Мамлакат иқтисодиётидаги бозор ислоҳотларининг ахборот-таҳлилий таъминоти, ривожлантиришнинг макроиқтисодий, тармоқ ва минтақавий дастурларини ишлаб чиқиш бўйича ишларни янада такомиллаштириш ва мувофиқлаштириш, шунингдек, бошқаришнинг функционал тизимини шакллантириш мақсадида Вазирлар Маҳкамаси қарор қилади:

1. Вазирлар Маҳкамасининг Умумиқтисодиёт ва Ҳудудий-ташкилий бўлимлари негизида штатдаги ходимлари сони 32 нафардан иборат бўлган Ўзбекистон Республикаси Вазирлар Маҳкамасининг Ахборот-таҳлил бошқармаси ташкил этилсин.

2. Ахборот-таҳлил бошқармаси тузилмаси, штатлар жадвали ва Бошқарма тўғрисидаги низом 1, 2 ва 3-иловаларга мувофиқ тасдиқлансин.

3. Қуйидагилар Ахборот-таҳлил бошқармасининг асосий вазифалари этиб белгилансин:

бозор ислоҳотлари амалга оширилиши ва ижтимоий-иқтисодий вазият тизимли ва комплекс ўрганилишини ташкил этиш, иқтисодиётдаги сифат ўзгаришларини ривожлантириш, таркибий ва институционал ўзгаришлар тенденциясини баҳолаш;

муҳим иқтисодий ва ижтимоий муаммолар мақсадли дастурлари таҳлил қилиниши ва эксперт баҳоланишини таъминлаш ҳамда уларнинг амалга оширилишини назорат қилиш;

комплекс таҳлил қилиш ва умумлаштириш асосида макро даражада, шунингдек, тармоқ ва ҳудудлар бўйича иқтисодий ва ижтимоий ўзгаришлар аҳволини акс эттирувчи таҳлилий материалларни тайёрлаш;

Вазирлар Маҳкамаси комплекслари, департаментлари ва бўлимларининг, ижро этувчи ҳокимият маҳаллий органларининг ижтимоий-иқтисодий ислоҳотларни амалга ошириш ва мақсадли хамда тармоқлар, иқтисодиёт секторлари ва ҳудудларни ривожлантириш комплекс дастурларини ишлаб чиқиш масалаларидаги фаолиятини мувофиқлаштириш ва уларнинг изчиллик билан рўёбга чиқарилишининг амалий назорат қилинишини таъминлаш;

қисқа муддатли даврда макроиқтисодий ва ижтимоий сиёсат самарадорлигини ошириш бўйича таклифлар ҳамда ўрта муддатли ва узоқ муддатли даврларда иқтисодий ислоҳотлар стратегиясининг вариантлари бўйича таклифлар ишлаб чиқиш.

4. Ахборот-таҳлил бошқармасига қуйидаги ҳуқуқлар берилсин:

Ахборот-таҳлил бошқармаси учун белгиланган вазифалар доирасида «Ўзистиқболстат» давлат қўмитаси, Молия вазирлиги, Меҳнат вазирлиги, Ташқи иқтисодий алоқалар вазирлиги, Марказий банк ва тижорат банкларидан, бошқа вазирликлар ва идоралардан зарур статистика ва таҳлилий ахборотларни, бюджет статистикаси ва социологик сўровлар маълумотларини сўраш ва олиш;

Вазирлар Маҳкамасининг комплекслари, департаментлари ва бўлимларидан, ижро этувчи ҳокимият маҳаллий органларидан Ахборот-таҳлил бошқармасига юкланган вазифаларни амалга ошириш учун зарур бўлган барча ахборотларни олиш;

марказий иқтисодиёт идоралари ходимларини, маҳаллий ва хорижий экспертларни жалб этган ҳолда махсус социологик, бюджет текширувларини, таҳлилий ва ахборот тадқиқотлари ўтказиш бўйича вақтинчалик эксперт таҳлилий гуруҳларини тузиш;

ижтимоий-иқтисодий ҳамкорлик ва ахборот-таҳлилий тадқиқотлар халқаро лойиҳаларида қатнашиш;

«Интернет» ва «Ўзнет» ахборот тармоқларига тўғридан-тўғри уланиш ҳуқуқини олиш.

5. «Ўзистиқболстат» давлат қўмитаси ҳузуридаги Иқтисодиёт ва ишлаб чиқариш кучларини ривожлантириш илмий-тадқиқот институти Макроиқтисодий ва ижтимоий тадқиқотлар институтига айлантирилсин, унинг фаолияти республикада, тармоқларда ва минтақаларда ижтимоий-иқтисодий аҳволни таҳлил қилишга, иқтисодиётни ривожлантириш макроиқтисодий моделларининг прогноз ва муқобил вариантларини ишлаб чиқишга, барқарор иқтисодий ўсиш омилларини тадқиқ этишга, тармоқлар ва ҳудудларни ривожлантириш ижтимоий-иқтисодий дастурларини ишлаб чиқишга услубий ва методологик ёндашувларни тайёрлашга йўналтирилсин.

Макроиқтисодий ва ижтимоий тадқиқотлар институти ишлари Ахборот-таҳлил бошқармаси фаолияти билан узвий ўзаро алоқада бўлиши таъминлансин.

6. Ахборот-таҳлил бошқармаси:

Ўзбекистон Республикаси Президентининг фармонлари ва фармойишлари, Вазирлар Маҳкамасининг қарорлари ва фармойишлари, Олий Мажлис сессиялари материаллари (келишув бўйича) мажбурий равишда юбориладиган ташкилотлар рўйхатига;

«Ўзистиқболстат» давлат қўмитаси, Молия вазирлиги, Марказий банк, Давлат солиқ қўмитаси, Меҳнат вазирлиги, Ташқи иқтисодий алоқалар вазирлиги, бошқа вазирликлар ва идораларнинг статистика ахборотлари бюллетенлари мажбурий равишда юбориладиган реестрга киритилсин.

7. Ўзбекистон Республикаси Молия вазирлиги Ахборот-таҳлил бошқармасини компьютер техникаси билан жиҳозлаш, компьютер алоқаси халқаро тармоқларига улаш бўйича харажатларни тўлаш учун, хорижий ва ватанимиз даврий босма нашрларига обунани расмийлаштириш учун зарур маблағлар ажратишни назарда тутсин.

8. Ўзбекистон Республикаси Президенти Аппарати Ишлар бошқармаси бир ҳафта муддатда Ахборот-таҳлил бошқармасини жойлаштириш масаласини ҳал қилсин, бунда тегишли инфраструктура ва техника билан таъминлаш заруриятини назарда тутсин.

9. Ахборот-таҳлил бошқармаси бошлиғи мақомига кўра Бош вазир ўринбосарига, бошқарма бошлиғининг ўринбосарлари — бўлим бошлиқлари — Ўзбекистон Республикаси вазирига тенглаштирилсин.

10. Ходимларнинг лавозим маошларига юқори малакаси, чет тилларни билиши, компьютер техникасидан фойдаланган ҳолда ишлаши учун меҳнатга ҳақ тўлаш фонди доирасида махсус устамалар белгилашга рухсат берилсин.

11. Ўзбекистон Республикаси Адлия вазирлиги икки ҳафта муддатда қонунчилик ва бошқа норматив ҳужжатларга мазкур қарордан келиб чиқувчи ўзгартиришларни киритиш тўғрисида таклиф киритсин.

12. Мазкур қарорнинг бажарилишини назорат қилиш Ўзбекистон Республикаси Бош вазири Ў. Султонов зиммасига юклансин.

Штатдаги ходимлар сони 32 киши (шу жумладан, 3 нафар катта инспектор)

Ўзбекистон Республикаси Вазирлар Маҳкамасининг Ахборот-таҳлил бошқармаси (кейинги ўринларда — Бошқарма деб аталади) Вазирлар Маҳкамасининг «Ўзбекистон Республикаси Вазирлар Маҳкамасининг Ахборот-таҳлил бошқармасини ташкил этиш тўғрисида» 1997 йил 16 апрелдаги 199-сон қарорига мувофиқ ташкил этилган.

Бошқарма фаолияти мамлакат иқтисодиётидаги бозор ислоҳотларини ахборот-таҳлил таъминотини амалга оширишга, марказий иқтисодиёт идоралари ва тармоқ бошқарув органларининг ахборот-таҳлилий ва прогноз фаолиятини мувофиқлаштиришга, макроиқтисодий, тармоқ ва минтақавий ривожлантириш стратегиясини ишлаб чиқишга, қисқа муддатли даврда макроиқтисодий ва ижтимоий сиёсат самарадорлигини ошириш бўйича таклифлар ҳамда ўрта муддатли ва узоқ муддатли даврларда иқтисодий ислоҳотлар стратегиясининг вариантлари бўйича таклифлар ишлаб чиқишга йўналтирилган.

Бошқарма ўз фаолиятида Ўзбекистон Республикаси Конституциясига, қонунларига ва Олий Мажлиснинг бошқа қарорларига, Ўзбекистон Республикаси Президентининг фармонлари ва фармойишларига, Вазирлар Маҳкамасининг қарорлари ва фармойишларига, бошқа норматив ҳужжатларга ва мазкур Низомга амал қилади.

Бошқарма тузилмасига:

Бошқарма бошлиғи;

Бошқарма бошлиғининг ўринбосари — Макроиқтисодий ривожланиш таҳлили ва стратегияси бўлими бошлиғи;

Бюджет-солиқ, кредит сиёсати ва пул муомаласи шуъбаси;

Хусусийлаштириш, кичик ва ўрта тадбиркорликни ривожлантириш шуъбаси;

Аҳоли турмуш даражаси шуъбаси;

Бошқарма бошлиғининг ўринбосари — Ҳудудлар ва тармоқларни ривожлантириш дастурлари бўлими бошлиғи;

Минтақаларда иқтисодий ислоҳотларни ривожлантириш дастурлари шуъбаси;

Тармоқ ва микроиқтисодий ривожлантириш дастурлари шуъбаси;

Бошқарма бошлиғининг ёрдамчиси киради.

Қуйидагилар Бошқарманинг асосий вазифалари ҳисобланади:

бозор ислоҳотлари амалга оширилишини ва ижтимоий-иқтисодий вазият тизимли ва комплекс ўрганилишини ташкил этиш, иқтисодиётдаги сифат ўзгаришларини, ривожлантириш, таркибий ва институционал ўзгаришлар тенденцияларини баҳолаш;

макро даражада, шунингдек, тармоқлар ва ҳудудлар бўйича иқтисодий ислоҳотларнинг боришини комплекс таҳлил қилиш ва умумлаштириш;

Вазирлар Маҳкамаси комплекслари, департаментлари ва бўлимларининг, ижро этувчи ҳокимият маҳаллий органларининг иқтисодий ислоҳотларнинг боришини таҳлил қилиш ва тармоқлар, иқтисодиёт секторлари ва ҳудудларни ривожлантириш дастурларини ишлаб чиқиш масалаларидаги фаолиятини мувофиқлаштириш;

марказий иқтисодиёт идоралари ва тармоқ бошқарув органларининг ахборот-таҳлилий ва прогноз фаолиятини мувофиқлаштириш асосида макроиқтисодий аҳвол ва ижтимоий вазият мониторингини таъминлаш;

макроиқтисодий ва ижтимоий вазият, макро даражада, шунингдек, тармоқлар ва ҳудудлар бўйича иқтисодий ислоҳотларнинг бориши, хусусийлаштириш ва институционал ислоҳотларни ривожлантириш, товарлар, сармоя, меҳнат бозорини шакллантириш, фонд бозори фаолияти масалалари бўйича таҳлилий материаллар тайёрлаш;

қисқа муддатли даврда макроиқтисодий ва ижтимоий сиёсат самарадорлигини ошириш бўйича таклифлар ҳамда ўрта муддатли ва узоқ муддатли даврларда иқтисодий ислоҳотлар стратегиясининг вариантлари бўйича таклифлар ишлаб чиқиш;

вазирликлар ва идоралар томонидан тайёрланадиган муҳим иқтисодий ва ижтимоий муаммоларнинг мақсадли дастурларини эксперт баҳолаш;

аҳолини ва халқаро жамоатчиликни Ўзбекистондаги макроиқтисодий ва ижтимоий аҳвол тўғрисида таништириш учун ҳар хил мақолалар, оммавий ахборот воситалари, халқаро молия ва бошқа ташкилотлар билан биргаликда ишлаш орқали ахборот-таҳлил макони яратиш.

Бошқарма қуйидаги ҳуқуқларга эга:

Ахборот-таҳлил бошқармаси учун белгиланган вазифалар доирасида «Ўзистиқболстат» давлат қўмитаси, Молия вазирлиги, Давлат солиқ қўмитаси, Меҳнат вазирлиги, Ташқи иқтисодий алоқалар вазирлиги, Марказий банк ва тижорат банкларидан, бошқа вазирликлар ва идоралардан зарур статистика ва таҳлилий ахборотларни, бюджет статистикаси, социологик сўровлар маълумотларини сўраш ва олиш;

марказий иқтисодиёт идоралари ва тармоқ бошқарув органларининг тармоқлар ва ҳудудларини ривожлантириш комплекс дастурларини ишлаб чиқиш масалаларидаги ахборот-таҳлилий ва прогноз фаолиятларини мувофиқлаштириш;

Вазирлар Маҳкамасининг комплекслари, департаментлари ва бўлимларидан, ижро этувчи ҳокимият маҳаллий органларидан Бошқармага юкланган вазифаларни амалга ошириш учун зарур бўлган ахборотларни сўраш;

Вазирлар Маҳкамасининг комплекслари ва бўлимларининг, ижро этувчи ҳокимият маҳаллий органларининг иқтисодий ислоҳотларнинг бориши натижаларини таҳлил қилиш ва умумлаштириш, тармоқларни, иқтисодиёт секторларини ва минтақаларни иқтисодий ривожлантириш стратегиясини ишлаб чиқиш масалалари бўйича фаолиятини мувофиқлаштириш;

марказий иқтисодиёт идоралари ходимларини, маҳаллий ва хорижий экспертларни жалб этган ҳолда махсус социологик, бюджет текширувларини, таҳлилий ва ахборот тадқиқотлари ўтказиш бўйича вақтинчалик эксперт таҳлилий гуруҳларини тузиш;

ижтимоий-иқтисодий тадқиқотларга «Ўзистиқболстат» давлат қўмитаси, Давлат мулки қўмитаси, Молия вазирлиги, Меҳнат ва аҳолини ижтимоий муҳофаза қилиш вазирлиги, Марказий банк ва бошқалар ҳузуридаги илмий-тадқиқот институтлари ва марказлар ходимларини жалб қилиш;

халқаро конференциялар, конгресслар, симпозиумлар ва йиғилишлар ишида, шунингдек, ижтимоий-иқтисодий ҳамкорлик ва ахборот-таҳлилий тадқиқотлар халқаро лойиҳаларида қатнашиш;

Бошқарма ваколатига кирувчи масалалар бўйича республика вазирликлари, идоралари, бошқарув ва ҳокимият маҳаллий органлари, хорижий давлатлар тадқиқот ва статистика ташкилотлари билан мустақил равишда ёзишмалар олиб бориш;

«Интернет» ва «Ўзнет» ахборот тармоқларига уланиш.

Бошқарма:

Вазирлар Маҳкамаси раҳбарияти кўриб чиқиши учун мамлакат ижтимоий-иқтисодий ривожланиши тенденцияларини тавсифловчи таҳлилий материаллар тақдим этишга;

қисқа муддатли, ўрта муддатли ва узоқ муддатли истиқболда ижтимоий-иқтисодий ривожлантириш стратегияси вариантлари бўйича таклифлар ишлаб чиқишга;

республикани ижтимоий-иқтисодий ривожлантириш дастурларининг, шунингдек, тармоқларни, иқтисодиёт секторларини ва ҳудудларни ривожлантиришнинг мақсадли ва комплекс дастурлари амалга оширилиши устидан амалий назоратни таъминлашга;

ижтимоий-иқтисодий ислоҳотларни янада чуқурлаштиришга йўналтирилган қонунчилик ва норматив ҳужжатлар лойиҳаларини пухта ишлаб чиқишга мажбурдир.

Бошқарма ўз фаолиятини Вазирлар Маҳкамаси раҳбарияти билан келишилган ва Бошқарма бошлиғи томонидан тасдиқланадиган йиллик ва чораклик иш режалари асосида амалга оширади.

Бошқарма ўз ишини Вазирлар Маҳкамаси комплекслари, департаментлари ва бўлимлари, вазирликлар ва идоралар, иқтисодиёт идоралари институтлари ва марказлари ҳамда халқаро молия ва бошқа ташкилотлар фаолиятини мувофиқлаштириш асосида ташкил этади.

Бошқарма бошлиғи:

Бошқармага юкланган вазифаларнинг бажарилиши учун шахсан жавоб беради;

Бошқарманинг ахборот-таҳлилий фаолиятида олинган натижаларни Вазирлар Маҳкамаси раҳбариятига етказади;

Бошқарма бошлиғи ўринбосарлари — бўлим бошлиқлари ўртасида вазифаларни тақсимлайди, уларнинг бажарилишини назорат қилади;

Бошқарма ходимлари томонидан давлат ва меҳнат интизомига риоя қилинишини таъминлайди.

Бошқарма бошлиғи қуйидаги ҳуқуқларга эга:

Бошқармага юкланган вазифалар доирасида ва унинг ваколатига кирувчи унинг жорий фаолияти масалалари юзасидан мустақил равишда қарор қабул қилиш;

Бошқармага юкланган вазифалар доирасида вазирликлар, идоралар, уюшмалар, концернлар, корпорациялар, ҳудудий бошқарув органларидан тармоқларда ва минтақаларда ижтимоий-иқтисодий ислоҳотларни амалга ошириш юзасидан қабул қилинган қарорлар ўз вақтида сифатли бажарилишини талаб қилишга, шунингдек, уларнинг бажарилиши бўйича тезкор ва статистика ахборотини сўрашга ҳақлидир;

Вазирлар Маҳкамаси раҳбариятига Бошқармага ишга тавсия қилинаётган номзодлар тўғрисида ҳамда Бошқарма ходимларининг лавозим маошларига шахсий устамалар миқдорларини белгилаш ҳақида таклифлар киритиш;

Бош вазир билан келишган ҳолда Бошқарма тузилмасини ўзгартириш бўйича таклифлар киритиш;

Бошқарма ходимларининг халқаро конференциялар, семинарлар, симпозиумларда, ҳам республикада, ҳам чет элларда малака ошириш курсларида қатнашиши масаласини белгиланган тартибда ҳал қилиш;

Бошқарма томонидан ўз ваколатлари доирасида тайёрланган жўнатилувчи хат-хабарларни имзолаш.