Ўзбекистон Республикаси Давлат солиқ қўмитасининг марказий аппаратига хизмат сафарига юборилган ва ишга ўтказилган ходимлар учун муносиб турар-жой шароитларини яратиш мақсадида Вазирлар Маҳкамаси қарор қилади:

1. Ўзбекистон Республикаси Давлат солиқ қўмитаси, Тошкент шаҳар ҳокимияти ва Ўзбекистон Республикаси хусусийлаштириш монополиядан чиқариш ва рақобатни ривожлантириш давлат қўмитасининг давлат мулки бўлган 4 қаватли ётоқхона биноси ва унга туташ ҳудудни Давлат солиқ қўмитасига оператив бошқарув ҳуқуқи асосида бепул ўтказиш тўғрисидаги таклифи маъқуллансин. Манзил: Тошкент шаҳар, Яккасарой тумани, Бобур кўчаси, 15 «а» (кейинги ўринларда — объект).

2. Тошкент шаҳар ҳокимиятига бир ҳафта муддатда топшириш. Давлат солиқ қўмитасига эса ушбу қарорнинг 1-бандида кўрсатилган объектни белгиланган тартибда қабул қилиш ва уни мақсадли фойдаланилишини таъминлаш вазифаси юклатилсин.

3. Ўзбекистон Республикаси Давлат солиқ қўмитасига қуйидагиларни таъминлаш юклатилсин:

Ўз бюджетдан ташқари маблағлари ҳисобидан қабул қилинган объектни реконструкция қилиш ва зарур техник жиҳозлар билан таъминлаш, шунингдек туташ ҳудудни ободонлаштириш;

қабул қилинган объектдан Давлат солиқ қўмитаси ходимлари учун хизмат турар-жойи сифатида фойдаланиш ва ходимлар ҳамда уларнинг оила аъзолари учун зарур яшаш шароитларини яратиш.

4. Вазирлар Маҳкамасининг 2013 йил 25 июлдаги «Тошкент шаҳри аҳолисининг турар-жой- коммунал шароитларини янада яхшилаш чоралари тўғрисида»ги 209-сон қарорининг 1-илова 1-банди ўз кучини йўқотган деб ҳисоблансин.

5. Мазкур қарор ижросини назорат қилиш Ўзбекистон Республикаси Бош вазири ўринбосари Б.И. Закиров зиммасига юклатилсин.