Тошкент шаҳри ва Тошкент вилояти, шунингдек, Фарғона, Наманган ва Андижон вилоятларида ветеринария хизмати ва чорвачилик тармоқларини янада ривожлантириш ҳамда наслчилик-селекция ишларини амалга ошириш учун малакали мутахассислар билан таъминлаш вазифаларини кечиктирмай ҳал этиш борасида қатор долзарб масалалар мавжуд.

Хусусан, Фарғона (148 нафар), Наманган (99 нафар), Андижон (35 нафар) ва Тошкент (136 нафар) вилоятлари ҳамда Тошкент шаҳри (25 нафар) ветеринария хизматларида жами 450 нафардан зиёд олий маълумотли мутахассис етишмаслиги сабабли уларнинг ўрнига ўрта махсус маълумотли ёки нафақа ёшидаги мутахассислар фаолият юритиб келмоқда. Шунингдек, чорвачилик тармоқларини янада ривожлантириш ҳамда идоравий ва ишлаб чиқаришдаги ветеринария хизматлари кўрсатишни ташкил этишда ҳам олий маълумотли малакали кадрларга эҳтиёж юқорилиги сезилмоқда.

Ўзбекистон Республикаси Президентининг «Ўзбекистон Республикаси Ветеринария ва чорвачиликни ривожлантириш давлат қўмитаси фаолиятини ташкил этиш тўғрисида» 2019 йил 28 мартдаги ПҚ-4254-сон қарори ижросини таъминлаш ҳамда ҳудудлардаги малакали кадрларга бўлган эҳтиёжни қаноатлантириш, ветеринария участкаларини малакали кадрлар билан таъминлаш, соҳани илм-фан ютуқлари асосида ташкил этиш, илмий асосланган инновацион услубларни жорий этиш, халқаро стандартлар даражасига мос олий маълумотли кадрлар тайёрлаш тизимини ташкил этишни янада такомиллаштириш, таълим сифатини яхшилаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Ўзбекистон Республикаси Ветеринария ва чорвачиликни ривожлантириш давлат қўмитаси фаолиятини ташкил этиш тўғрисида» 2019 йил 28 мартдаги ПҚ-4254-сон қарорида белгиланган вазифаларга мувофиқ Самарқанд ветеринария медицинаси институтининг Тошкент филиали (кейинги ўринларда Филиал деб аталади) ташкил этилганлиги маълумот учун қабул қилинсин.

2. Қуйидагилар Филиалнинг асосий вазифалари этиб белгилансин:

ижтимоий соҳа ва иқтисодиёт тармоқлари эҳтиёжига мувофиқ ветеринария ва чорвачилик соҳаси учун янги ва замонавий билимларга эга бўлган юқори малакали кадрларни халқаро стандартлар даражасида сифатли тайёрлашни таъминлаш;

ветеринария ва чорвачилик таълими мазмунида соҳа бўйича замонавий ишлаб чиқариш жараёнлари, инновацион ғоялар ва ишланмалар, юқори унумли ва ресурс тежамкор технологиялар асосида билим бериш, ўқув-лаборатория базасини ривожлантириш, таълим жараёнида назария ва амалиёт уйғунлигини таъминлаш;

хорижий илмий-тадқиқот ва олий таълим муассасаларининг профессор-ўқитувчилари, олим ва мутахассисларини жалб этган ҳолда, ветеринария ва чорвачилик соҳалари бўйича мутахассислар малакасини ошириш ва уларни қайта тайёрлаш курсларини ташкил этиш, ўқув жараёнига замонавий таълим технологияларини ва масофадан ўқитиш усулларини жорий этиш;

профессор-ўқитувчиларнинг илмий салоҳияти, касбий билим даражаси, шунингдек, амалий тажрибасини узлуксиз ривожлантириб бориш механизмларини жорий этиш, уларнинг касбий салоҳиятини ривожлантиришда хорижий илмий-тадқиқот ва олий таълим муассасаларининг илғор тажрибасидан кенг фойдаланиш, хорижий илмий ва олий таълим муассасаларида профессор-ўқитувчилар, илмий ва педагог кадрларнинг малакасини ошириш ва тажриба орттиришини ташкил этиш;

ветеринария ва чорвачилик соҳасидаги долзарб муаммоларни ҳал этишга йўналтирилган илмий изланишларни ташкил этиш, соҳа бўйича илмий ва илмий-педагог кадрлар тайёрлаш, илмий-тадқиқот муассасалари билан ҳамкорликда соҳанинг илмий муаммоларини ҳал этишга йўналтирилган амалий ва инновацион изланишларни амалга ошириш;

чорвачилик маҳсулотларини ишлаб чиқариш, сақлаш, дастлабки қайта ишлаш, сотишга ихтисослашган ҳамда наслчилик-селекция фаолияти билан шуғулланадиган ташкилотлар базасида талабаларнинг амалиётларини ташкил этиш;

республика ва хорижий олий таълим муассасалари ҳамда илмий марказларига истиқболли ёш битирувчиларни магистратура ва докторантурага мунтазам юбориш орқали Филиалнинг илмий-педагогик салоҳиятини ошириб бориш.

3. Самарқанд ветеринария медицинаси институтининг Тошкент филиалида кадрлар тайёрлаш бўйича бакалавриат таълимининг асосий йўналишлари рўйхати иловага мувофиқ тасдиқлансин.

4. Белгилаб қўйилсинки:

Филиал Самарқанд ветеринария медицинаси институтининг юридик шахс мақомига эга бўлган таркибий бўлинмаси ҳисобланади, Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга ҳамда Ўзбекистон Республикаси Молия вазирлигининг Ғазначилигида зарур шахсий ҳисобварақларига эга бўлади;

Филиалда ўқитиш мослаштирилган ўқув режалар ва дастурлар асосида ташкил этилади;

Филиалда ўқув жараёни 2020/2021 ўқув йилидан бошланади ҳамда талабаларни қабул қилиш сони белгиланган тартибда ҳар йили тасдиқланадиган республика олий таълим муассасаларига ўқишга қабул қилиш параметрларидан келиб чиққан ҳолда белгиланади.

5. Ўзбекистон Республикаси Ветеринария ва чорвачиликни ривожлантириш давлат қўмитаси Олий ва ўрта махсус таълим вазирлиги билан биргаликда Самарқанд, Тошкент вилоятлари ва Қорақалпоғистон Республикасидаги фаолияти мақбуллаштирилаётган қишлоқ хўжалиги йўналишидаги коллежларнинг ветеринария ва чорвачилик соҳасига оид ўқув лабораториялари, тегишли ўқув жиҳозларини Самарқанд ветеринария медицинаси институти ва унинг филиалларига бериш бўйича белгиланган тартибда Вазирлар Маҳкамасига таклиф киритсин.

6. Ўзбекистон Республикаси Ветеринария ва чорвачиликни ривожлантириш давлат қўмитаси Тошкент шаҳар ҳокимлиги билан биргаликда икки ой муддатда:

Филиалнинг уставини белгиланган тартибда тасдиқласин ва унинг давлат рўйхатидан ўтказилишини таъминласин;

Филиални танлов асосида юқори малакали профессор-ўқитувчилар билан таъминлаш чораларини кўрсин;

Филиалда ўқув-методик жараённинг ташкил этилишини таъминлаш, штатлар жадвали ва харажатлар сметасини тасдиқлаш, уни ўқув-лаборатория асбоб-ускуналари ва компьютер техникаси билан жиҳозлаш бўйича аниқ чора-тадбирларни амалга оширсин;

Филиалда ахборот-ресурс марказини таянч олий таълим муассасаси томонидан қўшимча ўқув, илмий ва бадиий адабиётлар билан таъминлаш чораларини кўрсин.

7. Тошкент вилояти ҳокимлиги, Ўзбекистон Республикаси Олий ва ўрта махсус таълим вазирлиги ҳамда Ветеринария ва чорвачиликни ривожлантириш давлат қўмитасининг Тошкент вилояти, Зангиота тумани, Ўртаовул ҚФЙ, Амир Темур кўчасида жойлашган Зангиота тумани агросервис касб-ҳунар коллежининг бино ва иншоотларинитегишли ҳудуди (асосий воситалари) билан биргаликда Филиалга оператив бошқарув ҳуқуқи асосида бериш тўғрисидаги таклифи маъқуллансин.

8. Қуйидагилар Филиал фаолиятини молиялаштириш манбалари этиб белгилансин:

Ўзбекистон Республикаси Давлат бюджети маблағлари;

тўлов-контракт асосида ўқитишдан тушадиган маблағлар;

хўжалик фаолиятидан ва шартнома асосида хизматлар кўрсатишдан тушадиган тушумлар;

жисмоний ва юридик шахсларнинг ҳомийлик хайриялари;

халқаро молия институтларининг грантлари;

қонунчилик ҳужжатларида тақиқланмаган бошқа манбалар.

9. Ўзбекистон Республикаси Молия вазирлиги Филиални сақлаш харажатларини 2019 йилда «Маориф» соҳаси бўйича тасдиқланган бюджет параметрлари доирасида, 2020 йилдан бошлаб эса мазкур соҳага ҳар йили ажратиладиган маблағлар доирасида амалга оширилишини назарда тутсин.

10. Филиалга 2 та енгил хизмат, шу жумладан 1 та навбатчи автотранспорт воситасини сақлаш учун лимит ажратилсин.

11. Ўзбекистон Республикаси Иқтисодиёт ва саноат вазирлиги Инвестициялар ва ташқи савдо вазирлиги, Молия вазирлиги билан биргаликда Ветеринария ва чорвачиликни ривожлантириш давлат қўмитаси томонидан тақдим этилган асосланган ҳисоб-китобларга биноан 2022 йил ва келгуси йилларга мўлжалланган Ўзбекистон Республикаси Инвестиция дастурларини шакллантиришда тасдиқланган лойиҳа-смета ҳужжатларига мувофиқ Филиалнинг бино ва иншоотларини реконструкция қилиш, капитал таъмирлаш ҳамда жиҳозлаш лойиҳалари ушбу дастурларга белгиланган тартибда киритилишини назарда тутсинлар.

12. Ўзбекистон Республикаси Ветеринария ва чорвачиликни ривожлантириш давлат қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

13. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари А.А. Абдухакимов ва Ўзбекистон Республикаси Ветеринария ва чорвачиликни ривожлантириш давлат қўмитаси раиси Б.Т. Норқобилов зиммасига юклансин.