Махсус автотранспорт (ахлат ташигичлар, ағдарма машиналар)ни ўз вақтида ишлаб чиқариш ва етказиб беришни таъминлаш, маҳаллий давлат ҳокимияти органлари билан келишган ҳолда етказиб бериш жадвалларини тасдиқлаш.

Санитария жиҳатидан тозалашнинг ихтисослаштирилган корхоналарига махсус техника сотиб олиш учун қайтариш муддати камида 5 йил бўлган имтиёзли кредитлар ажратилишини тижорат банклари томонидан таъминлаш.

Туманлар ва шаҳарларда махсус автотранспорт воситалари (ахлат ташигичлар, бульдозерлар, юк ортгичлар, ағдарма машиналар) ва асбоб-ускуналар (автотарозилар) харид қилинишини таъминлаш.

2014-2015 йилларда ахлат тўплаш шохобчалари, қаттиқ маиший чиқиндиларнинг янги полигонларини ташкил этиш ва уларни тегишли равишда жиҳозлаш дастурларига мувофиқ қаттиқ маиший чиқиндилар билан ишлашнинг қуйидагиларни назарда тутувчи схемаларини ишлаб чиқиш:
‎1) ахлат тўплаш майдончалари ва контейнерларни жойлаштириш;
‎2) янгидан ташкил этиладиган полигонларни жойлаштириш;
‎3) қуйидагиларда:
‎туман марказларида, туман марказидан 25 километргача радиусда жойлашган шаҳар посёлкалари ва қишлоқ аҳоли пунктларида, бир ҳафтада камида икки марта;
‎туман марказидан 25 километрдан 80 километргача масофадаги қишлоқ аҳоли пунктларида — бир ҳафтада камида бир марта аҳоли пунктлари ҳудудларини изчил қамраб олиш ва махсус автотранспорт ҳаракатланиши йўналишлари ҳисобга олинган ҳолда шаҳарларда санитария жиҳатидан тозалаш бўйича ихтисослаштирилган ташкилотлар томонидан ва туманларда ободонлаштириш бошқармалари томонидан тузилган қаттиқ маиший чиқиндиларни ташиб кетишнинг кундалик режа- жадвалини тузиш.
‎Яқин жойлашган қишлоқ аҳоли пунктларида, бироқ туман марказидан 80 километрдан ортиқ узоқликда яшайдиган аҳолига хизмат кўрсатиш учун айрим туманларда (асосан Қорақалпоғистон Республикаси, Навоий, Қашқадарё, Жиззах ва Тошкент вилоятларида) туман ободонлаштириш бошқармаларининг қаттиқ маиший чиқиндилар филиалларга бириктирилган ҳудудларга ташиб кетилишини таъминлайдиган филиаллари ташкил этилади.

Қуйидагиларни таъминлаш:
‎ахлат тўплаш майдончалари ва қаттиқ маиший чиқиндилар полигонлари учун ер ажратиш;
‎полигонлар учун тегишли санитария-экология хулосаларини ва кадастр ҳужжатларини расмийлаштириш;
‎тегишли техник талабларга жавоб берадиган махсус автотранспорт воситаларини сақлаш жойларини (гаражларни) ташкил этиш (транспорт воситалари учун ёпиқ тўхташ жойлари, ҳайдовчиларни ҳар куни кўрикдан ўтказиш учун тиббиёт пунктлари, транспортни техник кўрикдан ўтказиш, қўриқлаш жойлари, таъмирлаш устахоналари);
‎санитария жиҳатидан тозалаш бўйича ихтисослаштирилган ташкилотларининг санитария жиҳатидан тозалаш хизмати ва ободонлаштириш бошқармаларининг ходимларини махсус кийим-бош (расмий кийим) билан таъминлаш.

Қуйидаги ҳисоб-китоблардан келиб чиқиб қўшимча ахлат тўплаш шохобчалари қуриш:
‎шаҳарларда — 5 та кўп квартирали уй учун 1 та ахлат тўплаш шохобчаси, ҳар бир пунктни 4 та контейнер билан жиҳозлаган ҳолда (ҳисоблаб чиқилгани бўйича 1480 та ахлат тўплаш шохобчаси, 8389 та контейнер);
‎туман марказларида — 5 та кўп квартирали уй учун битта ахлат тўплаш шохобчаси, ҳар бир пунктни 2 та контейнер билан жиҳозлаган ҳолда (ҳисоблаб чиқилгани бўйича 2044 та ахлат тўплаш шохобчаси, 4088 та контейнер);
‎шаҳар посёлкалари ва қишлоқ аҳоли пунктларида — 100 та уй хўжалигига битта ахлат тўплаш шохобчаси (ҳисоблаб чиқилгани бўйича 49268 та ахлат тўплаш шохобчаси).

Ишлаб турган қаттиқ маиший чиқиндилар полигонларини:
‎145,5 минг п.м узунликдаги периметр бўйича атрофини ўраш;
‎уларни бульдозерлар, автоюклагичлар, ағдарма машиналар (469 та) ва автотарозилар (175 та) билан жиҳозлаш.

Қаттиқ маиший чиқиндиларнинг янги полигонларини қуриш:
‎Бухоро шаҳри эҳтиёжлари учун 10 га майдонда 1 та полигон;
‎Андижон, Булоқбоши, Зафаробод, Янгиобод, Муборак, Наманган, Оқолтин, Ховос, Бўстонлиқ, Оққўрғон, Оҳангарон, Чиноз, Қўштепа, Тошлоқ, Учкўприк ва Ҳазорасп туманлари эҳтиёжлари учун ҳар бирининг майдони 2 га бўлган 16 та полигон;
‎туман марказларидан (80 километрдан 300 километргача) ва қаттиқ маиший чиқиндиларни кўмиш полигонларидан (40 километрдан ортиқ) анча йироқ масофада жойлашган қишлоқ аҳоли пунктларида санитария қоидалари ва нормалари йўл қўядиган минимал масофада (0,5 — 1,0 км) 0,5-1 га майдонли 107 та мини-полигон (1-илова*);
‎ташкил этилаётган янги полигонларнинг 30,5 минг п.м узунликда периметр бўйича атрофини ўраш; шаҳарлар ва туманлар эҳтиёжлари учун ташкил этилаётган янги полигонларни бульдозерлар, автоюклагичлар ва ағдарма машиналар (51 та) ва автотарозилар билан жиҳозлаш.

Бухоро шаҳрида (Бухоро вилояти) ва Булоқбоши (Андижон вилояти), Бўстонлиқ ва Оҳангарон (Тошкент вилояти) туманларида қаттиқ маиший чиқиндиларнинг тўлган полигонларини тўлиқ ёпиш.

Қаттиқ маиший чиқиндиларнинг эгасиз полигонларини туман ободонлаштириш бошқармаларига бериш (2-илова*).

Қаттиқ маиший чиқиндиларни сортларга ажратиш ва қайта ишлаш бўйича тижорат тузилмаларини ташкил этишни, улар ўртасида кооперация алоқалари ўрнатилишини назарда тутувчи транспортда ташиш харажатларини қисқартириш мақсадида қаттиқ маиший чиқиндиларни, кейинчалик чиқитсиз қайта ишлашни ҳисобга олган ҳолда, сортларга ажратиш ва утилизация қилиш бўйича комплекс тадбирларни ишлаб чиқиш.

Санитария жиҳатидан тозалаш бўйича ихтисослаштирилган ташкилотлар, ободонлаштириш бошқармаларининг хўжалик ҳисобидаги участкалари ва полигонлар фойдаланишга топширилишига қараб қўшимча иш ўринлари ташкил этиш (бошқарув ва ишлаб чиқариш ходимлари: участкалар бошлиқлари, операторлар, механиклар, чилангар-таъмирловчилар, ҳайдовчилар, юк ортувчилар ва шу кабилар) (ҳисоблаб чиқилгани бўйича 4 853 нафар).

Санитария жиҳатидан тозалаш бўйича ихтисослаштирилган ташкилотларни ва ободонлаштириш бошқармалари хизматларидан фойдаланувчи жисмоний ва юридик шахсларни қуйидаги босқичларда ялпи хатловдан ўтказиш:

1-босқич. Қарорга 9-10-иловаларга мувофиқ тегишли мутахассислар таркибида вилоят ҳокимининг алоҳида қарори асосида ишчи гуруҳлар ташкил этиш.

2-босқич. Қаттиқ маиший чиқиндиларни ташиб кетиш хизматларидан амалда фойдаланувчи аҳоли сонини аниқлаш.

3-босқич. Хатлов натижасида аниқланган аҳоли сонини шаҳар ва туман ички ишлар бошқармаларининг фуқароларнинг кириши-чиқиши ва расмийлаштириш бўлимлари, фуқароларнинг ўзини ўзи бошқариш органлари, статистика бошқармалари, оилавий поликлиникалар ҳамда сув, иссиқлик, газ ва электр таъминоти бўйича коммунал хизмат кўрсатиш корхоналарининг маълумотлари билан таққослаш.

4-босқич. Шаҳардаги мавжуд юридик шахсларни хатловдан ўтказиш ва хатлов натижасида олинган маълумотларни статистика бошқармалари ва солиқ органларининг маълумотлари билан таққослаш.

5-босқич. Санитария жиҳатидан тозалаш бўйича ихтисослаштирилган корхоналар ва ободонлаштириш бошқармаларининг хатлов натижасида аниқланган истеъмолчилар билан шартномалар тузиши.

6-босқич. Санитария жиҳатидан тозалаш бўйича ташкилотларнинг абонент базасини шакллантириш.

Шартномавий-ҳуқуқий ишларни такомиллаштириш:
‎жисмоний ва юридик шахслар учун санитария жиҳатидан тозалаш бўйича хизматлар кўрсатиш учун намунавий шартномани ишлаб чиқиш;
‎мавжуд қарздорликни фуқаролик судлари ва хўжалик судлари орқали ундириб олиш юзасидан зарур чора-тадбирлар кўриш.

«Биллинг» компьютерлаштирилган дастурини жорий этиш йўли билан санитария жиҳатидан тозалаш бўйича ихтисослаштирилган ташкилотлар ва ободонлаштириш бошқармаларининг хўжалик ҳисобидаги бўлинмалари томонидан кўрсатиладиган хизматлар ҳажмини ва уларнинг абонентларини ҳисобга олиш тизимини автоматлаштириш.

Махсус автотранспорт воситаларини «GPS» узоқда туриб назорат қилишнинг автоматлаштирилган тизими билан жиҳозлаш ҳисобига улардан самарали фойдаланишни таъминлаш.

Санитария жиҳатидан тозалаш бўйича ихтисослаштирилган ташкилотлар ва ободонлаштириш бошқармаларининг хўжалик ҳисобидаги бўлинмалари томонидан қўлланиладиган амалдаги тарифларнинг иқтисодий асосланганлигини ўрганиш ва ўрганиб чиқиш якунлари бўйича туман (шаҳар) ҳокимликлари томонидан қаттиқ маиший чиқиндиларни ташиб кетиш хизматларига тарифларнинг янги даражаларини тасдиқлаш тўғрисида таклифлар киритиш.

Ободонлаштириш бошқармаларининг хўжалик ҳисобидаги бўлинмалари учун Ғазначиликнинг ҳудудий бўлинмаларида алоҳида шахсий ҳисоб рақамлари очиш. Ободонлаштириш бошқармаларининг хўжалик ҳисобидаги бўлинмалари томонидан даромад ва харажатнинг алоҳида ҳисоби юритилишини, юқори молия органига ҳисоботлар топширилишини таъминлаш.

Ободонлаштириш бошқармаларининг санитария жиҳатидан тозалаш бўлинмалари учун ходимларнинг мақбул сонини аниқлаш ва штат жадвалини белгиланган тартибда келишиш.

Санитария жиҳатидан тозалаш бўйича ихтисослаштирилган ташкилотлар ва ободонлаштириш бошқармаларининг хўжалик ҳисобидаги бўлинмалари томонидан абонентлар тўлиқ қамраб олиниши, даромадлар тушиши тўлиқлиги, дебиторлик-кредиторлик қарзларнинг ҳолати, ҳисоб ва ҳисобот юритилиши устидан доимий равишда мониторинг олиб бориш.

IV. Қаттиқ маиший чиқиндиларни ташиб кетишнинг ташкил этилишини назорат қилиш ва мониторингини олиб бориш

Қуйидагилар йўли билан чиқиндилар билан ишлаш масалаларида аҳолининг ҳуқуқий ва санитария-экологик саводхонлигини ошириш мақсадида аҳоли ўртасида кенг кўламли тушунтириш ишларини ташкил этиш:
‎чиқиндиларни тўғри тўплаш ва ташиб кетишнинг санитария-экологик аҳамиятини оммавий ахборот воситалари орқали кенг ёритиш;
‎санитария жиҳатидан тозалаш ҳамма жойда ташкил этилишини оммавийлаштирувчи радиоэшиттиришлар ва телекўрсатувларни, республика матбуотида ва маҳаллий матбуотда мақолалар эълон қилинишини мунтазам равишда ташкил этиш;
‎санитария жиҳатидан тозалаш ташкилотларига реклама роликларини жойлаштириш учун имтиёзли эфир дақиқаларини белгиланган тартибда бериш, қаттиқ маиший чиқиндиларни ташиб кетиш хизматлари кўрсатиш тартиби ва қоидаларини намойиш қилиш.

Қаттиқ маиший чиқиндиларни ташиб кетиш ва кўмиб ташлашни ташкил этиш ва назорат қилиш моделига (3-илова) мувофиқ ҳар бир шаҳар ва туман бўйича аҳоли пунктларини санитария жиҳатидан тозалашни ташкил этиш тадбирлари режасини ишлаб чиқиш.

Минтақаларда санитария жиҳатидан тозалашни ташкил этиш масалалари бўйича Қорақалпоғистон Республикаси Вазирлар Кенгаши Раисининг ва вилоятлар ҳокимлари ўринбосарларининг, Ўзбекистон Республикаси Табиатни муҳофаза қилиш давлат қўмитаси, Давлат статистика қўмитаси, Соғлиқни сақлаш вазирлиги ва «Ўзавтосаноат» АК раҳбарларининг ҳисоботларини Ўзбекистон Республикаси Вазирлар Маҳкамаси Президиуми мажлисларида кўриб чиқиш.