Ўзбекистон Республикаси Ҳукумати ва Бангладеш Республикаси Ҳукумати, бундан кейин Аҳдлашувчи Томонлар деб аталувчилар,

икки мамлакат ўртасида тенг ҳуқуқлилик, ўзаро манфаатдорлик ва халқаро ҳуқуқ принциплари асосидаги иқтисодий ва савдо муносабатларини ривожлантириш ва мустаҳкамлашга кўмаклашишни истаб,

ҳар икки мамлакатнинг хўжалик юритувчи субъектлари ўртасидаги савдо муносабатларининг ривожланиши учун шартнома-ҳуқуқий асослар ва қулай шароитлар яратиш заруратидан келиб чиқиб, ва

Савдо ва тарифлар бўйича Бош битим (ГАТТ) ҳамда Жаҳон савдо ташкилоти (ЖСТ)нинг принципларига мувофиқ равишда савдо соҳасидаги ўз муносабатларини ривожлантиришга интилиб,

қуйидагилар тўғрисида келишиб олдилар:

Аҳдлашувчи Томонлар ҳар икки мамлакатда амалда бўлган қонунларга мувофиқ, тенг ҳуқуқлилик, ўзаро фойда ва манфаатдорлик принципларига амал қилган ҳолда, уларнинг мулкчилик шаклларидан қатъи назар, иккала мамлакатнинг корхона, ташкилот, муассаса, компания ва ассоциациялари ўртасида узоқ муддатли ва барқарорлик асосидаги бевосита икки томонлама савдо ва иқтисодий муносабатларни ривожлантириш ва кенгайтириш учун тегишли чора-тадбирлар кўрадилар.

Аҳдлашувчи Томонлардан ҳар бири бошқа Аҳдлашувчи Томонга иқтисодий зарар етказиши мумкин бўлган хатти-ҳаракатларни қўлламайди.

Савдо ва иқтисодий ҳамкорликни ривожлантириш учун ўзаро манфаатли шароитлар яратиш мақсадида Аҳдлашувчи Томонлар қуйидагилар борасида бир-бирлари учун мумкин қадар қулайлик бериш режимини яратадилар:

импорт ва экспортга нисбатан қўлланиладиган бож тўловлари, солиқлар ва йиғимлар;

товарларнинг божхона расмийлаштирилиши, транзити, жойлаштирилиши, туширилиши ва шу сингари бошқа хизматларга тааллуқли бўлган низомлар ва қоидалар;

солиқлар ва бевосита ёки билвосита равишда ундириладиган исталган кўринишдаги бошқа ички йиғимлар;

ички бозорда товарларни сотиш, сотиб олиш, транспортировка қилиш, тақсимлаш ва улардан фойдаланишга оид қоидалар;

импорт ва экспорт учун лицензиялар бериш.

2-модданинг мумкин қадар қулайлик бериш режими тўғрисидаги қоидалари қуйидагиларга нисбатан қўлланилмайди:

чегара яқинидаги савдони ва чегара яқинидаги юк ташишларни енгиллаштириш мақсадида Аҳдлашувчи Томонлардан бирининг қўшни .давлатлар учун яратадиган имтиёзлари;

Аҳдлашувчи Томонлардан бирининг бугунги кунда ёки келгусида божхона уюшмалари, эркин савдо зоналари ёки савдо-иқтисодий ҳамкорликнинг бошқа шаклларидаги иштироки муносабати билан учинчи мамлакатлар учун яратиладиган имтиёзлар;

умумий преференциялар тизими бўйича яратиладиган имтиёзлар.

Аҳдлашувчи Томонлар ўртасидаги иқтисодий ва савдо ҳамкорлиги, ҳар икки мамлакатда амалда бўлган қонунларга, шунингдек халқаро савдо амалиёти нормаларига риоя қилган ҳолда, мулкчилик шакллари ва ишчан ҳамкорлик шаклларидан қатъи назар, келишилган нархлар бўйича, иккала мамлакатнинг хўжалик фаолияти юритувчи субъектлари ўртасида контрактлар тузиш йўли билан амалга оширилади.

Савдо ва иқтисодий ҳамкорликни амалга оширишда Аҳдлашувчи Томонлар мол айирбошлашни баланслаштиришга интиладилар.

Аҳдлашувчи Томонлар ўртасидаги савдо ва иқтисодий ҳамкорлик борасидаги барча ҳисоб-китоблар ва тўловлар, агар Аҳдлашувчи Томонлар ўзга тарзда келишган бўлмасалар, эркин муомаладаги валютада халқаро банк амалиётида кўзда тутилган исталган шаклда амалга оширилади.

Аҳдлашувчи Томонлар ҳар икки мамлакатда амалда бўлган қонунларга мувофиқ бир Аҳдлашувчи Томоннинг бошқа Аҳдлашувчи Томон ҳудудида қўшма корхоналар, хўжалик фаолияти юритувчи субъектларнинг филиаллари, банклар ва. бошқа ташкилотларни тузишида кўмаклашадилар. Аҳдлашувчи Томонлар инвестициялар, илғор технологияларни татбиқ этишнинг, шунингдек иқтисодий мақсадга мувофиқлик принципларидан келиб чиққан ҳолда, технологик жиҳатдан боғлиқ бўлган ишлаб чиқаришларнинг кооперациялашган алоқаларини мустаҳкамлаш ва ривожлантиришнинг муҳимлигини эътироф этадилар.

Аҳдлашувчи Томонлар иқтисодий, саноат ва техникавий ҳамкорлик асосида:

инвестициялар;

қишлоқ хўжалиги ва унинг маҳсулотларини қайта ишлаш;

енгил саноат ва саноатнинг бошқа соҳаларида;

транспорт ва алоқа;

атроф-муҳитни муҳофаза қилиш;

туризмни ривожлантириш;

мутахассислар билан алмашиш соҳаларида бевосита хўжалик алоқаларини кенгайтириш учун имконият яратадилар.

Аҳдлашувчи Томонлар давлатлараро савдо ва иқтисодий муносабатларни тартибга солиб бориш борасида қабул қилинаётган қонун актлари ҳақидаги ахборот, шунингдек товарлар ва хизматлар билан таъминлаш тўғрисидаги ахборот билан ўзаро алмашишини ташкил этадилар.

Икки томонлама савдо ва иқтисодий муносабатлар, статистик маълумотлар билан алмашиш, божхона процедуралари ўтказилишини тарифли ва тарифсиз равишда тартибга солиб боришни амалга ошириш учун Аҳдлашувчи Томонлар Жаҳон божхона ташкилотининг товарлар баёни ва кодлашнинг уйғунлашган тизимидан фойдаланишга келишдилар.

Аҳдлашувчи Томонлар юк ташиш, транспорт ҳаракати, шу жумладан транзит юклар ва йўловчиларни ташиш тартиби ва шартлари, шунингдек транспорт тизимларининг ўзаро ҳаракати халқаро юк ташиш қоидаларига мувофиқ равишда тартибга солиб борилиши ва/ёки Аҳдлашувчи Томонларнинг алоҳида битимларига биноан белгиланишига келишдилар.

Аҳдлашувчи Томонлар ўртасидаги икки томонлама савдода юзага келадиган савдо балансини кўриб чиқиш учун Аҳдлашувчи Томонлар мунтазам равишда маслаҳатлашишлар олиб боришга келишдилар.

Ҳар бир Аҳдлашувчи Томон ўзининг амалдаги қонунларига ва халқаро мажбуриятларга мувофиқ бошқа Аҳдлашувчи Томоннинг хўжалик фаолияти юритувчи субъектларининг тенг ҳуқуқли муҳофазасини, шу жумладан уларнинг ҳуқуқ ва қонуний манфаатларининг суд ҳимоясини таъминлайди.

Аҳдлашувчи Томонлар бошқа Аҳдлашувчи Томон ҳудудида савдо ярмаркалари, кўргазмалар, техникавий-иқтисодий семинарларни ташкил қилиш ва ўтказишга, шунингдек савдо делегациялари ва гуруҳларининг сафарларига кўмаклашадилар.

Аҳдлашувчи Томонлар ўз мамлакатларида амалда бўлган қонунлар ва норматив ҳужжатларга мувофиқ, бож тўловлари, солиқлар ва шу сингари йиғимлардан озод қилган ҳолда, қуйидаги маҳсулотларни импорт ва экспорт қилишга рухсат берадилар:

а) буюртмалар олиш учун зарур бўлган товар намуналари ва реклама материаллари (каталоглар, рисолалар, фотосуратлар ва бошқалар);

б) кўргазмалар учун зарур бўлган маҳсулот, товар ва материаллар, улар кўргазма ва ярмаркалардан сўнг реэкспорт қилиниши шарти билан. Бундай маҳсулот, товарлар ва материаллар манфаатдор Томоннинг розилигига биноан ярмарка ва кўргазмалар пайтида ёки улардан сўнг сотилиши мумкин, улар реализация қилинган ҳолларда эса, тегишли мамлакатнинг қоида ва нормаларига мувофиқ равишда барча солиқлар, тўловлар ҳамда шу каби бошқа йиғимлар амалга оширилиши лозим.

Ушбу Битимнинг қўлланишини назорат қилиш мақсадида Аҳдлашувчи Томонлар Қўшма ишчи комиссиясини таъсис этадилар. Бу комиссия йиғилишлари исталган Аҳдлашувчи Томоннинг илтимосига кўра қабул қилувчи Томоннинг раислигида навбатма-навбат Ўзбекистон Республикаси ва Бангладеш Халқ Республикасида ўтказилади.

Қўшма ишчи комиссиясининг иш тартиби алоҳида Протокол билан тартибга солиб борилади.

Ушбу Битим, зарур ҳолда, Аҳдлашувчи Томонларнинг ёзма келишувига биноан ўзгартирилиши ёки тўлдирилиши мумкин.

Ушбу Битимнинг қоидаларини талқин қилиш ёки қўллаш бўйича келишмовчиликлар пайдо бўлган ҳолда Аҳдлашувчи Томонлар уларни халқаро ҳуқуқ нормаларини кўллаган ҳолда ўзаро маслаҳатлашишлар йўли билан ҳал этадилар.

Аҳдлашувчи Томонлар ҳар бир мамлакатда икки томонлама савдо ва иқтисодий алоқаларни ривожлантиришга ёрдам берувчи савдо ваколатхоналарини таъсис қилишда кўмаклашишга розилик билдиришди.

Ушбу Битим барча ички юридик процедуралар бажарилгандан сўнг ноталар алмашилган санадан бошлаб кучга киради ва Аҳдлашувчи Томонлардан бири бошқа Аҳдлашувчи Томонни ушбу Битим амал қилиш муддати тугашидан камида олти ой аввал унинг амал қилишини тўхтатиш тўғрисида ёзма равишда хабардор қилгунга қадар, навбатдаги бир йиллик муддатга ўз-ўзидан узайтирилган ҳолда, кейинги беш йил мобайнида ўз кучини сақлаб қолади.

Ушбу Битимнинг амал қилиш тўхтатилган ҳолда унинг қоидалари ушбу Битимга мувофиқ тузилган барча контрактларга ва у амал қилган давр ичида қайд этилган контрактлардан келиб чиқувчи, ушбу Битим амал қилиши тўхтатилгунга қадар амалга оширилиши ёки бажарилиши мумкин бўлмаган мажбуриятларга нисбатан Битим амал қилиши тўхтатилган санадан бошлаб 5 йилдан ошмаган муддат мобайнида татбиқ этилади.

Дакка шаҳрида 1998 йил 14 февралда, уч асл нусхада, ҳар бири ўзбек, бенгал ва инглиз тилларида тузилди, барча матнлар бир хил кучга эга.

Ушбу Битим қоидаларини талқин этиш мақсадида инглиз тилидаги матн устувор кучга эга бўлади.