлар малакасини ошириш институтининг тасдиқланган тузилмаларига ходимларнинг белгиланган умумий чекланган сони ҳамда меҳнатга ҳақ тўлаш фонди доирасида ўзгартириш ва қўшимчалар киритиш ҳуқуқи берилсин.

14. Институт ва Ветеринария соҳасида кадрлар малакасини ошириш институти фаолиятини молиялаштириш манбалари этиб қуйидагилар белгилансин:

Давлат бюджети маблағлари;

тингловчиларни тўлов-контракт асосида ўқитишдан тушадиган маблағлар;

хўжалик фаолиятидан ҳамда шартнома асосида хизматлар кўрсатишдан тушадиган тушумлар;

жисмоний ва юридик шахсларнинг ҳомийлик хайриялари;

халқаро молия ташкилотларининг грант маблағлари;

қонунчилик ҳужжатлари билан тақиқланмаган бошқа манбалар.

15. Қишлоқ хўжалиги вазирлиги ҳамда Ветеринария ва чорвачиликни ривожлантириш қўмитасига тегишлича Институт ва Ветеринария соҳасида кадрлар малакасини ошириш институтининг бюджетдан ташқари маблағлари ҳисобидан:

нуфузли хорижий олий таълим ташкилотларининг малакали ҳамда тажрибали профессор-ўқитувчилари, етук мутахассис ва маслаҳатчиларини жалб этиш, уларга меҳнат бозорининг амалдаги конъюнктурасини ҳисобга олган ҳолда иш ҳақи тўлашга;

ходимларнинг етакчи хорижий таълим ва илмий-тадқиқот муассасаларида малака ошириши ва стажировка ўташи билан боғлиқ харажатлар учун тўловларни амалга оширишга;

Институт ва Ветеринария соҳасида кадрлар малакасини ошириш институти фаолиятини самарали ташкил этиш мақсадида зарур техника ва технологиялар, асбоб-ускуналар, компьютер дастурлари ва алоқа воситаларини харид қилишга рухсат берилсин.

16. Қишлоқ хўжалиги вазирлиги ҳамда Ветеринария ва чорвачиликни ривожлантириш қўмитаси:

икки ой муддатда Институт ва Ветеринария соҳасида кадрлар малакасини ошириш институтининг бюджетдан ташқари маблағларини шакллантириш ва улардан фойдаланиш тартибини белгиловчи низомлар ишлаб чиқсин;

икки ой муддатда қишлоқ хўжалиги ҳамда ветеринария ва чорвачилик соҳасида ходимларни узлуксиз касбий ривожлантиришни ташкил этишга оид Ҳукумат қарори лойиҳасини ишлаб чиқсин ва белгиланган тартибда Вазирлар Маҳкамасига киритсин;

уч ой муддатда Институт ва Ветеринария соҳасида кадрлар малакасини ошириш институти фаолиятини йўлга қўйиш мақсадида 2025-2026 йилларга мўлжалланган «йўл харитаси»ни ҳамда ушбу муддатда эришиш лозим бўлган мақсадли индикаторларни, қишлоқ хўжалиги ҳамда ветеринария ва чорвачилик соҳаси кадрлари малакасини ошириш ва қайта тайёрлаш тартибини ишлаб чиқиб, Вазирлар Маҳкамасига киритсин.

17. Белгилансинки:

Институт ва Ветеринария соҳасида кадрлар малакасини ошириш институтини бюджет маблағлари ҳисобидан сақлаш харажатларини молиялаштириш 2024 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Қишлоқ хўжалиги вазирлигига ажратиладиган маблағлар доирасида амалга оширилади, 2025 йилдан бошлаб бюджет қонунчилиги талабларига мувофиқ тақдим этилган бюджет сўровномаларига асосан Давлат бюджети параметрларида назарда тутилади;

Институт Тошкент вилояти, Юқори Чирчиқ тумани, А. Яссавий маҳалласи, Ш. Рашидов кўчаси, 1-уй манзилидаги бинога оператив бошқарув ҳуқуқи асосида жойлаштирилади;

Ветеринария соҳасида кадрлар малакасини ошириш институти Самарқанд вилояти, Самарқанд шаҳри, Мирзо Улуғбек кўчаси, 77-уй манзилидаги бинога оператив бошқарув ҳуқуқи асосида жойлаштирилади.

18. Ўзбекистон Республикаси Президентининг ва Ўзбекистон Республикаси Ҳукуматининг айрим қарорлари 3-иловага мувофиқ ўз кучини йўқотган деб ҳисоблансин.

19. Қишлоқ хўжалиги вазирлиги манфаатдор вазирлик ва идоралар билан биргаликда бир ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

20. Мазкур қарор ижросини самарали ташкил қилишга масъул ва шахсий жавобгар этиб қишлоқ хўжалиги вазири И.Ю. Абдурахмонов белгилансин.

Қарор ижросини муҳокама қилиш, ижро учун масъул идоралар фаолиятини мувофиқлаштириш Ўзбекистон Республикаси Бош вазири А.Н. Арипов зиммасига юклансин.

1. Қишлоқ хўжалиги соҳаси кадрларининг малакасини ошириш ва қайта тайёрлаш институтининг асосий вазифалари ва фаолият йўналишлари:

Қишлоқ хўжалиги вазирлиги марказий аппарати, тизимдаги ташкилот ва корхоналар раҳбар ва мутахассис кадрларнинг малакасини ошириш ва қайта тайёрлаш;

аграр соҳадаги олий, профессионал таълим ҳамда илмий-тадқиқот муассасаларининг педагог ва илмий кадрларининг малакасини ошириш ва қайта тайёрлаш;

маҳаллий давлат бошқаруви органлари, қишлоқ хўжалиги маҳсулотлари етиштирувчи субъектлар раҳбарлари, бошқа вазирлик ва идоралар тизимидаги ташкилотларнинг қишлоқ хўжалиги масалаларига масъул мутахассис кадрларининг соҳада амалга оширилаётган ислоҳотлар ҳамда инновациялар бўйича малакасини ошириш ва қайта тайёрлаш;

давлат таълим стандартлари, касбга доир билим ва кўникмаларга қўйилган талаблар асосида меҳнат бозори эҳтиёжларини ҳисобга олган ҳолда касбий маълумотга эга аграр ва озиқ-овқат саноати соҳасидаги ташкилотлар ходимлари учун қўшимча ихтисослик бўйича пуллик асосда малака ошириш ва қайта тайёрлаш ўқув курсларини ташкил этиш;

ўқув-машғулот жараёнига, хусусан, аграр соҳа таълим муассасалари амалиётига замонавий инновацион педагогик технологияларни, ўқитишнинг самарали шакллари ва усулларини жорий этиш;

аграр ва озиқ-овқат саноати мутахассисларини касбий, маънавий-маърифий билимларини ошириш, аграр соҳада таълим тизимини илмий-методик таъминлаш, илғор педагогик технологияларни жорий этиш;

аграр соҳа ва йўналишларда илмий-тадқиқот фаолиятини юритиш, маҳаллий ва халқаро илмий-амалий лойиҳаларда иштирок этиш;

аграр ва озиқ-овқат саноатига оид ўқув қўлланмалари, ўқув адабиётлари ва бошқа илмий тавсияларни давлат хариди асосида тайёрлаш ва тарқатиш;

халқаро алоқаларни кенгайтириш ва мустаҳкамлаш, конференциялар, кўргазмалар ва бошқа тадбирлар ўтказиш орқали мамлакатимизнинг қишлоқ хўжалиги соҳасидаги ютуқларини халқаро даражада кенг ёритиш, хорижий таълим муассасалари билан ҳамкорлик қилиш.

2. Ветеринария ва чорвачилик соҳасида педагог ҳамда мутахассис кадрларни қайта тайёрлаш ва уларнинг малакасини ошириш институтининг асосий вазифалари ва фаолият йўналишлари:

Ветеринария ва чорвачиликни ривожлантириш қўмитаси марказий аппарати, тизимдаги ташкилот ва корхоналар раҳбар ва мутахассис кадрларнинг малакасини ошириш ва қайта тайёрлаш;

ветеринария ва чорвачилик соҳасидаги олий, профессионал таълим ҳамда илмий-тадқиқот муассасаларининг педагог ва илмий кадрларининг малакасини ошириш ва қайта тайёрлаш;

ветеринария ва чорвачилик фаолияти билан шуғулланувчи субъектлар раҳбарлари, бошқа вазирлик ва идоралар тизимидаги ташкилотларнинг ветеринария ва чорвачилик масалаларига масъул мутахассисларни соҳада амалга оширилаётган ислоҳотлар бўйича малакасини ошириш ва қайта тайёрлаш;

давлат таълим стандартлари, касбга доир билим ва кўникмаларга қўйилган талаблар асосида меҳнат бозори эҳтиёжларини ҳисобга олган ҳолда касбий маълумотга эга ветеринария ва чорвачилик соҳасидаги ташкилотлар ходимлари учун қўшимча ихтисослик бўйича пуллик асосда малака ошириш ва қайта тайёрлаш ўқув курсларини ташкил этиш;

ўқув-машғулот жараёнига, хусусан, ветеринария ва чорвачилик соҳасидаги таълим муассасалари амалиётига замонавий инновацион педагогик технологияларни, ўқитишнинг самарали шакллари ва усулларини жорий этиш;

ветеринария ва чорвачиликка оид ўқув қўлланмалари, ўқув адабиётлари ва бошқа илмий тавсияларни давлат хариди асосида тайёрлаш ва тарқатиш;

халқаро алоқаларни кенгайтириш ва мустаҳкамлаш, конференциялар, кўргазмалар ва бошқа тадбирлар ўтказиш орқали ветеринария ва чорвачилик соҳасида мамлакатимиз ютуқларини халқаро даражада кенг ёритиш, хорижий таълим муассасалари билан ҳамкорлик қилиш.

1. Қишлоқ хўжалиги соҳаси кадрларининг малакасини ошириш ва қайта тайёрлаш институтида ташкил этиладиган қайта тайёрлаш ва малака ошириш йўналишлари:

Қишлоқ хўжалиги вазирлиги марказий аппарати ва унинг тизимидаги ташкилотлар раҳбар ва мутахассис кадрлар бошқарув кўникмаларини ривожлантириш;

тизимдаги олий таълим ва илмий-тадқиқот муассасалари кадрларининг педагогик маҳоратларини ривожлантириш, илмий-педагогик кадрлар ҳамда илмий ходимлар тадқиқотларини ташкил этиш;

маҳаллий давлат бошқаруви органлари ва бошқа ташкилотларнинг қишлоқ хўжалиги масалаларига масъул мутахассисларини соҳада амалга оширилаётган ислоҳотлар ҳамда инновациялар бўйича ўқитиш;

қишлоқ хўжалиги маҳсулотларини етиштирувчи субъектлар раҳбар ва ходимларини замонавий агробизнес (фермерликка) ҳамда қўшилган қиймат занжирини яратишга ўқитиш.

2. Ветеринария ва чорвачилик соҳасида педагог ҳамда мутахассис кадрларни қайта тайёрлаш ва уларнинг малакасини ошириш институтида ташкил этиладиган қайта тайёрлаш ва малака ошириш йўналишлари:

Ветеринария ва чорвачиликни ривожлантириш қўмитаси марказий аппарати ва унинг тизимидаги ташкилотлар раҳбар ҳамда мутахассис кадрларининг бошқарув кўникмаларини ривожлантириш;

Ветеринария ва чорвачиликни ривожлантириш қўмитаси тизимидаги олий таълим ва илмий-тадқиқот муассасаларининг педагог кадрлар ҳамда илмий ходимлар тадқиқотларини ташкил этиш ва педагогик маҳоратларини ривожлантириш;

ветеринария ва наслчилик-селекция соҳаларида фаолият олиб борадиган хўжалик юритувчи субъектларни ўқитиш орқали уларнинг салоҳиятини ҳар томонлама ривожлантириш.

1. Ўзбекистон Республикаси Президентининг 2022 йил 7 майдаги «Халқаро қишлоқ хўжалиги университетини ташкил қилиш чора-тадбирлари тўғрисида»ги ПҚ-237-сон қарорининг 5-банди.

2. Ўзбекистон Республикаси Президентининг 2023 йил 26 январдаги «Озиқ-овқат технологияси ва муҳандислиги халқаро институтини ташкил қилиш чора-тадбирлари тўғрисида»ги ПҚ-22-сон қарорининг 4 ва 5-бандлари.

3. Ўзбекистон Республикаси Президентининг 2023 йил 7 июлдаги «Аграр соҳада илм-фан, таълим ва ишлаб чиқаришни интеграция қилиш орқали сифат ва самарадорликни оширишнинг қўшимча чора-тадбирлари тўғрисида»ги ПҚ-216-сон қарорининг 6-банди.

4. Вазирлар Маҳкамасининг 2012 йил 26 сентябрдаги 278-сон «Олий таълим муассасалари педагог кадрларини қайта тайёрлаш ва уларнинг малакасини ошириш тизимини янада такомиллаштириш чора-тадбирлари тўғрисида»ги қарорига 1-илова «Педагог кадрларни қайта тайёрлаш ва уларнинг малакасини ошириш тармоқ марказлари» бўлимининг 17-позицияси.

5. Вазирлар Маҳкамасининг 2019 йил 23 сентябрдаги «Олий таълим муассасалари раҳбар ва педагог кадрларининг малакасини ошириш тизимини янада такомиллаштириш бўйича қўшимча чора-тадбирлар тўғрисида»ги 797-сон қарори 1-бандининг бешинчи хатбошиси, 2-бандининг тўртинчи хатбошиси ҳамда 3-илова.

6. Вазирлар Маҳкамасининг 2020 йил 19 мартдаги «Агросаноат мажмуи учун захира кадрларни қайта тайёрлаш ва уларнинг малакасини ошириш тизимини янада такомиллаштиришга доир қўшимча чора-тадбирлар тўғрисида»ги 172-сон қарори.