«Ўзбекистон Республикасида маъмурий-ҳудудий тузилиш, топонимик объектларга ном бериш ва уларнинг номларини ўзгартириш масалаларини ҳал этиш тартиби тўғрисида»ги Ўзбекистон Республикаси Қонунининг 2, 5, 9 ва 13-моддаларига мувофиқ Ўзбекистон Республикаси Олий Мажлисининг Сенати қарор қилади:

1. Ўзбекистон Республикаси Олий Мажлиси Қонунчилик палатасининг «Тошкент вилоятининг Зангиота ва Тошкент туманларини бирлаштириш ҳамда Тошкент вилоятининг Зангиота, Қибрай туманлари ва Тошкент шаҳрининг Ҳамза тумани ҳудудларини қисман ўзгартириш тўғрисида»ги 2010 йил 12 августдаги 137-II-сонли Қарори маълумот учун қабул қилинсин.

2. Ўзбекистон Республикаси Вазирлар Маҳкамасининг Тошкент вилоятининг Зангиота ва Тошкент туманларини бирлаштириш ҳамда Тошкент вилоятининг Зангиота, Қибрай туманлари ва Тошкент шаҳрининг Ҳамза тумани ҳудудларини қисман ўзгартириш тўғрисидаги таклифи маъқуллансин.

3. Тошкент вилояти таркибида Зангиота ва Тошкент туманлари негизида умумий майдони 38 299,6 гектар бўлган Зангиота тумани тузилсин ҳамда унинг таркибига Келес шаҳри, Эшонгузар ва Ўртаовул қўрғонлари, Бўзсув, Гулистон, Зангиота, Кўксарой, Кўктерак, Масалбой, Назарбек, Туркистон, Хасанбой, Хонобод, Чиғатой Оқтепа, Чоштепа, Чувалачи, Эркин, Юнусобод, Ўзгариш, Қатортол, Қизғалдоқ қишлоқ фуқаролар йиғинлари киритилсин.

Келес шаҳри Зангиота туманининг маъмурий маркази этиб белгилансин.

4. Тошкент вилояти Зангиота тумани ҳудудининг бир қисми:

505,4 гектар майдон (Қибрай тумани билан чегарадош, аҳоли пунктлари бўлмаган ҳудуд) Тошкент вилоятининг Қибрай тумани таркибига;

278 гектар майдон (Тошкент шаҳрининг Ҳамза тумани билан чегарадош «Гўзал» ва «Олмос» маҳаллалари ҳудуди) Тошкент шаҳрининг Ҳамза тумани таркибига ўтказилсин.

5. Ўзбекистон Республикаси Вазирлар Маҳкамаси томонидан тақдим этилган Тошкент вилояти Зангиота, Қибрай туманларининг ва Тошкент шаҳри Ҳамза туманининг чегаралари илова қилинаётган тавсифлар ва чизма шаклларга мувофиқ тасдиқлансин (1—5-сонли иловалар*).

6. Белгилаб қўйилсинки, бирлаштирилаётган Зангиота ва Тошкент туманларидаги сайлов округларидан сайланган халқ депутатлари туманлар Кенгашларининг депутатлари янги тузилган халқ депутатлари Зангиота тумани Кенгаши депутатлари ҳисобланади.

7. Ўзбекистон Республикаси Вазирлар Маҳкамаси ушбу Қарорни бажаришга доир комплекс чора-тадбирларнинг амалга оширилишини таъминласин.

8. Ушбу Қарор қабул қилинган кундан эътиборан кучга киради.

1-сонли бошланғич нуқта сифатида Тошкент шаҳри чегарасининг амалдаги 21-сонли нуқтаси қабул қилинган.

Чегара 1-сонли нуқтадан жанубий йўналишда Чирчиқ дарёсининг дамбаси бўйича ўтадиган асфальтбетон автомобиль йўлининг ўқи бўйича чап соҳил дамбаси билан кесишиш жойига қадар 1 150 метр масофада 2-сонли нуқтагача давом этади.

Чегара 2-сонли нуқтадан бурилади ва шарқий йўналишда чап соҳил дамбаси бўйлаб ўтадиган асфальтбетон автомобиль йўлининг ўқи бўйича автодромнинг бетон девори билан кесишиш жойига қадар 960 метр масофада 3-сонли нуқтагача давом этади.

Чегара 3-сонли нуқтадан автодромнинг бетон девори бўйича шарқий ва шимоли-шарқий йўналишда 585 метр масофада 4-сонли нуқтагача давом этади.

Чегара 4-сонли нуқтадан «Нерудник» ОАЖ ёрдамчи хўжалиги ҳудуди чегараларигача шимоли-ғарб томонга 300 метр масофада 5-сонли нуқтагача бурилади.

Чегара 5-сонли нуқтадан шимоли-шарққа бурилади ва Хўкизорол ороли чеккаси бўйлаб суғориш тармоғи билан кесишгунга қадар 4 465 метр масофада 6-сонли нуқтагача давом этади.

Чегара 6-сонли нуқтадан ғарб томонга бурилади ва Хўкизорол оролини ҳамда Чирчиқ дарёси қайирини 650 метр масофада 7-сонли нуқтагача кесиб ўтади.

Чегара 7-сонли нуқтадан жануби-ғарбга бурилади ва Чирчиқ дарёси қайирининг ўнг қирғоғи бўйлаб давом этади ва 4 820 метр масофада 1 -сонли бошланғич нуқта билан туташади.

1-сонли бошланғич нуқта сифатида тупроқ йўли Амин Турдиев кўчаси билан кесишган жой қабул қилинган.

Чегара 1-сонли нуқтадан шарқ томонга бурилади ва Товкент ариғи бўйлаб 555 метр масофада 2-сонли нуқтагача давом этади.

Чегара 2-сонли нуқтадан жануб томонга бурилади ва «Олмос» маҳалласининг кўчаси бўйича ариқ билан кесишиш жойигача 291 метр масофада 3-сонли нуқтагача давом этади.

Чегара 3-сонли нуқтадан жануби-шарқий йўналишда «Отамозор» қабристони ҳудудидан ўтган суғориш тармоғи бўйича 752 метр масофада 4-сонли нуқтагача давом этади.

Чегара 4-сонли нуқтадан 58-ҳарбий шаҳарчанинг бетон девори бўйича 60 метр масофада жануби-шарқ томонга, кейин 58-ҳарбий шаҳарчанинг бетон девори бўйича 96 метр масофада жануби-ғарбий йўналишда бурилади, сўнгра чегара жануб томонга бурилади ва 58-ҳарбий шаҳарчанинг бетон девори бўйича 62 метр масофада давом этади, ундан кейин чегара 58-ҳарбий шаҳарчанинг бетон девори бўйича 91 метр масофада жануби-шарқ томонга бурилади, шундан сўнг чегара 58-ҳарбий шаҳарчанинг бетон девори бўйича жануби-ғарб томонга 271 метр масофада 5-сонли нуқтагача бурилади.

Чегара 5-сонли нуқтадан жануби-шарқ томонга бурилади ва суғориш тармоғи бўйича 86 метр масофада давом этади, кейин чегара шимоли-шарқ томонга бурилади ва суғориш тармоғи бўйича 61 метр масофада давом этади, сўнгра чегара шарқ томонга бурилади ва турар жой участкаларининг девори бўйича 85 метр масофада дала йўли билан кесишиш жойигача давом этади. Дала йўли билан кесишиш жойидан чегара жануби-шарқ томонга бурилади ва дала йўли бўйича 145 метр масофада автомобиль йўлигача давом этади ва уни 26 метр масофада жануби-ғарбий йўналишда 6-сонли нуқтагача кесиб ўтади.

Чегара 6-сонли нуқтадан жануби-шарқ томонга бурилади ва «Олмос» маҳалласи ҳовлилари бўйлаб 359 метр масофада 7-сонли нуқтагача давом этади.

Чегара 7-сонли нуқтадан шимоли-шарқ томонга бурилади ва Толариқ ариғининг чап қирғоғи бўйича 73 метр масофада давом этади, сўнгра чегара жануби-шарқ томонга бурилади ва 23 метр масофада дала йўли билан кесишиш жойигача давом этади, шундан кейин чегара шимоли-шарқ томонга бурилади ва дала йўли бўйича Баратхўжа ариғи кўприги чеккасигача 100 метр масофада 8-сонли нуқтагача давом этади.

Чегара 8-сонли нуқтадан Баратхўжа ариғининг чап қирғоғи бўйлаб Тошкент ҳалқа йўлининг қизил чизиғи билан кесишиш жойигача 1 214 метр масофада 9-сонли нуқтагача давом этади.

Чегара 9-сонли нуқтадан Тошкент ҳалқа йўлининг ўқидан 39 метр масофада ўтадиган Тошкент ҳалқа йўли қизил чизиғи бўйича шимоли-шарқий йўналишга бурилади ва ушбу қизил чизиқ бўйича суғориш тармоғи билан кесишгунга қадар 2 530 метр масофада 10-сонли нуқтагача давом этади.

Чегара 10-сонли нуқтадан бурилади ва суғориш тармоғининг ўқи бўйича шимоли-шарқий йўналишда Амин Турдиев кўчаси билан кесишиш жойигача 750 метр масофада 11-сонли нуқтагача давом этади.

Чегара 11-сонли нуқтадан Амин Турдиев кўчасининг қатнов қисми ўқи бўйича суғориш тармоғи билан кесишиш жойигача 260 метр масофада давом этади ва бошланғич 1-сонли нуқта билан туташади.