Қизилмия ва бошқа доривор ўсимликларни етиштириш ҳамда саноат усулида қайта ишлашни самарали ташкил этишни таъминлаш, соҳанинг тадбиркорлик субъектлари учун жозибадорлигини ошириш, шунингдек, юқори қўшилган қийматга эга бўлган экспортбоп маҳсулотлар ишлаб чиқариш ҳажмларини кўпайтириш мақсадида Вазирлар Маҳкамаси қарор қилади:

1. Қуйидагилар Қизилмия ва бошқа доривор ўсимликларни етиштириш ва қайта ишлаш ташкилотлари уюшмасининг (кейинги ўринларда Уюшма деб аталади) асосий вазифалари ҳисоблансин:

қизилмия ва бошқа доривор ўсимликларни етиштириш ва қайта ишлашни комплекс ривожлантириш дастурларини шакллантириш ҳамда уларнинг амалга оширилишини мувофиқлаштиришда иштирок этиш, ушбу соҳада ягона илмий-техник, технологик, инвестиция ва экспорт сиёсатини юритишга кўмаклашиш;

қизилмия ва бошқа доривор ўсимликлар ўсиши учун қулай ҳудудларда махсус плантациялар ташкил этиш, шу жумладан етиштиришнинг интенсив технологияларини жорий этиш орқали ва табиий ўсиш майдонларидан оқилона фойдаланган ҳолда уларни етиштириш ҳажмларини босқичма-босқич ошириб бориш;

плантацияларни ташкил этиш, шунингдек, қизилмия ва бошқа доривор ўсимликларни саноат асосида чуқур қайта ишлаш ҳамда улардан юқори қўшилган қийматга эга бўлган экспортбоп маҳсулотлар ишлаб чиқариш доирасида тадбиркорлик субъектларининг давлат бошқаруви органлари, барча даражадаги маҳаллий давлат ҳокимияти органлари билан ўзаро ҳамкорлигини самарали ташкил этишга кўмаклашиш;

қизилмия ва бошқа доривор ўсимликларни етиштириш ҳамда қайта ишлаш соҳасини ривожлантиришга оид норматив-ҳуқуқий ҳужжатлар лойиҳаларини ишлаб чиқишда иштирок этиш, шунингдек, жамоатчилик экологик назоратини амалга ошириш;

қизилмия ва бошқа доривор ўсимликларни етиштириш ҳамда қайта ишлаш соҳасидаги инвестиция дастурлари ва лойиҳаларининг амалга оширилишини мувофиқлаштиришда иштирок этиш;

қизилмия ва бошқа доривор ўсимликларни етиштириш ҳамда қайта ишлаш бўйича янги қувватларни ташкил этиш ва мавжудларини ривожлантириш жараёнларига хорижий сармояларни, чет эллик мутахассислар ҳамда маслаҳатчиларни фаол жалб этиш, ушбу соҳада илғор технологияларни жорий этиш;

мазкур соҳа учун мутахассисларни тайёрлаш ва қайта тайёрлаш, олий ва ўрта махсус, касб-ҳунар таълими муассасаларида, шунингдек, хорижда уларнинг малакасини ошириш ишларини самарали ташкил этиш ҳамда мувофиқлаштиришда иштирок этиш.

2. Давлат ва хўжалик бошқаруви органлари, маҳаллий ижро этувчи ҳокимият органлари Уюшмага унинг сўровлари бўйича унга юкланган вазифаларни бажариш билан боғлиқ зарур ахборот, статистика ҳамда бошқа маълумотлар тақдим этилишини таъминласинлар.

3. Бошқарув ходимларининг чекланган сони 12 нафардан иборат бўлган Уюшманинг ижро этувчи аппарати тузилмаси 1-иловага мувофиқ маъқуллансин.

4. 2019 — 2023 йилларда Қорақалпоғистон Республикасида қизилмия ўсимлиги янги плантацияларини ташкил этишнинг прогноз параметрлари 2-иловага мувофиқ тасдиқлансин.

Қорақалпоғистон Республикаси Вазирлар Кенгаши Раиси ва туманлари ҳокимларининг 2019 — 2023 йилларда Қорақалпоғистон Республикасида қизилмия ўсимлиги янги плантацияларини ташкил этиш прогноз параметрларининг ўз вақтида, тўлиқ ҳамда самарали бажарилишини таъминлаш учун шахсий масъулияти белгилансин.

5. Уюшма ва унинг аъзолари ўртасидаги ўзаро муносабатлар қонун ҳужжатларига мувофиқ тегишли таъсис шартномаси асосида тартибга солиниши маълумот учун қабул қилинсин.

6. Уюшманинг 2019 йил 1 майдан бошлаб, қизилмия экстракти ишлаб чиқарувчилари бўлган Уюшма аъзолари учун 2024 йил 1 янаваргача 100 гектардан кам бўлмаган майдонда қизилмия плантацияларини мажбурий ташкил этиш бўйича талаблар белгилаш тўғрисидаги таклифига розилик берилсин.

7. Уюшма аъзоларига 2024 йил 1 январгача бўлган муддатда қизилмия ва бошқа доривор ўсимликлар етиштириш, қизилмия ва бошқа доривор ўсимликлар плантацияларини назорат қилиш ҳамда мониторингини олиб бориш жараёнини самарали бошқариш учун учувчисиз учиш аппаратларини олиб киришга рухсат берилсин.

8. Ўзбекистон Республикаси Транспорт вазирлиги ҳузуридаги Фуқаро авиацияси агентлиги зарур ҳужжатлар тақдим этилган кундан бошлаб ўн кун муддатда Уюшма аъзоларига учувчисиз учиш аппаратларидан фойдаланишга рухсат этиш тўғрисида хулоса берилишини таъминласин.

9. Қизилмия ва бошқа доривор ўсимликлар плантацияларини ташкил этадиган, шунингдек, қизилмия ва бошқа доривор ўсимликларни қайта ишлайдиган тадбиркорлик субъектларига 2024 йил 1 январгача бўлган муддатга:

а) қуйидагилардан:

қизилмия ва бошқа доривор ўсимликларни етиштиришда ва (ёки) қайта ишлашда фойдаланиладиган (олинадиган) объектлар (фойда, даромад) қисмида юридик шахслардан олинадиган ер солиғи, юридик шахсларнинг мол-мулкига солинадиган солиқ ва фойда солиғи ва айланмадан олинадиган солиқни тўлашдан;

белгиланган тартибда шакллантириладиган рўйхатлар бўйича ўзларининг ишлаб чиқариш эҳтиёжлари учун республикада ишлаб чиқарилмайдиган олиб келинадиган технологик ускуналар, махсус қишлоқ хўжалиги техникалари, уларнинг бутловчи ва эҳтиёт қисмлари, қизилмия ва бошқа доривор ўсимликлар уруғлари ва кўчатлари учун божхона божидан озод қилиш.

б) плантациялар ташкил этиш учун экиш материалларини (уруғ, қаламчалар) тайёрлаш (йиғиш) мақсадида рухсатнома олиш учун йиғимлар тўловини кечиктириш тарзида имтиёзлар берилсин.

10. Хомашё кўринишидаги қизилмияни Ўзбекистон Республикасидан ташқарига юқори қўшилган қийматга эга бўлган маҳсулот ишлаб чиқариш ва экспорт қилиш мақсадида олиб чиқиш учун тўловлар бўйича имтиёзлар бериш амалиёти бекор қилинсин.

11. Белгилаб қўйилсинки, 2019 йил 1 майдан бошлаб:

Халқаро лабораторияларни аккредитация қилиш ташкилоти (ILAC) ва Халқаро аккредитация қилиш форумининг (IAF) тўлақонли аъзолари ҳисобланган мамлакатларнинг сертификатлаш органлари томонидан берилган мувофиқлик сертификатлари ёки синовлар протоколлари тақдим этилганда, Уюшма аъзолари фақат ўзларининг ишлаб чиқариш эҳтиёжлари, плантациялар ташкил қилиш, қизилмия ва бошқа доривор ўсимликлардан юқори қўшилган қийматга эга бўлган маҳсулотлар ишлаб чиқариш учун олиб келинадиган товарларни сертификатлаш талаб этилмайдиган тартиб белгиланади;

қизилмиядан фойдаланиш учун Ўзбекистон Республикаси Экология ва атроф муҳитни муҳофаза қилиш давлат қўмитаси томонидан тасдиқланадиган қўшимча квоталар Уюшманинг буюртманомаси бўйича Ўзбекистон Республикаси Фанлар академиясининг ижобий хулосаси ҳисобга олинган ҳолда жорий йилнинг 1 апрелидан 30 декабригача бўлган даврга ажратилади.

12. Ўзбекистон Республикаси Вазирлар Маҳкамаси ҳузуридаги Ўсимликлар карантини давлат инспекцияси, Соғлиқни сақлаш вазирлиги Қизилмия ва бошқа доривор ўсимликларни етиштириш ва қайта ишлаш ташкилотлари уюшмаси билан биргаликда Ўзбекистон Республикаси Президентининг «Техник жиҳатдан тартибга солиш, стандартлаштириш, сертификатлаштириш ва метрология тизимларини янада ривожлантириш чора-тадбирлари тўғрисида» 2018 йил 12 декабрдаги ПҚ-4059-сон қарорининг 9-банди ижросини таъминлаш доирасида импорт қилинадиган қизилмия хомашёси учун карантин рухсатномаси берилишини бекор қилишнинг мақсадга мувофиқлиги тўғрисидаги масалани икки ҳафта муддатда кўриб чиқсин.

13. Ўзбекистон Республикаси Экология ва атроф муҳитни муҳофаза қилиш давлат қўмитаси икки ой муддатда:

Қишлоқ хўжалиги вазирлиги, Фанлар академияси ва Уюшма билан биргаликда қизилмия ва бошқа доривор ўсимликлар плантациялари тўғрисидаги низомни тасдиқлашни назарда тутадиган Ҳукумат қарорининг лойиҳасини ишлаб чиқсин ҳамда Вазирлар Маҳкамасига киритсин;

Ички ишлар вазирлиги ва Уюшма билан биргаликда тайёрловчилар билан тузилган етказиб бериш шартномаларини амалга ошириш доирасида тайёрланган қизилмияни қайта ишловчи ташкилотларгача ташиб беришда табиатни муҳофаза қилишга доир қонун ҳужжатларига риоя этилишини назорат қилиш соҳасида идоралараро яқин ўзаро ҳамкорликни ташкил этиш бўйича қўшма дастурни ишлаб чиқсин ва тасдиқласин.

14. Ўзбекистон Республикаси Инновацион ривожланиш вазирлиги 2019 — 2021 йиллар учун амалий ва инновацион тадқиқотлар давлат илмий дастурларини шакллантиришда қизилмия ва бошқа доривор ўсимликлар етиштиришнинг замонавий технологияларини ишлаб чиқиш бўйича лойиҳалар танловлари ўтказилишини таъминласин.

15. Вазирлар Маҳкамасининг 2014 йил 20 октябрдаги 290-сон қарори билан тасдиқланган Ўсимлик дунёси объектларидан фойдаланиш ва ўсимлик дунёси объектларидан фойдаланиш соҳасида рухсат бериш тартиб-таомилларидан ўтиш тартиби тўғрисидаги низомга 13-илованинг «Ўсимлик дунёси объектларининг турлари» устунининг учинчи хатбошидаги «ТИФ ТН коди 1211 90 850 0» сўзлари «ТИФ ТН коди 1211 90 860 8» сўзлари билан алмаштирилсин.

16. Ўзбекистон Республикаси Вазирлар Маҳкамасининг «Ўзбекистон Республикасида Қизилмия ва бошқа доривор ўсимликларни етиштириш ҳамда саноат усулида қайта ишлашни янада ривожлантириш чора-тадбирлари тўғрисида» 2018 йил 27 январдаги 63-сон қарорининг 2, 3, 7 ва 14-бандлари, шунингдек, қарорга 1 ва 2-иловалар ўз кучини йўқотган деб ҳисоблансин.

17. Мазкур қарорнинг бажарилишини назорат қилиш Ўзбекистон Республикаси Бош вазирнинг ўринбосари Э.М. Ғаниев зиммасига ва Вазирлар Маҳкамасининг Аграр ва озиқ-овқат соҳаларини ривожлантириш масалалари котибиятига юклансин.