Иқтисодий таълимнинг иқтисодий ислоҳотлар вазифалари ва талабларига мос янги тизимини ташкил этиш ва аҳолининг иқтисодий билимларини шакллантириш мақсадида Вазирлар Маҳкамаси қарор қилади:

1. Ўзбекистон Республикаси Вазирлар Маҳкамаси ҳузурида Иқтисодий таълим ва бозор иқтисодиёти асослари бўйича мувофиқлаштирувчи кенгаш 1-иловага* мувофиқ ташкил этилсин.

Бирлашган Миллатлар Ташкилоти (БМТ), Жаҳон банки, Халқаро валюта фонди, АҚШ халқаро ривожлантириш агентлиги (ЮСЭЙД), К. Аденауэр фондининг Ўзбекистон Республикасида аккредитация қилинган ваколатхоналарининг, шунингдек ЎзБюроКЕСнинг Мувофиқлаштирувчи кенгаш ишида қатнашиш тўғрисидаги таклифлари қабул қилинсин ва уларнинг экспертлари Мувофиқлаштирувчи кенгаш таркибига киритилсин.

2. Иқтисодий таълим ва бозор иқтисодиёти асослари бўйича мувофиқлаштирувчи кенгашнинг тузилмаси ва унинг 1996 йилги иш режаси 2 ва 3-иловаларга* мувофиқ маъқуллансин.

3. Иқтисодий таълим ва бозор иқтисодиёти асослари бўйича мувофиқлаштирувчи кенгашга қуйидаги функциялар юклатилсин:

мактабларда, махсус ва олий ўқув юртларида иқтисодий таълим тизимини ривожлантириш стратегиясини белгилаш ва ишлаб чиқилган йўналишларни амалга оширишга оид ишларни мувофиқлаштириш;

иқтисодий таълим соҳасида кадрлар малакасини ошириш ва уларни қайта тайёрлаш тизимини ривожлантириш стратегиясини белгилаш ва ишлаб чиқилган йўналишларни амалга оширишга оид ишларни мувофиқлаштириш;

иқтисодий фанлар бўйича ўқув дастурларини шакллантириш ва бозор муносабатлари иқтисодиёти бўйича ўқув-услубий материаллар, дарсликлар ва ўқув қўлланмалари тайёрлаш, шунингдек етакчи хорижий иқтисодчиларнинг ўқув адабиётлари ва монографияларини таржима қилиш ҳамда республикада нашр этишни ташкил қилиш бўйича ишларни мувофиқлаштириш;

иқтисодий ихтисосликдаги илмий-тадқиқот институтларининг иқтисодий билимларни ва амалга оширилаётган иқтисодий ислоҳотни тарғиб қилишга оид фаолиятини фаоллаштириш ишларини мувофиқлаштириш;

хорижий мамлакатларнинг университетлари, ўқув марказлари ҳамда бошқа таълим ва ўзга тизимлари билан иқтисодий таълим соҳасида халқаро ҳамкорликни ташкил этиш ишларини мувофиқлаштириш.

4. Иқтисодий таълим ва бозор иқтисодиёти асослари бўйича мувофиқлаштирувчи кенгаш тўғрисидаги Низом 4-иловага мувофиқ тасдиқлансин.

6. Ўзбекистон Республикаси Олий ва ўрта махсус таълим вазирлиги, Халқ таълими вазирлиги, Молия вазирлиги, «Ўзистиқболстат» давлат қўмитаси, Фан ва техника давлат қўмитаси Ўзбекистон Республикаси Президенти ҳузуридаги Давлат ва жамият қурилиши академияси, Ўзбекистон Товар ишлаб чиқарувчилар ва тадбиркорлар палатаси ҳамда бошқа манфаатдор вазирликлар ва идоралар билан биргаликда бир ой муддатда республикада иқтисодий таълимни комплекс ривожлантириш дастурини ишлаб чиқсинлар ва Мувофиқлаштирувчи кенгашнинг кўриб чиқиши учун киритсинлар, бунда қуйидагилар назарда тутилсин:

ҳар хил иқтисодий ихтисосликлар бўйича кадрлар тайёрлаш, қайта тайёрлаш ва уларнинг малакасини оширишнинг мақбул тузилмасини белгилаш;

таълимнинг янги шаклларини ривожлантириш, иқтисодий ихтисосликдаги ўқув юртларининг тузилмасини такомиллаштириш;

иқтисодий ихтисосликдаги мутахассисларни чет тилларга ўқитишни кенгайтириш ва чуқурлаштириш.

7. Олий ва ўрта махсус таълим вазирлиги бир ой муддатда:

иқтисодий таълим халқаро стандарт таснифи ва касбларнинг халқаро стандарт таснифи асосида иқтисодий ихтисосликлар бўйича Давлат мажбурий стандартларини ишлаб чиқиш;

Давлат матбуот қўмитаси билан биргаликда ўзбек, рус ва чет тилларда оммавий нусхада нашр этиладиган иқтисодий ихтисосликдаги замонавий ўқув-услубий ва илмий адабиётлар, шу жумладан хорижий ўқув-услубий ва илмий адабиётлар рўйхати;

таълим муассасаларининг моддий базасини такомиллаштириш ва ривожлантириш ҳамда ўқитишнинг пулли шаклларини кенгайтириш ҳисобига илмий-педагогик кадрларнинг муқим ўрнашиб қолиши;

Халқ таълими вазирлиги, Ўзбекистон Республикаси Президенти ҳузуридаги Давлат ва жамият қурилиши академияси ва Ўзбекистон Товар ишлаб чиқарувчилар ва тадбиркорлар палатаси билан биргаликда иқтисодий таълимнинг барча шакллари ва даражалари (мактаблар, ўрта махсус ва олий ўқув юртлари, кадрларни қайта тайёрлаш ва малака ошириш муассасалари) учун дастур ва мажбурий иқтисодий фанлар рўйхати;

манфаатдор вазирликлар ва идоралар билан биргаликда илмий-ўқитувчи кадрларни ва талабаларни чет элда ўқитиш тизимини ривожлантириш, ўқув-услубий адабиётлар харид қилиш, мутахассислар айирбошлаш, шунингдек иқтисодий ихтисосликдаги кадрлар тайёрлаш ва қайта тайёрлашга оид чет эл ўқув ва илмий марказлари билан биргаликда қўшма ўқув юртлари, илмий бўлинмалар ва курслар ташкил этиш бўйича таклифлар киритсин.

8. Ўзбекистон Республикаси Халқ таълими вазирлиги «Ўзистиқболстат» давлат қўмитаси ҳамда Олий ва ўрта махсус таълим вазирлиги билан биргаликда бир ой муддатда «Иқтисодий билимлар асослари» мактаб курси дастурини ишлаб чиқсин ва Мувофиқлаштирувчи кенгашнинг кўриб чиқиши учун киритсин, ушбу фан бўйича мутахассис ўқитувчилар тайёрлаш чора-тадбирларини назарда тутсин.

Мувофиқлаштирувчи кенгаш Ўзбекистон Республикаси Халқ таълими вазирлиги ва Давлат матбуот қўмитаси билан биргаликда ушбу фан 1996/97 ўқув йилидан бошлаб жорий этилишини таъминласин.

9. Олий ва ўрта махсус таълим вазирлиги, «Ўзистиқболстат» давлат қўмитаси, Меҳнат вазирлиги Ўзбекистон Республикаси Президенти ҳузуридаги Давлат ва жамият қурилиши академияси, Ўзбекистон Товар ишлаб чиқарувчилар ва тадбиркорлар палатаси билан биргаликда бир ой муддатда ўрта ва олий бўғин раҳбар кадрларининг иқтисодий қайта тайёргарлиги ва уларнинг малакасини оширишнинг махсус тизимини ташкил этиш бўйича таклифларни ишлаб чиқсинлар ва Мувофиқлаштирувчи кенгашнинг кўриб чиқиши учун киритсинлар, унда БМТ, Жаҳон банки, Европа Иттифоқи, ЮСЭЙД, К. Аденауэр фонди ва бошқа халқаро, минтақавий ва миллий ташкилотларнинг республикага кўрсатаётган молиявий имкониятларидан фойдаланишни назарда тутсин.

10. «Ўзтелерадио» компанияси Олий ва ўрта махсус таълим вазирлиги, Фанлар академияси, Ўзбекистон Қишлоқ хўжалиги фанлари академияси, Давлат мулки қўмитаси, Ўзбекистон Товар ишлаб чиқарувчилар ва тадбиркорлар палатаси ҳамда бошқа манфаатдор идоралар билан биргаликда иқтисодчи олимлар, раҳбар ходимлар ва мутахассисларни жалб этган ҳолда 1996 йил сентябргача бўлган муддатда бозор иқтисодиёти асослари ва республикада амалга оширилаётган иқтисодий ислоҳотлар, шунингдек хорижий мамлакатлардаги иқтисодий ислоҳотлар тажрибаси билан таништириш бўйича ўқув теле- ва радиоэшиттиришларнинг махсус туркумини тайёрласин ва намойиш қилишни бошласин.

11. Белгилаб қўйилсинки, Мувофиқлаштирувчи кенгашнинг қарорлари барча вазирликлар, идоралар, корпорациялар, уюшмалар, мулкчилик шаклларидан қатъи назар, корхоналар ва ташкилотлар учун мажбурий ҳисобланади.

12. Мазкур қарорнинг бажарилишини назорат қилиш Бош вазир Ў.Т. Султонов зиммасига юклансин.

Мутахассисларнинг иқтисодий тайёргарлик даражаси республикада ислоҳотларни муваффақиятли олиб боришнинг асосий омилларидан бири ҳисобланади. Тадбиркорликни ривожлантириш, аҳолини иш билан таъминлаш ва унинг меҳнат фаолиятини фаоллаштириш муаммоларини ҳал этиш кўп жиҳатдан кишиларда қадриятларга янгича қарашларни шакллантириш, уларнинг янги иқтисодий шароитларга мослашувини тезлаштириш билан белгиланади.

Қўйилган муаммоларни ҳал этишнинг комплекс хусусияти вазирликлар, идоралар, корхоналар, муассасалар ва жамоатчилик кенг табақаларининг аниқ мақсадли ва келишилган фаолияти зарурлигини келтириб чиқаради. Шу мақсадда Вазирлар Маҳкамаси ҳузурида Иқтисодий таълим ва бозор иқтисодиёти асослари бўйича мувофиқлаштирувчи кенгаш тузилмоқда.

Мувофиқлаштирувчи кенгаш ўз ишини иқтисодий таълимнинг ва аҳолининг Ўзбекистон Республикасидаги иқтисодий ислоҳотлар вазифалари ва талабларига мос бўлган иқтисодий билимларини шакллантиришнинг замонавий тизимларини яратишга йўналтиради.

Қуйидагилар мувофиқлаштирувчи кенгаш функциялари ҳисобланади:

мактабларда, ўрта махсус ва олий ўқув юртларида иқтисодий таълим тизимини ривожлантириш стратегиясини белгилаш ва ишлаб чиқилган йўналишларни амалга оширишга оид ишларни мувофиқлаштириш;

иқтисодий таълим соҳасидаги кадрлар малакасини ошириш ва уларни қайта тайёрлаш тизимини ривожлантириш стратегиясини белгилаш ва ишлаб чиқилган йўналишларни амалга оширишга оид ишларни мувофиқлаштириш;

иқтисодиёт йўналишидаги илмий-тадқиқот институтларининг иқтисодий билимларни ва амалга оширилаётган иқтисодий ислоҳотларни тарғиб қилиш бўйича фаолиятини жадаллаштиришга оид ишларни мувофиқлаштириш;

хорижий мамлакатларнинг иқтисодий таълим соҳасидаги университетлари, ўқув марказлари ва бошқа таълим ҳамда ўзга тузилмалари билан халқаро ҳамкорликни ташкил этиш бўйича ишларни мувофиқлаштириш.

Мувофиқлаштирувчи кенгаш ўз функцияларига мувофиқ қуйидаги вазифаларни ҳал этади:

аҳолининг асосий гуруҳлари бўйича уларнинг иқтисодий билими ҳолатини ўрганиш ва уни таҳлил қилиш;

мамлакатда иқтисодий таълимни ривожлантириш ва такомиллаштиришнинг ягона давлат дастурини ишлаб чиқиш;

илғор хорижий тажрибани ҳисобга олиб иқтисодий таълимнинг самарали шакл ва усулларини жорий этиш;

ўқув муассасаларида, корхоналарда, бизнес, тадбиркорлик ва инвестиция фаолияти соҳасида, яшаш жойи бўйича ва оилада иқтисодий таълим ва ўқитиш шаклларининг асосий босқичларини белгилаш;

олимлар ва мутахассисларни жаҳон стандартлари ва таълимнинг турли даража ва шакллари талабларига жавоб берувчи янги ўқув дастурлари, дарсликлар, ўқув-услубий ҳамда кўргазмали қўлланмалар, ўқув технологияларини ишлаб чиқишга жалб этиш;

мактаблар, лицейлар, коллежлар, техникумлар ва олий ўқув юртлари мутахассислари, раҳбарлари ва ўқитувчилар таркибини қайта тайёрлаш ва уларнинг малакасини оширишнинг комплекс дастурини яратиш ҳамда амалга ошириш;

турли вазирликлар ва идораларда иқтисодий таълимнинг моддий-теxника базасини ривожлантиришга оид тавсияномалар ишлаб чиқиш;

бошқарув кадрларини тестдан ўтказишнинг самарали усуллари асосида аттестация қилишнинг янги тизимини ишлаб чиқиш;

вазирликлар ва идораларнинг халқаро ҳамкорликни ташкил этишдаги, иқтисодиёт мутахассисларини тайёрлаш, қайта тайёрлаш, уларнинг малакасини оширишдаги, шунингдек талабалар, ўқитувчилар, ўқув дастурлари ва материаллар алмашишдаги, биргаликда илмий бўлинмалар яратишдаги фаолиятларини мувофиқлаштириш;

иқтисодий фанларнинг устувор йўналишлари бўйича илмий-тадқиқот ишларини ва иқтисодиёт соҳасининг илмий-педагогик кадрларини тайёрлашни мувофиқлаштириш ҳамда иқтисодий таълимдаги фан ютуқларидан фойдаланишга оид тавсияномалар ишлаб чиқиш;

иқтисодий таълим ислоҳотларининг устувор йўналишларини биринчи навбатда молиялаштириш, таълим соҳасидаги актив фаолиятни моддий барқарорлаштириш бўйича тавсияномалар ишлаб чиқиш;

нашриётларнинг иқтисодий адабиётлар нашр этишга оид фаолиятини келишиш, таълим эҳтиёжларидан келиб чиққан ҳолда уларни нашр этиш навбатларини белгилаш;

оммавий иқтисодий ўқитиш ягона дастурига мувофиқ оммавий ахборот воситаларида иқтисодий билимларни тарғиб қилишнинг асосий йўналишлари, шакллари ва усулларини ишлаб чиқиш;

вазирликлар ва идоралар, корхоналар ва муассасаларнинг иқтисодий таълим соҳасида тажриба алмашувини ташкил этиш.

Иқтисодий таълим ва бозор иқтисодиёти асослари бўйича мувофиқлаштирувчи кенгаш қуйидаги ҳуқуқ ва мажбуриятларга эга:

иқтисодий таълимни ташкил этиш ва такомиллаштириш масалалари юзасидан таклифларни тайёрлаш ва ҳукуматга киритиш;

вазирликлар ва идораларнинг иқтисодий таълим масалалари юзасидан ахборотларини тинглаш;

дастурларнинг устуворлигини ҳисобга олган ҳолда вазирликлар ва идораларнинг айрим таълим дастурларини молиялаштиришга оид таклифлар киритиш;

иқтисодий таълимни ислоҳ қилишнинг ҳамда иқтисодий таълим давлат дастури бажарилишининг якунлари ва боришини муҳокама қилиш;

иқтисодий йўналишдаги ўқув юртларининг илмий-педагогик, ўқув-услубий ва моддий-техник базаларини такомиллаштиришга оид таклифлар киритиш;

ватанимиздаги ва хорижий илмий ҳамда таълим муассасалари, фондлар ва жамоат ташкилотлари ҳамкорлигининг барча шаклларини ривожлантириш бўйича чора-тадбирлар тизимини шакллантириш.

Мувофиқлаштирувчи кенгаш иши унинг умумий мажлислари, секциялари ва вақтинчалик ишчи гуруҳлар мажлислари шаклида амалга оширилади. Секциялар ишнинг асосий йўналишларини ҳисобга олган ҳолда тузилади.

Зарур бўлган ҳолларда вақтинчалик секциялараро ишчи гуруҳлари тузилади. Секциялар ва ишчи гуруҳлари Мувофиқлаштирувчи кенгашнинг умумий мажлисида тасдиқланади ва унга ҳисоб беради. Секциялар раҳбарлари Мувофиқлаштирувчи кенгаш раиси томонидан тайинланадилар.

Мувофиқлаштирувчи кенгаш ишини унинг раиси, у бўлмаганда эса ўринбосар бошқаради. Мувофиқлаштирувчи кенгаш раиси умумий раҳбарликни амалга оширади, Мувофиқлаштирувчи кенгаш фаолиятининг бош йўналишини белгилайди.

Раис ўринбосари Мувофиқлаштирувчи кенгаш иши режаси ва унинг қарорлари бажарилишини назорат қилади.

Мувофиқлаштирувчи кенгаш Котибияти унинг мажлисларини тайёрлайди, унинг қарорларини манфаатдор вазирликлар ва идораларга етказади, қабул қилинган қарорларнинг амалга оширилишини назорат қилади.

Мувофиқлаштирувчи кенгаш иши унинг календарь йил учун тузилган режасига мувофиқ ташкил этилади. Секциялар иши тегишли режалар бўйича амалга оширилади. Мувофиқлаштирувчи кенгаш мажлиси йилнинг ҳар чорагида ўтказилади. Мажлиснинг кун тартиби унинг бошланишидан 30 кун олдин белгиланади. Секциялар мажлиси ҳар ойда ўтказилади. Секциялар аъзоларига бажарилиши учун улар шахсан жавобгар бўлган аниқ ишлар бириктириб қўйилади.

Мувофиқлаштирувчи кенгаш ва унинг алоҳида секциялари таркибидаги кадрларни янгилаб туриш Мувофиқлаштирувчи кенгаш раиси томонидан амалга оширилади.