Вазирлар Маҳкамаси қарор қилади:

1. Ўзбекистон Республикаси Халқ таълими вазирлиги ҳамда Олий ва ўрта махсус таълим вазирлиги тўғрисидаги илова қилинаётган Низомлар тасдиқлансин.

2. Ўзбекистон ССР Министрлар Советининг 1969 йил 26 июндаги 304, 305-сон қарорлари (Ўз ССР ҚТ 1969 й., 5-сон, 47-модда ва 48-модда) ва 1972 йил 2 августдаги 366-сон қарори (ЎзССР ҚТ, 1972 й., 7-сон, 4-модда) ўз кучини йўқотган деб ҳисоблансин.

1. Ўзбекистон Республикаси Халқ таълими вазирлиги халқ таълими давлат бошқарув органи ҳисобланади ва ўз фаолиятида Ўзбекистон Республикаси Вазирлар Маҳкамасига бўйсунади.

Вазирлик мактабгача тарбия, умумий, мактабдан ташқари, ҳунар-техника, ўрта, олий педагогик таълим, педагог ходимлар тайёрлаш, қайта тайёрлаш ва малакасини ошириш, педагогика фанини ривожлантириш соҳасида ягона давлат сиёсати амалга оширилишини таъминлайди.

Вазирлик идоравий бўйсуниши ва мулкчилик шаклидан қатъий назар, таълим муассасаларида таълим тўғрисидаги Ўзбекистон Республикаси қонунчилигига риоя қилиш устидан назоратни ва уларга услубий раҳбарликни амалга оширади.

2. Ўзбекистон Республикаси Халқ таълими вазирлиги, Қорақалпоғистон Республикаси Халқ таълими вазирлиги, Тошкент шаҳар халқ таълими бош бошқармаси, вилоятлар халқ таълими бошқармалари, шаҳар, туман ҳокимликлари халқ таълими бўлимлари тегишли ҳудудий даражаларда давлат таълим муассасалари тизимига ягона раҳбарликни амалга оширадилар.

Мазкур бошқарув органлари ўқув-тарбиявий ва вазирликка қарашли бошқа муассасалар, корхоналар ҳамда ташкилотлар билан биргаликда Вазирликнинг ягона тизимини ташкил этади.

Вазирлик ва халқ таълими бошқарувнинг маҳаллий органлари таълим муассасаларида давлат томонидан белгиланган талаблар ва нормативлар бажарилишини таъминлайдилар, идоравий бўйсуниши ва мулкчилик шаклидан қатъий назар, таълим муассасаларига услубий ёрдам кўрсатадилар.

3. Вазирлик ўз фаолиятида Ўзбекистон Республикаси Конституциясига, қонунларига, Ўзбекистон Республикаси Олий Мажлисининг қарорлари ва бошқа ҳужжатларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, бошқа меъёрий ҳужжатларга ҳамда ушбу Низомга амал қилади.

4. Вазирликнинг бош вазифалари қуйидагилар ҳисобланади:

умуминсоний қадриятлар, тарихий тажриба, халқнинг кўп асрлик илмий ва маданий анъаналарини, жамиятнинг келгуси тараққиётини ҳисобга олган ҳолда, республиканинг интеллектуал ва илмий имкониятини ривожлантириш, ўзининг жамият, оила ва давлат олдидаги масъулиятини англайдиган, ҳар томонлама етук, эркин шахсни шакллантириш мақсадида таълим соҳасида давлат сиёсатини амалга ошириш;

таълим стратегиясини ишлаб чиқиш, унинг ривожланиш истиқболини белгилаш ва режалаштириш, таълим тизимининг халқ хўжалигининг бошқа соҳалари билан ўзаро муносабати тартибини такомиллаштириш;

таълим мазмунини мунтазам янгилаб туриш ҳамда таълимнинг жаҳон андозаларига, аҳолининг миллий, ёш ва бошқа гуруҳлари эҳтиёжларига жавоб берадиган янги мазмуни ишлаб чиқилишини таъминлаш;

касб таълими олиш ва янги ижтимоий-иқтисодий шароитлардаги фаолиятга тайёрланиш учун ёшларнинг умумий ўрта ва базавий таълими концепциясини шакллантириш ва рўёбга чиқариш;

болалар ва ўсмирларни ижтимоий-ҳуқуқий жиҳатдан ҳимоя қилиш чора-тадбирлари комплексини ишлаб чиқиш ва амалга ошириш;

Ўзбекистон Республикаси Ҳукуматининг таълим, илмий-педагог ходимлар тайёрлаш ва улардан фойдаланишни такомиллаштириш, таълим соҳаси ходимининг жамиятдаги ижтимоий мақомини кўтаришни амалга ошириш соҳасидаги кадрлар сиёсатини рўёбга чиқариш;

ўқув-тарбия жараёни сифатига давлат баҳосини бериш, давлат тасарруфида бўлган ва давлатга қарашли бўлмаган таълим муассасаларида ишчилар ва мутахассислар тайёрлаш;

таълимнинг моддий негизни и ривожлантириш ва техника билан қайта жиҳозлаш чора-тадбирларини ишлаб чиқиш ва амалга ошириш, замонавий таълимни амалга ошириш учун зарур бўлган турли буюмлар ишлаб чиқариш ва хизматлар кўрсатиш йўналишларини белгилаш;

таълим масалаларида халқаро, давлатлараро даражаларда Ўзбекистон Республикаси манфаатларни белгиланган тартибда ифодалаш;

таълим муассасаларида, уларнинг идоравий бўйсунишидан қатъий назар, ўқув-тарбиявий ва услубий ишларни мувофиқлаштириш, вазирликлар, давлат қўмиталари ва идоралар билан биргаликда таълим сифатини ошириш, болалар ва ёшлар тарбияси бўйича тадбирларни ишлаб чиқиш.

5. Вазирлик ўзига юклатилган вазифаларига мувофиқ қуйидаги мажбуриятларни бажаради:

Ўзбекистон Республикаси Вазирлар Маҳкамасининг Истиқболни белгилаш ва статистика давлат қўмитаси, бошқа манфаатдор вазирликлар, давлат қўмиталари ва идоралар билан биргаликда таълим тизимини ва унинг муайян бўғинларини ривожлантиришнинг илмий асосланган узоқ муддатли истиқболини ишлаб чиқади;

Қорақалпоғистон Республикаси Халқ таълими вазирлиги, Тошкент шаҳар ҳокимлиги халқ таълими бош бошқармаси, вилоятлар халқ таълими бошқармалари билан биргаликда таълим тизимини ривожлантириш стратегиясини белгилайди, уларни рўёбга чиқаришда давлат ва жамоат тузилмаларининг ўзаро ҳамкорлигини таъминлайди;

Ўзбекистон Республикаси Молия вазирлиги, Қорақалпоғистон Республикаси Халқ таълими вазирлиги, вилоятлар ва Тошкент шаҳар халқ таълими бошқаруви органлари, манфаатдор вазирликлар, давлат қўмиталари ва идоралар билан биргаликда таълимни ривожлантириш, илмий хизмат кўрсатишга, шунингдек, «таълим», «уй-жой қурилиши», «фан ва илмий хизмат кўрсатиш» тармоқлари бўйича давлат бюджети маблағлари ҳажмига оид таклифларни ишлаб чиқади, Ўзбекистон Республикаси Фан ва техника давлат қўмитаси билан биргаликда Вазирлик тизимидаги илмий муассасалар ва педагогика олий ўқув юртларида илмий тадқиқотлар олиб бориш мавзуларини ва улар учун ажратиладиган давлат маблағлари ҳажмини белгилайди;

шартнома муносабатлари негизида таълимни маблағ билан таъминлашнинг қўшимча манбаларини шакллантиради, вазирликнинг ва таълим бошқаруви бошқа органларининг марказлаштирилган жамғармалари ҳам шу жумлага киради;

Ўзбекистон Республикасида таълим тизимини ҳимоя қилиш ва ривожлантиришнинг ҳуқуқий асосини яратувчи қонунчилик ҳужжатлари ва Ҳукумат қарорларининг лойиҳаларини тайёрлайди;

вазирликка қарашли бўлган ташкилотлар, муассасалар ва корхоналар фаолиятининг меъёрий негизини ишлаб чиқади ва такомиллаштиради;

таълим муассасаларида ўқув-тарбия жараёнига илмий-услубий раҳбарликни амалга оширади;

таълим ва тарбия тизимининг ҳар бир бўғини учун, шу жумладан, давлат ихтиёрида бўлмаган таълим муассасалари учун таълим мазмуни ва сифатига қўйиладиган асосий талабларни белгилайди;

умумий таълим, фундаментал, ижтимоий ва умумий касбий фанларни ўқитишнинг ўқув режалари ва дастурларини ишлаб чиқади ҳамда тасдиқлайди, ўқув-услубий ҳужжатларни тасдиқлаш ва чиқариш тартибини белгилайди;

таълим ва илмий-тадқиқот муассасалари, ўқув-услубий марказлар ва кабинетлар, педагогика олий ўқув юртлари педагогик жамоаларининг ўқув-услубий материаллар ва дарсликларнинг тезлик билан ишлаб чиқилишига, барча турдаги таълим муассасаларида ўқув-тарбия жараёнини ташкил қилишга янги истиқболли ёндашишларни ишлаб чиқишга, илмий-педагог ходимлар тайёрлаш, қайта тайёрлаш ва уларнинг малакасини ошириш муаммоларини ҳал қилишга кенг жалб этилишини таъминлайди;

педагог ходимларга таълим бериш, уларни тайёрлаш, қайта тайёрлаш ва малакасини оширишнинг оқилона муддатларини белгиланган тартибда белгилайди. Манфаатдор вазирликлар, давлат қўмиталари, идоралар билан биргаликда халқ хўжалиги соҳаларининг малакали ишчилар ва мутахассисларга бўлган эҳтиёжини аниқлайди, уларни тайёрлайди ва қайта тайёрлайди;

таълим муассасаларида умумтаълим, фундаментал, умумихтисос, ижтимоий фанларни ўқитишнинг қўйилишига, меҳнат, ахлоқий, ҳуқуқий, иқтисодий, экологик ва жисмоний тарбия берилишига, касбга йўналтиришнинг ташкил этилишига ўқув-услубий раҳбарликни амалга оширади;

таълим соҳасидаги илмий тадқиқотлар давлат дастурларини тузади ва Ўзбекистон Республикаси Фан ва техника давлат қўмитасига тақдим этади, педагогика олий ўқув юртларида, Вазирлик тизимидаги бошқа ўқув-тарбиявий ва илмий-тадқиқот муассасаларида уларни амалга оширишга қўйиладиган асосий талабларни аниқлайди;

Вазирликка қарашли педагогика олий, ўрта махсус ўқув юртларида ҳамда ҳунар-техника билим юртларида ихтисосликлар ва касблар бўйича кадрлар тайёрлашни бошлайди ёки тўхтатади;

Ўзбекистон Республикаси Вазирлар Маҳкамаси, маҳаллий ҳокимият органлари, вазирликлар, давлат қўмиталари ва идоралар билан келишган ҳолда ўрта педагогика ва ҳунар-техника ўқув юртларини ташкил қилади ва тугатади;

республика Вазирлар Маҳкамаси томонидан тасдиқланган низомларга биноан давлат ихтиёрида бўлмаган таълим муассасалари ва педагогика ўқув юртларига лицензия беради, аттестация ва аккредитациядан ўтказади, давлат тасарруфида бўлганларини эса аттестациядан ўтказади;

таълим ўқув юртлари фаолиятида давлат андозаларини белгилаш юзасидан илмий асосланган тавсияларни ишлаб чиқади;

ўқитишнинг замонавий техник воситаларини ўқув жараёнига жорий қилиш бўйича тадбирларни ишлаб чиқади ва уларни рўёбга чиқаради, бу ишларга ўқув-услубий раҳбарликни амалга оширади;

Ўзбекистон Республикаси Вазирлар Маҳкамаси ҳамда Олий ва ўрта махсус таълим вазирлиги билан келишган ҳолда олий ва ўрта педагогика ўқув юртларига қабул қилиш қоидаларини, талабалар ва ўқувчиларнинг педагогика амалиёти, давлат имтиҳон комиссиялари ҳақидаги низомларни ишлаб чиқади ва тасдиқлайди;

умумтаълим муассасаларига (умумтаълим мактаблари, ҳунар-техника билим юртлари), уларнинг идоравий бўйсунишидан қатъи назар, қабул қилиш қоидаларини ишлаб чиқади ва тасдиқлайди;

Вазирлик нашрлари орқали таълим соҳаси бўйича илмий-техник ва педагогик ахборотларни ёяди; манфаатдор, вазирликлар, давлат қўмиталари, идоралар билан биргаликда илғор педагогик тажрибаларнинг оммалаштирилиши ва жорий қилинишини таъминлайди ҳамда илмий-услубий журналлар, газеталар, Вазирлик бўйича буйруқлар, йўриқномалар тўпламларини нашр этади;

маҳаллий ҳокимият органлари билан биргаликда аҳолининг мактабгача тарбияга бўлган эҳтиёжини қондириш, мактабгача ёшдаги болаларнинг тўлақонли жисмоний ва ақлий ривожланиши учун шароит яратиш тадбирларини амалга оширади ҳамда болалар ва ўсмирларга мўлжалланган мактабдан ташқари ва ўқув-тарбия муассасаларининг моддий-техник негизини мустаҳкамлайди ва уларнинг тармоғини ривожлантиради, ўсиб келаётган авлоднинг ижодиёти ва соғлом дам олиши, унинг қизиқишлари ва эҳтиёжлари қондирилишини, қобилият ва истеъдодлари ҳар томонлама ривожланишини таъминловчи муассасалар комплексини яратади;

давлат таълим муассасалари ва давлатга қарашли бўлмаган таълим муассасаларида етим ва ота-она ғамҳўрлигисиз қолган болаларни тўла давлат таъминоти асосида боқиш, ўқитиш, тарбиялаш ва касбга тайёрлаш учун шарт-шароитлар яратади;

маҳаллий ҳокимият органлари билан биргаликда жисмоний ва ақлий ривожланишда нуқсони бўлган болаларни ўқитиш, тарбиялаш ва уларни боқишни, касбга тайёрлашни, уларнинг ижтимоий-маиший ва моддий таъминотини, уларга тиббий хизмат кўрсатишни ва уларни соғломлаштиришни такомиллаштиради, ихтисослаштирилган мактабгача тарбия муассасалари, мактаблар ва мактаб-интернатлар тармоғини ривожлантиради;

Ўзбекистон Республикаси Фан ва техника давлат қўмитаси билан келишган ҳолда педагогика олий ўқув юртлари, илмий-тадқиқот институтлари, Халқ таълими ходимлари малакасини ошириш марказий институти ҳузурида аспирантура ва докторантура очишга рухсат беради ва ҳамда у иш қониқарсиз ташкил этилган бўлинмаларда аспирантлар ва докторантлар тайёрлашни тўхтатади;

Ўзбекистон Республикаси Олий аттестация комиссиясига фан доктори ва номзоди илмий даражаларини олиш учун диссертацияларни ҳимоя қилиш бўйича ихтисослаштирилган кенгашларнинг раислари ва шахсий таркибини, тегишли кенгашларга диссертацияларни ҳимояга қабул қилиш, илмий даражалар ва илмий унвонлар бериш ҳуқуқини берувчи ихтисосликлар рўйхатини келишиш ва тасдиқлаш учун тақдим этади;

Вазирлик қуйидагиларни ишлаб чиқади ва тақдим этади: Ўзбекистон Республикаси Фан ва техника давлат қўмитасига — аспирантура ва докторантура орқали илмий-педагог ходимлар тайёрлаш режасини; Ўзбекистон Республикаси Вазирлар Маҳкамасининг истиқболни белгилаш ва статистика давлат қўмитасига — педагогика олий ўқув юртлари ва педагогика билим юртларида педагог ходимлар тайёрлаш ва уларнинг малакасини ошириш режаларини;

педагог ходимларнинг малакасини ошириш факультетлари ташкил этиладиган педагогика олий ўқув юртлари рўйхатини тасдиқлайди;

педагогика институти ректори лавозимига тайинлаш учун номзодларни белгиланган тартибга мувофиқ республика Ҳукуматига тақдим этади, лавозимлар номенклатурасига биноан республика органлари, муассасалари ва ўқув юртлари раҳбарларини тайинлайди;

ўзига қарашли олий ва ўрта педагогика ўқув юртлари уставларини рўйхатга олади, Вазирлик тизимидаги корхоналар, ташкилотлар ва муассасалар тўғрисидаги низомларни тасдиқлайди;

таълим масалалари бўйича жамоатчилик фикрини ўрганишни ташкил этади, республикада таълимнинг аҳволини қиёсий таҳлил қилади, унинг ривожланиш тенденциясини белгилайди;

ўқув юртларининг моддий негизини мустаҳкамлаш ва техника билан қайта жиҳозлаш, моддий-техника ресурсларидан самарали фойдаланиш соҳасида ягона сиёсатни амалга оширади; таълим объектлари қуриш ва уларни қайта қуришнинг комплекс дастурлари ишлаб чиқилиши ва амалга оширилишини ташкил этади;

ўзига қарашли ўқув юртларида қурилиш бўйича асосий буюртмачи вазифасини бажаради; ўқув юртлари қурилиши лойиҳалари ва сметалари экспертизасини амалга оширади; пудрат ва хўжалик усулида бажариладиган асосли тузатиш ишлари ҳажмини режалаштиради;

бевосита Вазирликка бўйсунувчи муассасалар, ташкилотлар, корхоналарнинг молия-хўжалик фаолиятига раҳбарликни амалга оширади;

республика Соғлиқни сақлаш вазирлиги билан биргаликда болалар ва ўқувчи ёшлар саломатлигини мустаҳкамлаш ва муҳофаза қилишни таъминловчи шартларга риоя этилиши тадбирларининг бажарилиши устидан назоратни амалга оширади;

республиканинг манфаатдор вазирликлари, давлат қўмиталари, идоралари, концернлари, уюшмалари билан биргаликда ўқувчилар, талабалар спорт мусобақаларини, сайёҳлар слётларини, техник ижодиёт кўрикларини, мактаб олимпиадаларини, педагог ходимлар ўртасида спорт мусобақаларини, ёш талантларни аниқлаш, ўстириш ва шахсни камол топтиришга йўналтирилган ўқув- тарбия тусидаги бошқа тадбирларни ташкил этади ҳамда ўтказади;

таълимнинг муҳим масалалари бўйича кенгашлар, семинарлар ва конференцияларни белгиланган тартибда чақиради;

таълим ходимлари республика съездларининг ўтказилишини белгиланган тартибда ташкил этади;

меҳнат ва ўқишдаги юқори кўрсаткичлари, ўқувчи ёшларни ўқитиш, тарбиялаш ва ҳомийлик қилишда фаол иштирок этганликлари учун Вазирлик тизимидаги педагог ходимларни, ўқувчилар ва талабаларни, вазирликлар, давлат қўмиталари, идораларнинг ходимларини белгиланган тартибда Ҳукумат мукофотларига тақдим этади ҳамда тармоқ мукофотлари билан тақдирлайди;

фуқароларнинг таклиф, ариза, шикоятлари ўз вақтида кўриб чиқилишини ташкил этади; фуқароларнинг хатларида маълум қилинган таълим тўғрисидаги қонунчиликни бузиш ҳолларини бартараф этиш бўйича чора-тадбирлар кўради;

6. Вазирликка олдида турган вазифаларни ҳал этиш, зиммасига юклатилган мажбуриятларни бажариш учун қуйидаги ҳуқуқлар берилади:

мулкчилик шакли ва кимга бўйсунишидан қатъий назар, таълим органлари ва муассасалари томонидан «Таълим тўғрисида»ги Ўзбекистон Республикаси Қонуни ва республика Ҳукуматининг таълим масалалари бўйича қарорларининг бажарилиши устидан назоратни амалга ошириш;

таълимнинг айрим масалаларини ҳал этиш, таълим муассасалари ишини такомиллаштириш, уларнинг ўқув-моддий негизини мустаҳкамлаш, малакали педагог ходимлар тайёрлаш, давлат таълим муассасалари ходимлари, ўқувчилар ва талабаларнинг белгиланган ижтимоий муҳофазасини таъминлаш бўйича таклифларни кўриб чиқиш учун республика Ҳукуматига киритиш;

таълим тизимини ва унинг муайян бўғинларини ривожлантиришнинг долзарб ва истиқболли муаммоларини ишлаб чиқиш учун муваққат илмий жамоалар ташкил этиш;

Вазирликка юклатилган вазифаларни бажариш учун Ўзбекистон Республикаси Вазирлар Маҳкамасининг Истиқболни белгилаш ва статистика давлат қўмитасидан, жойлардаги таълим бошқарув идораларидан статистика, режа ва ҳисобот маълумотларини олиш;

Қорақалпоғистон Республикаси Халқ таълими вазирлиги, вилоят, туман ва шаҳар халқ таълими бўлими органларининг «Таълим тўғрисида»ги Қонунга зид бўлган буйруқ ва кўрсатмаларининг амал қилишини тўхтатиш зарур ҳолларда уларни бекор қилиш ҳақида тегишли ҳокимликка ёки Вазирлар Маҳкамасига таклиф киритиш;

ўзига қарашли муассасаларнинг қабул қилинган меҳнат тўғрисидаги қонунларга хилоф равишда ходимларни жазолаш ва ишдан бўшатиш ҳақидаги буйруқларини бекор қилиш;

ҳайъат мажлисларида таълим бошқарув органлари, таълим муассасалари раҳбарларининг Вазирлик ваколатига кирувчи масалалар бўйича ҳисоботларини эшитиш;

халқ таълими ва фан ходимлари касаба уюшмалари Марказий Қўмитаси, Меҳнат вазирлиги билан биргаликда республика Ҳукуматининг қарорлари билан назарда тутилган имтиёз ва компенсацияларнинг Вазирлик тизимида тўғри қўлланиши устидан назоратни амалга ошириш;

Ўзбекистон Республикаси қонун ҳужжатларида белгиланган тартибда ташқи иқтисодий фаолиятни амалга ошириш, банк ва бошқа кредит муассасаларида валюта счётларига эга бўлиш;

таълим масалалари бўйича қонунларнинг амалда қўлланилишини умумлаштириш, уни такомиллаштириш бўйича таклифлар ишлаб чиқиш ва уларни белгиланган тартибда республика Ҳукуматига киритиш, ўз ваколати доирасида амалдаги қонунларнинг қўлланилиши бўйича тушунтиришлар бериш ҳамда таълим тизимида ҳуқуқий ишларни такомиллаштириш чора-тадбирларини амалга ошириш;

ўз аппаратининг мансабдор шахсларини, ўзининг ва бошқа тизимларнинг ёрдам беришга жалб қилинадиган ходимларини Вазирлик ваколатига тегишли бўлган масалалар бўйича материаллар билан танишиш учун таълим бошқарув органларига, ўқув таълим муассасаларига, ташкилотлар ва корхоналарга юбориш;

ўқув дастурлари, дарсликлар, ўқув қўлланмалари ва услубий материаллар ҳақида хулосалар тайёрлаш, илғор тажриба ва педагогика фани ютуқларидан фойдаланиш бўйича тавсиялар ишлаб чиқиш учун Вазирликда Илмий-услубий кенгаш тузиш; Илмий-услубий кенгашнинг таркиби ва у ҳақдаги Низом Ўзбекистон Республикаси Халқ таълими вазирлиги томонидан тасдиқланади.

7. Ўзбекистон Республикаси Халқ таълими вазирлигига Ўзбекистон Республикаси Конституциясига мувофиқ лавозимга тайинланадиган Вазир бошчилик қилади.

8. Вазир:

Вазирликка юклатилган вазифаларнинг бажарилиши учун шахсан жавоб беради, Вазирлик фаолиятининг алоҳида соҳаларига, халқ таълими органларига ва Вазирлик тизимидаги таълим ўқув юртлари, муассасалар, ташкилотлар ва корхоналарга раҳбарлик қилиш учун вазир ўринбосарларининг, Вазирлик марказий аппарати бўлинмалари раҳбарларининг жавобгарлиги даражасини белгилайди;

Ўзбекистон Республикасининг амалдаги қонун ҳужжатлари асосида ва уларни бажариш юзасидан буйруқлар, йўриқномалар чиқаради ҳамда Вазирлик тизимида бажарилиши мажбурий бўлган кўрсатмалар беради ва уларнинг ижросини текширади. Унинг ваколатига кирувчи масалалар бўйича буйруқлари ва йўриқномалари халқ таълимининг барча бошқарув органлари, республиканинг таълим муассасалари ҳамда тасарруфида таълим муассасалари бўлган вазирликлар, давлат қўмиталари ва идораларнинг бажариши учун мажбурийдир;

зарур бўлган ҳолда бошқа вазирликлар, давлат қўмиталари ва идораларнинг раҳбарлари билан биргаликда қўшма буйруқлар чиқаради.

9. Вазир ўринбосарлари Ўзбекистон Республикаси Халқ таълими вазирининг тақдимномаси бўйича Ўзбекистон Республикаси Вазирлар Маҳкамаси томонидан тайинланди.

10. Вазирлик ўз ишини яккабошчилик ва коллегиаллик асосида ташкил қилади.

11. Вазирликда ҳайъат ташкил қилинади, унинг шахсий таркиби Вазирлар Маҳкамаси томонидан тасдиқланади.

12. Ҳайъатнинг тегишли ҳужжатлари қарорлар ҳамда Вазирнинг буйруқлари билан ҳаётга жорий қилинади Вазир билан ҳайъат аъзолари ўртасида келишмовчилик келиб чиққан тақдирда Вазир юзага келган келишмовчилик ҳақида Вазирлар Маҳкамасини хабардор қилган ҳолда ўз қарорини ҳаётга жорий қилади. Ҳайъат аъзоларига ҳам ўз фикрларини Вазирлар Маҳкамасига маълум қилиш ҳуқуқи берилади.

13. Вазирлик марказий аппарати тузилмаси, ходимлари сони ва меҳнатга ҳақ тўлаш фонди Ўзбекистон Республикаси Вазирлар Маҳкамаси томонидан тасдиқланади ва белгиланади.

Ўзбекистон Республикаси Халқ таълими вазири ходимларнинг белгиланган сони ва меҳнатга ҳақ тўлаш фонди доирасида тузилмага ўзгартириш киритиш ва Вазирлик марказий аппаратининг штат жадвалини тасдиқлаш ҳуқуқига эгадир.

14. Вазирлик юридик шахс ҳисобланади, Ўзбекистон Республикаси Давлат герби тасвирланган ва ўз номи ўзбек ва рус тилларида ёзилган муҳрга, Ўзбекистон Республикаси Марказий банкининг тегишли бўлинмаларида бюджет ва ҳисоб-китоб счётларига эга бўлади.

1. Ўзбекистон Республикаси Олий ва ўрта махсус таълим вазирлиги (кейинги ўринларда — Вазирлик) республикада олий ўрта махсус таълимга раҳбарлик қилувчи давлат бошқарув органи ҳисобланади, ўз фаолиятида Ўзбекистон Республикаси Вазирлар Маҳкамасига бўйсунади.

2. Вазирлик Ўзбекистон Республикасида олий ва ўрта махсус таълим соҳасидаги ягона давлат сиёсатини изчиллик билан амалга оширади, жаҳон андозалари даражасида мутахассислар тайёрлаш мақсадида олий ва ўрта махсус ўқув юртларида давлат томонидан белгиланган талаблар ҳамда нормативларнинг бажарилишини таъминлайди. Идоравий бўйсуниши ва мулкчилик шаклидан қатъий назар, олий ва ўрта махсус ўқув юртларига ўқув-услубий раҳбарликни амалга оширади ҳамда улар томонидан Ўзбекистон Республикасининг таълим тўғрисидаги қонунчилигига риоя этилишини назорат қилади.

Вазирликнинг ягона тизимини ташкил этадиган, бевосита ўзига бўйсунадиган олий ва ўрта махсус ўқув юртларига, корхоналар, ташкилотлар ҳамда муассасаларга раҳбарлик қилади.

3. Вазирлик ўз фаолиятида Ўзбекистон Республикаси Конституциясига, қонунларига ва Олий Мажлиснинг бошқа қарорларига, Ўзбекистон Республикаси Президентининг фармонлари, қарорлари ҳамда фармойишларига, Вазирлар Маҳкамасининг қарорлари ва фармойишларига ҳамда мазкур Низомга амал қилади.

4. Вазирликнинг бош вазифалари:

республикада олий ва ўрта махсус таълим соҳасида ягона давлат сиёсатини амалга ошириш;

ҳозирги ижтимоий-иқтисодий вазиятни ҳисобга олган ҳолда республикада олий ва ўрта махсус таълимни ривожлантириш концепциясини ишлаб чиқиш ва амалга ошириш;

республика олий ва ўрта махсус ўқув юртларида халқаро талабларга мос келадиган, назарий ва касбий лаёқатлиликни жаҳон маданияти қадриятлари ва миллий анъаналарга асосланган юксак ахлоқий фазилатлар билан чоғиштирган, илмий-техникавий, ижтимоий ва маданий тараққиёт вазифаларини ташаббус ҳамда масъулият билан ҳал эта оладиган мутахассисларни тайёрлайди;

олий ва ўрта махсус маълумотли мутахассислар тайёрлашга, олий ва ўрта махсус ўқув юртлари илмий-педагог ходимлари малакасини ошириш ва қайта тайёрлашга илмий-услубий раҳбарлик қилиш шунингдек, республика халқ хўжалигида ишлаётган мутахассисларнинг малакасини ошириш ва қайта тайёрлашга умумий услубий раҳбарликни амалга ошириш;

жамиятнинг умумий ҳамда касб маданияти жаҳон даражасига мувофиқлигини таъминлаш мақсадида олий ва ўрта таълим тизимини ривожлантириш;

олий мактабда илмий-тадқиқот ишларини, республика олий ва ўрта махсус ўқув юртларида ёшларнинг илмий-техника ижодиётини ривожлантириш ҳамда самарадорлигини ошириш. Юқори малакали илмий ходимлар тайёрлаш;

иқтидорли ёшларни излаб топиш ва тарбиялаш;

вазирлик тизимидаги олий ва ўрта махсус ўқув юртлари, корхоналар, ташкилотлар ва муассасаларнинг моддий-техника негизини мустаҳкамлаш ва ривожлантириш;

вазирлик тизимидаги олий ва ўрта махсус ўқув юртлари талабалари, ўқувчилар, аспирантлари, илмий-педагог ходимларининг, корхоналар, ташкилотлар ва муассасалар ишчи ва хизматчиларининг уй-жой, маданий-маиший шароитларини ва уларни ижтимоий ҳимоя қилиш чораларини яхшилаш, уларга хавф-хатарсиз меҳнат шароитларини таъминлаш.

5. Вазирлик бош вазифаларга мувофиқ қуйидаги функцияларни амалга оширади:

республикада олий ва ўрта махсус таълимни ривожлантиришнинг асосий йўналишларини белгилаш бўйича илмий асосланган тавсияларни ишлаб чиқади;

Ўзбекистон Республикаси Вазирлар Маҳкамасининг Истиқболни белгилаш ва статистика давлат қўмитаси ҳамда Ўзбекистон Республикаси Меҳнат вазирлиги билан биргаликда республика халқ хўжалиги эҳтиёжларидан келиб чиқиб, мутахассислар тайёрлаш ҳамда олий ва ўрта махсус ўқув юртларини тугатган мутахассисларни ишга жойлаштиришнинг республикада олий ва ўрта махсус ўқув юртларини оқилона жойлаштиришнинг истиқболдаги ва жорий режаларини ишлаб чиқади;

олий ва ўрта махсус ўқув юртлари учун барча ихтисосликлар ва фанлар бўйича ўқув режалари ва дастурларини, шунингдек, ўқув юртларида улар бўйича мутахассислар тайёрлаш амалга оширилиши керак бўлган янги ихтисосликлар рўйхатини ишлаб чиқади ва тасдиқлайди;

ўзига бўйсунувчи олий ва ўрта махсус ўқув юртларининг уставларини рўйхатга олади ва вазирлик тизимидаги корхона ҳамда муассасалар тўғрисидаги низомларни тасдиқлайди; аккредитация қилинган давлатга қарашли бўлмаган ўқув юртларининг ҳисобини олиб боради;

Ҳукумат томонидан тасдиқланган Низомга биноан олий ва ўрта махсус ўқув юртларини, идоравий бўйсунишидан ва мулкчилик шаклидан қатъий назар, аттестациядан ва рўйхатдан ўтказади. Аттестация асосида таълим муассасаларига муайян мақом беради (коллеж, университет ва ҳоказо);

давлат таълим андозаларининг таркибий қисмлари ва мундарижасини белгилаш бўйича илмий асосланган тавсияларни ишлаб чиқади;

олий ва ўрта махсус ўқув юртлари педагог ходимларининг маълумот цензига қўйиладиган талабларни ишлаб чиқади;

мутахассислар тайёрлаш сифатини яхшилаш чора-тадбирларини ишлаб чиқади ва амалга оширади. Ҳукумат томонидан тасдиқланган Низомга мувофиқ республикада икки босқичли олий таълим тизимини жорий этади;

олий ва ўрта махсус ўқув юртларида ижтимоий фанларни ўқитишга ўқув-услубий раҳбарликни амалга оширади ва тарбиявий ишлар кўламини мувофиқлаштиради;

олий ўқув юртларига талабаларни танлаб олиш республика маркази билан биргаликда, республика Вазирлар Маҳкамаси билан келишган ҳолда холислик ва ижтимоий адолатни таъминловчи олий ва ўрта махсус ўқув юртларига қабул қилиш қоидаларини ишлаб чиқади ва тасдиқлайди, шунингдек, тест синовлари натижаларига кўра абитуриентларни олий ўқув юртларига қабул қилиш бўйича давлат комиссияси ишида қатнашади;

республика олий ва ўрта махсус ўқув юртлари учун дарсликлар, ўқув қўлланмалари ҳамда бошқа ўқув-услубий адабиётларни тайёрлаш, таржима қилиш ва нашр этишни ташкил этади; Ўзбекистон Республикаси Давлат матбуот қўмитаси билан биргаликда давлат тилида ҳамда бошқа тилларда ўқитиш бўйича дарсликлар ва ўқув қўлланмаларини нашр этиш ҳамда кўпайтиришнинг йиллик ва истиқбол режаларини ишлаб чиқади, уларни белгиланган тартибда тасдиқлаш учун тақдим этади;

ўқув жараёнига ўқитишнинг замонавий техник воситаларини (компьютер, аудиовизуал техникаси ва бошқа воситалар) жорий этиш бўйича тадбирлар ишлаб чиқади ва амалга оширади, бу ишга ўқув-услубий раҳбарликни амалга оширади, Ўзбекистон Давлат телевидение ва радиоэшиттириш компанияси билан биргаликда олий ўқув юртлари талабалари ва ўрта Махсус ўқув юртлари ўқувчилари учун радио, телевидениеда ўқув машғулотлари эшиттиришларини ташкил қилади;

республиканинг олий ва ўрта махсус ўқув юртларида ҳарбий ва жисмоний тайёргарликнинг ўқув-услубий раҳбарлигини белгиланган тартибда амалга оширади; Ўзбекистон Касаба уюшмалари Федерацияси Кенгаши ҳамда манфаатдор вазирликлар ва идоралар билан биргаликда Вазирлик тизими ўқув юртларида спорт-соғломлаштириш лагерлари, профилакторийлар ва бошқа соғломлаштириш муассасаларини ташкил қилиш тадбирларини ишлаб чиқади;

Вазирлик олий ўқув юртлари ҳузуридаги докторантура ҳамда аспирантура орқали илмий ва илмий-педагог ходимлар тайёрлаш режасини ишлаб чиқади ва Ўзбекистон Республикаси Фан ва техника давлат қўмитасига тақдим этади;

Вазирликнинг олий ва ўрта махсус ўқув юртлари ўқитувчиларининг малакасини ошириш режаларини тузади ва уни ташкил этади;

идоравий бўйсунишидан ва мулкчилик шаклидан қатъий назар, олий ўқув юртлари ҳузуридаги докторантура ҳамда аспирантурани очишни ва тугатишни, уларнинг фаолиятига илмий-услубий раҳбарликни ва назоратни амалга оширади. Ўзбекистон Республикаси Фан ва техника давлат қўмитаси, Фанлар академияси ҳамда ОАК билан биргаликда аспирантура ва докторантура ҳақида Низом ишлаб чиқади;

етакчи олий ўқув юртлари ҳузурида фан доктори ҳамда фан номзоди илмий даражаларини ҳимоя қилиш бўйича ихтисослаштирилган кенгашлар тузиш ҳақидаги тақдимномаларни кўриб чиқади ва Ўзбекистон Республикаси ОАКга тақдим этади ҳамда уларнинг фаолиятини мувофиқлаштиради;

Вазирлик тизимидаги олий ва ўрта махсус ўқув юртларининг илмий-тадқиқот, тажриба-конструкторлик ишларини мувофиқлаштиради ва уларга раҳбарлик қилади, илмий ишларни режалаштиришни такомиллаштириш ҳамда уларнинг самарадорлигини ошириш тадбирларини амалга оширади; Вазирлик олий ўқув юртларида муҳим илмий-тадқиқот ишларининг, давлат бюджети ҳисобидан фундаментал илмий-тадқиқотлар ўтказиш ва илмий-педагог ходимлар тайёрлашни маблағ билан таъминлашнинг давлат йиллик ва истиқбол режалари лойиҳаларини ишлаб чиқади;

Ўзбекистон Республикаси Фан ва техника давлат қўмитаси билан биргаликда олий ўқув юртлари профессор-ўқитувчилари таркибини амалий фанлар соҳасида илмий-тадқиқотлар ўтказишга жалб қилишни таъминлайди, манфаатдор вазирликлар ҳамда идоралар билан биргаликда тадқиқотлар натижаларидан халқ хўжалигида фойдаланиш бўйича тадбирлар ишлаб чиқади ва амалга оширади;

давлат бюджети тематикаси бўйича илмий-тадқиқот ишларини ўтказишга ажратилган маблағлар олий ўқув юртлари томонидан фойдаланишини назорат қилади, шунингдек, Вазирлик олий ўқув юртларининг илмий-тадқиқот ишлари ўтказиш ва илмий-педагог ходимлар тайёрлаш бўйича йил чораги ҳамда йиллик ҳисоботларини кўриб чиқади;

республикада олий ва ўрта махсус таълим муаммолари, олий ўқув юртларида бажарилган илмий тадқиқотлар натижалари бўйича илмий, илмий-техника ахборотини ташкил қилади; ўқув, илмий ва илмий-техник адабиётларни белгиланган тартибда тайёрлашни ва нашр этишни таъминлайди, патент-лицензия ишига раҳбарлик қилади;

олий ва ўрта махсус ўқув юртлари педагог ходимларини ишга шартнома усулида қабул қилишни қўллаш ва такомиллаштириш бўйича услубий тавсияларни ишлаб чиқади ва уларнинг амалга оширилишини назорат қилади;

Ўзбекистон Республикасида олий ва ўрта махсус таълимни ривожлантириш муаммолари бўйича белгиланган тартибда кенгашлар, илмий ва илмий-услубий конференциялар ўтказади ва кўргазмалар ташкил этади;

Фан ва техника давлат қўмитаси билан биргаликда муаммоли лабораторияларни, манфаатдор вазирликлар ва муассасалар билан келишган ҳолда — Вазирлик тизимидаги олий ўқув юртларидаги тармоқ илмий-тадқиқот лабораторияларини очади ва тугатади;

олий ўқув юрти ректори лавозимига тайинлаш учун белгиланган тартибда Вазирлар Маҳкамасига номзодларни тақдим этади, Вазирлик олий ўқув юртларининг проректорларини тайинлайди ҳамда деканларнинг тайинланишига розилик беради. Вазирлик тизимидаги ўрта махсус ўқув юртларининг директорларини, корхоналар, ташкилотлар ва муассасаларнинг раҳбарларини тайинлайди;

Вазирлик тизимидаги олий ва ўрта махсус ўқув юртлари илмий-педагог ходимлари ҳисобини олиб боради;

зарур маълумотларни умумлаштиради ва белгиланган тартибда Ўзбекистон Республикаси Вазирлар Маҳкамасининг Истиқболни белгилаш ва статистика давлат қўмитасига юборади;

объектлар қурилишига ажратилган сармоя маблағларидан самарали фойдаланишни таъминлайди; ўқув-лаборатория базасини мустаҳкамлаш, ётоқхоналар, ижтимоий ва маданий-маиший объектлар қурилиши комплекс дастурини ишлаб чиқади ва амалга оширади; ўқув юртлари томонидан ўқув ва илмий жиҳозлардан самарали фойдаланилишини назорат қилади;

Вазирлик тизимидаги ўқув юртларининг моддий-техника таъминотини ташкил қилади ва мувофиқлаштиради;

олий ва ўрта махсус ўқув юртларини маблағ билан таъминлаш давлат меъёрларини белгилаш, шунингдек, ўқув жараёнини моддий-техника жиҳатдан таъминлаш ва жиҳозлаш бўйича таклифлар ишлаб чиқади;

мутахассислар тайёрлаш бўйича шартномалар ҳисоботини олиб боради ҳамда маблағларнинг келиб тушишини ва харажатларни назорат қилади;

Вазирлик тизимидаги давлат бюджети таъминотида бўлган олий ва ўрта махсус ўқув юртлари ҳамда муассасаларнинг харажатлар сметасини ишлаб чиқади ва уларни белгиланган тартибда маблағ билан таъминлайди;

ўзига бўйсунадиган ташкилотлар ва хўжалик ҳисобидаги корхоналарнинг ишлаб-чиқариш ва молиявий фаолиятини бошқаради;

Вазирликка бўйсунадиган олий ва ўрта махсус ўқув юртлари, ташкилотлар ва муассасаларнинг хўжалик ҳамда молиявий фаолияти устидан назоратни амалга оширади;

талабалар ва ўқувчиларнинг ўзлаштиришлари ҳамда жамоат ишларидаги фаолликларини ҳисобга олган ҳолда уларни моддий ва маънавий рағбатлантириш чораларини кўради;

Ўзбекистон Республикаси Марказий банки муассасаларида ва бошқа банкларда марказлаштирилган тартибда Вазирликка ажратиладиган маблағларни тақсимлаш ва қайта тақсимлаш учун ҳисоб-китоб, жорий счётлар ва бошқа счётлар очади;

Вазирликнинг олий ва ўрта махсус ўқув юртларида муассаса ва ташкилотларида режа-иқтисод масалалари ҳамда бухгалтерия ҳисоби ва ҳисоботини юритиш бўйича услубий раҳбарликни амалга оширади;

Вазирлик тизимидаги ўқув юртлари, корхоналар, ташкилотлар ва муассасаларнинг профессор-ўқитувчилари таркиби ҳамда ўқув-ёрдамчи ва бошқа тоифадаги ходимларнинг сонини белгиланган тартибда тасдиқлайди;

тизим ходимларини Ўзбекистон Республикасининг фахрий унвонларига, давлат мукофотлари ва бошқа мукофотларга тақдим этиш материалларини кўриб чиқади ва хулоса беради. Вазирлик тизими илғор ходимларини ва бошқа вазирликлар ҳамда муассасаларнинг олий ва ўрта махсус ўқув юртлари ходимларини Фахрий ёрлиқлар билан шунингдек, олий ва ўрта махсус ўқув юртлари талабалари ва ўқитувчиларини энг яхши илмий ва тажриба-конструкторлик ишлари учун белгиланган тартибда мукофотлайди;

хорижий мамлакатларнинг таълим бошқарув органлари, олий ўқув юртлари ва фирмалари билан тўғридан-тўғри алоқалар ўрнатади, Ўзбекистон Республикасининг халқаро шартномалари ва битимлари асосида улар билан таълим ва олий ўқув юрти фани соҳасида ҳамкорликни амалга оширади;

чет эллик фуқароларни ўқитиш бўйича меъёрий ҳужжатларни ишлаб чиқади, бошқа давлатларнинг фуқароларини республика олий ва ўрта махсус ўқув идораларида ўқитиш, тайёрлаш ва малакасини оширишга, шунингдек Ўзбекистон Республикаси фуқароларини чет эл таълим муассасаларида Ўзбекистон Республикасининг халқаро битимларига мувофиқ ҳамда хайрия жамғармалари, ҳомийлар ва фуқаролар ҳисобига ўқитиш, тайёрлаш ва малакасини оширишга шартномалар тузади;

идоравий бўйсунишидан ва мулкчилик шаклидан қатъий назар, республика таълим муассасаларига хорижий мамлакатлар учун мутахассислар тайёрлашга умумий ташкилий раҳбарликни амалга оширади;

«Ўзбекистон Республикаси давлат тили ҳақида»ги Қонуннинг бажарилишини назорат қилади.

6. Вазирликка юклатилган вазифаларга кўра қуйидаги ҳуқуқлар берилади:

республикада олий ва ўрта махсус таълим тузилмасини ва бошқарувини такомиллаштириш масалалари бўйича таклифларни кўриб чиқиш учун Ўзбекистон Республикаси Вазирлар Маҳкамасига киритиш;

идоравий бўйсунишидан ва мулкчилик шаклидан қатъий назар, олий ва ўрта махсус ўқув юртларида таълим тўғрисида Ўзбекистон Республикаси қонун ҳужжатларига риоя этилишини назорат қилиш;

давлатга қарашли бўлмаган олий ва ўрта махсус ўқув юртларида ҳамда уларга тенглаштирилган таълим муассасаларида Ўзбекистон Республикаси қонун ҳужжатлари бузилган тақдирда, уларнинг фаолиятини тўхтатиб қўйиш;

ўз тизимида қонунларни қўллаш тажрибасини умумлаштириш, уни такомиллаштириш бўйича таклифлар ишлаб чиқиш ва тегишли органларга тақдим этиш. Республика олий ва ўрта махсус ўқув юртлари фаолиятининг турли соҳаларида пайдо бўладиган муносабатларни ҳуқуқий тартибга келтириш бўйича берилган ваколат доирасида меъёрий актлар чиқариш;

олий ва ўрта махсус ўқув юртлари ҳамда уларнинг филиалларини ўқув юртларининг идоравий бўйсунишидан ва мулкчилик шаклидан қатъий назар, очиш (қайта тузиш ва тугатиш) учун хулоса бериш;

давлатга қарашли бўлмаган олий ва ўрта махсус ўқув юртларига ҳамда уларга тенглаштирилганларга Ҳукумат тасдиқлаган Низомга мувофиқ таълим фаолияти ҳуқуқи лицензияларини бериш;

олий ва ўрта махсус ўқув юртлари ўқитувчилари малакасини ошириш ва қайта тайёрлаш факультетлари ташкил қилинадиган олий ўқув юртлари рўйхатини белгилаш;

вазирликлар, идоралардан ва бевосита олий ва ўрта махсус ўқув юртларидан Вазирлик зиммасига юклатилган вазифаларни бажариши учун зарур материалларни, шунингдек, олий ва ўрта махсус таълим бўйича белгиланган статистик ҳисоботни олиш. Вазирлик ўқув юртларида ҳисоб-китоб ва ҳисоботнинг ҳолатини назорат қилишни амалга ошириш;

Ўзбекистон Республикаси қонун ҳужжатларида белгиланган тартибда ташқи иқтисодий фаолиятни амалга ошириш ва банк ҳамда бошқа кредит муассасаларида валюта ҳисобларига эга бўлиш;

ўзига бўйсунувчи ўқув юртлари ва ташкилотлардан мутахассислар тайёрлаганликлари учун, тадбиркорлик фаолиятлари даромадларидан, шунингдек, хайрия жамғармалари, ҳомийлар ва чет эл инвестицияларидан пул ўтказиш тартибида тушаётган бюджетдан ташқари маблағлар ҳисобига марказлаштирилган ривожлантириш, ижтимоий ҳимоя қилиш ва бошқа жамғармаларни тузиш;

мутахассисларни шартнома асосида мақсадли тайёрлаш учун ўзига бўйсунувчи олий ўқув юртларида махсус кафедралар, факультетлар, курслар очиш;

олий ва ўрта махсус ўқув юртлари бўлган республика вазирликлари ва идоралари раҳбар ходимларининг ахборотларини (маърузаларини) ҳайъат мажлисига киритиш;

Вазирликда Ўзбекистон Республикаси олий ва ўрта махсус ўқув таълимини ривожлантиришнинг асосий йўналишлари бўйича таклифларни кўриб чиқиш, Ватан ва чет эл фани, техникаси ҳамда олий ва ўрта махсус ўқув юртлари фаолияти илғор тажрибасининг янги ютуқларини ҳисобга олган ҳолда, мутахассислар тайёрлашнинг илмий мазмунини аниқлаш учун етакчи олимлар, юқори малакали мутахассислар, илмий-техника жамиятлари ва бошқа ташкилотларнинг вакилларидан иборат илмий-услубий кенгаш тузиш. Илмий-услубий кенгаш таркиби ва унинг Низоми Вазир томонидан тасдиқланади;

тасдиқланган бошқарув аппарати тузилмасига Вазирликнинг иш ҳақи фонди ҳамда аппарат ходимларининг чекланган сони доирасида бошқарув технологияси ҳамда техникасини такомиллаштириш зарурати билан бўладиган ўзгартишларни киритиш;

ўзига бўйсунувчи муассасалар томонидан амалдаги қонунларга зид равишда чиқарилган буйруқларни бекор қилиш.

7. Вазирлик ўз ишини вазирликнинг олий ва ўрта махсус ўқув юртлари, корхоналари ва муассасаларига раҳбарлик бўйича барча масалалари муҳокама қилишда ва ҳал этишда коллегиаллик ҳамда яккабошчиликнинг уйғунлиги асосида ташкил этади.

8. Вазирлик Ўзбекистон Республикаси Конституциясига мувофиқ Ўзбекистон Республикаси Президентининг Фармони билан лавозимга тайинланадиган вазир бошчилик қилади.

9. Вазирнинг Ўзбекистон Республикаси Вазирлар Маҳкамаси томонидан тайинланадиган биринчи ўринбосари ва ўринбосарлари бўлади. Улар ўртасидаги вазифалар тақсимоти вазир томонидан амалга оширилади.

10. Вазирликда вазир, лавозимига кўра вазирнинг биринчи ўринбосари ва ўринбосарлари, вазирликнинг ва тизимнинг бошқа ходимларидан иборат тартибда ҳайъат ташкил этилади. Ҳайъат аъзоларининг сони Ўзбекистон Республикаси Вазирлар Маҳкамаси томонидан тасдиқланади.

Вазирлик ҳайъати олий ва ўрта махсус таълимни ривожлантиришнинг асосий йўналишлари қабул қилинган қарорлар ижросини текшириш, кадрларни танлаш ва улардан фойдаланиш масалаларини, муҳим буйруқ ва йўриқномалар лойиҳаларини, Вазирлик бошқармалари ва бўлимлари, ўқув юртлари раҳбарларининг ҳисоботларини кўриб чиқади. Қарорлар қабул қилади.

11. Ҳайъат қарорлари, одатда, вазирнинг буйруқлари билан ҳаётга татбиқ этилади. Вазир билан ҳайъат ўртасида келишмовчилик пайдо бўлган тақдирда Вазир ўз қарорини амалга ошириш ҳуқуқига эга бўлади, бунда у Ўзбекистон Республикаси Вазирлар Маҳкамасига келишмовчиликлар ҳақида ахборот беради, ҳайъат аъзолари эса, ўз навбатида, фикрларини Ўзбекистон Республикаси Вазирлар Маҳкамасига билдиришлари мумкин.

12. Вазир:

Ўзбекистон Республикасининг амалдаги қонун ҳужжатлари асосида ва уларни бажариш юзасидан буйруқлар, йўриқномалар чиқаради, Вазирлик тизимида бажариш мажбурий бўлган кўрсатмалар беради ва уларнинг бажарилишини текширади. Унинг ўз ваколати доирасига кирувчи республикада олий ва ўрта махсус таълимга раҳбарлик қилиш масалалари бўйича буйруқлари ва йўриқномалари республиканинг барча олий ва ўрта махсус ўқув юртлари, шунингдек, шу ўқув юртлари бўйсунадиган вазирликлар ва идоралар учун ҳам мажбурийдир.

Вазирликка юклатилган вазифаларнинг бажарилишига шахсан жавоб беради, вазирнинг биринчи ўринбосари ва ўринбосарларининг, марказий аппарат таркибий бўлинмалари раҳбарларининг Вазирлик фаолиятининг айрим соҳаларига раҳбарлиги, шунингдек, ўзига бўйсунувчи ўқув юртлари корхоналар ва ташкилотлар иши учун масъуллиги даражасини белгилайди.

Зарур ҳолларда бошқа вазирликлар ва идоралар раҳбарлари билан биргаликда қўшма буйруқлар чиқаради.

13. Вазирлик марказий аппарати ходимлари сони ва меҳнат ҳақи фонди Ўзбекистон Республикаси Вазирлар Маҳкамаси томонидан тасдиқланади.

Вазирлик бошқармалари ва бўлимлари тўғрисидаги низомлар Вазир томонидан тасдиқланади.

14. Вазирлик фуқароларнинг хатлари, шикоятлари ва аризаларининг ўз вақтида эътибор билан кўриб чиқилишини ташкил қилади, бу хатларда кўтарилган масалаларнинг тўғри ҳал этилишига эришади, шунингдек, фуқаролар хатида баён этилган Вазирлик тизимидаги олий ва ўрта махсус ўқув юртлари, корхоналар, ташкилотлар ва муассасалар фаолиятидаги камчиликларни бартараф этиш чораларини кўради.

15. Ўзбекистон Республикаси Олий ва ўрта махсус таълим вазирлиги Давлат герби тасвири туширилган ва ўз номи ўзбек ва рус тилларида тўлиқ ёзилган муҳрга эга бўлади.