LexUZ шарҳи
Мазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
1997 йилда Вазирлар Маҳкамасининг 1996 йил 27 августдаги 299-сон қарори билан белгиланган ҳажмларда бошоқли экинлар дони етиштириш ва тайёрлашни таъминлаш мақсадида Вазирлар Маҳкамаси қарор қилади:
1. 1997 йилда Қорақалпоғистон Республикаси, вилоятлар ва туманлар бўйича бошоқли дон экинлари ҳосилдорлигини ошириш тадбирлари 1—1н-иловаларга* мувофиқ маъқуллансин.
Ўзбекистон Республикаси Қишлоқ хўжалиги вазирига, Қорақалпоғистон Республикаси Вазирлар Кенгаши Раисига, вилоятлар ва туманлар ҳокимларига кўрсатиб ўтилган тадбирлар амалга оширилиши учун шахсий жавобгарлик юклансин. Бунда буғдой Вазирлар Маҳкамасининг 1996 йил 27 августдаги 299-сон қарорига мувофиқ ҳажмларда етиштирилишини таъминловчи майдонларда экилишига алоҳида эътибор берсинлар.
2. Ўзбекистон Республикаси Қишлоқ хўжалиги вазирлиги, «Ўзқишлоқхўжаликтаъминоттузатиш» давлат-кооператив қўмитаси, Ўзбекистон Қишлоқ хўжалиги фанлари академияси, Қорақалпоғистон Республикаси Вазирлар Кенгаши, вилоятлар ва туманлар ҳокимликлари:
ғалла экинлари тозаланган ва дориланган уруғликлар билан экилишини таъминласинлар, экин майдонларини шартнома асосида аниқ ижарачиларга ёки оилавий звеноларга бириктириб қўйсинлар;
қарорга иловада мўлжалланган чора-тадбирлар бажарилиши учун зарур шароитларни яратсинлар хамда бошоқли дон етиштириш агротехникасига қатъий риоя қилинишини таъминласинлар;
бир ҳафта муддатда Ўзбекистон Қишлоқ хўжалиги фанлари академияси томонидан Ўзбекистон Республикаси Қишлоқ хўжалиги вазирлиги билан биргаликда ишлаб чиқилган бошоқли дон экинларидан юқори ҳосил олишга доир тавсияларни ҳар бир хўжаликка етказсинлар.
3. «Ўзкимёсаноат» уюшмаси Қишлоқ хўжалиги вазирлиги билан биргаликда икки ҳафта муддатда Қорақалпоғистон Республикаси ва республика вилоятлари бўйича қишлоқ хўжалиги корхоналарига минерал ўғитлар етказиб бериш жадвалини ишлаб чиқсинлар ва тасдиқласинлар, бунда қуйидаги ҳажмлардан келиб чиқилсин (юз фоиз таъсир қилувчи моддаларга қайта ҳисоблаганда):
тупроқни тайёрлаш ва экиш даврида (1996 йил 10 ноябргача тугаллаган ҳолда) — 120 минг тонна азотли ўгитлар, 60 минг тонна фосфорли ўғитлар;
Ўзбекистон Республикаси Қишлоқ хўжалиги вазирлиги, «Ўзкимёсаноат» уюшмаси, Қорақалпоғистон Республикаси Вазирлар Кенгаши, вилоятлар ва туманлар ҳокимликлари ички ишлар органлари иштирокида минерал ўғитлар сақланишини ва улардан мақсадли фойдаланилишини таъминласинлар.
4. «Ўзкимёсаноат» уюшмаси кейинчалик республика хўжаликларига жўнатиш учун берилган хом ашёдан ишлаб чиқилган 35 минг тонна фосфорли ўғитлар (юз фоиз таъсир қилувчи моддаларга қайта ҳисоблаганда) сотиб олиш масаласини «Коратов» акционерлик жамияти (Қозоғистон Республикаси) билан келишсин.
5. Хўжаликларга Вазирлар Маҳкамасининг 1996 йил 27 августдаги 299-сон қарорига мувофиқ бошоқли дон экинларидан бўшаган суғориладиган ерларга пахта-дон-беда алмашлаб экишни жорий этиш мақсадида ва қишлоқ хўжалиги экинларини навбати билан экишни таъминлаш учун устун даражада беда экиш тавсия қилинсин.
Ўзбекистон Қишлоқ хўжалиги фанлари академияси ва Ўзбекистон Республикаси Қишлоқ хўжалиги вазирлиги экинларни навбати билан экишнинг кўрсатиб ўтилган тартибини жорий этишга доир тавсияларни хўжаликларга етказсинлар.
6. Ўзбекистон Республикаси Қишлоқ хўжалиги вазирлиги кузги бошоқли дон экинлари экиш якунлари, уруғлик сифати ва сарфига нисбатан қўйиладиган талабларнинг хўжаликлар томонидан бажарилиши, шунингдек бошоқли экинларнинг ҳолати тўғрисида Вазирлар Маҳкамасига ахборот берсин.