Ўзбекистон Республикаси Ҳукумати ва Ҳиндистон Республикаси Ҳукумати, кейинги ўринларда «Томонлар» деб аталувчилар,

Томонлар давлатлари ўртасида дўстона муносабатларни мустаҳкамлаш мақсадида,

Томонлар давлатларининг амалдаги дипломатик паспортга эга бўлган фуқароларининг кириш ва чиқиш, шунингдек, сафар қилишларига кўмаклашишни истаган ҳолда,

қуйидагилар тўғрисида келишиб олдилар:

Ҳар бир Томон давлатининг амалдаги дипломатик паспорти эгалари бошқа Томон давлати ҳудудига кирган санадан бошлаб олтмиш (60) кундан ошмаган муддатда ушбу Томон давлати ҳудудига визасиз кириш, чиқиш, ундан транзит ўтиш ҳамда унда вақтинчалик бўлиш ҳуқуқига эгадирлар.

1. Ҳар бир Томон давлатининг амалдаги дипломатик паспорти эгалари бошқа Томон давлати ҳудудида бўлишлари давомида ушбу Томон давлатининг миллий қонунчилигига, шу жумладан, хорижий фуқароларга нисбатан қўлланиладиган рўйхатдан ўтиш, бўлиб туриш ва ҳаракатланиш қоидаларига риоя қиладилар.

2. Мазкур Битимдаги бирор қоида 1961 йил 18 апрелдаги Дипломатик алоқалар тўғрисидаги Вена Конвенцияси ва 1963 йил 24 апрелдаги Консуллик алоқалари тўғрисидаги Вена Конвенциясида баён қилинган ҳуқуқ ва мажбуриятларга дахл қиладиган тарзда талқин қилинмаслиги лозим.

1. Ҳар бир Томон давлатининг бошқа Томон давлати ҳудудида жойлашган дипломатик ваколатхоналар ва консуллик муассасалари ходими ёки ўз мамлакатининг халқаро ташкилотдаги вакили сифатида тайинланган ва амалдаги дипломатик паспортга эга бўлган фуқароси бошқа Томон давлати ҳудудига кириши учун виза олиши талаб этилади.

2. Ҳар бир Томон давлатининг халқаро ташкилот, орган, агентлик ва бошқа ҳар қандай шунга ўхшаш ташкилотлар томонидан ишга ёлланган дипломатик паспорти эгалари бошқа Томон давлатининг ҳудудига расмий ёки шахсий ташрифлар учун киришидан олдин виза олиши талаб этилади.

3. Мазкур модданинг 1-бандида кўрсатилган шартлар дипломатик ваколатхоналар ёки консуллик муассасалари ходимининг ёки халқаро ташкилотдаги вакилнинг турмуш ўртоғи, фарзандлари ва қарамоғида бўлган ота-оналарига ҳам татбиқ қилинади.

1. Ҳар бир Томон ўз давлати ҳудудига бошқа Томон давлатининг амалдаги дипломатик паспорти эгаларининг киришини рад этиш ёки бўлиб туриш муддатини чеклаш ҳуқуқини ўзида сақлаб қолади, башарти мазкур шахс номақбул деб топилса.

2. Ҳар бир Томон жамоат тартибини сақлаш, миллий хавфсизлик ёки ўз давлати фуқароларининг соғлиғини муҳофаза қилиш сабаби билан мазкур Битимнинг амал қилишини вақтинча, тўлиқ ёки қисман тўхтатиб қўйиши мумкин. Тўхтатиб қўйиш бошқа Томон давлати ҳудудига кириб бўлган фуқароларнинг ҳуқуқларига дахл этмайди.

3. Томонлар бир-бирларини мазкур модданинг 2-бандида кўрсатилган чоралар кўрилиши тўғрисида 72 соатдан кечиктирмасдан дипломатик каналлар орқали хабардор қиладилар.

1. Ҳар бир Томон давлати фуқароларининг дипломатик паспортлари бошқа Томон давлати ҳудудига кириш санасида аввал камида 6 (олти) ой муддатга амалда бўлиши лозим.

2. Томонлар мазкур Битим имзолангандан сўнг ўттиз (30) кун мобайнида мавжуд дипломатик паспорт намуналарини, шу жумладан, бундай ҳужжатларнинг батафсил тавсифини дипломатик каналлар орқали алмашадилар.

3. Башарти Томонлардан бири мазкур Битимнинг амал қилиши давомида дипломатик паспортларни алмаштирса ёки уларга ўзгартириш киритса, ушбу Томон бошқа Томонни ўттиз (30) кун аввал дипломатик каналлар орқали хабардор қилади ҳамда янги паспортлар намуналарини, шу жумладан, унинг батафсил тавсифини тақдим қилади.

1. Ҳар бир Томон давлатининг амалдаги дипломатик паспорти эгалари бошқа Томон давлати ҳудудида ҳаракатланиш ҳужжатлари йўқолган ёки шикастланган тақдирда ўз давлатининг дипломатик ваколатхонаси ёки консуллик муассасасини зудлик билан хабардор қиладилар, улар эса ўз навбатида қабул қилувчи давлатнинг Ташқи ишлар вазирлигини тегишли чоралар кўриш учун хабардор қиладилар.

2. Паспортлар йўқолган ёки шикастланган тақдирда тегишли Томон давлатининг дипломатик ваколатхонаси ёки консуллик муассасаси янги паспорт ёки йўқолган паспортнинг ўрнини вақтинчалик босувчи бошқа ҳаракатланиш ҳужжатини тақдим этади. Қабул қилувчи Томон давлати ҳудудидан жўнаб кетиш мазкур Битим қоидалари ва қабул қилувчи Томон давлати қонунчилигига мувофиқ амалга оширилади.

Мазкур Битим қоидаларини амалга ошириш ва талқин қилишда низо ва келишмовчиликлар юзага келган тақдирда, Томонлар уларни учинчи томон ёки халқаро трибуналга мурожаат этмасдан, дипломатик каналлар орқали музокаралар ва маслаҳатлашувлар йўли билан ҳал қиладилар.

Мазкур Битимга Томонларнинг ўзаро розилиги билан унинг ажралмас қисми ҳисобланадиган ҳамда мазкур Битимнинг 9-моддасида кўрсатилган тартибда кучга кирадиган алоҳида баённомалар орқали ўзгартириш ва қўшимчалар киритилиши мумкин.

1. Мазкур Битим номуайян муддатга тузилади ва Томонлар унинг кучга кириши учун зарур бўлган ички ҳуқуқий процедураларни якунлаганликлари тўғрисида охирги ёзма хабарнома олинган санадан 30 кун ўтгач кунга киради.

2. Ҳар бир Томон мазкур Битимни бошқа Томонга ёзма хабарнома юбориш орқали тугатиши мумкин. Мазкур Битим бошқа Томон бундай хабарномани олган санадан бошлаб тўқсон (90) кундан сўнг тугатилади.

Бунинг тасдиғи сифатида ўзларининг тегишли ҳукуматлари томонидан ўрнатилган тартибда ваколат берилган қуйида имзо чекувчилар мазкур Битимни имзоладилар.

Деҳли шаҳрида 2018 йил 1 октябрда икки (2) асл нусхада, ҳар бири ўзбек, ҳинд ва инглиз тилларида тузилди, бунда барча матнлар тенг аутентикдир. Талқин қилишда тафовут юзага келган тақдирда, инглиз тилидаги матн устувор ҳисобланади.