Ўзбекистон Республикаси Ҳукумати ва Корея Республикаси Ҳукумати (кейинги ўринларда «Томонлар» деб аталувчилар),

икки мамлакат ўртасида туризм соҳасидаги ҳамкорликни ривожлантириш ва мустаҳкамлашни истаб,

икки мамлакатнинг иқтисодий, ижтимоий ва маданий ривожланишида туризмнинг муҳим аҳамиятга эга эканлигини эътиборга олиб,

туризм соҳасидаги ҳамкорликни ривожлантиришнинг икки мамлакат халқлари ўртасида дўстона муносабатларни мустаҳкамлашдаги аҳамиятини ҳисобга олган ҳолда,

қуйидагилар тўғрисида келишиб олдилар:

1. Томонлар туризм орқали тенглик ва ўзаро манфаат асосида икки мамлакатнинг иқтисодиёти, маданияти, табиатининг диққатга сазовор жойлари, тарихий ёдгорликлари ва миллий анъаналари борасида ўз халқлари ўртасидаги ҳамжиҳатликни қўллаб-қувватлаш учун туризм соҳасидаги ҳамкорликнинг ривожланишига ёрдам кўрсатадилар.

2. Томонлар сайёҳлар алмашинувини ошириш мақсадида ўз мамлакатларининг туризм соҳасидаги муассаса ва ташкилотлари, шу жумладан туризм соҳасидаги давлат органлари, сайёҳлик агентликлари ва туризм билан боғлиқ бошқа ташкилотлар ўртасида ҳамкорлик ва дўстона муносабатларни ҳам қўллаб-қувватлайдилар.

3. Мазкур Битим доирасидаги барча тадбирлар Томонларнинг миллий қонунчилигига ва икки давлат иштирокчилари бўлган халқаро шартномаларга мувофиқ амалга оширилади.

Томонлар туризм соҳасига инвестициялар киритиш, меҳмонхоналар ва бошқа сайёҳлик инфратузилмаси объектларини яратиш, меҳмонхона бошқаруви ва тиббий туризм, кулинар туризм, маданий туризм, табиат туризми, барқарор туризм каби ва Томонлар ўртасида келишилган туризмга тааллуқли ҳар қандай бошқа соҳаларда икки томонлама ҳамкорликни кенгайтиришни қўллаб-қувватлайдилар.

Томонлар туризм билан боғлиқ тажриба, статистика, материаллар ва тадқиқотлар тўғрисида маълумотлар билан алмашишга ёрдам кўрсатадилар.

Ҳар бир Томон бошқа Томон вакилларининг ўз ҳудудида ўтказиладиган халқаро туристик кўргазмалар, семинарлар ва конференцияларда иштирок этишига, шунингдек халқаро туристик ташкилотлар томонидан ўтказиладиган тадбирларда биргаликда иштирок этишига ёрдам кўрсатади ва уларни рағбатлантиради.

Томонлар халқаро туризм соҳасида икки томонлама ҳамкорликни, шу жумладан туризм бўйича халқаро ташкилотларда иштирок этиш ва ҳамкорлик қилишни ривожлантирадилар.

Томонлар туризмнинг турли соҳаларида мутахассислар тайёрлашда маълумот ва тажриба алмашишни қўллаб-қувватлайдилар, шунингдек туризм йўналишидаги талабалар ва экспертлар алмашинувига ва туризм соҳасидаги кадрларнинг қобилияти ва малакасини оширишга қаратилган семинарларни ташкил этишга ёрдам кўрсатадилар.

Томонлар бошқа мамлакатлардан сайёҳларни жалб қилиш учун икки давлатнинг туризм соҳасидаги ваколатли органлари ўртасида ҳамкорликни қўллаб-қувватлайдилар.

1. Мазкур Битимни амалга оширишни енгиллаштириш ҳамда Томонлар, икки мамлакатнинг туризм соҳасидаги ваколатли органлари ва бошқа тегишли ташкилотлари ўртасида фикр алмашиш мақсадида Томонлар ваколатли органлар ва тегишли давлат ташкилотларининг тенг сондаги вакилларидан иборат Қўшма қўмита (кейинги ўринларда «Қўмита») тузишлари мумкин.

2. Қўмита Томонлар ўртасида ўзаро келишилган муддатларда вақти-вақти билан мажлислар ўтказади.

3. Қўмита Томонларнинг тегишли миллий қонунчилигига мувофиқ ўзининг иш тартибини белгилайди.

4. Томонлар Қўмита мажлисларида иштирок этиш учун туризм соҳасидаги давлат органлари ва хусусий ташкилотлар вакилларини таклиф этиш юзасидан ўзаро келишиб олишлари мумкин.

Ҳар бир Томон бошқа Томондан махфий сифатида олинган маълумотларнинг хавфсизлигини таъминлайди ва бундай маълумотларни ушбу бошқа Томоннинг ёзма розилигисиз учинчи томонга тақдим этмайди.

Томонлар мазкур Битимни амалга ошириш учун қуйидаги органларни масъул этиб белгилайдилар:

Ўзбек томонидан — Ўзбекистон Республикаси Ташқи иқтисодий алоқалар, инвестициялар ва савдо вазирлиги;

Корейс томонидан — Корея Республикаси Маданият, спорт ва туризм вазирлиги.

Мазкур Битимни талқин қилиш ёки амалга оширишда юзага келадиган ҳар қандай низолар маслаҳатлашувлар ва музокаралар воситасида ҳал этилади.

Мазкур Битимга Томонларнинг ўзаро келишуви асосида ўзгартиш ва қўшимчалар киритилиши мумкин. Ҳар қандай шундай тузатишлар мазкур Битимнинг 14-моддасида назарда тутилган тартибда кучга кириб, мазкур Битимнинг ажралмас қисми ҳисобланувчи протоколлар билан расмийлаштирилади.

Мазкур Битим икки мамлакатнинг улар иштирокчиси бўлган халқаро шартномалардан келиб чиқувчи ҳуқуқ ва мажбуриятларига дахл қилмайди.

1. Томонлар мазкур Битимнинг кучга кириши учун зарур бўлган давлат ички процедураларининг бажарилгани тўғрисида бир-бирларини ёзма шаклда дипломатик каналлар орқали хабардор қиладилар. Мазкур Битим охирги хабарнома санасидан бошлаб кучга киради ва Томонлардан бири ўзининг мазкур Битимнинг амал қилишини тўхтатиш мақсади тўғрисида бошқа Томонни ёзма шаклда хабардор қилгунига қадар ўз кучида қолади. Мазкур Битимнинг амал қилиши шундай хабарнома санасидан бошлаб тўқсон (90) кундан кейин тугатилади.

2. Мазкур Битим кучга кирган санадан бошлаб 1995 йил 16 февралда имзоланган Ўзбекистон Республикаси Ҳукумати ва Корея Республикаси Ҳукумати ўртасида сайёҳлик соҳасида ҳамкорлик қилиш тўғрисида Ўзаро тушуниш Меморандумининг амал қилиши тугатилади.

3. Агар Томонлар ўртасида бошқача тарзда келишилган бўлмаса, мазкур Битим амал қилишининг тугатилиши амалдаги қўшма тадбирларнинг ҳақиқийлиги ёки давом этишига таъсир кўрсатмайди.

Барчасини тасдиқлаган ҳолда, қуйида имзо чекувчилар ўзларининг тегишли ҳукуматлари томонидан белгиланган тартибда берилган ваколатлари доирасида мазкур Битимни имзоладилар.

Сеул шаҳрида 2012 йил 20 сентябрда ҳар бири ўзбек, корейс ва инглиз тилларида бўлган икки нусхада тузилди, бунда барча матнлар бир хил кучга эга.

Мазкур Битим қоидаларини талқин қилишда ихтилофлар юзага келганда инглиз тилидаги матн устувор ҳисобланади.