Ушбу Қонуннинг мақсади электрон рақамли имзодан фойдаланиш соҳасидаги муносабатларни тартибга солишдан иборат.

Электрон рақамли имзо тўғрисидаги қонунчилик ушбу Қонун ва бошқа қонунчилик ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикасининг электрон рақамли имзо тўғрисидаги қонунчилигида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

Ушбу Қонунда қуйидаги асосий тушунчалар қўлланилади:

электрон рақамли имзо — электрон ҳужжатдаги мазкур электрон ҳужжат ахборотини электрон рақамли имзонинг ёпиқ калитидан фойдаланган ҳолда махсус ўзгаришлар натижасида ҳосил қилинган ҳамда электрон рақамли имзонинг очиқ калити ёрдамида электрон ҳужжатдаги ахборотда хатолик мавжуд эмаслигини аниқлаш ва электрон рақамли имзо калитининг эгасини идентификация қилиш имконини берадиган имзо;

электрон рақамли имзонинг ёпиқ калити — электрон рақамли имзо воситаларидан фойдаланган ҳолда ҳосил қилинган, фақат имзо қўювчи шахснинг ўзига маълум бўлган ва электрон ҳужжатда электрон рақамли имзони яратиш учун мўлжалланган белгилар кетма-кетлиги;

электрон рақамли имзо калитининг сертификати — электрон рақамли имзонинг очиқ калити электрон рақамли имзонинг ёпиқ калитига мувофиқлигини тасдиқлайдиган электрон ҳужжат;

электрон рақамли имзо калитининг эгаси — ўзига электрон рақамли имзо калитининг сертификати берилган жисмоний ёки юридик шахс;

электрон рақамли имзонинг очиқ калити — электрон рақамли имзо воситаларидан фойдаланган ҳолда ҳосил қилинган, электрон рақамли имзонинг ёпиқ калитига мувофиқ бўлган, ахборот тизимининг ҳар қандай фойдаланувчиси учун очиқ бўлган ва электрон ҳужжатдаги электрон рақамли имзонинг ҳақиқийлигини тасдиқлаш учун мўлжалланган белгилар кетма-кетлиги;

электрон рақамли имзонинг ҳақиқийлигини тасдиқлаш — электрон рақамли имзонинг электрон рақамли имзо калитининг эгасига тегишлилигини ва электрон ҳужжатдаги ахборотда хатолик мавжуд эмаслигини текширишнинг ижобий натижаси;

электрон ҳужжат — электрон шаклда қайд этилган, электрон рақамли имзо билан тасдиқланган ва электрон ҳужжатнинг уни идентификация қилиш имконини берадиган бошқа реквизитларига эга бўлган ахборот.

Бир вақтнинг ўзида қуйидаги шартларга риоя этилган тақдирда, электрон ҳужжатдаги электрон рақамли имзо қоғоз ҳужжатга қўлда шахсан қўйилган имзо билан бир хил аҳамиятга эга бўлади, агар:

электрон рақамли имзонинг ҳақиқийлиги тасдиқланган бўлса;

электрон рақамли имзо калитининг сертификати электрон рақамли имзонинг ҳақиқийлигини тасдиқлаш пайтида ёхуд имзолаш пайтини белгиловчи далиллар мавжуд бўлганда электрон ҳужжатни имзолаш пайтида амалда бўлса;

электрон рақамли имзодан электрон рақамли имзо калитининг сертификатида кўрсатилган мақсадларда фойдаланилаётган бўлса.

Ушбу модданинг биринчи қисмида кўрсатилган шартларга бир вақтнинг ўзида риоя этилган тақдирда, юридик шахснинг электрон рақамли имзоси билан тасдиқланган электрон ҳужжат юридик шахснинг муҳри билан тасдиқланган қоғоз ҳужжатга тенглаштирилади.

Электрон рақамли имзо воситалари электрон ҳужжатда электрон рақамли имзо яратилишини, электрон рақамли имзонинг ҳақиқийлиги тасдиқланишини, электрон рақамли имзонинг ёпиқ ва очиқ калитлари яратилишини таъминлайдиган техник ва дастурий воситалар мажмуидан иборатдир.

Электрон рақамли имзо воситалари қонунчиликда белгиланган тартибда ахборот хавфсизлиги талабларига мувофиқ сертификатлаштирилиши керак.

Давлат органлари ўртасидаги идоралараро электрон ҳамкорлик миллий стандартлар асосида ишлаб чиқилган электрон рақамли имзо воситаларидан фойдаланилган ҳолда амалга оширилади.

Давлат хизматларини кўрсатиш чоғида миллий ва халқаро (минтақавий) стандартлар асосида ишлаб чиқилган электрон рақамли имзо воситаларидан фойдаланишга йўл қўйилади.

Электрон рақамли имзолар калитларини рўйхатга олиш марказларининг «булутли технологияларида» (ишончли сақлаш тизимида) электрон рақамли имзо калитларидан фойдаланиш камида икки омилли аутентификация қилиш тартиб-таомилидан фойдаланилган ҳолда амалга оширилади.

Тарқатилиши чекланган ахборотни ўз ичига олган электрон ҳужжатлар учун электрон рақамли имзо калитига нисбатан қўшимча талаблар қўйилиши мумкин.

Электрон рақамли имзодан фойдаланиш соҳасидаги давлат сиёсатининг асосий йўналишлари қуйидагилардан иборат:

электрон рақамли имзодан фойдаланиш учун ҳуқуқий, иқтисодий, ташкилий, техник ва бошқа шарт-шароитлар яратиш;

электрон рақамли имзонинг мавжуд бўлиши талаб қилинадиган электрон хизматлар барча турларининг очиқлигини ва сифатини таъминлаш;

мажбурий техник талаблар, нормалар ва қоидаларга риоя этилиши устидан давлат назоратини амалга ошириш;

электрон рақамли имзодан фойдаланиш соҳасидаги илмий-техник тадқиқотларни рағбатлантириш;

кадрларни тайёрлаш, қайта тайёрлаш ва уларнинг малакасини ошириш;

инвестицияларни жалб этиш учун қулай шарт-шароитлар яратиш;

давлат-хусусий шерикликни ривожлантириш;

илғор инновацион, ахборот ва коммуникация технологияларининг жорий этилишига кўмаклашиш;

халқаро ҳамкорликни ривожлантириш.

Ўзбекистон Республикаси Вазирлар Маҳкамаси:

электрон рақамли имзодан фойдаланиш соҳасида ягона давлат сиёсати амалга оширилишини таъминлайди;

электрон рақамли имзодан фойдаланиш соҳасидаги давлат дастурларини тасдиқлайди ва уларнинг амалга оширилишини таъминлайди;

электрон рақамли имзодан фойдаланиш соҳасидаги норматив-ҳуқуқий ҳужжатларни ўз ваколатлари доирасида қабул қилади;

Ўзбекистон Республикасининг консуллик муассасалари, шунингдек Ўзбекистон Республикаси дипломатик ваколатхоналарининг консуллик бўлимлари орқали электрон рақамли имзолар калитларининг сертификатларини бериш тартибини белгилайди;

Ишончли учинчи тараф хизматининг фаолияти тартибини белгилайди.

Ўзбекистон Республикаси Вазирлар Маҳкамаси қонунчиликка мувофиқ бошқа ваколатларни ҳам амалга ошириши мумкин.

Ўзбекистон Республикаси Ахборот технологиялари ва коммуникацияларини ривожлантириш вазирлиги электрон рақамли имзодан фойдаланиш соҳасидаги ваколатли давлат органидир (бундан буён матнда ваколатли давлат органи деб юритилади).

Ваколатли давлат органи:

электрон рақамли имзодан фойдаланиш соҳасидаги стандартлар, нормалар ва қоидаларни ишлаб чиқади;

электрон рақамли имзолар калитларини рўйхатга олиш марказларини аккредитация қилишни ва қайта аккредитация қилишни амалга оширади;

электрон рақамли имзолар калитларини рўйхатга олиш марказларига электрон рақамли имзолар калитларининг сертификатларини беради, шунингдек Электрон рақамли имзолар калитларини рўйхатга олиш марказларининг электрон рақамли имзолар калитлари сертификатларининг ягона давлат реестрини юритади;

электрон рақамли имзолар калитларини рўйхатга олиш марказларининг фаолиятини назорат қилади ва камчиликлар аниқланган тақдирда уларни бартараф этиш тўғрисида кўрсатма беради;

жисмоний ва юридик шахсларнинг мурожаатларига кўра рўйхатга олиш марказларига тегишли бўлган электрон рақамли имзонинг ҳақиқийлигини тасдиқлашни амалга оширади;

Ишончли учинчи тараф хизматининг фаолиятини ташкил этади.

Ваколатли давлат органи қонунчиликка мувофиқ бошқа ваколатларни ҳам амалга ошириши мумкин.

Қонунчиликда белгиланган тартибда аккредитация қилинган ва Ўзбекистон Республикаси резиденти бўлган, электрон рақамли имзодан фойдаланиш соҳасидаги фаолиятни амалга оширадиган юридик шахс электрон рақамли имзолар калитларини рўйхатга олиш марказидир (бундан буён матнда рўйхатга олиш маркази деб юритилади).

Рўйхатга олиш маркази ҳамда жисмоний ва юридик шахслар ўртасидаги электрон рақамли имзодан фойдаланиш соҳасидаги муносабатлар шартнома асосида амалга оширилади.

Рўйхатга олиш марказлари томонидан берилган электрон рақамли имзо калитига эга бўлган шахслар электрон рақамли имзонинг мавжуд бўлиши талаб қилинадиган давлат хизматларининг барча турларидан эркин фойдаланиш имкониятига эга бўлади.

Рўйхатга олиш маркази:

электрон рақамли имзони яратиш ва текшириш учун ахборот хавфсизлиги талабларига мувофиқ сертификатлаштирилган аппарат, дастурий-аппарат ва дастурий таъминотга;

электрон рақамли имзолар калитларининг сертификатларини тайёрлаш, ҳисобга олиш ва сақлаш учун ахборот хавфсизлиги талабларига мувофиқ сертификатлаштирилган аппарат, дастурий-аппарат ва дастурий таъминотга;

тарқатилиши чекланган ахборотнинг сақланишини таъминлайдиган шарт-шароитларга;

ахборот хавфсизлиги, техника хавфсизлиги ва ёнғин хавфсизлиги талабларига жавоб берадиган зарур хоналарга эга бўлиши керак.

Рўйхатга олиш марказларининг ахборот тизимлари ва ресурслари ахборот тизимларидаги ҳамда ресурсларидаги маълумотлар қонунга хилоф равишда тарқатилишининг, ўғирланишининг, йўқолишининг, яхлитлиги бузилишининг, блокланишининг ҳамда қалбакилаштирилишининг олдини олиш мақсадида рухсатсиз фойдаланишдан (киришдан) ҳимоя қилинган бўлиши керак.

Рўйхатга олиш марказини устав фондида (устав капиталида) чет давлат резидентининг улуши ўттиз ва ундан ортиқ фоиз бўлган юридик шахслар томонидан ташкил этишга йўл қўйилмайди.

Рўйхатга олиш марказини аккредитация қилиш жараёни қуйидагиларни ўз ичига олади:

аккредитация қилиш тўғрисидаги аризани кўриб чиқишни ҳамда аккредитация қилиш тўғрисида ёки аккредитация қилишни рад этиш ҳақида қарор қабул қилишни;

аккредитация қилинганлик тўғрисида гувоҳнома беришни;

электрон рақамли имзо калитининг сертификатини беришни.

Аккредитация қилинганлик тўғрисидаги гувоҳнома ва электрон рақамли имзо калитининг сертификати электрон ҳужжат тарзида яратилади.

Рўйхатга олиш марказини аккредитация қилиш тўғрисидаги ариза Ўзбекистон Республикасининг Ягона интерактив давлат хизматлари портали орқали ваколатли давлат органига берилади.

Рўйхатга олиш марказини аккредитация қилиш тўғрисидаги аризада қуйидагилар кўрсатилади:

муассис тўғрисидаги маълумотлар;

рўйхатга олиш марказининг номи, жойлашган ери (почта манзили), мақсади ва вазифалари.

Рўйхатга олиш марказини аккредитация қилиш тўғрисидаги аризага қуйидагилар илова қилинади:

рўйхатга олиш маркази муассисининг устави (низоми);

аризачи-ташкилотнинг раҳбари тўғрисидаги маълумотлар;

ваколатли давлат органи билан ҳамкорлик қилиш учун танланган шахсга нисбатан ишонч хати;

электрон рақамли имзонинг очиқ калити (мавжуд бўлганда) ва унинг қўлланилиши тўғрисидаги маълумотлар.

Ваколатли давлат органи рўйхатга олиш марказини аккредитация қилиш учун бошқа ваколатли органларда мавжуд бўлган зарур ҳужжатларни ва маълумотларни ахборот ҳамкорлиги тизими воситасида мустақил равишда олади.

Рўйхатга олиш марказини аккредитация қилиш тўғрисидаги аризани бериш чоғида тақдим этилган маълумотлар ўзгарган тақдирда, аризачи бу ҳақда ваколатли давлат органини Ўзбекистон Республикасининг Ягона интерактив давлат хизматлари портали орқали уч иш куни ичида хабардор қилиши керак.

Ваколатли давлат органи рўйхатга олиш марказини аккредитация қилиш тўғрисидаги ариза олинган кундан эътиборан бир ойлик муддатда аризани кўриб чиқади ҳамда тақдим этилган ҳужжатлар ва маълумотлар асосида рўйхатга олиш марказини аккредитация қилиш тўғрисида ёки аккредитация қилишни рад этиш ҳақида қарор қабул қилади.

Рўйхатга олиш маркази аккредитация қилинганлиги учун ҳақ ундирилмайди.

Рўйхатга олиш марказини аккредитация қилиш тўғрисида қарор қабул қилинган тақдирда, аккредитация қилинганлик тўғрисидаги гувоҳнома рўйхатга олиш марказига Ўзбекистон Республикасининг Ягона интерактив давлат хизматлари портали орқали QR-код (матрик штрихли код) қўйилган ҳолда, электрон тарзда ваколатли давлат органи томонидан берилади. Рўйхатга олиш маркази аккредитация қилинганлиги тўғрисидаги гувоҳнома ваколатли давлат органининг ахборот ресурсида сақланади.

Рўйхатга олиш маркази аккредитация қилинганлиги тўғрисидаги гувоҳнома рўйхатга олиш марказининг аризасига асосан, амал қилиши беш йилгача бўлган муддатга берилади.

Рўйхатга олиш маркази аккредитация қилинганлиги тўғрисидаги гувоҳнома йўқолган тақдирда (йўқотилганда, йўқ қилинганда ва бошқа ҳолларда), уни тиклаш рўйхатга олиш марказининг аризасига асосан ваколатли давлат органи томонидан амалга оширилади.

Рўйхатга олиш марказини аккредитация қилиш қуйидаги ҳолларда рад этилиши мумкин:

ушбу Қонуннинг 10-моддасида назарда тутилган талаблар аризачи томонидан бажарилмаганда;

агар илгари худди шундай ёки шунга ўхшаш номдаги бошқа рўйхатга олиш маркази аккредитация қилинган бўлса.

Рўйхатга олиш марказини аккредитация қилиш рад этилган тақдирда, қарор қабул қилинганидан кейин уч иш куни ичида аризачи бу ҳақда ёзма шаклда, шунингдек Ўзбекистон Республикасининг Ягона интерактив давлат хизматлари портали орқали электрон шаклда хабардор қилинади.

Ёзма ёки электрон хабарномада рўйхатга олиш марказини аккредитация қилишни рад этиш сабаблари, шунингдек аризачи рад этиш сабаблари бартараф этилганидан кейин ваколатли давлат органига такроран мурожаат қилиши мумкин бўлган муддат кўрсатилади.

Аризачи ваколатли давлат органининг рўйхатга олиш марказини аккредитация қилишни рад этиш тўғрисидаги қарори устидан судга шикоят қилиши мумкин.

Рўйхатга олиш марказини қайта аккредитация қилиш қуйидаги ҳолларда амалга оширилади:

рўйхатга олиш марказининг жойлашган ери (почта манзили) ўзгарганда;

рўйхатга олиш маркази аккредитация қилинганлиги тўғрисидаги гувоҳноманинг амал қилиш муддати тугаганда.

Рўйхатга олиш марказини қайта аккредитация қилиш рўйхатга олиш марказини аккредитация қилиш қандай тартибда ўтказилган бўлса, худди шундай тартибда амалга оширилади.

Қайта аккредитация қилиш учун рўйхатга олиш маркази қайта аккредитация қилиш ҳақидаги аризани аккредитация қилиш маркази рўйхатга олинганлиги тўғрисидаги гувоҳноманинг амал қилиш муддати тугагунига қадар камида бир ой олдин юборади.

Рўйхатга олиш маркази аккредитация қилинганлиги тўғрисидаги гувоҳноманинг амал қилиши қуйидаги ҳолларда тўхтатиб турилиши мумкин:

рўйхатга олиш маркази томонидан қонунчилик, шунингдек ахборот хавфсизлиги стандартлари, нормалари ва қоидаларининг талаблари бузилганлиги аниқланганда;

рўйхатга олиш маркази томонидан ваколатли давлат органининг аниқланган бузилишларни бартараф этиш бўйича мажбуриятни унинг зиммасига юкловчи талаби бажарилмаганда.

Рўйхатга олиш маркази аккредитация қилинганлиги тўғрисидаги гувоҳноманинг амал қилишини ўн кунгача бўлган муддатга тўхтатиб туриш ваколатли давлат органи томонидан, ўн кундан кўп муддатга, бироқ кўпи билан олти ой муддатга тўхтатиб туриш эса суд томонидан амалга оширилади.

Ваколатли давлат органининг рўйхатга олиш маркази аккредитация қилинганлиги тўғрисидаги гувоҳноманинг амал қилишини тўхтатиб туриш ҳақидаги қарори қабул қилинган кундан эътиборан бир иш кунидан кечиктирмай рўйхатга олиш марказига гувоҳноманинг амал қилишини тўхтатиб туриш сабаблари ва қонунчиликнинг аниқ нормалари кўрсатилган ҳолда Ўзбекистон Республикасининг Ягона интерактив давлат хизматлари портали орқали электрон шаклда етказилади.

Суднинг рўйхатга олиш маркази аккредитация қилинганлиги тўғрисидаги гувоҳноманинг амал қилишини тўхтатиб туриш ҳақидаги қарори рўйхатга олиш марказига қонунчиликда белгиланган муддатларда етказилади.

Рўйхатга олиш маркази аккредитация қилинганлиги тўғрисидаги гувоҳноманинг амал қилишини тўхтатиб туриш муддати мазкур гувоҳноманинг амал қилиш муддатидан ошмаслиги керак.

Рўйхатга олиш маркази аккредитация қилинганлиги тўғрисидаги гувоҳноманинг амал қилишини тўхтатиб туришга олиб келган ҳолатлар рўйхатга олиш маркази томонидан бартараф этилган тақдирда, гувоҳноманинг амал қилишини тўхтатиб туриш ҳақида қарор қабул қилган ваколатли давлат органи ёки суд кўрсатилган ҳолатлар бартараф этилганлиги тўғрисидаги тасдиқнома олинган кундан эътиборан уч иш куни ичида гувоҳноманинг амал қилишини қайта тиклаш ҳақида қарор қабул қилиши шарт.

Рўйхатга олиш маркази аккредитация қилинганлиги тўғрисидаги гувоҳноманинг амал қилишини тўхтатиб туриш даврида рўйхатга олиш марказининг электрон рақамли имзо калити сертификатининг амал қилиши ҳам тўхтатиб турилади.

Ваколатли давлат органининг ёки суднинг рўйхатга олиш маркази аккредитация қилинганлиги тўғрисидаги гувоҳноманинг амал қилишини тўхтатиб туриш ҳақидаги қарори устидан белгиланган тартибда шикоят қилиниши мумкин.

Рўйхатга олиш маркази аккредитация қилинганлиги тўғрисидаги гувоҳноманинг амал қилиши қуйидаги ҳолларда ваколатли давлат органининг қарорига кўра тугатилиши мумкин:

рўйхатга олиш маркази рўйхатга олиш маркази аккредитация қилинганлиги тўғрисидаги гувоҳноманинг амал қилишини тугатиш ҳақидаги ариза билан мурожаат этганда;

рўйхатга олиш маркази аккредитация қилинганлиги тўғрисидаги гувоҳноманинг амал қилиш муддати тугаганда.

Рўйхатга олиш маркази аккредитация қилинганлиги тўғрисидаги гувоҳноманинг амал қилиши қуйидаги ҳолларда суд томонидан тугатилади:

рўйхатга олиш маркази аккредитация қилинганлиги тўғрисидаги гувоҳноманинг амал қилиши тўхтатиб турилишига олиб келган ҳолатлар рўйхатга олиш маркази томонидан ваколатли давлат органи ёки суд белгилаган муддатда бартараф этилмаганда;

ваколатли давлат органининг рўйхатга олиш маркази аккредитация қилинганлиги тўғрисидаги гувоҳномани бериш ҳақидаги қарори қонунга хилоф эканлиги аниқланганда;

рўйхатга олиш маркази томонидан қонунчилик, шунингдек ахборот хавфсизлиги стандартлари, нормалари ҳамда қоидаларининг талаблари мунтазам равишда (бир йил давомида икки ва ундан ортиқ маротаба) ёки бир маротаба қўпол равишда бузилганда, агар мазкур қоидабузарликлар фуқароларнинг ҳаёти ва соғлиғига, жисмоний ва юридик шахсларнинг ҳуқуқлари ҳамда қонуний манфаатларига, жамоат хавфсизлигига зарар етказилишига олиб келган бўлса;

рўйхатга олиш маркази аккредитация қилинганлиги тўғрисидаги гувоҳнома қалбаки ҳужжатлардан фойдаланилган ҳолда олинганлиги факти аниқланганда.

Рўйхатга олиш маркази аккредитация қилинганлиги тўғрисидаги гувоҳноманинг амал қилишини тугатиш ҳақидаги ариза билан судга мурожаат қилинган кундан эътиборан бир иш кунидан кечиктирмай ваколатли давлат органи гувоҳноманинг амал қилишини тугатиш ҳақидаги ариза билан судга мурожаат қилиш асосларини рўйхатга олиш марказига қонунчиликнинг аниқ нормаларини кўрсатган ҳолда, Ўзбекистон Республикасининг Ягона интерактив давлат хизматлари портали орқали электрон шаклда етказади.

Рўйхатга олиш маркази аккредитация қилинганлиги тўғрисидаги гувоҳноманинг амал қилиши тугатилган тақдирда, рўйхатга олиш марказининг электрон рақамли имзо калити сертификатининг ҳам амал қилиши тугатилади.

Ваколатли давлат органининг ёки суднинг рўйхатга олиш маркази аккредитация қилинганлиги тўғрисидаги гувоҳноманинг амал қилишини тугатиш ҳақидаги қарори устидан белгиланган тартибда шикоят қилиниши мумкин.

Ваколатли давлат органи Рўйхатга олиш марказларининг электрон рақамли имзолар калитлари сертификатларининг ягона давлат реестрини (бундан буён матнда Ягона давлат реестри деб юритилади) юритади ҳамда жисмоний ва юридик шахсларнинг ундан эркин фойдаланишини таъминлайди.

Ягона давлат реестрида қуйидагилар кўрсатилади:

рўйхатга олиш маркази тўғрисидаги маълумотлар (рўйхатга олиш марказининг номи, жойлашган ери (почта манзили), телефон (факс) рақами, электрон почта манзили, рўйхатга олиш маркази аккредитация қилинганлиги тўғрисидаги гувоҳноманинг берилган санаси, серия рақами ва амал қилиш муддати, унинг амал қилишини тўхтатиб туриш ҳамда қайта тиклаш асослари ва саналари);

рўйхатга олиш марказининг раҳбари ҳақидаги маълумотлар;

рўйхатга олиш марказининг электрон рақамли имзо калити сертификатининг амал қилишини узайтириш, тўхтатиб туриш, қайта тиклаш ҳамда тугатиш асослари ва саналари.

Рўйхатга олиш марказларининг электрон рақамли имзолар калитлари сертификатларининг амал қилиши тугатилган тақдирда, улар Ягона давлат реестридан чиқарилади.

Рўйхатга олиш марказининг электрон рақамли имзо калити сертификати Ягона давлат реестридан чиқарилган пайтдан эътиборан ҳақиқий эмас деб ҳисобланади.

Фойдаланилаётган электрон рақамли имзонинг ёпиқ калитига ишонч йўқолган тақдирда, рўйхатга олиш маркази ваколатли давлат органини бу ҳақда ёзма ёки электрон шаклда хабардор қилади. Ваколатли давлат органи ёзма ёки электрон хабарнома олинганидан кейин сертификатнинг амал қилишини дарҳол тўхтатиб туради ва мазкур рўйхатга олиш марказининг сертификатини амал қилиши тугатилган сертификатлар рўйхатига жойлаштиради.

Рўйхатга олиш маркази қуйидаги ҳуқуқларга эга:

электрон рақамли имзонинг очиқ ва ёпиқ калитларини яратиш, электрон рақамли имзо калитининг сертификатини рўйхатга олиш ҳамда бериш;

ушбу Қонуннинг 27-моддасида назарда тутилган ҳолларда, электрон рақамли имзо калитлари сертификатларининг амал қилишини тўхтатиб туриш, тиклаш ва тугатиш;

электрон рақамли имзоларнинг ёпиқ калитларини «булутли технологияларда» лозим даражада сақлашга доир ташкилий-техник тадбирларни ишлаб чиқиш ва амалга ошириш;

вақт штампини (имзоланган электрон ҳужжатнинг кўрсатилган вақтда мавжудлигини тасдиқловчи реквизитни) қўйиш бўйича хизмат кўрсатиш;

электрон рақамли имзоларнинг калитларини бериш тўғрисида аризалар қабул қилиш, рўйхатга олиш маркази номидан электрон рақамли имзоларнинг ёпиқ калитларини ва электрон рақамли имзолар калитларининг тегишли сертификатларини бериш учун ҳудудий бўлинмаларга эга бўлиш;

электрон рақамли имзоларнинг калитларини бериш, рўйхатга олиш маркази номидан электрон рақамли имзоларнинг ёпиқ калитларини ҳамда электрон рақамли имзолар калитларининг тегишли сертификатларини бериш тўғрисидаги аризаларни қабул қилишга оид ваколатларини шартнома асосида бошқа юридик шахсларга топшириш.

Рўйхатга олиш маркази:

электрон рақамли имзоларнинг ёпиқ калитларини яратиш ва бериш жараёни хавфсизлигига таъсир кўрсатиши мумкин бўлган шарт-шароитларнинг ҳар қандай ўзгаришлари тўғрисида ваколатли давлат органини ёзма ёки электрон шаклда хабардор қилиши;

рўйхатга олиш марказининг электрон рақамли имзосининг ёпиқ калитидан фақат ўзи берган электрон рақамли имзолар калитларининг сертификатларини имзолаш учун фойдаланиши;

рўйхатга олиш марказининг электрон рақамли имзосининг ёпиқ калитини ҳимоя қилиш бўйича чоралар кўриши, агар ушбу калит бошқа шахслар томонидан фойдаланилаётганлиги ёки фойдаланиш режими бузилганлиги маълум бўлиб қолса, бу ҳақда ваколатли давлат органини дарҳол хабардор қилиши;

электрон рақамли имзо калитларининг эгалари тўғрисидаги ахборотни ошкор қилмаслиги, бундан электрон рақамли имзолар калитларининг сертификатларида кўрсатилган ахборот мустасно;

Жисмоний ва юридик шахсларнинг электрон рақамли имзолари калитлари сертификатларининг реестрини (бундан буён матнда Реестр деб юритилади) юритиши, унинг ўз вақтида янгиланишини ҳамда электрон рақамли имзолар калитларининг амалдаги, амал қилиши тўхтатиб турилган ва тугатилган сертификатлари тўғрисидаги маълумотлардан жисмоний ҳамда юридик шахсларнинг эркин фойдаланиши имкониятини таъминлаши;

электрон рақамли имзолар калитлари сертификатлари серия рақамларининг ва электрон рақамли имзолар очиқ калитларининг ноёблигини таъминлаши;

жисмоний ва юридик шахсларга рўйхатга олиш марказининг оммавий офертаси билан танишиш имкониятини бериши;

жисмоний ва юридик шахсларнинг мурожаатларига кўра электрон ҳужжатлардаги электрон рақамли имзонинг ҳақиқийлигини тасдиқлашни амалга ошириши шарт.

Рўйхатга олиш маркази қонунчиликка мувофиқ бошқа ҳуқуқларга эга бўлиши ва унинг зиммасида бошқа мажбуриятлар ҳам бўлиши мумкин.

Рўйхатга олиш маркази қонунчиликда белгиланган тартибда тугатилиши мумкин.

Рўйхатга олиш маркази тугатиш тўғрисида қарор қабул қилинган пайтдан эътиборан бир ой ичида бу ҳақда ваколатли давлат органига, шунингдек сертификатлари ушбу рўйхатга олиш маркази томонидан берилган электрон рақамли имзолар калитларининг барча эгаларига хабар қилиши шарт.

Рўйхатга олиш маркази тугатилган тақдирда, ушбу рўйхатга олиш маркази томонидан берилган электрон рақамли имзолар калитларининг сертификатлари электрон рақамли имзолар калитлари эгаларининг розилиги билан бошқа рўйхатга олиш марказларига топширилиши мумкин.

Бошқа рўйхатга олиш марказларига топширилмаган электрон рақамли имзолар калитларининг сертификатлари ваколатли давлат органига сақлаш учун топширилиб, бу ҳақда мазкур электрон рақамли имзолар калитларининг эгалари ёзма ёки электрон шаклда хабардор қилинади. Бунда электрон рақамли имзолар калитларининг сертификатлари уларнинг амал қилиш муддати тугагунига қадар амал қилади.

Электрон рақамли имзо калитининг сертификати жисмоний ёки юридик шахснинг электрон рақамли имзонинг калитини бериш ёки электрон рақамли имзо калитининг сертификатини рўйхатга олиш тўғрисидаги аризасига асосан берилади.

Электрон рақамли имзонинг калитини бериш ёки электрон рақамли имзо калитининг сертификатини рўйхатга олиш тўғрисидаги аризани кўриб чиқиш муддати бир иш кунидан ошмаслиги керак. Электрон рақамли имзо калитининг сертификати рўйхатга олиш маркази томонидан аризачининг шахси тасдиқланганидан кейин берилади.

Рўйхатга олиш марказлари томонидан электрон рақамли имзо калитини бериш ва электрон рақамли имзолар калитларининг сертификатларини рўйхатга олиш учун:

жисмоний шахслардан — шахсини тасдиқловчи ҳужжатни кўрсатиш, жисмоний шахснинг шахсий идентификация рақамини ҳамда электрон рақамли имзонинг калитидан фойдаланиш мақсади ҳақидаги маълумотларни тақдим этиш;

юридик шахслардан — солиқ тўловчи юридик шахснинг идентификация рақами тўғрисидаги маълумотларни, юридик шахснинг электрон рақамли имзоси калитининг сертификатини олувчи ходим кўрсатилган ишончномани, ишончномада кўрсатилган ходимнинг шахсини ҳамда электрон рақамли имзонинг калитидан фойдаланиш мақсадларини тасдиқловчи ҳужжатни тақдим этиш талаб қилинади.

Тарқатилиши чекланган ахборотни ўз ичига олган электрон ҳужжатлар учун электрон рақамли имзонинг ёпиқ калитини бериш ва электрон рақамли имзо калитининг сертификатини рўйхатга олиш учун қўшимча ахборот талаб қилиниши мумкин.

Рўйхатга олиш марказининг жисмоний ва юридик шахслардан электрон рақамли имзо калитларининг сертификатларини бериш мақсадларига мувофиқ бўлмаган маълумотларни сўраб олиши тақиқланади.

Ариза берилгунига қадар аризачи электрон рақамли имзонинг очиқ ва ёпиқ калитларини мустақил равишда яратиши ҳамда рўйхатга олиш марказига очиқ калитни электрон рақамли имзо калитининг сертификатини олиш учун тақдим этиши мумкин.

Жисмоний ва юридик шахслар бир нечта электрон рақамли имзо калитларига эга бўлиши мумкин. Ҳар бир электрон рақамли имзо калитининг сертификатини рўйхатга олиш белгиланган тартибда алоҳида амалга оширилади.

Электрон рақамли имзо калити сертификатининг амал қилиш муддати электрон рақамли имзо калитининг сертификати рўйхатга олинган пайтдан эътиборан йигирма тўрт ойдан ошмаслиги керак. Бунда электрон рақамли имзо калити сертификатининг амал қилиш муддати икки мартадан кўп бўлмаган муддатга узайтирилиши мумкин.

Электрон рақамли имзо калитининг сертификати рўйхатга олиш марказининг электрон рақамли имзоси билан тасдиқланади ва Реестрга киритилади.

Ўзбекистон Республикасининг хориждаги фуқаролари, шунингдек чет эл жисмоний ва юридик шахслари ҳамда фуқаролиги бўлмаган шахслар электрон рақамли имзо калитининг сертификатини Ўзбекистон Республикасининг консуллик муассасалари, шунингдек Ўзбекистон Республикаси дипломатик ваколатхоналарининг консуллик бўлимлари орқали олиши мумкин.

Ўзбекистон Республикасининг консуллик муассасалари, шунингдек Ўзбекистон Республикаси дипломатик ваколатхоналарининг консуллик бўлимлари томонидан электрон рақамли имзолар калитларининг сертификатларини бериш тартиби Ўзбекистон Республикаси Вазирлар Маҳкамаси томонидан белгиланади.

Электрон рақамли имзо калитининг сертификатида қуйидагилар кўрсатилиши керак:

электрон рақамли имзо калитининг эгаси бўлган жисмоний шахснинг фамилияси, исми, отасининг исми ва шахсий идентификация рақами;

электрон рақамли имзо калитининг эгаси бўлган солиқ тўловчи юридик шахснинг номи, жойлашган ери (почта манзили) ва идентификация рақами;

электрон рақамли имзо калити сертификатининг серия рақами ва унинг амал қилиш муддати;

электрон рақамли имзонинг очиқ калити;

электрон рақамли имзонинг очиқ калитидан қайси электрон рақамли имзо воситалари ёрдамида фойдаланиш мумкин бўлса, худди шундай воситаларнинг номи;

мазкур сертификатни берган рўйхатга олиш марказининг номи ва жойлашган ери (почта манзили);

электрон рақамли имзо калитидан фойдаланиш мақсади тўғрисидаги маълумотлар;

электрон рақамли имзо калитининг мазкур сертификати киритилган Реестрнинг Интернет жаҳон ахборот тармоғидаги тўлиқ манзили.

Электрон рақамли имзо калити эгасининг ташаббусига кўра электрон рақамли имзо калитининг сертификатига қонунчиликка мувофиқ бошқа маълумотлар ҳам киритилиши мумкин.

Электрон рақамли имзо калити сертификатининг амал қилишини тўхтатиб туриш, тиклаш ва тугатиш электрон рақамли имзо калити эгасининг аризаси асосида амалга оширилади.

Электрон рақамли имзо калити сертификатининг амал қилишини тўхтатиб туриш, тиклаш ёки тугатиш тўғрисидаги ариза унинг эгаси томонидан муддати кўрсатилган ҳолда ёзма ёки электрон шаклда берилади.

Электрон рақамли имзо калити сертификатининг амал қилиши тўхтатиб турилганда, тикланганда ва тугатилганда рўйхатга олиш маркази Реестрга тегишли ёзувни киритади ҳамда бу ҳақда электрон рақамли имзо калитининг эгасини уч иш куни ичида ёзма ёки электрон шаклда хабардор қилади.

Электрон рақамли имзо калити сертификатининг амал қилиши рўйхатга олиш маркази томонидан қуйидаги ҳолларда ҳам электрон рақамли имзо калити эгасининг розилигидан қатъи назар, тугатилади:

мазкур сертификатнинг амал қилиш муддати тугаганда;

электрон рақамли имзо калитининг эгаси ушбу Қонуннинг 27-моддасида назарда тутилган мажбуриятларни бажармаганлиги фактлари аниқланганда;

электрон рақамли имзо калити сертификатининг амал қилишини тўхтатиб туриш муддати тугаганда ва уни тиклаш учун электрон рақамли имзо калити эгасининг аризаси мавжуд бўлмаганда.

Электрон рақамли имзо калитининг сертификатини рўйхатга олиш марказида сақлаш тартиби ҳамда муддати рўйхатга олиш маркази ва электрон рақамли имзо калитининг эгаси ўртасидаги шартнома билан белгиланади.

Электрон рақамли имзо калитининг сертификатини сақлаш муддати тугагач, у Реестрдан чиқарилади ва амал қилиши тугатилган сертификатлар архивига ўтказилади.

Электрон рақамли имзо калитининг эгаси қуйидаги ҳуқуқларга эга:

электрон рақамли имзо калитининг сертификатини бериш, рўйхатга олиш, унинг амал қилишини тўхтатиб туриш, тиклаш ва тугатиш тўғрисидаги ариза билан рўйхатга олиш марказига мурожаат этиш;

электрон рақамли имзо калити сертификатининг амал қилиш муддатини узайтириш ҳақида сўров юбориш.

Ушбу модда биринчи қисмининг учинчи хатбошисида назарда тутилган ҳолларда, электрон рақамли имзо калити сертификатининг амал қилиш муддатини узайтириш тўғрисидаги сўровни рўйхатга олиш марказига мазкур сертификатнинг амал қилиш муддати тугагунига қадар камида икки ҳафта олдин юбориш керак.

Электрон рақамли имзо калитининг эгаси:

электрон рақамли имзонинг ёпиқ калити хавфсизлигини таъминлаш учун барча мумкин бўлган чораларни кўриши;

электрон рақамли имзонинг калити бошқа шахслар томонидан фойдаланилаётганлиги ёки кириш режимининг бузилганлиги аниқланган тақдирда, электрон рақамли имзо калитининг сертификатини берган рўйхатга олиш марказини дарҳол хабардор қилиши;

тарқатилиши чекланган ахборотни ўз ичига олган электрон ҳужжатларга имзо қўйиш учун мўлжалланган электрон рақамли имзонинг калитидан фақат тегишли мақсадларда фойдаланиши шарт.

Агар электрон рақамли имзо калитининг эгаси юридик шахс бўлса, ушбу юридик шахснинг раҳбари электрон рақамли имзонинг ёпиқ калитидан фойдаланилиши учун масъул бўлади.

Электрон рақамли имзо калитининг эгаси бўлган юридик шахснинг раҳбари ушбу модданинг учинчи қисмида кўрсатилган мажбуриятлардан ташқари:

юридик шахс қайта ташкил этилган ёки тугатилган тақдирда бу ҳақда рўйхатга олиш марказига хабар қилиши;

ўзи билан тузилган меҳнат шартномаси тугатилганда электрон рақамли имзонинг калитини белгиланган тартибда топшириши шарт.

Юридик шахснинг янги тайинланган раҳбари юридик шахсга тегишли бўлган электрон рақамли имзонинг калитини белгиланган тартибда («булутли технологиялардан» фойдаланилганда аутентификация қилиш омилларини алмаштириш мажбурияти билан) қабул қилиб олади.

Электрон рақамли имзо калитининг эгаси қонунчиликка ва шартномага мувофиқ бошқа ҳуқуқларга эга бўлиши ҳамда унинг зиммасида бошқа мажбуриятлар ҳам бўлиши мумкин.

Ишончли учинчи тараф хизмати ахборот ва электрон ҳужжатларни алмашиш чоғида ишончни таъминлаш мақсадида электрон ҳужжатдаги электрон рақамли имзонинг унга имзо қўйган шахсга тегишлилигини текширишга доир фаолиятдир.

Ишончли учинчи тараф хизматининг вазифаларини амалга оширадиган шахс ваколатли давлат органи томонидан тайинланади ҳамда идоралараро ва трансчегаравий ахборот ҳамкорлиги жараёнида электрон ҳужжатларнинг дахлсизлиги ҳамда ишончлилигини сақлаш кафолатларини вақтнинг муайян пайтида таъминлаш бўйича ахборот воситачиси сифатида иш юритади, шунингдек уларнинг юридик кучга эга эканлигини тасдиқлайди.

Чет давлатларнинг электрон рақамли имзо калитларининг сертификатлари Ўзбекистон Республикаси ҳудудида Ўзбекистон Республикасининг халқаро шартномаларида белгиланган тартибда ёки Ишончли учинчи тараф хизмати томонидан ҳақиқийликни тасдиқлаш йўли билан тан олинади.

Ишончли учинчи тараф хизмати фаолиятининг тартиби Ўзбекистон Республикаси Вазирлар Маҳкамаси томонидан белгиланади.

Электрон рақамли имзодан фойдаланиш соҳасидаги низолар қонунчиликда белгиланган тартибда ҳал этилади.

Электрон рақамли имзо тўғрисидаги қонунчиликни бузганликда айбдор шахслар белгиланган тартибда жавобгар бўлади.

Қуйидагилар ўз кучини йўқотган деб топилсин:

1) Ўзбекистон Республикасининг 2003 йил 11 декабрда қабул қилинган «Электрон рақамли имзо тўғрисида»ги 562-II-сонли Қонуни (Ўзбекистон Республикаси Олий Мажлисининг Ахборотномаси, 2004 йил, № 1-2, 12-модда);

2) Ўзбекистон Республикаси Олий Мажлисининг 2003 йил 11 декабрда қабул қилинган «Электрон рақамли имзо тўғрисида»ги Ўзбекистон Республикаси Қонунини амалга киритиш ҳақида»ги 563-II-сонли Қарори (Ўзбекистон Республикаси Олий Мажлисининг Ахборотномаси, 2004 йил, № 1-2, 13-модда);

3) Ўзбекистон Республикасининг 2015 йил 20 августда қабул қилинган «Ўзбекистон Республикасининг айрим қонун ҳужжатларига хусусий мулкни, тадбиркорлик субъектларини ишончли ҳимоя қилишни янада кучайтиришга, уларни жадал ривожлантириш йўлидаги тўсиқларни бартараф этишга қаратилган ўзгартиш ва қўшимчалар киритиш тўғрисида»ги ЎРҚ-391-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2015 йил, № 8, 312-модда) 29-моддаси;

4) Ўзбекистон Республикасининг 2018 йил 18 апрелда қабул қилинган «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги ЎРҚ-476-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2018 йил, № 4, 224-модда) 46-моддаси;

5) Ўзбекистон Республикасининг 2021 йил 21 апрелда қабул қилинган «Ўзбекистон Республикасининг айрим қонун ҳужжатларига ўзгартишлар киритиш тўғрисида»ги ЎРҚ-683-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2021 йил, 4-сонга илова) 156-моддаси.

Ўзбекистон Республикаси Ахборот технологиялари ва коммуникацияларини ривожлантириш вазирлиги ва бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

давлат бошқаруви органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

Ушбу Қонун расмий эълон қилинган кундан эътиборан уч ой ўтгач кучга киради.