Жаҳон банки гуруҳи билан молиявий ҳамкорликни янада кенгайтириш, иқтисодиётнинг устувор тармоқларини, ишлаб чиқариш тузилмаси ва ижтимоий соҳани ривожлантиришни жадаллаштириш, жалб этилаётган молиявий ресурслардан самарали фойдаланилишини таъминлаш учун имтиёзли узоқ муддатли қарзларни жалб этиш мақсадида Вазирлар Маҳкамаси қарор қилади:

1. Жаҳон банки гуруҳига кирувчи Халқаро тараққиёт уюшмасининг узоқ муддатли имтиёзли кредитларини 2001 йилдан бошлаб жалб этиш, уларни ишлаб чиқариш ва ижтимоий инфратузилмани жадал ривожлантиришни таъминловчи устувор лойиҳаларни амалга оширишга жамлаш мақсадга мувофиқ деб ҳисоблансин.

2. Қуйидагилар Халқаро тараққиёт уюшмасининг 40 йилгача бўлган муддатга бериладиган 10 йилгача имтиёзли даврга эга бўлган имтиёзли фоизсиз кредитларидан фойдаланишнинг устувор йўналишлари этиб белгилансин:

ирригация-мелиорация тармоғини реконструкция қилиш ва самарадорлигини ошириш;

электр энергетикада энергия ишлаб чиқарувчи қувватларни замонавийлаштириш;

шаҳар ва қишлоқ инфратузилмасини ривожлантириш;

ижтимоий инфратузилма (таълим, соғлиқни сақлаш)ни ривожлантириш.

Халқаро тараққиёт уюшмаси билан ўзаро келишувга кўра ҳамкорликнинг бошқа йўналишлари.

3. Халқаро тараққиёт уюшмаси билан ишлаш бўйича Идоралараро ишчи гуруҳнинг таркиби иловага* мувофиқ тасдиқлансин.

4. Идоралараро ишчи гуруҳга:

бозор ислоҳотларини чуқурлаштириш, иқтисодиётнинг стратегик муҳим тармоқларини техника билан қайта жиҳозлаш, инфратузилмани замонавийлаштириш ва ижтимоий соҳани ривожлантиришга доир биринчи навбатдаги вазифаларни ҳал этиш учун Халқаро тараққиёт уюшмасининг узоқ муддатли имтиёзли кредитлари жалб этилишини;

Халқаро тараққиёт уюшмаси томонидан ажратилаётган маблағлардан энг кўп даражада самарали ва мақсадли фойдаланилишини таъминлаш юклансин.

5. Идоралараро ишчи гуруҳ Халқаро тараққиёт уюшмаси билан қўшма лойиҳаларни тайёрлаш ва амалга оширишда ушбу лойиҳаларнинг Жаҳон банки гуруҳига кирувчи бошқа халқаро молия институтлари (Халқаро тикланиш ва тараққиёт банки, Халқаро молия корпорацияси, Инвестицияларни кафолатлаш халқаро агентлиги), шунингдек Осиё тараққиёт банки, Европа тикланиш ва тараққиёт банки ва бошқалар билан Ўзбекистон Республикасининг ўзаро ҳамкорлик дастурларининг чамбарчас мувофиқлаштирилишига ва ўзаро бир-бирини тўлдиришига алоҳида эътиборни қаратсин.

6. Мазкур қарорнинг бажарилишини назорат қилиш Бош вазир ўринбосари Р.С.Азимов зиммасига юклансин.