Депутатлар назорати самарадорлигини, депутатлар корпуси фаоллигини, шунингдек Ўзбекистон Республикасининг қонунлари ва Ўзбекистон Республикаси Олий Мажлиси Қонунчилик палатасининг қарорлари ижро этилишини таъминлаш юзасидан давлат тузилмалари раҳбарларининг масъулиятини ошириш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикасининг қонунлари ва Ўзбекистон Республикаси Олий Мажлиси Қонунчилик палатасининг қарорлари ижро этилиши устидан назоратни амалга ошириш тартиби тўғрисидаги низом тасдиқлансин (илова қилинади).

2. Ўзбекистон Республикаси Олий Мажлиси Қонунчилик палатаси қўмиталарининг раислари Ўзбекистон Республикасининг қонунлари ва Ўзбекистон Республикаси Олий Мажлиси Қонунчилик палатасининг қарорлари ижро этилиши устидан назоратни амалга ошириш тартиби тўғрисидаги низомда назарда тутилган назорат тадбирларини тайёрлаш ва ўтказиш тартиб-таомилига доир талабларга оғишмай риоя қилинишини таъминласинлар.

3. Назорат фаолияти якунлари тўғрисидаги ахборотни (йилнинг ҳар чорагида) эшитиш ва муҳокама қилиш амалиётга жорий этилсин.

4. Ўзбекистон Республикасининг қонунлари ва Ўзбекистон Республикаси Олий Мажлиси Қонунчилик палатасининг қарорлари ижро этилиши устидан назоратни амалга ошириш тартиби тўғрисидаги низомнинг ижроси устидан назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари зиммасига юклатилсин.

5. Ушбу қарор қабул қилинган кундан эътиборан кучга киради.

1. Ушбу Низом Ўзбекистон Республикасининг қонунлари ва Ўзбекистон Республикаси Олий Мажлиси Қонунчилик палатаси қарорларининг ижро этувчи ҳокимият органлари (бундан буён матнда давлат органлари деб юритилади) томонидан ижро этилиши устидан назоратни амалга оширишга доир тадбирларни (бундан буён матнда назорат тадбирлари деб юритилади) Ўзбекистон Республикаси Олий Мажлиси Қонунчилик палатасининг қўмиталари (бундан буён матнда Қонунчилик палатаси қўмиталари деб юритилади) томонидан тайёрлаш ва ўтказиш тартиб-таомилини тартибга солади.

2. Қонунчилик палатаси қўмиталарининг Ўзбекистон Республикаси қонунлари ва Ўзбекистон Республикаси Олий Мажлиси Қонунчилик палатаси қарорларининг (бундан буён матнда Қонунчилик палатасининг қарорлари деб юритилади) ижро этилиши устидан назоратни амалга ошириш борасидаги фаолиятини ташкил этиш Ўзбекистон Республикаси Олий Мажлиси Қонунчилик палатасининг Спикери томонидан амалга оширилади.

Қонунчилик палатаси Спикери ўринбосарлари зиммасига Қонунчилик палатасининг ўзлари масъул бўлган қўмиталари ишининг лозим даражада ташкил этилишини, шунингдек ушбу Низомда назарда тутилган талабларга риоя этилишини таъминлаш вазифаси юклатилади.

3. Қонунчилик палатаси қўмиталарининг назорат тадбирларини тайёрлаш ва ўтказиш борасидаги фаолиятини мувофиқлаштириш Ўзбекистон Республикаси Олий Мажлиси Қонунчилик палатасининг Кенгаши (бундан буён матнда Қонунчилик палатасининг Кенгаши деб юритилади) томонидан амалга оширилади.

4. Қонунчилик палатасининг қўмиталарида назорат тадбирларини тайёрлаш ва ўтказиш, тайёрланаётган ҳужжатларнинг сифатини таъминлаш, шунингдек Қонунчилик палатаси қўмиталарининг назорат тадбирлари якунларига кўра қабул қилиниб, давлат органларига юборилган қарорларини ўз вақтида кўриб чиқиш юзасидан таъсирчан мониторингни амалга ошириш борасидаги ишларни ташкил қилиш Қонунчилик палатаси қўмиталарининг раислари зиммасига юклатилади.

5. Қонунчилик палатаси қўмиталари томонидан назорат тадбирларини ташкил этиш ва ўтказиш Қонунчилик палатаси ёки Қонунчилик палатасининг Кенгаши ҳар йили тасдиқлайдиган назорат фаолияти режаларига мувофиқ амалга оширилади.

6. Қонунчилик палатаси қўмиталарининг назорат фаолияти режаси (бундан буён матнда Назорат фаолияти режаси деб юритилади) Қонунчилик палатаси қўмиталарининг таклифлари асосида шакллантирилади.

7. Қонунчилик палатаси қўмиталарининг таклифларини умумлаштириш Қонунчилик палатаси Девони Назорат-ахборот бўлимининг зиммасига юклатилади.

Қонунчилик палатаси қўмиталарининг таклифлари Қонунчилик палатаси Девонининг Назорат-ахборот бўлимига жорий йилнинг 1 декабридан кечиктирмасдан тақдим этилади.

8. Қонунчилик палатаси қўмиталарининг Назорат фаолияти режасига киритиш учун таклифлар тайёрлаш борасидаги фаолиятини мувофиқлаштириш Қонунчилик палатаси Спикери ўринбосарларидан бирининг зиммасига юклатилади. Мазкур масалага доир қарор Қонунчилик палатаси Кенгашининг мажлисида қабул қилинади.

9. Назорат фаолияти режасининг шакллантирилган лойиҳаси Қонунчилик палатаси Спикерига кўриб чиқиш учун тақдим этилади, у мазкур режани маромига етказиш учун ўз эътирозлари билан қайтаришга ҳақли.

10. Қонунчилик палатаси Спикерининг фикр-мулоҳазалари мавжуд бўлмаган тақдирда, Назорат фаолияти режаси лойиҳаси Қонунчилик палатасининг ёки Қонунчилик палатаси Кенгашининг муҳокамасига киритилади.

11. Қонунчилик палатаси қўмиталари томонидан Назорат фаолияти режасига киритиш учун таклифлар тайёрлаш уларнинг жорий йилдаги фаолияти натижаларига (қонун ижодкорлиги фаолияти, конференциялар, давра суҳбатлари ўтказиш, назорат фаолияти якунлари, парламентлараро фаолият ва бошқалар) якун ясаш билан бошланади. Якун ясалганидан кейин назорат тадбирлари доирасида қўшимча равишда ўрганилиши лозим бўлган масалалар аниқланади ва назорат тадбирларининг тахминий мавзулари белгиланади.

Кейинги йил учун таклифлар тайёрлаш чоғида Қонунчилик палатасида кўриб чиқилиши (қонун лойиҳаларини биринчи, иккинчи ва учинчи ўқишларда кўриб чиқиш) пайтида Қонунчилик палатасининг қўмитаси масъул бўлган Ўзбекистон Республикаси қонунларининг, шунингдек Қонунчилик палатаси қарорларининг ижро этилиши амалиётини ўрганишга қаратилган назорат тадбирларини ўтказиш зарурати ҳам ҳисобга олинади.

12. Таклифларни тайёрлаш учун қуйидагилар асос бўлиши мумкин:

Ўзбекистон Республикаси Президентининг қарорларидан ёки маърузаларидан (нутқларидан) келиб чиқадиган топшириқ;

Ўзбекистон Республикаси Олий Мажлиси Қонунчилик палатаси ва Сенатининг қўшма қарорида ёки Қонунчилик палатасининг қарорида кўрсатилган топшириқ;

Қонунчилик палатаси Спикерининг топшириғи ёки тавсияси;

Қонунчилик палатаси Кенгашининг топшириғи ёки тавсияси;

қўмита аъзолари бўлган ва сиёсий партиялар фракцияларининг вакиллари ёки Ўзбекистон экологик ҳаракати депутатлар гуруҳи аъзолари бўлган депутатларнинг тегишли сиёсий партия фракциясининг ёки Ўзбекистон экологик ҳаракати депутатлар гуруҳининг (бундан буён матнда депутатлар бирлашмалари деб юритилади) қарорига асосланган таклифи;

ўтказилган назорат тадбирларининг якунлари, шу жумладан парламент сўровига жавоб эшитуви ёки парламент эшитувларини ўтказиш якунлари;

конференциялар ва давра суҳбатлари якунлари;

Қонунчилик палатаси депутатларининг сайловчилар билан учрашувлари якунлари;

қонун лойиҳаларини ишлаб чиқиш, парламент сўровлари ва парламент эшитувларини тайёрлаш билан боғлиқ масалаларни таҳлилий жиҳатдан ҳар томонлама ишлаб чиқиш зарурияти;

Қонунчилик палатаси қўмиталари томонидан ўтказилган назорат тадбирлари якунларига кўра қабул қилинган қарорларнинг ижро этилиш ҳолатини баҳолаш натижалари;

бошқа асослар.

13. Қонунчилик палатаси қўмиталарининг таклифлари дастлаб уларнинг мажлисларида муҳокама қилинади. Бунда Қонунчилик палатаси қўмитасининг ҳар бир аъзоси ўз фикрини билдиришга ва назорат тадбирининг мавзусини таклиф этишга ҳақли.

14. Депутатлар бирлашмалари Назорат фаолияти режасига киритиш учун бериладиган таклифларни тайёрлашда Қонунчилик палатаси қўмиталаридаги ўз вакиллари — депутатлар бирлашмаларининг аъзоси бўлган депутатлар орқали иштирок этадилар.

15. Қонунчилик палатаси қўмиталарининг таклифлари қуйидаги талабларга жавоб бериши керак:

назорат тадбирларини ўтказиш зарурияти асосланган бўлиши лозим;

назорат тадбирларининг мақсади аниқ белгиланган ва таърифланган бўлиши керак;

назорат тадбирларининг мавзулари Назорат фаолияти режасига киритиш учун таклиф берган Қонунчилик палатаси қўмиталарининг ихтисослигига мувофиқ бўлиши керак;

назорат тадбирларининг мавзулари долзарб хусусиятга эга бўлиши ҳамда Ўзбекистон Республикасини ривожлантиришнинг социал-иқтисодий ва ижтимоий-сиёсий эҳтиёжларидан келиб чиқиши лозим;

назорат тадбирлари бажариб бўладиган ва натижали бўлиши керак;

назорат тадбирларини ўтказиш якунларига эҳтиёж бўлиши керак;

назорат тадбирларининг пировард натижаларини тахмин қилиш имконияти.

16. Назорат фаолияти режасига киритиш учун таклифлар тайёрланаётганда тадбирларни ўтказишнинг аниқ муддатлари белгиланиши керак. Қонунчилик палатаси қўмитасининг таклифи жадвал шаклида расмийлаштирилиши лозим (илова қилинади). Қонунчилик палатаси қўмиталарининг таклифларига қуйидагиларни қамраб олган тушунтириш хатлари илова қилинади:

назорат тадбирининг мақсади тавсифи;

назорат тадбири мавзусига оид ишларнинг ҳолатига доир шарҳ (таҳлил);

назорат тадбирини ўтказиш заруриятининг асоси;

назорат тадбирини ўтказишдан кутилаётган натижалар.

17. Йил бошида, тасдиқланган Назорат фаолияти режаси асосида Қонунчилик палатаси қўмитасининг мажлисида қўмита аъзолари орасидан назорат тадбирларини тайёрлаш ва ўтказиш учун масъул бўлган депутатлар (депутатлар гуруҳи) белгиланади.

18. Назорат тадбирини тайёрлаш ва ўтказиш учун масъул бўлган депутат Қонунчилик палатаси қўмитасининг қарори қабул қилинганидан кейин беш иш куни ичида Назорат тадбирини тайёрлаш ва ўтказиш бўйича тадбирлар режасини тузади ҳамда уни Қонунчилик палатаси қўмитасининг раиси билан келишиб олади.

19. Назорат тадбирларини тайёрлаш ва ўтказишга доир тадбирлар режаси қуйидагиларни ўз ичига олиши мумкин:

тегишли давлат органларига сўровлар юбориш (сўровлар Қонунчилик палатаси қўмитасининг бланкасида расмийлаштирилади ва Қонунчилик палатаси қўмитасининг раиси томонидан имзоланади);

зарур амалий маслаҳатлар олиш мақсадида давлат органлари ва бошқа ташкилотлардан мутахассисларни таклиф этиш (таклифномалар Қонунчилик палатаси қўмитасининг бланкасида расмийлаштирилади ҳамда Қонунчилик палатаси қўмитасининг раиси томонидан имзоланади);

ижро этилишини ўрганиш мўлжалланилаётган Ўзбекистон Республикаси қонуни нормаларини ижро этиш учун қабул қилинган қонуности ҳужжатлари рўйхатини белгилаш;

ижро этилишини ўрганиш мўлжалланилаётган Ўзбекистон Республикаси қонунини ижро этиш юзасидан қабул қилинган қонуности ҳужжатлари ва норматив ҳужжатлар ва ички ҳужжатларни таҳлил қилиш;

назорат тадбири мавзусига доир халқаро тажрибани ўрганиш;

конференция ёки давра суҳбати ўтказиш (тадбир экспертлар ва олимларнинг фикр-мулоҳазаларини ўрганиш мақсадида Қонунчилик палатасининг қўмитаси номидан ўтказилади);

Қонунчилик палатаси қўмитасининг мажлисида давлат органи раҳбарининг Ўзбекистон Республикаси қонуни ижро этилишини таъминлаш юзасидан кўрилаётган чора-тадбирлар ҳақидаги ахборотини эшитиш;

бошқа тадбирлар.

20. Ўзбекистон Республикаси қонуни нормаларини ижро этиш мақсадида қабул қилинган қонуности ҳужжатларини ва норматив (ички) ҳужжатларни таҳлил қилиш чоғида:

Ўзбекистон Республикаси қонунининг ижро этилиши учун масъул бўлган давлат органлари белгиланади;

Ўзбекистон Республикаси қонунининг ижро этилиши учун масъул бўлган давлат органларининг мақсадлари ва вазифаларини белгиловчи норматив-ҳуқуқий ҳужжатлар ўрганилади;

Ўзбекистон Республикаси Президентининг Ўзбекистон Республикаси қонунларининг ижро этилиши мақсадида қабул қилинган фармонлари ва қарорлари ўрганилади;

Ўзбекистон Республикаси Вазирлар Маҳкамасининг Ўзбекистон Республикаси қонунини ижро этиш мақсадида қабул қилинган қарорлари ўрганилади;

вазирликлар, давлат қўмиталари ва идораларнинг Ўзбекистон Республикаси қонунини ижро этиш мақсадида қабул қилинган норматив-ҳуқуқий ҳужжатлари ўрганилади;

Ўзбекистон Республикаси қонунининг ижро этилиши учун масъул бўлган давлат органи томонидан қабул қилинган норматив (ички) ҳужжатлар (ички буйруқлар, фармойишлар ва ҳоказо) сўраб олинади ҳамда таҳлил этилади;

ҳуқуқни қўллаш амалиётидаги камчиликлар ва номувофиқликлар, Ўзбекистон Республикаси қонунининг нормалари билан мазкур Ўзбекистон Республикаси қонунини ижро этиш мақсадида қабул қилинган қонуности ҳужжатлари, норматив ҳужжатлар, ички ҳужжатлар ўртасидаги тафовутлар ёки зиддиятлар аниқланади.

21. Ўзбекистон Республикаси қонунини ижро этиш учун қабул қилинган қонуности ҳужжатлари ва норматив (локаль) ҳужжатлар таҳлилининг якунлари алоҳида маълумотнома тарзида расмийлаштирилиб, Қонунчилик палатасининг қўмитаси томонидан Қонунчилик палатаси Спикерининг мазкур қўмита фаолиятига мутасадди бўлган ўринбосари кўриб чиқиши учун тақдим этиладиган бажарилган ишлар тўғрисидаги йиғма таҳлилий маълумотномани шакллантиришга асос бўлади.

22. Ўзбекистон Республикаси қонуни ижро этилиши учун қабул қилинган қонуности ҳужжатлари ва норматив (локаль) ҳужжатлар таҳлили асосида Қонунчилик палатаси қўмитаси томонидан дастлабки тарздаги хулосалар ва тавсиялар тайёрланади.

Дастлабки тарздаги хулосалар ва тавсиялар асослилигининг тасдиғини олиш мақсадида Қонунчилик палатасининг қўмитаси Ўзбекистон Республикаси қонуни ижро этилиши учун масъул бўлган давлат органининг фикрини сўраши, мутахассислар ва олимларни таклиф қилиши, конференциялар, давра суҳбатлари ва бошқа шу каби тадбирлар ташкил этиши мумкин.

23. Назорат тадбирини тайёрлаш ва ўтказиш тадбирлари режасини рўёбга чиқариш якунлари бўйича бажарилган ишлар тўғрисида йиғма таҳлилий маълумотнома тайёрланади, унда бажарилган иш якунлари, Қонунчилик палатаси қўмитасининг дастлабки тарздаги хулосалари ва тегишли тавсиялари, Ўзбекистон Республикаси қонуни ижро этилиши учун масъул бўлган давлат органининг нуқтаи назари қисқача тавсифланади, шунингдек жойга бориб назорат тадбири ўтказиш зарурлиги асослаб берилади.

24. Бажарилган иш тўғрисидаги йиғма таҳлилий маълумотнома Қонунчилик палатаси қўмитасининг раиси томонидан Қонунчилик палатаси Спикерининг мазкур қўмита фаолияти учун мутасадди бўлган ўринбосарига юборилади. Йиғма таҳлилий маълумотнома маромига етказиш учун Қонунчилик палатасининг қўмитасига қайтариб юборилиши мумкин.

25. Қонунчилик палатаси қўмитасининг раиси жойга бориб назорат тадбири ўтказиш тўғрисидаги масалани Қонунчилик палатаси Спикерининг мазкур қўмита фаолияти учун мутасадди бўлган ўринбосари билан келишади.

26. Жойга бориб назорат тадбири ўтказиш масаласи бўйича эътирозлар бўлмаса, Қонунчилик палатаси қўмитаси раиси ёки унинг ўринбосари:

тегишли давлат органининг раҳбарига белгиланган назорат тадбири тўғрисида олдиндан хат юборади;

масъул депутатнинг таклифига биноан ишчи гуруҳининг таркибини белгилайди ва ташкилотларнинг ишчи гуруҳи таркибига киритилган ходимлари иштироки тўғрисидаги масалани тегишли ташкилотларнинг раҳбарлари билан келишади;

ишчи гуруҳи аъзоларини бажарилган иш тўғрисидаги йиғма таҳлилий маълумотнома билан таништиради;

ўрганиш йўналишлари ва объектларини белгилайди;

ишчи гуруҳи аъзолари ўртасида вазифаларни тақсимлайди;

бажарилган иш тўғрисидаги йиғма таҳлилий маълумотномада кўрсатилган дастлабки тарздаги хулосалар ва тавсияларни инобатга олган ҳолда саволнома тайёрлаб, уни тегишли давлат органининг раҳбарига олдиндан юборади.

27. Назорат тадбири жойга бориб ўтказилганда:

Қонунчилик палатаси қўмитасининг бажарилган иш тўғрисидаги йиғма таҳлилий маълумотномада кўрсатилган дастлабки тарздаги хулосалари ёки тавсияларининг тўғрилиги ёки нотўғрилиги текширилади;

Қонунчилик палатаси қўмитасининг сўровлари бўйича давлат органи раҳбарлари томонидан аввал тақдим этилган ахборотнинг ишончли эканлиги ёки ишончли эмаслиги ва қай даражада тугаллиги текширилади;

давлат органи ходимларининг таркиб топган иш амалиёти Ўзбекистон Республикаси қонуни талабларига қай даражада мувофиқлиги текширилади;

Ўзбекистон Республикаси қонуни нормаларини ижро этиш учун қабул қилинган қонуности ҳужжатлари, норматив ҳужжатлар ва ички ҳужжатлар бор-йўқлиги аниқланади;

давлат органи ходимларининг малакасини ва мамлакатда амалга оширилаётган ижтимоий-иқтисодий ислоҳотларнинг қандай бораётганлигидан хабардорлигини ошириш мақсадида амалга оширилаётган чора-тадбирларнинг самарадорлиги ўрганилади;

давлат органи томонидан Ўзбекистон Республикаси қонуни нормалари ижро этилишини таъминлаш учун қабул қилинган муайян чора-тадбирлар аниқланади.

28. Ўтказилган назорат тадбири якунлари бўйича якуний маълумотнома (5 — 10 бет) тайёрланади. Якуний маълумотномада қуйидагилар кўрсатилади:

назорат тадбири ўтказилган сана ва жой;

Қонунчилик палатаси қўмитаси томонидан ташкил этилган ишчи гуруҳининг таркиби;

давлат органининг назорат тадбири ўтказилишида иштирок этган вакиллари;

Ўзбекистон Республикаси қонуни ижро этилиши борасидаги ишлар ҳолатининг тавсифи;

Қонунчилик палатаси қўмитасининг асослантирилган хулосалари;

Қонунчилик палатаси қўмитасининг (агар камчиликлар ва хатоликлар мавжуд бўлса) давлат органи фаолиятини такомиллаштириш ёки амалдаги қонун ҳужжатларига ўзгартишлар киритиш бўйича асослантирган таклифлари.

29. Якуний маълумотнома ишчи гуруҳи аъзолари ва Қонунчилик палатаси қўмитасининг раиси томонидан имзоланади. Якуний маълумотнома ишчи гуруҳи Қонунчилик палатасига қайтиб келганидан кейин кўпи билан уч иш куни ичида тайёрланади. Якуний маълумотноманинг нусхаси мазкур қўмита учун масъул бўлган Қонунчилик палатаси Спикери ўринбосарига тақдим этилади, шунингдек маълумот учун давлат органининг раҳбарига юборилади.

30. Қонунчилик палатаси қўмитасининг якуний маълумотномада кўрсатилган хулосалари ва таклифлари расмий ҳужжатлар билан мустаҳкамланиши керак.

31. Якуний маълумотнома Қонунчилик палатаси қўмитасининг мажлисида тегишли давлат органи раҳбарини таклиф этган ҳолда муҳокама қилинади. Давлат органи раҳбарининг Қонунчилик палатаси қўмитасининг хулосалари ва таклифларига доир нуқтаи назари Қонунчилик палатасининг қўмитасига олдиндан ёзма равишда тақдим этилади.

32. Қонунчилик палатасининг қўмитаси якуний маълумотномани кўриб чиқиш якунлари бўйича қарор қабул қилади, унда аниқ баён этилган тавсиялар ва Қонунчилик палатаси қўмитасининг қарори тегишли давлат органи томонидан кўриб чиқилганлиги тўғрисида ахборот тақдим этиш муддатлари кўрсатилади.

33. Қонунчилик палатаси қўмитасининг қарорида мазкур қўмитанинг Қонунчилик палатаси қўмитаси қарорининг ижро этилиши бўйича келиб тушган ахборотларни умумлаштириш ва таҳлил этиш вазифаси зиммасига юклатилган масъул аъзоси ҳам кўрсатилади.

34. Қонунчилик палатаси қўмитаси қарорини бажариш бўйича тақдим этилган ахборот етарли бўлмаса, парламент сўрови юбориш ёки парламент эшитуви ўтказиш тўғрисида ташаббус билан чиқилади.

35. Қонунчилик палатаси қарорларининг ижро этилиши устидан назорат Қонунчилик палатасининг қарорларида кўрсатилган Қонунчилик палатаси қўмиталари ёки депутатлари томонидан амалга оширилади.

Қонунчилик палатаси қарорларининг ижро этилиши устидан назоратни амалга ошириш бўйича тадбирларни рўёбга чиқариш мақсадида Қонунчилик палатаси ихтисослашган қўмитаси аъзолари орасидан ишчи гуруҳи шакллантирилади.

36. Қонунчилик палатасининг қарори Қонунчилик палатасининг қарорида назарда тутилган муддатларда ижро этилганлиги тўғрисидаги ахборот келиб тушган тақдирда, ишчи гуруҳи ушбу ахборотни ҳар томонлама таҳлил қилади.

37. Қонунчилик палатаси қарорининг ижро этилиши тўғрисидаги ахборотда кўрсатилган маълумотларни аниқлаштириш мақсадида ёки бундай ахборот ўз вақтида тақдим этилмагани тақдирда, ишчи гуруҳининг таклифига биноан Қонунчилик палатаси тегишли қўмитасининг раиси томонидан тегишли давлат органларига ёзма шаклдаги сўровлар юборилади.

38. Зарурат тақозо этган тақдирда, ишчи гуруҳи Қонунчилик палатасининг Кенгаши билан келишган ҳолда Қонунчилик палатаси қарори ижро этилишининг боришини жойга бориб ўрганади.

39. Қонунчилик палатаси қарорининг ижро этилиши тўғрисидаги ахборотнинг ва депутатларнинг ёзма сўровлари асосида давлат органи томонидан тақдим этилган ҳужжатларнинг якуний таҳлили бўйича Қонунчилик палатаси қарорининг ижро этилганлиги ёки ижро этилмаганлиги тўғрисида хулосалар тайёрланади (Қонунчилик палатаси қарорида баён қилинган кўрсатмаларнинг лозим даражада ёки тугал даражада ижро этилмаганлиги Қонунчилик палатаси қарорини ижро этмаганлик деб ҳисобланади). Хулосалар якуний маълумотнома шаклида тайёрланиб, Қонунчилик палатаси Спикерининг мазкур масала бўйича мутасадди бўлган ўринбосарига тақдим этилади. Тақдим этилган хулосалар асослантирилмаган ёки тақдим этилган ахборот тугал бўлмаган тақдирда, маълумотнома маромига етказиш учун қайтариб юборилади.

40. Қонунчилик палатаси қарорининг ижро этилиши якунлари тўғрисидаги ахборот Қонунчилик палатаси қарорида кўрсатилган Қонунчилик палатаси қўмитаси ёки депутатлари томонидан Қонунчилик палатаси Кенгашининг кўриб чиқиши учун тақдим этилади.

41. Қонунчилик палатаси Кенгашининг мажлисида:

Қонунчилик палатаси қарорининг ижро этилиши натижаларига;

Қонунчилик палатасининг қарорида кўрсатилган Қонунчилик палатаси қўмитаси ёки депутатларининг Қонунчилик палатаси қарори ижро этилишини таъминлаш бўйича фаолиятига баҳо берилади.

42. Қонунчилик палатаси Кенгаши Қонунчилик палатасининг қарори ижро этилмаганлиги тўғрисидаги хулосалар ифода этилган қарор қабул қилган тақдирда, ушбу масалани Қонунчилик палатаси мажлисида Қонунчилик палатаси қарорининг лозим даражада ижро қилинишини таъминламаган давлат органи раҳбарини таклиф қилган ҳолда кўриб чиқиш тўғрисида қарор қабул қилинади.

43. Қонунчилик палатасининг қўмиталари томонидан ўтказилган назорат тадбирларининг якунлари йилнинг ҳар чорагида Қонунчилик палатаси Кенгашининг мажлисларида кўриб чиқилади. Қонунчилик палатаси Спикери ёки унинг ўринбосарлари ёхуд Қонунчилик палатаси қўмиталари раисларининг ташаббусига кўра Қонунчилик палатаси Кенгашининг мажлисларида назорат тадбирларига дахлдор бошқа масалалар ҳам кўриб чиқилиши мумкин.

44. Назорат тадбирларининг якунлари бўйича оммавий ахборот воситаларида эълон қилиш ёки Қонунчилик палатасининг веб-сайтида жойлаштириш учун ахборот материаллари тайёрланади.

45. Назорат тадбирлари давомида қоғозда ёки электрон шаклда тайёрланган маълумот материаллари ва ҳужжатларининг нусхалари Қонунчилик палатаси қўмиталарининг раислари томонидан Ўзбекистон Республикаси Олий Мажлиси Қонунчилик палатаси қўмиталари фаолиятига доир маълумотларнинг ахборот базаси тўғрисидаги Низомда белгиланган тартибда Қонунчилик палатаси Девонининг тегишли бўлинмаларига тақдим этилади.