Ўзбекистон Республикаси ва Россия Федерацияси иккала мамлакат ўртасидаги дўстона муносабатларни ривожлантиришга кўмаклашиш, ва шунингдек ўз фуқароларининг ҳуқуқ ва манфаатларини янада самарали ҳимоялашга интилиб,

1963 йил 24 апрелда Венада имзоланган Консуллик алоқалари тўғрисидаги Вена Конвенциясининг ривожига консуллик муносабатларини олиб бориш учун қўшимча қоидаларни ўрнатиш истагида

қуйидагилар тўғрисида келишиб олдилар:

Мазкур Конвенцияда:

1) «Консуллик муассасаси» ҳар қандай бош консулликни, консулликни, вице-консулликни ёхуд консуллик агентлигини билдиради,

2) «консуллик округи» консуллик вазифаларини бажариш учун консуллик муассасасига ажратилган туманни англатади,

3) «консуллик муассасасининг бошлиғи» шу сифатда ҳаракат қилиш топширилган шахсни англатади,

4) «консуллик мансабдор шахси» ҳар қандай шахсни, жумладан консуллик муассасасининг бошлиғи сифатида консуллик вазифаларини бажариш топширилган шахсни ҳам англатади.

5) «консуллик хизматчиси» консуллик муассасасида маъмурий ёки техник вазифаларни бажарувчи ҳар қандай шахсни англатади,

6) «хизмат кўрсатиш ходими» консуллик муассасасига хизмат кўрсатиш вазифаларини бажараётган ҳар қандай шахсни англатади,

7) «консуллик муассасасининг ходимлари» консулликнинг мансабдор шахслари, консуллик ходимлари ва хизмат кўрсатувчи шахсларни англатади,

8) «консуллик ходимларининг хизматчилари» консуллик мансабдор шахсларини (консуллик муассасаси бошлиғи бундан мустасно), ва шунингдек консуллик ходимларини ва хизмат кўрсатувчи ходимларни англатади,

9) «хусусий уй ишчиси» консуллик муассасаси ходимининг фақат хусусий хизматида бўлган шахсни англатади,

10) «консуллик бинолари» фақат консуллик муассасаси учун фойдаланиладиган бинолар ёки бинолар қисми ва мазкур бино ёки бино қисмига хизмат қилувчи, мулк ҳуқуқи кимга тегишли бўлишидан қатъи назар, ер участкасини англатади,

11) «консуллик архивлари» ўз ичига барча қоғозларни, ҳужжатларни,корреспонденцияни, китобларни, фильмларни, видео-овоз ёзишни, дискетларни ва консуллик идорасининг реестрларини шифрлар ва кодлар, картотекалар ва уларни асраш ёки сақлашни таъминлашга мослаштирилган ҳар қандай уй жиҳозларини ўз ичига олади,

12) «консулликка ваколат берган давлат кемаси», консулликка ваколат берган давлат байроғи остида юриш ҳуқуқига эга бўлган ва шу давлатда рўйхатдан ўтган, ҳарбий кемалардан ташқари, ҳар қандай кемани англатади,

13) «консулликка ваколат берган давлат ҳаво кемаси», консулликка ваколат берган давлатда рўйхатдан ўтган ва шу давлатнинг таниқли белгиларини олиш, юриш ҳуқуқига эга бўлган, ҳарбий учиш аппаратларидан ташқари, ҳар қандай учиш аппаратини англатади.

1. Консулликка ваколат берган давлатнинг консуллик муассасаси консуллик жойлашган давлатнинг ҳудудида фақат консуллик жойлашган давлатнинг розилиги билан очилиши мумкин.

2. Консуллик муассасасининг манзилгоҳи, ёхуд консуллик муассасаси манзилгоҳида бўлмаган таркибий қисмлари, унинг даражаси, консуллик округи ва консуллик мансабдор шахсларининг сони, шунингдек ҳар қандай бошқа ўзгаришлар, консулликка ваколат берган давлат ва консуллик жойлашган давлат ўртасидаги битим билан белгиланади.

1. Консулликка ваколат берган давлатнинг консуллик муассасаси бошлиғи тайинланганига қадар, дипломатик ёки бошқа тегишли йўллар билан таклиф қилинаётган шахсга нисбатан консуллик жойлашган давлатнинг розилиги олиниши керак.

2. Агар консуллик жойлашган давлат у ёки бу шахсга консуллик муассасасининг бошлиғи сифатида тайинланишига розилик бермаса, у консулликка ваколат берган давлатга бундай рад этишнинг сабабларини маълум қилиши шарт эмас.

3. Консулликка ваколат берган давлат дипломатик йўллар билан консуллик жойлашган давлатнинг Ташқи ишлар вазирига консуллик муассасасининг бошлиғини тайинлаш учун консуллик патентини ёки бошқа худди шундай ҳужжатни юборади. Бу ҳужжатда консуллик муассасаси бошлиғининг тўлиқ исми, фамилияси,унинг фуқаролиги, даражаси,консуллик округи ва консуллик муассасаси жойлашган жой кўрсатилади.

4. Консуллик жойлашган давлат консуллик муассасасининг бошлиғи бўлиб тайинланиши учун консуллик патентини ёки бошқа айнан шундай ҳужжатни олгандан сўнг, экзекватура деб номланадиган рухсатни, бундай рухсат ҳар қандай шаклда бўлишидан қатъи назар, беради. Экзекватура ёки бошқа рухсатни беришга рад жавобини бераётган консуллик жойлашган давлат, консулликка ваколат берган давлатга бундай рад этишнинг сабабларини маълум қилиши шарт эмас.

5. Ушбу модданинг 6-банди ва 4-моддада кўзда тутилган ҳолатлардан ташқари, консуллик муассасасининг бошлиғи экзекватура ёки бошқа рухсат берилганидан сўнг ўз вазифаларини бажаришга киришиши мумкин.

6. Консуллик жойлашган давлат экзекватура ёки бошқа рухсат берилишига қадар консуллик муассасасининг бошлиғига вақтинчалик ўз вазифаларини бажаришга йўл қўйиши мумкин. У ҳолда ушбу Конвенциянинг қоидалари қўлланилади.

7. Консуллик жойлашган давлат консуллик муассасасининг бошлиғига ўз вазифаларини бажаришга вақтинчалик рухсат берган бўлса ҳам бу хабар консуллик округининг ваколатли идораларига зудлик билан етказилади. Бундан ташқари, у консуллик муассасасининг бошлиғи ўз мансаби бўйича бурчларини бажариш ва мазкур Конвенциядан келиб чиқувчи афзалликлардан фойдаланиш учун зарур чораларни таъминлайди.

1. Агар консуллик муассасасининг бошлиғи ўз вазифаларини бажара олмаса ёки консуллик муассасасининг бошлиғи мансаби бўш бўлса, консуллик муассасасининг бошлиғи вазифаларини шу консуллик муассасасининг ёки консулликка ваколат берган давлатнинг консуллик жойлашган давлатдаги дипломатик ваколатхонасининг дипломатик ходимларидан бири консуллик муассасаси бошлиғи вазифасини бажарувчи сифатида бажариши мумкин.

2. Консуллик муассасасининг бошлиғи вазифасини бажарувчининг тўлиқ исми ва фамилияси консуллик жойлашган давлат Ташқи ишлар вазирлигига ёки шу вазирлик кўрсатган идорага хабар қилинади. Консулликка ваколат берган давлатнинг дипломатик ваколатхонаси томонидан ёхуд, консуллик жойлашган давлатда ушбу давлатнинг бундай ваколатхонаси бўлмаса, консуллик муассасасининг бошлиғи, ёхуд у, буни қилиш имкониятига эга бўлмаса, консулликка ваколат берган давлатнинг ҳар қандай ваколатли идораси орқали, умумий қоидага кўра, хабар қилинади.

3. Консуллик жойлашган давлатнинг ваколатли идоралари консуллик муассасанинг бошлиғи вазифасини бажарувчига ёрдам ва ҳимоя кўрсатадилар. У ушбу муассасани бошқарар экан, унга ушбу Конвенциянинг қоидалари тегишли муассасасининг бошлиғига берилган каби асосда қўлланилади.

4. Агар консуллик жойлашган давлатда консулликка ваколат берган давлатнинг дипломатик ваколатхонасининг дипломатик ходимлари аъзоси мазкур модданинг 1-бандига мувофиқ тайинланса, консуллик муассасасининг бошлиғи вазифасини бажарувчи дипломатик имтиёзлар ва иммунитетлардан консуллик жойлашган давлат қаршилик қилмаган тақдирда фойдаланаверади.

1. Консулликка ваколат берган давлат 3, 6 ва 7-моддаларнинг қоидалари назарда тутган мустаснолардан ташқари, консуллик ходимларини эркин тайинлашлари мумкин.

2. Консулликка ваколат берган давлат консуллик жойлашган давлатга консуллик мансабдор шахсларининг консуллик муассасаси бошлиғидан ташқари барчасининг тўлиқ исми ва фамилияси, мавқеи ва даражаси, консуллик жойлашган давлат хоҳлаган вақтда, 7-модданинг 3-бандида кўзда тутилган ҳуқуқларни амалга ошириши учун олдиндан хабар қилинади.

3. Консуллик жойлашган давлат консуллик муассасасининг барча ходимларига ва уларнинг оила аъзоларига консуллик муассасасининг ходимлари ва уларнинг оила аъзолари мақомини тан олувчи шахсий гувоҳномалар беради.

Консулликнинг мансабдор шахси консулликка ваколат берган давлатнинг фуқароси бўлмоғи даркор.

1. Консуллик жойлашган давлат хоҳлаган вақтда консулликка ваколат берган давлатга дипломатик йўллар орқали у ёки бу консуллик мансабдор шахсининг «persona non grata» эканлигини ёки ҳар қандай консуллик ходими номақбул эканлигини хабардор қилиши мумкин. Бундай ҳолатда консулликка ваколат берган давлат шу шахсни чақириб олиши ва унинг консуллик муассасасидаги вазифаларини тўхтатиши лозим.

2. Агар консулликка ваколат берган давлат ушбу модданинг 1-бандида кўзда тутилган мажбуриятларни оқилона муддатларда бажаришдан воз кечса ёки бажармаса, консуллик жойлашган давлат шу шахсга нисбатан экзеватурани ёки бошқа рухсатни бекор қилиши ёки уни консуллик ходими деб ҳисоблашни тўхтатиши мумкин.

3. Консуллик муассасасининг ходими сифатида тайинланган шахс консуллик жойлашган давлат ҳудудига келишидан олдин ёки консуллик жойлашган давлатга келиб бўлган бўлса, агар у консуллик муассасасидаги ўз мажбуриятларини бажаришга киришгунга қадар, номақбул деб эълон қилиниши мумкин. Бундай ҳолатда консулликка ваколат берган давлат унинг тайинланишини бекор қилади.

4. Ушбу модданинг 1 ва 3-бандларида қайд этилган ҳолларда консуллик жойлашган давлат консулликка ваколат берган давлатга ўз қарорининг сабабларини маълум қилиши шарт эмас.

1. Консуллик жойлашган давлатнинг Ташқи ишлар вазирлиги ёки шу вазирлик кўрсатган идорага:

a) консуллик муассасасининг ходимларининг тайинланиши, уларнинг тайинлангандан кейин консуллик муассасасига келиши, уларнинг тамоман кетиши, ёки улар вазифаларининг тўхтатилиши ва уларнинг мақомига дахлдор бўлган консуллик муассасасида ишлаган даврида, бўлиши мумкин бўлган ҳар қандай ўзгаришлар тўғрисида;

b) консуллик идораси ходимининг оила аъзоси ва у билан доимо бирга яшовчи шахснинг келиши ёки батамом кетиши, шунингдек, тегишли ҳолларда у ёки бу шахснинг, оиланинг шундай аъзоси бўлишидан тўхтаганда;

c) уйдаги хусусий ишчиларнинг келиши ва батамом кетиши ва тегишли ҳолларда, уларнинг шу сифатда хизматларининг тугаши ҳақида;

d) консуллик жойлашган давлатда консуллик муассасасининг ходими ёки хусусий уй ишчиси сифатида ёлланган ёки бўшатилган шахслар тўғрисида хабар берилади.

2. Келиш ёки батамом кетиш тўғрисидаги хабар имкониятга қараб олдиндан берилиши керак.

1. Консулликка ваколат берган давлат ўз номидан ёки у ваколат берган ҳар қандай жисмоний ёки юридик шахслар орқали консуллик жойлашган давлат қонунлари ва қоидаларига мувофиқ ва шу давлатнинг розилиги билан қуйидагиларни мулк сифатида сотиб олиш, фойдаланиш учун олиш, ижарага ёки бошқа бирор шаклда эгалик қилиш ҳуқуқига эга.

a) консуллик бинолари, консуллик муассасаси бошлиғининг қароргоҳи, консуллик жойлашган давлатнинг фуқароси бўлмаган ёки бу давлатда доимий турар жойи бўлмаган консулликнинг ҳар қандай мансабдор шахси ва консулликнинг ҳар қандай хизматчисининг турар жой биноси;

b) ҳар қандай консуллик ва турар жой бинолари қуришга мўлжалланган ер,

2. Ушбу модданинг 1-бандида эслатилган шартларга мувофиқ, консулликка ваколат берган давлат бундай консуллик ва турар жой биноларини ёки ерни ободонлаштириши мумкин.

3. Консуллик жойлашган давлат зарур ҳолларда ушбу модданинг 1 ва 2-бандларида кўрсатилган ҳуқуқларни амалга оширишда консулликка ваколат берган давлатга тегишли ёрдам ва мададни бериб туради.

4. Ушбу моддадаги ҳеч нарсани консулликка ваколат берган давлатнинг консуллик жойлашган давлатдаги, биноларнинг жойлашуви ва конструкциясини тартибга солувчи қонун-қоидаларига риоя қилиш, шунингдек шаҳарни режалаштириш ва районлаштиришни тартибга солишдаги қонун ва қоидаларга риоя қилиш масъулиятидан озод қилади деб тушуниш керак эмас.

Агар иккала Аҳдлашаётган Томонлар консуллик фахрий мансабдор шахсини тайинлашга розилик билдирсалар, у ҳолда ушбу Конвенция асосида тегишли битим тузиш тўғрисида бир бирлари билан ва консуллик фахрий мансабдор шахсларига қўлланиладиган режимни аниқлаш мақсадида одатдаги халқаро ҳуқуқ нормалари масаласида маслаҳатлашадилар.

1. Консуллик жойлашган давлат консуллик муассасасининг вазифаларини бажариш учун барча имкониятларни таъминлайди.

2. Консуллик жойлашган давлат консуллик мансабдор шахсларига лозим даражада ҳурмат билан қарайди, шу консуллик жойлашган давлатнинг фуқаролари бўлмаган ёки унда доимо яшамайдиган шахслар, шунингдек уларнинг оилалари, юқорида қайд этилган шахсларнинг ҳар қандайи билан доимий яшовчиларнинг шахсига, озодлиги ва қадр қимматига ҳар қандай тажовузлардан сақланишнинг керакли чораларини кўради.

1. Консулликка ваколат берган давлат консуллик жойлашган давлатда мазкур модда қоидаларига мувофиқ, ўз давлат байроғи ва тамғасидан фойдаланиш ҳуқуқига эга.

2. Консулликка ваколат берган давлатнинг байроғи ва тамғаси консуллик жойлашган бино пештоғига ўрнатилиши мумкин, шунингдек, консуллик муассасаси бошлиғи қароргоҳида ва хизмат вазифаларини ўтаётган пайтда транспорт воситаларига ҳам ўрнатилиши мумкин.

3. Мазкур модданинг ҳуқуқларини амалга оширишда консулликка ваколат берган давлат консуллик жойлашган давлатнинг қонун-қоидалари ва одатларига риоя қилади.

1. Мазкур модданинг қоидаларига биноан консуллик бинолари дахлсиздир.

2. Консуллик жойлашган давлат маъмурлари консуллик биносининг фақат консуллик муассаса иши учун фойдаланилаётган қисмига кириши мумкин эмас, консуллик муассасасининг бошлиғи ёки консулликка ваколат берган давлатнинг дипломатик ваколатхонасининг бошлиғи ёки уларнинг бирортаси томонидан тайинланган шахс рухсати бўлган бошқа ҳоллар бундан мустаснодир.

Агар ушбу бандда эслатилган шахслар томонидан тўғридан тўғри рад жавоби бўлмаса, зарурий чоралар талаб этувчи ёнғин ёки бошқа табиий офат ҳолларида консуллик жойлашган давлат маъмурлари консуллик биноларига кира оладилар. Аммо маъмуриятга консуллик биноларидан консуллик архивларининг дахлсизлиги қоидасини бузиш, ва айниқса, уни ўрганиш ёки мусодара қилишга рухсат этилмайди.

3. Ушбу модданинг 2-бандидаги қоидаларига риоя қилинган тақдирда, консуллик жойлашган давлат зиммасида консуллик биноларига ҳар хил бостириб киришлар ёки зарар етказиш ва консуллик муассасасининг тинчлигини бузиш ёки унинг шаънини ҳақоратлашга қарши тегишли ҳимоя чораларини кўришнинг махсус мажбуриятлари ётади.

4. Консуллик бинолари, унинг анжом-буюмлари, консуллик муассасасининг мулки, шунингдек транспорт воситалари давлат муҳофазаси ёки ижтимоий мақсадларда мол-мулкни давлат ихтиёрига олишдан дахлсиздир.

Консуллик архивлари ва консуллик ҳужжатлари қачон ёки қаерда бўлишидан қатъи назар, дахлсиздир.

1. Консулликка ваколат берган давлат ёки унинг номидан ҳаракат қилаётган ҳар қандай шахс эгалик қилаётган ёки ижарага олган консуллик бинолари ва консуллик муассасаси бошлиғининг қароргоҳи барча давлат, район ёки муниципал солиқлардан, йиғин ва божлардан озод этилади, аниқ хизмат турлари учун олинадиган тўловлар бундан мустаснодир.

2. Ушбу модданинг 1-бандида кўрсатилган солиқ олишлар, консуллик жойлашган давлатнинг қонун-қоидаларига кўра унинг шахслари томонидан консулликка ваколат берган давлат билан шартнома тузиб ёки унинг номидан ҳаракат қилувчи шахсга нисбатан қўлланиладиган йиғин, бож ва солиқларга нисбатан татбиқ этилмайди.

Давлат хавфсизлиги нуқтаи назаридан кириш тартибга солинган ёки тақиқланган зоналарнинг қонун ва қоидаларига зид келмаганлиги сабабли, консуллик жойлашган давлат консуллик муассасасининг барча ходимларига консуллик округининг ҳудуди бўйлаб эркин ҳаракат қилиш ва юришни таъминлайди.

1. Консуллик жойлашган давлат барча расмий мақсадлар учун консуллик муассасасининг эркин алоқа қилишига рухсат бериши ва ҳимоя қилиши керак. Консулликка берган давлатнинг ҳукумати дипломатик ваколатхоналари ва бошқа консуллик муассасалари билан алоқа қилишда, улар қаерда бўлишидан қатъи назар, консуллик муассасаси барча мос келадиган воситалардан, жумладан дипломатик ва консуллик курьерларидан, дипломатик ёки консуллик вализаларидан ва кодлаштирилган ёки шифрланган депешалардан фойдаланиши мумкин. Аммо, консуллик муассасаси радио узатгич ўрнатиш ва фойдаланишда консуллик жойлашган давлатнинг розилигини олиши лозим.

2. Консуллик муассасасининг расмий корреспонденцияси дахлсиздир. Расмий корреспонденция деганда консуллик муассасасига ва унинг вазифаларига тааллуқли барча корреспонденция тушунилади.

3. Консуллик вализасини ташкил қилувчи барча жойлар, уларнинг характерини кўрсатувчи ташқи кўринувчи белгиларга эга бўлиши, ва фақат расмий корреспонденция ва ҳужжатлардан ёки айнан расмий фойдаланиш предметларидан иборат бўлмоғи керак.

4. Консуллик вализаси очиб кўрилиши ҳам, ушлаб қолиши ҳам мумкин эмас. Аммо консуллик жойлашган давлатнинг ваколатли маъмурлари вализада ушбу модданинг 3-бандида қайд этилган корреспонденциядан, ҳужжат ёки предметлардан ташқари бирор бир нарса борлигига жиддий асослари бўлса, у ҳолатда улар вализани консулликка ваколат берган давлатнинг ваколатли вакили иштирокида очишни талаб қилишлари мумкин. Агар консулликка ваколат берган давлатнинг маъмурияти бундай талабни бажаришдан бош тортса, вализа юборилган жойга қайтарилади.

5. Консуллик курьери унинг статуси ва консуллик вализасини ташкил қилувчи жойлар сони кўрсатилган расмий ҳужжат билан таъминланади. Мустасно ҳолларда консуллик жойлашган давлатнинг розилиги бўлганда, у консуллик жойлашган давлатнинг фуқароси бўла олмайди, агар у консулликка ваколат берган давлатнинг фуқароси бўлмаса, консуллик жойлашган давлатнинг доимий яшаётган шахси бўла олмайди. Ўз вазифаларини бажаришда у консуллик жойлашган давлатнинг ҳимоясида бўлади, шахсий дахлсизликдан фойдаланади ва қандай шаклда бўлишидан қатъий назар, қамоққа олинмайди, ушлаб қолинмайди.

6. Консулликка ваколат берган давлат, унинг дипломатик ваколатхоналари ва консуллик муассасалари махсус консуллик курьерларини ad noc тайинлашлари мумкин. Бундай ҳолларда, шунингдек ушбу модданинг 5-банди қоидалари қўлланилади. Фақат унда эслатилган даҳлсизлик курьерга топширилган консуллик вализасини тайинлангани бўйича топширган вақтдан бошлаб тугатилиши бундан мустасно.

7. Консуллик вализаси рухсат этилган порт ёки аэропортга бораётган кема ёки фуқаролик самолёти командирига топширилиши мумкин.У вализа ташкил қилган жой сони ва расмий ҳужжатлар билан таъминланади, лекин у консуллик курьери ҳисобланмайди. Консуллик муассасаси ваколатли маҳаллий маъмурлар билан келишиб, ўз ходимларидан бирини кема ёки самолёт командиридан бевосита ва тўсқинликсиз вализани қабул қилиш ва унга бундай вализани топшириш учун юбориши мумкин.

1. Консуллик мансабдор шахслари ва уларнинг оила аъзолари шахсий даҳлсизликдан фойдаланадилар. Улар ҳеч қандай шаклда қамоққа олиниши ёки ушлаб қолиниши мумкин эмас. Бу консуллик мансабдор шахсларнинг оила аъзоларига ҳам, агар улар консуллик жойлашган давлат фуқаролари бўлмасалар ёки унда доимо яшамасалар тааллуқлидир.

2. Консуллик жойлашган давлат консуллик мансабдор шахслари ва унинг оила аъзоларига ҳурмат билан муносабатда бўлиши ва уларнинг шахсий эркинлиги ва қадр-қимматини ҳар қандай тажовузлардан сақлаш ва олдини олишнинг барча чора-тадбирларини кўриши керак.

Консуллик мансабдор шахслари, шунингдек уларнинг оила аъзолари, агар улар консуллик жойлашган давлат фуқаролари ёки унда доимий яшовчи шахслар бўлмасалар, консуллик жойлашган давлатда жиноий, фуқаролик ва маъмурий юрисдикциялар бўйича қуйидаги фуқаролик даъволаридан ташқари иммунитетдан фойдаланадилар:

1. Консуллик мансабдор шахслари томонидан шартномалардан келиб чиқувчи, улар бўйича ўзларига консулликка ваколат берган давлат агенти сифатидаги мажбуриятларни тўғридан тўғри ёки билвосита олмаганларида;

2. Учинчи томоннинг нақлиёт воситасида келтириб чиқарилган бахтсиз ҳодиса туфайли етказилган зарар бўйича даъвоси.

1. Суд ва маъмурий ишлар кўрилаётганда консуллик муассаса ходимлари гувоҳ сифатида чақирилишлари мумкин. Консуллик ходими ёхуд хизмат ходими ушбу модданинг 3-бандида қайд этилган ҳолатдан бошқа пайтларда гувоҳлик кўрсатмалари беришдан бош тортиши мумкин эмас. Агар консулликнинг мансабдор шахси гувоҳлик кўрсатмалари беришдан бош тортса, унга нисбатан ҳеч қандай мажбурлов ёки жазо чоралари кўрилиши мумкин эмас.

2. Консуллик мансабдор шахсидан гувоҳлик кўрсатмалари талаб этаётган орган бу шахснинг ўз вазифаларини бажаришига халақит бермасликка ҳаракат қилиши лозим. У имкони бўлганда, гувоҳлик кўрсатмаларини ходимнинг уйида ёхуд консуллик идорасида эшитиши ёки ундан гувоҳлик кўрсатмаларини ёзма шаклда қабул қилиши мумкин.

3. Консуллик муассасаси ходимлари ўз вазифаларини бажариш билан боғлиқ бўлган кўрсатмаларни ёхуд ўз вазифаларига оид бўлган расмий корреспонденция ва ҳужжатларни беришлари шарт эмас. Улар консуллик ваколат берган давлатнинг қонунчилигини тушунтирувчи кўрсатмаларни ҳам беришлари шарт эмас.

1. Ваколат берган давлат 18-19 ва 20-моддаларда кўрсатилган консуллик муассасаси ходимлари ва уларнинг оила аъзолари учун кўзда тутилган ҳар қандай имтиёз ва иммунитетлардан воз кечиши мумкин.

2. Ушбу модданинг 3-бандида кўзда тутилган ҳолдан ташқари бундай воз кечиш доим аниқ ифодаланиши ва консуллик жойлашган давлатга ёзма шаклда билдирилмоғи лозим.

3. Консуллик мансабдор шахси ёки консуллик хизматчиси 19-моддага мувофиқ юрисдикция бўйича иммунитетдан фойдаланиши мумкин бўлган тақдирда иш қўзғаса, у асосий даъво билан бевосита боғлиқ бўлган ҳар қандай қарши даъвога нисбатан юрисдикция бўйича иммунитет ҳавола қилиш ҳуқуқидан маҳрум бўлади.

4. Гражданлик ва маъмурий ишларга нисбатан юридик иммунитетдан воз кечиш суд қарорининг натижаси бўлган ижро ҳаракатлари иммунитетидан воз кечишни англатмайди; бундай ҳаракатларга нисбатан алоҳида воз кечиш талаб этилади.

1. Консуллик мансабдор шахслари, ва шунингдек консуллик жойлашган давлатда доим яшамайдиган консуллик хизматчилари ва уларнинг оила аъзолари консуллик жойлашган давлатнинг қонун ва қоидаларида ажнабийларни рўйхатга олишга нисбатан назарда тутилган барча мажбуриятлардан ва яшаш учун рухсат олишдан озод қилинадилар.

2. Аммо ушбу модданинг биринчи бандидаги қоидалар консулликка ваколат берган давлатнинг доимий хизматчиси ҳисобланмаган ҳар қандай консуллик хизматчиси, ва шунингдек бундай хизматчининг ҳар қандай оила аъзосига нисбатан қўлланилмайди.

1. Консуллик муассасаси ходимлари, агар улар консуллик жойлашган давлат фуқаролари бўлишмаса ёки у ерда доим яшамасалар, консулликка ваколат берган давлат учун ишлашга доир, консуллик жойлашган давлатнинг ажнабийларни ишга ёллаш тўғрисидаги қонун ва қоидаларида белгиланган, ишга рухсат олиш билан боғлиқ бўлган ҳар қандай мажбуриятлардан озод қилинадилар.

2. Консуллик хизматчиларининг хусусий уй ишчилари, агар улар консуллик жойлашган давлатда даромад олиш мақсадида бошқа фаолият билан шуғулланмасалар ва улар консуллик жойлашган давлатнинг фуқароси бўлишмаса ёхуд унда доим яшамасалар, ушбу модданинг 1-бандида кўрсатилган мажбуриятлардан озод этиладилар.

1. Ушбу модданинг 3-бандида назарда тутилган ҳоллардан ташқари, консуллик жойлашган давлатнинг ижтимоий таъминот тўғрисида амалдаги қарорлари консуллик муассасаси ходимлари ва улар билан бирга яшайдиган оила аъзоларига нисбатан, консулликка ваколат берган давлат учун улар томонидан бажарилаётган иш ҳақида қўлланилмайди, агар:

a) улар консуллик жойлашган давлат фуқаролари бўлишмасалар ва у ерда доим яшамасалар;

b) уларга нисбатан ижтимоий таъминот тўғрисида консулликка ваколат берган давлатда ёки учинчи давлатда амал қилаётган қоидалар қўлланилса.

2. Ушбу модданинг 1-бандида кўзда тутилган ажратиш фақат консуллик муассасаси ходимлари хизматида бўлган хусусий уй хизматчиларига нисбатан ҳам қўлланилади, ушбу модданинг 1-бандидаги «а» ва «b» кичик бандларида кўрсатилган шарти билан.

3. Консуллик муассасаси ходимлари ушбу модданинг 2-бандида кўзда тутилган ажратишлардан фойдаланмайдиган шахсларни ишга ёллаганда, ишга ёлловчилар зиммасига юклатилган мажбуриятларни бажаришлари зарур.

4. Ушбу модданинг 1 ва 2-бандларида кўзда тутилган ажратишлар консуллик жойлашган давлат ижтимоий таъминот тизимида ихтиёрий равишда иштирок этишга халақит бермайди, агар бундай иштирокка шу давлат рухсат берса.

1. Консуллик мансабдор шахслари ва консуллик ходимлари, ва шунингдек улар билан бирга турувчи консуллик жойлашган давлат фуқаролари бўлмаган, консуллик жойлашган давлатда доим яшамаётган оила аъзолари шахсий ва мулкий, давлат, туман ва муниципал солиқлари, йиғимлари ва божларининг барчаларидан озод қилинадилар, булардан:

a) одатда товар ва хизматлар нархига киритиладиган билвосита солиқлар;

b) консуллик жойлашган давлат ҳудудида жойлашган хусусий кўчмас мулкдан олинадиган йиғим ва солиқлар, 15-модда қоидаларида назарда тутилган ажратишлар билан бирга;

c) консуллик жойлашган давлат томонидан мерос мулкига солинадиган солиқлар ёки мерос олишдан ундириладиган божлар ёки мулк ўтишига солинадиган солиқлар, 27-модданинг «b» кичик бандидаги қоидаларда назарда тутилган ажратишлар билан бирга;

d) хусусий даромаддан олинадиган солиқ ва йиғимлар, бунга манбаи консуллик жойлашган давлатда бўлган сармоядан тушадиган даромадлар ҳам киради, ва консуллик жойлашган давлатдаги тижорат ва молия корхоналарига қўйилган сармояларга солинадиган солиқлар;

e) хизмат кўрсатишнинг муайян турларидан олинадиган йиғимлар;

f) қайд қилиш, суд ва реестр божларни, ипотека йиғимлари, тамға йиғимлари, 15-модданинг қоидаларида назарда тутилган ажратишлар билан бирга мустаснодир.

2. Хизмат кўрсатиш ходимлари ўз иши учун оладиган иш ҳақига солиқ, йиғим ва божлардан озод қилинадилар.

3. Консуллик муассасаси ходимлари, иш ҳақлари консуллик жойлашган давлатда даромад солиғидан озод қилинмаган шахсларни ишга ёллаганда, шу давлат қонун ва қоидаларига биноан ишга ёлловчилар зиммасига даромад солиғи олиш борасида юкланган мажбуриятларни бажарадилар.

1. Консуллик жойлашган давлат ўзида қабул қилинган қонун ва қоидаларга мувофиқ:

а) консуллик муассасасининг расмий фойдаланиши учун мўлжалланган нарсаларни;

b) консуллик мансабдор шахси ёки у билан бирга яшайдиган оила аъзоларининг шахсий фойдаланишига мўлжалланган, бунга унинг жойлашишига мўлжалланган нарсалар ҳам киради, нарсаларни олиб киришга рухсат беради ва сақлаш, ташиш ва шунга ўхшаш хизматлар учун олинадиган йиғимлардан ташқари, барча божхона божлари, солиқлар ва улар билан боғлиқ бўлган йиғимлардан озод қилади.

2. Консуллик ходимлари дастлабки жойлашиш вақтида олиб кирилган нарсаларга нисбатан ушбу модданинг 1-бандида кўзда тутилган имтиёзлар ва озод бўлишдан фойдаланадилар.

3. Консуллик мансабдор шахслари ва улар билан бирга яшайдиган оила аъзоларининг бирга келган шахсий юклари текширувдан озод қилинади. Агар юклар орасида ушбу модданинг 1-банди «b» кичик бандида кўрсатилгандан бошқа нарсалар ёки бўлмаса консуллик жойлашган давлат қонун ва қоидалари томонидан олиб кириш ва олиб чиқиш тақиқланган нарсалар ёки унинг карантин қонун ва қоидаларига мувофиқ тақиқланган нарсалар борлигини тахмин қилиш учун жиддий асослар бўлгандагина юкларни текширувдан ўтказиш мумкин. Бундай текширув тегишли консуллик мансабдор шахси ёки унинг оила аъзоси иштирокида ўтказилиши керак.

Консуллик муассасаси ходими ёки унинг билан бирга яшаётган оила аъзоси вафот этган тақдирда, консуллик жойлашган давлат:

a) марҳумнинг кўчиши мумкин бўлган мулкини олиб чиқиб кетишга рухсат беради, консуллик жойлашган давлатда сотиб олинган ва вафот этган пайтда олиб чиқиб кетиш ман этилган мулк бундан мустасно,

b) вафот этган шахс консуллик жойлашган давлатда фақат консуллик муассасаси ходими ёки унинг оила аъзоси сифатида бўлгани учун меросига ҳеч қанақа давлат, туман ёки муниципал солиқлари солмайди ёки консуллик жойлашган давлатдаги кўчиши мумкин бўлган мулкдан бож олмайди.

Консуллик жойлашган давлат консуллик муассасаси ходимларини ва улар билан бирга яшаётган оила аъзоларини, уларнинг консуллик жойлашган давлат фуқаролари бўлмаган ёки унда доимий яшаётган шахслар бўлмаганлари учун, барча меҳнат ва давлат мажбуриятларидан, уларнинг қандай мазмунга эга бўлишидан қатъи назар, реквизиция, контрибуция ва ҳарбий қўноқ каби ҳарбий мажбуриятлардан озод этиши лозим.

1. Консуллик муассасасининг ҳар бир ходими ушбу Конвенцияда назарда тутилган имтиёз ва иммунитетлардан консуллик жойлашган давлат ҳудудига ўз иш жойига кетаётиб қадам қўйганидан бошлаб ёки у, шу ҳудудга келиб бўлган бўлса, ўз вазифаларини бажаришга киришган муддатдан бошлаб, фойдаланади.

2. Консуллик жойлашган давлат фуқароси ёки консуллик жойлашган давлат ҳудудида доимий яшайдиган консулликка ваколат берган давлат фуқароси ҳисобланмаган консуллик муассасаси ходимининг у билан бирга яшайдиган оила аъзолари ва унинг хусусий уй хизматчилари ушбу Конвенцияда кўзда тутилган имтиёз ва иммунитетлардан унга ушбу модданинг 1-бандига мувофиқ имтиёз ва иммунитетлар берилган муддатдан бошлаб ёки уларнинг консуллик жойлашган давлат ҳудудига қадам қўйган вақтидан бошлаб ёки улар унинг оила аъзолари ёки хусусий уй хизматчилари ҳисоблана бошлаган вақтдан бошлаб, бундан кейинроқ нима бўлганлигига қараб, фойдаланадилар.

3. Консуллик муассасаси ходимининг вазифалари тўхтатилганда унинг имтиёз ва иммунитетлари, шунингдек у билан бирга яшайдиган оила аъзолари ва унинг хусусий уй хизматчисининг имтиёз ва иммунитетлари ҳам одатда мазкур шахснинг консуллик жойлашган давлатни тарк этиши биланоқ тўхтайди ёки бунинг учун ажратилган оқилона муддат тугагунга қадар қайси фурсат аввалроқ келишига қараб, ҳатто қуролли тўқнашув ҳолатида ҳам бу иммунитет сақланиб қолади.

Ушбу модданинг 2-бандида эслатилган шахсларнинг имтиёз ва иммунитетлари консуллик муассасаси ходимининг оила аъзолигидан чиқишлари билан ёки унинг хизматидан бўшашлари билан тўхтатилади, аммо бундай шахслар консуллик жойлашган давлатни оқилона муддат ичида тарк этишни кўзлаган бўлсалар, уларнинг имтиёз ва иммунитетлари кетгунларига қадар сақланади.

4. Аммо консуллик мансабдор шахси ёки консуллик хизматчиси ўз вазифаларини бажараётгандаги ҳаракатларига нисбатан юрисдикция иммунитети бирор муддат билан чекланмаган ҳолда давом этади.

5. Консуллик муассасасининг ходими вафот этган тақдирда, у билан бирга яшаган оила аъзолари консуллик жойлашган давлатни тарк этишга берилган оқилона муддат тугагунга қадар, қайси фурсат аввалроқ келишига қараб, уларга берилган имтиёз ва иммунитетлардан фойдаланишда давом этадилар.

1. Имтиёз ва иммунитетлардан фойдаланадиган барча шахслар, ўз имтиёз ва иммунитетларга зарар етказмаган ҳолда, консуллик жойлашган давлат қонун ва қоидаларини ҳурмат қилишлари лозим. Улар шунингдек, бу давлатнинг ички ишларига аралашмасликлари лозим.

2. Консуллик бинолари консуллик вазифаларини бажариш билан тўғри келмайдиган мақсадларда ишлатилмаслиги керак.

3. Ушбу модданинг 2-банди қоидалари канцелярия ёки бошқа идора ёки муассасаларнинг консуллик хоналари жойлашган бинонинг қисмида ўрнашиш имкониятини, фақат бундай канцелярия учун ажратилган хоналар консуллик муассасаси фойдаланадиган хоналардан ажратилган бўлиши шарти билан, истисно қилмайдилар. Бу ҳолда мазкур канцеляриялар ушбу Конвенцияга билан консуллик биносининг қисми ҳисобланмайдилар.

Консуллик муассасаси ходимлари консуллик жойлашган давлат қонун ва қоидаларида назарда тутилган учинчи шахсларга ҳар қандай нақлиёт воситаларидан фойдаланиш туфайли келтирилиши мумкин бўлган зарарни суғурта қилиш хусусидаги ҳар қандай талабларга риоя қилишлари шарт.

1. Консуллик мансабдор шахслари консуллик жойлашган давлатда шахсий даромад олиш мақсадида бирор бир касбий ёки тижорат фаолияти билан шуғулланмасликлари лозим.

2. Ушбу Конвенцияда назарда тутилган имтиёз ва иммунитетлар:

a) консуллик хизматчилари ёки консуллик жойлашган давлатда даромад олиш мақсадида шахсий фаолият билан шуғулланаётган хизмат кўрсатиш ходимларига;

b) ушбу банднинг «а» кичик бандида гап кетаётган шахс оила аъзоларига ёки унинг шахсий уй хизматчисига;

с) консуллик жойлашган давлатда даромад олиш мақсадида шахсий фаолият билан шуғулланаётган консуллик муассасаси ходимининг оила аъзоларига берилмайди.

Консуллик мансабдор шахсларидан ташқари консуллик жойлашган давлат фуқаролари ҳисобланувчи ёки унда доим яшовчи консуллик муассасаси ходимлари ва оила аъзолари, шунингдек хусусий уй хизматчилари ҳам афзаллик, имтиёз ва иммунитетлардан фақат консуллик жойлашган давлатнинг уларга берган даражасидагича фойдалана оладилар. Аммо консуллик жойлашган давлат бу шахслар устидан ўз юрисдикциясини шундай тарзда амалга ошириши керакки, бунда консуллик муассасаси вазифаларини бажариш учун кераксиз тўсқинликлар яратилмаслиги керак.

Консуллик вазифалари консуллик муассасалари томонидан бажарилади. Улар шунингдек, ушбу Конвенциянинг қоидаларига мувофиқ дипломатик ваколатхоналар томонидан ҳам бажарилади.

1. Дипломатик ваколатхона консуллик вазифаларини бажарган ҳолларда ушбу Конвенциянинг қоидалари контекстдан келиб чиқадиган даражада қўлланилади.

2. Консуллик вазифаларини бажариш юкланган дипломатик ваколатхона ходимларининг фамилиялари консуллик жойлашган давлатнинг Ташқи ишлар вазирлигига ёки шу вазирлик томонидан кўрсатилган идорага хабар қилинади.

3. Дипломатик ваколатхона консуллик вазифаларини бажараётганда, консуллик жойлашган давлатнинг ҳам маҳаллий, ҳам марказий маъмуриятларига консуллик жойлашган давлат қонунлари, қоидалари ва одатлари йўл қўйган даражада мурожаат қилиши мумкин.

4. Дипломатик ваколатхона ходимларининг ушбу модданинг 2-бандида қайд этилган имтиёз ва иммунитетлари, дипломатик муносабатларга тааллуқли халқаро ҳуқуқ нормалари томонидан бошқарилишда давом этади.

1. Консуллик мансабдор шахси ўз консуллик округи доирасида ушбу Конвенцияда қайд этилган консуллик вазифаларини бажариш ҳуқуқига эга.

2. Консуллик мансабдор шахси консуллик жойлашган давлат розилиги билан консуллик вазифаларини ўз консуллик округи ташқарисида ҳам бажариши мумкин.

3. Консулликка ваколат берган давлат, тегишли давлатларни хабардор қилгандан сўнг консуллик жойлашган давлатда очилган консуллик муассасасига учинчи давлатда консуллик вазифаларини, агар консуллик жойлашган давлат томонидан аниқ изҳор қилинган эътироз бўлмаса бажариш топшириғини бериши мумкин.

4. Консулликка ваколат берган давлатнинг консуллик муассасаси консуллик жойлашган давлатни тегишлича хабардор қилгандан сўнг.агар консуллик жойлашган давлат эътироз билдирмаса, консуллик жойлашган давлатда консуллик вазифаларини учинчи давлат номидан бажариши мумкин.

Ушбу Конвенциянинг бу билан боғлиқ бўлган бошқа моддаларидаги қоидаларни ҳисобга олган ҳолда консуллик функциялари қуйидагилардан иборатдир:

a) консуллик жойлашган давлатда консулликка ваколат берган давлат ва унинг фуқаролари (жисмоний ва юридик шахслар) манфаатларини халқаро ҳуқуқ томонидан йўл қўйилган даражада ҳимоя қилиш;

b) консулликка ваколат берган давлат ва консуллик жойлашган давлат ўртасида савдо, иқтисодий, маданий ва илмий алоқаларни ривожлантиришга ҳамкорлик қилиш, шунингдек улар ўртасида ушбу Конвенция қоидаларига мувофиқ бошқа йўллар билан дўстона муносабатларни ривожлантиришга ҳамкорлик қилиш;

c) барча қонуний йўллар билан консуллик жойлашган давлатнинг савдо, иқтисодий, маданий ва илмий ҳаётидаги шароит ва воқеаларни аниқлаш, консулликка ваколат берган давлат ҳукуматига улар ҳақида хабар бериш ва манфаатдор шахсларга маълумот топшириш;

d) консулликка ваколат берган давлат фуқароларининг паспорт ва бошқа йўл ҳужжатларини бериш, бекор қилиш, тўғрилаш, олиб қўйиш ёки тўхтатиб туриш ва консулликка ваколат берган давлатга боришни хоҳловчи шахсларнинг визалари ёки тегишли ҳужжатларини узайтириш ёки бекор қилиш;

e) консулликка ваколат берган давлатнинг фуқароларига (жисмоний ва юридик шахсларга) ёрдам бериш ва кўмаклашиш;

f) консуллик жойлашган давлатнинг ваколатли органларидан консулликка ваколат берган давлат фуқаролари турган жойни аниқлаш учун, гап уларнинг фаровонлиги ёки бошқа инсонпарварлик мақсадлари ҳақида кетаётган бўлса ёрдам олиш;

g) консулликка ваколат берган давлат фуқароларининг консуллик жойлашган давлатдан шошилинч қайтиш ҳуқуқини қуйидаги шартларга амал қилган ҳолда ҳимоя қилиш:

1. Алоҳида вазият юзага келган тақдирда кетишга чоғланган шахсга алоқадор маъмурий ёки суд расмиятлари бажарилса;

2. Кетишга чоғланган шахснинг қайтиш билан боғлиқ оддий расмиятчиликларга амал қилса, фақат шу шарт биланки, агар бу талабларни бажариш, камситиш характерига эга бўлмаса ва шошилинч қайтишга тўсқинлик қилиш учун фойдаланилмаса;

h) нотариус, фуқаролик ҳолати актларини қайд этувчи вазифаларини ва шунга ўхшаш бошқа вазифаларни бажариш, шунингдек маъмурий характердаги баъзи вазифаларни, бу ҳолда ҳеч нарса консуллик жойлашган давлат қонун ва қоидаларига зид келмаслиги шарти билан, бажариш;

i) консуллик жойлашган давлат қонун ва қоидаларига мувофиқ шу давлат ҳудудида (mortis causa) мерос бўлган тақдирда фуқаролар (жисмоний ва юридик шахслар)нинг манфаатларини ҳимоя қилиш;

j) консуллик жойлашган давлат қонун ва қоидалари белгилаб қўйган доираларда консулликка ваколат берган давлат фуқаролари бўлган вояга етмаган ва тўлиқ ишга яроқлиликка эга бўлмаган бошқа шахсларни ҳимоя қилиш;

к) консуллик жойлашган давлатда қабул қилинган амалиёт ва тартибга риоя қилган ҳолда, вакиллик ёки консулликка ваколат берган давлат фуқароларининг консуллик жойлашган давлатнинг суд ва бошқа муассасаларидаги тегишли вакиллигини консуллик жойлашган давлат қонун ва қоидаларига мувофиқ, агар фармойиш йўқлиги ёки бошқа сабабларга кўра бундай фуқаролар ўз вақтида ўз ҳуқуқ ва манфаатларини ҳимоя қилолмасалар, бу фуқароларнинг ҳуқуқ ва манфаатларини сақловчи қўшимча чоралар ҳақидаги бундай фармойишни олиш мақсадида таъминлаш;

1) суд ва судга оид бўлмаган ҳужжатларни топшириш ёки суд топшириқларини ёхуд консулликка ваколат берган давлат судлари учун амалдаги халқаро битимларга мувофиқ ёки бундай битимлар мавжуд бўлмаган тақдирда консуллик жойлашган давлат қонун ва қоидаларига хилоф бўлмайдиган ҳар қандай бошқа тартибда гувоҳлик кўрсатмаларини олиш бўйича топшириқларни ижро этиш;

m) консулликка ваколат берган давлатга мансуб кемаларга ва бу давлатда қайд этилган тайёралар ҳамда уларнинг экипажига нисбатан консулликка ваколат берган давлат қонун ва қоидалари кўзда тутган назорат ва тафтиш ҳуқуқини амалга ошириш;

n) ушбу модданинг «m» бандида эслатилган кема ва тайёраларга ва уларнинг экипажларига ёрдам бериш, кема ҳужжатларини қабул қилиш ва консуллик жойлашган давлат маъмурлари ҳуқуқларига зарар етказилмаган ҳолда йўлда рўй берган ҳар қандай ҳодисаларни тергов қилиш ва, модомики бу консулликка ваколат берган давлат қонун-қоидаларида назарда тутилган экан, капитан, қўмондонлик таркиби ва матрослар ўртасидаги ҳар қанақа тортишувларни ҳал қилиш;

о) Консуллик жойлашган давлат қонун ва қоидалари ман қилмайдиган ёки амалга оширилишига нисбатан консуллик жойлашган давлатнинг эътирози бўлмаган ёки консулликка ваколат берган давлат ва консуллик жойлашган давлат ўрталарида амал қилаётган халқаро шартномаларда назарда тутилган, консулликка ваколат берган давлатнинг консуллик муассасасига юклаган бошқа ҳар қандай вазифаларни бажариш.

1. Консуллик мансабдор шахслари консулликка ваколат берган давлат фуқаролари билан эркин алоқа қилиш ва учрашиш имконига эга. Консулликка ваколат берган давлат фуқаролари ҳам консулликка ваколат берган давлат консуллик мансабдор шахслари билан алоқа қилиш ва учрашишда худди ўшандай эркинликка эгадирлар.

2. Консуллик мансабдор шахслари консуллик жойлашган давлатнинг ваколатли маъмурларига консуллик ваколат берган давлатнинг дом-дараксиз йўқолган фуқароларини қидириш учун мурожаат қилишлари мумкин.

1. Агар консулликка ваколат берган давлатнинг бирон-бир фуқароси консуллик округи ҳудудида ҳибсга олинган бўлса консуллик жойлашган давлатнинг ваколатли маъмурлари бу ҳақда тўрт кеча-кундуз муддат ичида кечиктирмасдан ваколат берган давлат консуллик муассасасини хабардор қиладилар.

2. Консулликка ваколат берган давлатнинг ҳибсга олинган фуқаросининг шу консуллик муассасаси номига йўллаган ҳар қандай хабари консуллик жойлашган давлат маъмурлари томонидан кечиктирмасдан шу консуллик муассасасига етказилади.

3. Консуллик мансабдор шахси консулликка ваколат берган давлатнинг ҳибсдаги фуқароси билан суҳбатлашиш ҳамда хат ва юбортмаларини бериш ё ундан олиш ва уни юридик вакиллик билан таъминлаш мақсадларида кўришиши мумкин. Бундай кўришишлардан биринчисига рухсат уч кеча-кундуз ичида берилади.

Кейинги кўришишларга рухсат маълум даврлардан кейин, аммо икки ойда бир мартадан кам эмас, берилади.

4. Консуллик мансабдор шахслари консулликка ваколат берган давлатнинг фуқароси номидан ҳар қандай чоралар кўришдан, агар мазкур фуқаро консуллик мансабдор шахсининг иштирокида очиқдан-очиқ бундай ҳаракатларга эътироз билдирса, ўзини тияди.

5. Консуллик жойлашган давлат консулликка ваколат берган давлатнинг ҳибсдаги ёки суд ёки бошқа текширишларга тегишли бўлган фуқароларини мазкур модданинг қоидалари билан хабардор қиладилар, бу ҳақда жиноий иш материалларида тегишли ёзувлар қилинади.

6. Мазкур моддада ҳибсдаги шахсга қилинган ҳавола қамоқда бўлган, ҳибсга олинган ёки шахс озодлигини чеклашнинг бирон бир турига мажбур қилинган шахсга қилинган ҳаволани ҳам ўз ичига олади. Бу тоифага судда ишини кўришни кутаётган ёки консуллик жойлашган давлат ҳудудидаги турмада муддатини ўтаётган шахс ҳам киради.

7. Мазкур моддада баён қилинган ҳуқуқлардан, консуллик жойлашган давлат қонун ва қоидаларига мувофиқ, агар бу қонун ва қоидалар бу ҳуқуқлардан фойдаланиш мўлжалланган мақсадларга тўла етишишга ёрдам берса, фойдаланилади.

1. Консуллик жойлашган давлатнинг ваколатли идоралари консуллик мансабдор шахсини иложи борича қисқа муддат ичида унинг консуллик округи ҳудудида бу идораларга консулликка ваколат берган давлат фуқароси сифатида маълум бўлган шахснинг вафоти ҳақида хабар берадилар, шунингдек консуллик мансабдор шахсини мерос қолган мулк, васият ҳамда консуллик жойлашган давлат ҳудудида бўлган ёки вакил қилинган бирон бир шахснинг бу мулкни бошқарувчиси этиб тайинлангани ҳақидаги хабар билан таништирадилар.

2. Консуллик жойлашган давлатнинг ваколатли идоралари консуллик мансабдор шахсини иложи борича қисқа муддат ичида консуллик жойлашган давлат ҳудудида қолдирилган мерос мулки ҳақида, агар меросхўр ёки рад жавоби олувчи консулликка ваколат берган давлат бўлса ёки бу ваколатли идораларга консулликка ваколат берган давлат фуқароси сифатида маълум бўлган бирон бир шахс бўлса, хабардор қиладилар.

3. Агар консуллик мансабдор шахси консуллик жойлашган давлат ҳудудида консулликка ваколат берган давлат фуқаросининг вафоти ҳақида ёки консуллик жойлашган давлат ҳудудида консулликка ваколат берган давлатнинг марҳум фуқароси қолдирган мерос мулки борлиги ҳақида биринчи бўлиб хабар топса, у консуллик жойлашган давлатнинг ваколатли идораларини бу ҳақда хабардор қилади.

4. Консуллик мансабдор шахси ушбу модданинг 1, 2 ва 3-бандларида эслатилган мерос мулки масалалари бўйича шунингдек консуллик жойлашган давлат қонун ва қоидаларига мувофиқ имкон берилган даражагача қуйидаги ҳуқуқларга эга бўлади:

a) консуллик жойлашган давлатдан бу мерос мулкини ҳимоя қилиш, сақланиши ва ихтиёрида бўлиши бўйича чоралар кўришни ёки шахсан ҳаракат қилишни сўраш;

b) ушбу банднинг «а» кичик бандида гапирилган чораларни кўришда иштирок этиш ёки бирон йўл билан қатнашиш;

c) бу мулкка нисбатан қонуний манфаати бўлган, консуллик жойлашган давлатда турмаган ва унда ўз вакилига эга бўлмаган консулликка ваколат берган давлат фуқаросини вакиллик билан таъминлаш.

5. Ушбу модданинг 4-банд «с» кичик бандига мувофиқ вакиллик билан таъминлаш чоралари кўрилган ҳолларда бу вакиллик то шу йўл билан вакил бўлган шахслар ўзларининг шахсий вакилларини тайинламагунларича ёки ўз ҳуқуқ ва манфаатларини ҳимоя қилиш масъулиятини ўз зиммаларига олмагунларигача амал қилади.

6. Агар ваколат берган давлатнинг бирон бир фуқароси ўзининг консуллик жойлашган давлат ҳудудидаги вақтинчалик бўлиши даврида вафот этса ва бу ҳолда мазкур давлатда доимий яшаш жойига эга бўлмаган бўлса, консуллик мансабдор шахси консулликка ваколат берган давлат қонунини назарда тутгани ҳолда марҳум хонадонига кира олади ва унинг ҳужжатлари, пуллари ва бошқа шахсий мулкини ўз ихтиёрига ола олади, фақат шу шарт биланки консуллик жойлашган давлат ҳудудида бундай ҳужжат, пул ва шахсий мулкка даъвогарлик қилиш ҳуқуқига эга бўлган шахс бўлмаса. Вақтинчалик эгалик қилиш ҳуқуқлари консуллик жойлашган давлат қонун ва қоидаларига мувофиқ тегишли йўсинда тайинланган бошқарувчи ёки бошқа вакил қилинган шахсга берилади.

7. Консулликка ваколат берган давлат ва консуллик жойлашган давлат меросни топширишда қуйидагича кўмаклашадилар:

а) мерос мулкининг қисми ҳисобланган ашёларни агар бу ашёларни олиб чиқиб кетиш ва олиб кириш бунга рухсат бериши талаб қилинаётган давлатлар қонун-қоидалари томонидан очиқ тақиқланмаган бўлса, олиб чиқиб кетиш ва олиб киришга рухсат бериш йўли билан;

б) мерос мулкининг ушбу банднинг «а» кичик банди қоидасига биноан олиб чиқиб кетилмайдиган ҳар қандай қисмини сотишга рухсат бериш йўли билан.

8. Консуллик мансабдор шахси консулликка ваколат берган давлат фуқароси номидан, агар бундай фуқаро консуллик жойлашган давлат ҳудудида бўлмаса, суддан, маъмурлар ёки алоҳида шахслардан пул ёки ушбу фуқаронинг ҳар қандай шахснинг вафоти муносабати билан мерос мулки, бахтсиз ҳодисалар туфайли товон тўлаш ҳақидаги қонунларга мувофиқ берилган тўловларни, шунингдек ҳаётни суғурта қилиш муносабати билан суғурта полиси бўйича тўловларни ҳам қўшиб ҳисоблаганда, олиш ҳуқуқига эга бўлган бошқа мулкни ола олади.

Консуллик мансабдор шахси:

а) консулликка ваколат берган давлат фуқароларини ҳисобга олиб бориш;

б) аризаларни қабул қилиш ва ушбу Битимнинг 30-моддасининг 1-бандини ҳисобга олган ҳолда, консулликка ваколат берган давлат қонун ва қоидаларини ҳисобга олган ҳолда фуқаролик масалаларига тааллуқли ҳужжатларни олиш, бериш ёки топшириш ҳуқуқига эга.

1. Консуллик мансабдор шахси:

а) консулликка ваколат берган давлат фуқароларининг тугилиш ва вафотини ёзиш китобини олиб бориш ва тегишли маълумот ва ҳужжатларни олиш ва қабул қилиш;

б) консулликка ваколат берган давлат фуқароларининг фуқаролик ҳолатларига тааллуқли бўлган ҳар қандай илтимоснома ёки аризаларни қабул қилиш ҳуқуқига эга.

2. Ушбу модданинг 1-бандининг қоидалари тегишли шахсларни консуллик жойлашган давлат қонун ва қоидаларидан келиб чиқувчи бирон бир мажбуриятлардан озод қилмайди.

1. Консуллик жойлашган давлатнинг ваколатли идоралари тасарруфида тегишли ахборот бор бўлган тақдирда улар ваколатли консуллик муассасасини кечиктирмасдан васий ёки ҳомийни тайинлаганда вояга етмаган ёки тўла ишга яроқлиликка эга бўлмаган ва консулликка ваколат берган давлат фуқароси ҳисобланган бошқа шахс манфаатларига жавоб берувчи ҳар қандай ҳол ҳақида хабар қилишга мажбурдирлар.

2. Консуллик мансабдор шахси консуллик жойлашган давлатнинг ваколатли идораларига васийлик ва ҳомийликка тайинлаш учун тўғри келувчи шахслар исми шарифларини таклиф этиш ҳуқуқига эга.

1. Консуллик мансабдор шахси консулликка ваколат берган давлатнинг консуллик жойлашган давлатнинг бандаргоҳида ёки бошқа лангар ташлаб туриш жойида ёки консуллик жойлашган давлатнинг ички ва ҳудудий сувларида турган кемасига тегишли ёрдам ва мадад бериш ҳуқуқига эга.

2. Консуллик мансабдор шахси капитан ва экипаж аъзолари билан кемада ва ҳар қандай бошқа жойда консуллик жойлашган давлат қонун ва қоидаларига мувофиқ учрашиш ва алоқа боғлаш ҳуқуқига эга.

3. Консуллик мансабдор шахси консуллик жойлашган давлатнинг ваколатли идораларига мурожаат қилиши ва консулликка ваколат берган давлат кемаси билан боғлиқ, шунингдек капитан, экипаж аъзолари ва юк хусусидаги барча масалалар юзасидан ўз вазифаларини амалга оширишда улардан кўмак сўраши мумкин.

1. Консуллик мансабдор шахси қуйидаги ҳаракатлар консуллик жойлашган давлат қонун ва қоидаларига зид бўлмаган даражада:

a) консулликка ваколат берган давлат кемасининг бортида юз берган ҳар қандай тўқнашувларни ҳар томонлама текшириб кўриш, капитан ва экипажнинг ҳар қандай аъзосини бундай тўқнашувлар муносабати билан сўроқ қилиш, кема ҳужжатлари билан танишиш, кеманинг рейси ва белгиланган тўхташ жойи хусусида ахборот қабул қилиш, шунингдек кеманинг келиши, кетиши ва унинг бандаргоҳда бўлиши муносабати билан ёрдам кўрсатиш;

b) капитан ва экипаж аъзоси ўртасидаги тортишувларни, ойлик маош ва меҳнат шартномалари хусусидаги тортишувлар ҳам бунга киради, ҳал қилиш;

c) капитан ва экипаж аъзоларини ёллаш ва ишдан бўшатиш билан боғлиқ расмиятчиликларни бажариш;

d) капитан, экипаж аъзолари ёки кема йўловчиларини тиббий даволаш билан таъминлаш ва уларнинг консулликка ваколат берган давлатга қайтариш чораларини кўриш;

e) консулликка ваколат берган давлат кемаси ва унинг юки хусусидаги консуллик жойлашган давлат қонун ва қоидаларида назардан тутилган, ҳар қандай ариза ёки бошқа ҳужжатни олиш, тузиш, тасдиқлаш ёки амал қилиш муддатини узайтириш;

f) консулликка ваколат берган давлатнинг савдо кемалари қатнови ҳақидаги қонун ва қоидаларини қўллаш учун бошқа чораларни кўриш ҳуқуқига эга.

2. Консуллик мансабдор шахси консуллик жойлашган давлат қонун ва қоидаларига мувофиқ капитан ёки экипажнинг ҳар қандай аъзосини консуллик жойлашган давлат суди ёки бошқа идораларида уларга ёрдам бериш учун ҳамроҳлик қилиш ҳуқуқига эга.

1. Агар консуллик жойлашган давлатнинг суд ёки бошқа ваколатли идоралари консуллик жойлашган давлат ички сувлари, ҳудудий сувлари ёки ички сув йўлларида турган консулликка ваколат берган давлат кемаси бортида мажбурий чоралар кўриш ёки тергов олиб бориш ниятида бўлсалар, консуллик жойлашган давлат ваколатли маъмурлари бу ҳақда консуллик мансабдор шахсини аввалроқ хабардор қилишлари керак.

Агар консуллик мансабдор шахси бундай чораларни кўриш вақтида иштирок этмаётган бўлса, консуллик жойлашган давлатнинг ваколатли идоралари уни бу ҳақда илтимосга кўра ёзма равишда хабардор қиладилар. Агар кўрилиши керак бўлган чораларнинг шошилинчлиги консуллик мансабдор шахсига аввалроқ билдирувнома юборишга йўл қўймаса, консуллик жойлашган давлатнинг ваколатли идоралари консуллик мансабдор шахсини, ҳатто унинг тегишли илтимоси йўқ бўлган тақдирда ҳам, ушбу факт ҳақида ёзма равишда хабардор қиладилар.

2. Ушбу модданинг 1-банди қоидалари, шунингдек консуллик жойлашган давлатнинг ваколатли идоралари консулликка ваколат берган давлат кема капитани ёки экипажининг бирон бир аъзосини кемага тааллуқли масалалари юзасидан соҳилга чақирган ҳолда ҳам амал қиладилар.

3. Консуллик мансабдор шахси ёки консулликка ваколат берган давлат кема капитанининг илтимоси ёки рухсати билан амалга оширилгандаги ҳолларни истисно қилганда, консуллик жойлашган давлатнинг суд ёки бошқа ваколатли идоралари консулликка ваколат берган давлат кемаси бортида кеманинг экипаж аъзоларининг ўзаро муносабатлари, меҳнат муносабатлари, кема бортидаги интизом ва кемага алоқадор бўлган ички характердаги бошқа тадбирларга тааллуқли масалалар бўйича ички ишларига, фақат бунда консуллик жойлашган давлатнинг тинчлиги ва хавфсизлигини таъминлаш билан боғлиқ қонун ва қоидалар бузилмаслиги шарти билан, аралашмайдилар.

4. Аммо ушбу модданинг қоидалари божхона кўриги, иммиграция паспорт ва санитар назорати билан боғлиқ оддий чораларга ёки консуллик жойлашган давлатнинг ваколатли идораларининг кема капитани илтимоси ёки розилиги билан кўриладиган бошқа чораларига нисбатан қўлланмайди. Ушбу модда Томонларнинг улар ўртасида амал қилаётган кўп томонлама шартномаларидан келиб чиқувчи ҳуқуқ ва вазифаларга даҳл қилмайди.

1. Агар консулликка ваколат берган давлатнинг кемаси консуллик жойлашган давлатнинг ички ёки ҳудудий сувларида ҳалокатга учраган, саёз жойга тиқилиб қолган ёки бошқа тарзда шикастланган бўлса, консуллик жойлашган давлатнинг ваколатли идоралари консуллик мансабдор шахсини бу ҳақда иложи борича қисқа муддат ичида хабардор қиладилар ва йўловчилар ва экипажни қутқариш ва кема ва унинг юкини қутқариш учун кўрилган чоралар ҳақида хабар берадилар.

2. Консуллик мансабдор шахси консулликка ваколат берган давлат кемасига, унинг экипажи аъзоларига ва кеманинг консулликка ваколат берган давлат фуқаролари ҳисобланган йўловчиларига ёрдам кўрсата олади ёхуд консуллик жойлашган давлатдан бундай ёрдам кўрсатишни сўрай олади.

3. Агар консулликка ваколат берган давлат кемасининг эгаси, капитани ёки бошқа ваколатли шахс кеманинг ёки унинг юкининг қўриқланиши ва қутқарилишини таъминлаш чораларини кўришга ёки уларни ўз қўл остига олишга қодир бўлмаса, консулликка ваколат берган давлатнинг консуллик мансабдор шахси кема эгаси номидан ё бундай ҳолатда кема ёки юк эгаси қабул қилиши керак бўлган чораларни кўради, ё консуллик жойлашган давлатга шундай чораларни кўриш илтимоси билан мурожаат қилади.

4. Ушбу модданинг 1, 2 ва 3-бандларининг қоидалари, шунингдек консулликка ваколат берган давлат ёки учинчи давлат фуқаросига тегишли бўлган ва консуллик жойлашган давлат соҳили ёки сувларида топилган ёки консуллик жойлашган давлат бандаргоҳига келтирилган ашёларга нисбатан ҳам амал қиладилар.

5. Консуллик жойлашган давлатнинг ваколатли идоралари консулликнинг мансабдор шахсига консулликка ваколат берган давлатнинг кемасини қутқариш билан боғлиқ чораларни кўришда барча тегишли ёрдамни кўрсатадилар.

6. Консулликка ваколат берган давлатнинг шикастланган кемаси, шунингдек унинг юки ва мулки консуллик жойлашган давлатда божхона солиқлари, йиғим ва божларидан фақат кема ва унинг юки бу давлатда бож тўлашни кутиб қолдирилган ҳолларни истисно қилганда, озод қилинадилар.

Ушбу Конвенциянинг 44 — 47-моддалари фуқаро авиацияси бўйича иккала давлат аъзо бўлган ҳар қандай халқаро битимга зид келмайдиган даражада фуқаро ҳаво кемаларига нисбатан ҳам амал қилади.

Консуллик мансабдор шахслари ўз вазифаларини бажариш жараёнида:

а) ўз консуллик округининг ваколатли маҳаллий идораларга;

в) консуллик жойлашган давлатнинг ваколатли марказий идораларига консуллик жойлашган давлат қонун, қоидалари ва урф-одатлари ёки тегишли халқаро шартномалар йўл қўйган даражада мурожаат қилишлари мумкин.

1. Консуллик муассасаси консуллик жойлашган давлат ҳудудида консуллик ишларини амалга оширгани учун консулликка ваколат берган давлатнинг қонун ва қоидалари назарда тутган йиғим ва божлар олиши мумкин.

2. Ушбу модданинг 1-бандида эслатилган, йиғим ва божлар сифатида олинадиган пуллар ва бундай йиғим ва божларни олгандаги квитанциялар консуллик жойлашган давлатда барча солиқ йиғим ва божлардан озод қилинади.

3. Консуллик жойлашган давлат консуллик муассасасига шу йўсинда тўпланган пулларни ўзининг расмий банк ҳисобига ўтказишга рухсат беради.

Консуллик муассасаси ходимларининг вазифалари, хусусан:

а) консулликка ваколат берган давлатнинг консуллик жойлашган давлатга унинг вазифалари тўхтаганини хабар қилиши билан;

b) 3-моддага биноан консуллик жойлашган давлат томонидан берилган экзекватура ёки бошқа рухсатномани бекор қилиш билан;

c) консуллик жойлашган давлатнинг консулликка ваколат берган давлатни унинг ходимини консуллик ходими деб ҳисоблашни тўхтатгани ҳақида хабардор қилиши билан тўхтатилади.

Консуллик жойлашган давлат ҳатто қуролли можаро юз берган тақдирда ҳам консуллик муассасаси ходимлари ва консуллик жойлашган давлатнинг фуқаролари ёки унинг ҳудудида доимий яшовчи чет эллик ҳисобланмаган хусусий уй хизматчиларига, шунингдек улар билан бирга яшаётган оила аъзоларига, уларнинг қайси давлат фуқароси эканлигидан қатъи назар, қайтишга тайёргарлик кўришлари ва тегишли ходимларнинг вазифалари тугагандан сўнг иложи борича тезроқ чиқиб кетишлари учун зарур бўлган вақт ва шароитни яратиб бериши лозим. Хусусан, у лозим бўлган тақдирда, уларнинг ихтиёрига ўзлари учун ва консуллик жойлашган давлатда сотиб олган, қайтиб кетиши вақтида олиб кетиш тақиқланмаган, мулклари учун нақлиёт воситалари бериши лозим.

1. Икки давлат ўртасидаги консуллик муносабатлари узилган тақдирда:

a) консуллик жойлашган давлат, ҳатто қуролли ихтилоф рўй берган тақдирда ҳам консуллик биноси, шунингдек консуллик муассасаси ва консуллик архивига ҳурмат билан қараши ва қўриқлаши шарт;

b) консулликка ваколат берган давлат консуллик биноларини, шунингдек уларда жойлашган мулкни ва консуллик архивини қўриқлашни консуллик жойлашган давлатга маъқул бўлган учинчи давлатга ишониб топшириши мумкин;

c) консулликка ваколат берган давлат ўз манфаатлари ва фуқаролари манфаатларини ҳимоя қилишни консуллик жойлашган давлатга маъқул бўлган учинчи давлатга ишониб топшириши мумкин.

2. Консуллик муассасасининг вақтинчалик ёки тамоман ёпилиши ҳолларида ушбу модданинг 1-бандининг «а» кичик банди қоидаларига амал қилинади. Бундан ташқари:

а) агар консулликка ваколат берган давлат консуллик жойлашган давлатда дипломатик ваколатхонага эга бўлмаса, лекин бу давлат ҳудудида бошқа консуллик муассасасига эга бўлса, ушбу консуллик муассасасига ёпилган консуллик муассасасини ундаги мулки ва консуллик архиви билан биргаликда қўриқлаш ва консуллик жойлашган давлат розилиги билан, бу консуллик муассасаси округида консуллик вазифаларини бажариш ишониб топширилиши мумкин; ёки

b) агар консулликка ваколат берган давлат консуллик жойлашган давлатда ва дипломатик ваколатхонага, на бошқа консуллик муассасасига эга бўлмаса ушбу модданинг 1-бандининг «b» ва «с» кичик бандларидаги қоидаларига амал қилинади.

1. Ушбу Конвенция Аҳдлашаётган Томонларнинг конституциявий қоидаларига мувофиқ ратификация қилиниши лозим ва ратификация ёрлиқлари алмашилган санадан 30 кун ўтгандан сўнг кучга киради.

2. Ушбу Конвенция Аҳдлашаётган Томонлардан бирининг дипломатия воситалари орқали бошқа Аҳдлашаётган Томонга ўзининг ушбу Конвенциянинг амал қилишини тўхтатиш нияти ҳақидаги ёзма билдирувномасини топширган санадан олти ой ўтганга қадар ўз кучини сақлайди.

Москва шаҳрида, 1994 йил 2 мартида икки нусхада, ўзбек ва рус тилларида тузилди, иккала матн ҳам бир хил кучга эга.