Ўзбекистон Республикаси Ҳукумати билан Покистон Ислом Республикаси Ҳукумати, бундан кейин алоҳида «Томон», биргаликда «Томонлар» деб аталувчилар,

БМТ Низомининг мақсад ва принципларига, жумладан, халқаро тинчлик ва хавфсизликни таъминлаш, давлатлар ўртасида дўстона муносабатлар ҳамда ҳамкорликнинг ривожланишига амал қилиб,

давлатларнинг суверенитети, тенглиги ва ҳудудий яхлитлигини, ўзаро ҳурмат принципларини қайта таъкидлаб,

халқаро терроризм давлатларнинг ҳудудий яхлитлиги ҳамда хавфсизлиги, шунингдек сиёсий, иқтисодий ва ижтимоий барқарорлигига таҳдид солишини англаб,

халқаро терроризм ушбу Битимда қандай белгиланган бўлса, уларнинг мақсадидан қатъи назар, ҳар қандай шароитларда ҳам оқланиши мумкин эмаслиги, халқаро терроризмни содир этган айбдор шахслар эса жавобгарликка тортилиши лозим эканлигига ишониб,

Ўзбекистон Республикаси ва Покистон Ислом Республикаси қўшилган халқаро терроризмнинг ҳар қандай кўринишларининг олдини олиш ва унга қарши курашиш соҳасида халқаро ҳамкорликка доир халқаро конвенцияларни эътиборга олиб,

халқаро терроризм, ноқонуний миграция ва одамлар савдосини қўллаб-қувватловчи ҳаракатларнинг олдини олиш соҳасида ҳамкорликдан манфаатдор бўлиб,

Томонларнинг ушбу Битим қоидалари доирасида биргаликдаги саъй-ҳаракатлари терроризмга қарши курашнинг самарали шаклларидан ҳисобланишига амин бўлиб,

Томонлар давлатларининг тегишли қонун-қоидалари асосида ушбу Битим доирасида ҳамкорлик қиладилар ва ўзаро кўмаклашадилар.

1. Ушбу Битим мақсадларида «терроризм» атамаси қуйидагиларни англатади:

а) ушбу Битимнинг Иловасида санаб ўтилган халқаро актлардан бирида жиноят деб тан олинган ҳаракатлар;

b) тинч аҳолининг ёки қуролли можаро даврида ҳарбий ҳаракатларда фаол иштирок этмаётган ҳар қандай шахсларнинг ўлимига сабаб бўладиган ёки оғир тан жароҳати етказадиган, ёки мол-мулкка катта зарар етишига олиб келадиган ўқотар қуроллар, портловчи моддалар ёки ҳар қандай бошқа қуроллардан фойдаланиш орқали амалга ошириладиган ҳаракатлар ҳамда ўз характери ёки кўринишига кўра тинч аҳолини хавф остига қўядиган, унга зарар етказадиган, жамоат хавфсизлигига путур етказадиган ёки давлат муассасаларини маълум бир ҳаракатларни амалга оширишга мажбурлайдиган ва Томонлар давлатларининг қонунларига биноан жиноят ҳисобланадиган, ҳаракатларни ташкил этиш, режалаштириш, ундаш ёки тажовуз қилиш;

2. Ушбу модданинг қоидалари унда белгиланган атамаларнинг бошқача ёки кенгроқ таърифланиши бошқа халқаро битимлар қоидалари ёки миллий қонунларига таъсир қилмайди.

3. Томонлар ўзаро муносабатларда ушбу моддада қайд этилган ҳаракатларни жиноятлар сифатида қарайдилар.

4. Ушбу Битимни амалга оширишда экстрадиция билан боғлиқ масалаларда Томонлар Ўзбекистон Республикаси билан Покистон Ислом Республикаси ўртасида экстрадиция тўғрисида (Исломобод, 2001 йил 25 январь) Шартнома қоидаларига мувофиқ ҳамкорликни амалга оширадилар.

Томонлар миллий қонунлари ва халқаро ҳуқуқ нормалари доирасида ўзларининг тегишли марказий ваколатли органлари орқали ушбу Битимнинг 2-моддасида санаб ўтилган жиноятларни содир этишнинг олдини олиш, аниқлаш, бартараф қилиш ва тергов олиб боришда ҳамкорлик қиладилар.

1. Ушбу Битим қоидаларини амалга оширишда қуйидагилар Томонларнинг марказий ваколатли органлари (марказий орган ёки марказий органлар) этиб тайинланадилар:

Ўзбекистон Республикаси учун:

Миллий хавфсизлик хизмати;

Покистон Ислом Республикаси учун:

Ички ишлар вазирлиги.

2. Томонлар ўзларининг марказий ваколатли органлари рўйхатига киритилган ҳар қандай ўзгартишлар тўғрисида бир-бирларини имкон қадар тез хабардор қиладилар.

3. Марказий ваколатли органлар ушбу Битим доирасида бевосита ҳамкорлик қиладилар.

4. Марказий ваколатли органлар учрашувларни ўтказиш ва ҳамкорликни кенгайтириш қоидаларини ишлаб чиқадилар.

1. Томонлар 2-модда қоидаларига мувофиқ халқаро терроризмга қарши курашда, шу жумладан қуйидаги йўналишлар бўйича ҳамкорлик қиладилар:

a) терроризмнинг жамоат хавфсизлигига тажовуз қилувчи барча кўринишларига қарши кураш;

b) бир Томон давлати хавфсизлигига таҳдид солиши мумкин бўлган террорчилик ташкилотлар фаолиятини, террорчиларни тайёрлаш марказлари ҳамда шахсларни аниқлаш ва бартараф этиш;

с) террорчилик ташкилотларни ўқотар қуроллар, ўқ-дорилар, кўп мақсадли ҳарбий ускуна, портловчи, заҳарловчи, биологик ва кимёвий моддалар билан таъминлаш йўлларини аниқлаш ҳамда олдини олиш;

d) террорчилик фаолиятини молиялаштириш мақсадида гиёҳвандлик воситалар ва психотроп моддалар ҳамда прекурсорларнинг ноқонуний айланмаси билан шуғулланувчи террористик ташкилотлар, гуруҳлар ва шахсларнинг фаолиятини олдини олиш;

e) терроризмни қўллаб-қувватлашда шубҳаланаётган террорчилик ташкилотлар ёки шахсларга молиявий активларни ва пул ўтказилишини амалга оширишни олдини олиш мақсадида саъй-ҳаракатларни мувофиқлаштириш;

f) уларнинг давлатлари ҳудудларида террорчилик фаолиятини амалга ошириш мақсадида фойдаланишни, таъминот базалари, ўқув лагерлари ва марказларининг яратилиши, террорчилик ҳаракатларини тайёрлаш ёки ташкил этишни олдини олиш бўйича чораларни қўллаш;

g) Томонлар давлатлари фуқароларини террорчилик ташкилотларга террорчилик ҳаракатларини амалга оширишда ёрдам бериш мақсадида ёлланишини бартараф этиш бўйича чораларни қўллаш;

h) террорчилик ҳаракатларининг транспортнинг барча турлари, ҳаётни таъминлаш ҳамда алоқа объектларига, инсонлар ҳаёти ва саломатлиги ҳамда атроф-муҳит учун хавф солинишига қаратилган ҳар қандай шакли ва кўринишларини олдини олиш;

i) Томонлар давлатларида рўйхатга олинган ҳаво кемаларининг хавфсизлигини Томонлар давлатлари иштирок этган фуқаро авиациясига тааллуқли халқаро конвенцияларнинг қоидаларига мувофиқ таъминлаш;

j) Томонлар ташувни амалга оширишни ўзаро келишган ҳолда қимматбаҳо ва махсус юкларни ташишда хавфсизликни таъминлаш;

k) террорчилик ҳаракатларини амалга оширишда фойдаланилиши мумкин бўлган ҳарбий аслаҳалар ва икки ёқлама мақсаддаги товарларни экспорт қилишни назорат қилиш;

l) террорчилик ҳаракатларининг олдини олиш, аниқлаш, бартараф қилиш ва тергов олиб бориш, шунингдек уларга дахлдор шахсларни жавобгарликка тортиш бўйича ўзаро келишилган чораларни ишлаб чиқиш.

1. Ушбу Битим қоидаларига мувофиқ Томонлар халқаро терроризмга қарши курашда қуйидаги шаклларда ҳамкорлик қиладилар:

a) террорчилик ҳаракатларига тааллуқли жиноятларнинг олдини олиш, аниқлаш ва терговни олиб боришга кўмак бўла оладиган ахборот алмашиш;

b) шахсларни, ташкилотларни, муассасаларни ва фирмалар фаолиятини текшириш орқали террорчилик ҳаракатларни аниқлашга кўмаклашиш;

c) террорчилик ташкилотлари, гуруҳлар ҳамда шахсларнинг фаолиятини назорат қилиш ва бартараф этишга қаратилган ўзаро келишилган чораларни амалга ошириш;

d) зарур ҳолларда аксилтеррор операцияларни ўтказишда техник кўмак кўрсатиш;

e) халқаро терроризмни бартараф этиш масалалари бўйича қонунлар ва суд қарорларига оид ахборот ва ҳужжатларни алмашиш;

f) махсус мосламалар ва алоқа воситаларидан фойдаланиш орқали халқаро терроризмни бартараф этиш бўйича режаларни ишлаб чиқиш.

Марказий ваколатли органлар ўзаро қизиқиш уйғотувчи масалалар бўйича ахборот алмашадилар, хусусан:

a) ушбу Битимнинг 2-моддасида кўрсатилган ҳаракатларни режалаштириш ва содир этиш;

b) ушбу Битимнинг 2-моддасида қайд этилган Томонлар давлатларининг давлат раҳбарлари, ҳукумат раҳбарлари, элчихоналар, консуллик муассасалари, шунингдек, уларнинг давлатларига ташриф буюраётган шахсларга нисбатан ҳаракатларни режалаштириш ва содир этиш;

c) ушбу Битимнинг 2-моддасида кўрсатилган ҳаракатларни режалаштиришда ва содир этишда иштирок этаётган ташкилотлар, гуруҳлар ва шахслар;

d) ушбу Битимнинг 2-моддасида кўрсатилган ҳаракатларни содир этиш учун кучли таъсир қилувчи заҳарли, заҳарловчи, портловчи моддалар, ўқотар қуроллар, портлатиш ускуналари, қуроллар, ўқ-дори, кимёвий ва биологик қуролларни ноқонуний тайёрлаш, сотиб олиш, сақлаш, етказиб бериш ва фойдаланиш;

e) ушбу Битимнинг 2-моддасида кўрсатилган ҳаракатларни содир этиш шакли, усули ва воситалари;

f) марказий ваколатли органлар ўзаро келишиб олиши мумкин бўлган бошқа масалалар.

Ушбу Битим доирасидаги ҳамкорлик бир марказий ваколатли органнинг бошқа марказий ваколатли органга юборган кўмаклашиш тўғрисидаги сўровномалари асосида амалга оширилади.

1. Кўмаклашиш тўғрисидаги сўровнома сўраётган марказий ваколатли орган тегишли тартибда ваколат берилган шахси томонидан имзоланади ва расмий гербли муҳр билан тасдиқланади. Сўровнома сўраётган марказий ваколатли орган томонидан сўралаётган марказий ваколатли органга тўғридан-тўғри юборилади.

2. Кўмаклашиш тўғрисидаги сўровнома ёзма равишда юборилади ва қайд этилган муддатларда амалга оширилади. Кўмаклашиш тўғрисидаги сўровнома қайд этилган муддатларда бажариш имконияти йўқ бўлганда, сўраётган марказий ваколатли орган бунинг сабаблари ва сўровномани бажаришга сўралаётган муддатлар тўғрисида ёзма равишда хабардор қилинади. Сўровноманинг мазмуни ва моҳияти ноаниқ бўлган тақдирда сўралаётган марказий ваколатли орган аниқлик киритиши мумкин;

3. Кўмаклашиш тўғрисидаги сўровномада inter-alia қуйидаги ахборот бўлиши лозим:

a) сўровномани имзолаган мансабдор шахснинг номи ва мақоми;

b) сўровнома мазмуни;

c) ишга алоқадор шахсларнинг исми ва фамилияси, фуқаролиги, туғилган санаси ва жойи ҳамда турар жойи, ташкилотнинг юридик номи ва манзили;

d) сўраётган марказий ваколатли орган давлатининг миллий қонунларига мувофиқ ҳаракат ёки ишнинг тафсилотлари, жиноятнинг ҳуқуқий тавсифи ва қўлланиладиган қонун матни;

e) сўровноманинг мақсади ва сабаблари;

f) жавоб олиш зарур бўлган муҳим саволлар рўйхати;

g) сўровномани бажариш муддатлари;

h) сўровномани бажаришда фойдали бўлиши мумкин бўлган ҳар қандай бошқа ахборот.

1. Сўраётган марказий ваколатли орган сўралаётган ёрдамни тез бажариш учун барча зарур чораларни кўради. Агар сўровномани бажариш марказий ваколатли органнинг ваколатига тааллуқли бўлмаса, ушбу орган сўровномани тегишли органга тақдим қилади ва сўраётган марказий ваколатли органни бу ҳақда хабардор қилади. Сўралаётган марказий ваколатли орган сўровномани бажариш учун зарур бўлган қўшимча маълумот ва муддатларни сўраб олиши мумкин.

2. Сўровномани бажаришда сўралаётган марказий ваколатли орган давлатининг қонунлари қўлланилади. Агар сўровноманинг бажарилиши сўралаётган марказий ваколатли органнинг давлатида амалга оширилаётган терговга халал берса, унинг бажарилиши кейинга қолдирилиши мумкин.

3. Марказий ваколатли органлар ўз ваколатлари доирасида бир-бирларига кўмаклашадилар.

Ушбу Битим доирасида кўмаклашиш тўғрисидаги сўровнома қуйидаги ҳолларда қисман ёки бутунлай рад этилиши мумкин:

a) агар сўровномани бажариш сўралаётган марказий ваколатли орган давлатининг суверенитети, миллий хавфсизлиги ва бошқа манфаатларига зарар етказиши ёки мамлакатнинг қонунлари ёхуд халқаро мажбуриятларига зид бўлса;

b) агар кўмаклашиш тўғрисидаги сўровномада қайд этилган ҳолат ва ҳаракатлар сўралаётган марказий ваколатли орган давлатининг миллий қонунларига мувофиқ жиноят деб ҳисобланмаса. Агар кўмаклашиш тўғрисидаги сўровнома рад этилса, сўралаётган марказий ваколатли орган сўраётган марказий ваколатли органни рад этишнинг сабаблари хусусида ёзма равишда хабардор қилади.

1. Томонлар ушбу Битим доирасида бир-биридан олган ахборотнинг махфийлигини таъминлайдилар, агар Томонлар бошқача келишувга эришмаган бўлсалар. Бир Томон бундай ахборотни учинчи томонга бундай ахборотни берган бошқа Томоннинг ёзма розилигисиз тақдим этмайди.

2. Ушбу Битим доирасида алмашилган ахборотдан фақат кўрсатилган мақсадларда фойдаланилади ва ваколатли органларга тақдим этилади. Томонлар бундай ахборотдан ўзга шахсларнинг фойдаланмаслиги, рухсатсиз ўзгартирилиши, унинг йўқ қилиниши ва ошкор этилишига қарши ҳимояни таъминлайдилар.

Ушбу Битим доирасидаги ҳамкорлик инглиз тилида амалга оширилади.

1. Агар ўзгача келишиб олинмаган бўлса, ҳар бир Томон ушбу Битим қоидаларини амалга оширишда юзага келадиган харажатларни қоплайди.

2. Томонлар халқаро терроризмга қарши курашда зарурат юзага келганда бир-бирларига зарур воситалар, ускуна ва лозим бўлган материалларни ушбу Битим доирасида бепул таъминлайдилар.

Марказий ваколатли органлар ушбу Битимни бажариш учун зарур бўлган бошқа аҳдлашувларни тузишлари мумкин.

Ушбу Битимнинг самарали бажарилишини таъминлаш мақсадида марказий ваколатли органларнинг вакиллари амалий учрашувлар, маслаҳатлашувлар ва музокараларни ўзаро келишган ҳолда ўтказишлари мумкин.

Ушбу Битим қоидалари Томонларнинг улар иштирок этган бошқа халқаро битимлардан келиб чиқадиган ҳуқуқ ва мажбуриятларга дахл қилмайди.

Ушбу Битимни талқин қилиш ва қўллаш билан боғлиқ бўлган барча низолар Томонлар ўртасида маслаҳатлашувлар ва музокаралар орқали ҳал этилади.

Ушбу Битимга қўшимча баённомалар билан расмийлаштириладиган ва ушбу Битимнинг ажралмас қисми ҳисобланадиган ўзгартиш ва қўшимчалар исталган вақтда киритилиши мумкин.

1. Ушбу Битим ратификация қилиниши лозим ва ратификация ёрлиқлари алмашинган кундан кучга киради. У бекор қилинмагунга қадар номуайян муддат амал қилади. Ҳар бир Томон исталган вақтда олти ой илгари ушбу Битимнинг амал қилишини тўхтатиш истаги тўғрисида хабарномани бошқа Томонга юбориш орқали амал қилишини тўхтатиши мумкин.

2. Агар Томонлар ўзгача аҳдлашиб олмаган бўлсалар, ушбу Битим амал қилишининг тўхтатилган куни бажарилмаган ёки амалга оширилмай қолган ушбу Битим қоидаларига мувофиқ бошланган ҳаракатлар ва юборилган сўровномага нисбатан ушбу Битим қоидаларининг амал қилиши давом этади.

3. Ушбу Битим кучга кириши билан Ўзбекистон Республикаси Ҳукумати билан Покистон Ислом Республикаси Ҳукумати ўртасида терроризмга қарши кураш тўғрисида 1996 йил 19 октябрда имзоланган Битим амал қилишни тўхтатади.

Тошкент шаҳрида 2005 йил 6 мартда икки асл нусхада ўзбек ва инглиз тилларида тузилди, бунда иккала матн бир хилда аутентикдир. Матнда ёки талқин қилишда келишмовчиликлар юзага келган ҳолларда, инглиз тилидаги матндан фойдаланилади.