Ўзбекистон Республикаси Ҳукумати билан Сингапур Республикаси Ҳукумати, бундан буён «Томонлар» деб аталувчилар,

икки давлат имкониятларидан самарали фойдаланиш ҳамда ўз халқларининг турмуш тарзини кўтариш мақсадида ўзаро савдо-иқтисодий, илмий-техникавий ва гуманитар ҳамкорликни ривожлантириш ва мустаҳкамлаш ниятида,

шартномавий-ҳуқуқий асосни ҳамда ўз халқлари ўртасида ўзаро манфаатдорлик, узоқ муддатли ва барқарорлик асосида савдо-иқтисодий, саноат, илмий-техникавий ва гуманитар ҳамкорликни ўзаро ривожлантириш шароитларини яратиш мақсадида,

халқаро ҳуқуқнинг амалдаги нормалари, тенг ҳуқуқлилик, ўзаро манфаат принципларига мувофиқ ҳамда ҳар бир давлатнинг амалдаги қонунлари доирасида,

Томонлар икки мамлакатнинг тараққиёти йўлида савдо-иқтисодий, илмий-техникавий ва гуманитар алоқаларни ривожлантириш, мустаҳкамлаш ва кенгайтириш мақсадида барча имкониятларидан фойдаланадилар.

Томонлар ўртасидаги савдо-иқтисодий, илмий-техникавий ва гуманитар ҳамкорлик Томонларнинг стратегик манфаатларига жавоб берадиган узоқ муддатли ҳамкорлик, тенглик, ўзаро манфаат принципларига асосланади.

Сингапур томони, Жаҳон Савдо Ташкилотининг аъзоси бўлганлиги сабабли, Ўзбекистон Республикасининг мазкур ташкилотга кириши масаласида ўқув машғулотлари ва маслаҳатлар ўтказиш йўли билан кўмаклашиши ва қўллаб-қувватлаши мумкин.

Томонлар ўртасида савдога кўмаклашиш мақсадида, А иловада келтирилган импорт ва экспорт қилинадиган товарларга нисбатан қуйидагилар тўғрисида келишилди:

(1) Ўзбекистон Республикаси Сингапур Республикасига нисбатан, Мустақил давлатлар ҳамдўстлигидан ташқари, бошқа давлатларга қўлланиладиган энг қулай режимдан кам бўлмаган режимни қўллайди;

(2) Сингапур Республикаси Ўзбекистон Республикасига нисбатан Тарифлар ва Савдо бўйича Бош Битим доирасидаги Сингапурнинг Тариф имтиёзлари жадвалига мувофиқ белгиланган энг қулай режимдан кам бўлмаган режимни қўллайди.

Мазкур мажбурият ушбу Битим кучга кирган санадан уч ой ўтганидан сўнг кучга киради.

Божхона божлари деганда товарларнинг импорт ёки экспорти билан боғлиқ барча божлар ёки турли хил тўловлар ҳамда шундай импорт ёки экспортга доир қўшимча солиқлар ёки қўшимча тўловлар тушунилади, бироқ улар қуйидагиларни ўз ичига олмайди:

(1) ички солиқларга тенглаштирилган тўловлар, яъни акциз солиқлари ҳамда товарлар ва хизматлардан ундириладиган солиқлар;

(2) адволор асосда қўлланилмайдиган тўловлар, бунда улар кўрсатилган хизматнинг тахминий таннархига тенг бўлиши ҳамда маҳаллий маҳсулотни билвосита ҳимоя қиладиган ва молиявий мақсадларда импорт ёки экспортга солиқ солиш тарзида бўлмаслиги лозим.

Томонлар ўртасида айрбошланадиган товарларнинг таснифланиши Товарларнинг уйғунлаштирилган тавсифи ва кодлаштирилган тизимига мувофиқ амалга оширилади.

Мавжуд савдо-иқтисодий ва илмий-техникавий ҳамкорлик даражасини инобатга олиб, Томонлар қуйидаги соҳаларда хусусий секторда тадбиркорлик ҳамкорлигини қўллаб-қувватлайдилар:

— енгил саноат;

— электротехника саноати;

— транспорт саноати;

— энергетика саноати, шу жумладан учинчи давлатлар бозорида биргаликдаги фаолият;

— соғлиқни сақлаш ва фармацевтика саноати;

— кимё ва нефть-кимё саноати;

— божхона расмиятчиликлари;

— ахборот ва коммуникация технологиялари;

— туризм;

— кичик ва хусусий тадбиркорлик; ва

— таълим ва мутахассисларни ўзаро манфаатли турли йўналишларда тайёрлаш.

Икки мамлакат ўртасидаги ҳамкорликни ривожлантириш, мустаҳкамлаш ва кенгайтириш мақсадида Томонлар қуйидагилар бўйича қўллаб-қувватлайдилар, кўмаклашадилар ва одимлатишга интиладилар:

— давлат органлари, ишбилармон доиралар, профессионал ва илмий-маданий ташкилотлар, агентликлар ва уюшмалар ҳамда савдо-саноат палаталари ўртасида ҳамкорликни ўзаро манфаатли маълумотлар алмашиш билан рағбатлантириш, шунингдек савдо-иқтисодий, илмий-техникавий ва гуманитар алоқалар масалалари бўйича делегациялар ҳамда улар вакилларининг ташрифлари билан ўзаро алмашишни қўллаб-қувватлаш;

— Томонлар давлатлари ҳудудларида ўтказиладиган савдо ярмаркалар ва кўргазмалар, бизнес учрашувлар, семинарлар, симпозиумлар, конференциялар, давра суҳбатлари ва бошқа шу каби тадбирларда иштирок этиш;

— маркетинг ва консалтинг хизматлари бўйича ўзаро манфаатли соҳаларда ҳамкорлик қилиш;

— Томонлар молиявий институтлар ўртасида алоқаларни ва ҳамкорликни мустаҳкамлаш;

— инвестиция фаолияти;

— кичик ва хусусий тадбиркорлик субъектлари ўртасида ҳамкорлик; ҳамда

— Томонлар ўртасида ҳамкорликнинг бошқа келишилган шакллари.

Томонлар зарур ҳолларда экспорт назорати масалалари бўйича ҳамкорлик қилиш мақсадида икки хил мақсадда фойдаланилиши мумкин бўлган товарларга нисбатан маслаҳатлашувлар ўтказадилар.

Товарларни етказиб бериш ва хизматлар кўрсатиш борасидаги барча тўловлар, эркин муомаладаги валютада ёки шартнома томонлари ўзга тарзда келишган бўлсалар исталган бошқа валютада тегишли Томон давлати ҳудудида амалда бўлган валюта алмашинуви тўғрисидаги қонунларга мувофиқ амалга оширилади.

Томонлар узоқ муддатга мўлжалланган гуманитар соҳани ривожлантириш бўйича барча муҳим чора-тадбирларни, асосан қуйидаги соҳаларда амалга оширадилар:

— соғлиқни сақлаш;

— таълим ва кадрлар билан алмашиш;

— маданият;

— спорт;

— туризм; ҳамда

— ва бошқа ўзаро манфаатли ҳамкорлик соҳалари.

Томонлар ўзларининг анъанавий туризм, экотуризм, пиёда туризми, тоғ туризми, сув туризми, от туризми, велосипед туризми, экстремал туризм, чанғи туризми, автомототуризм ва туризмнинг бошқа йўналишларида хизмат кўрсатувчилари ўртасида ҳамкорликни рағбатлантирадилар.

Спорт тадбирларига, мусиқий ва театрлаштирилган фестивалларга ва бошқа тадбирларга ташриф буюриш учун, Томонлар жамоавий ва якка туризмга, шу жумладан тиббиёт мақсадида, шунингдек ихтисослашган гуруҳлар билан алмашишга кўмаклашадилар.

Томонлар бир-бирларининг давлат тилларини, адабиётини, тарихини ва географиясини ўрганишни истаган шахсларга кўмаклашадилар.

Томонлар Ўзбекистон Республикаси ва Сингапур Республикаси ўзларининг олий таълим муассасалари ўртасида гуманитар фанлар ва технологиялар соҳаларидаги ҳамкорликни, шу жумладан мутахассислар алмашувини ва қўшма тадқиқот ишларини ўтказишни қўллаб-қувватлайдилар.

Томонлар, икки томонлама товар ва хизматлар алмашувини енгиллаштириш мақсадида, илмий ишлар натижаларини ва сертификатларини тан олиш учун тегишли чора-тадбирларни амалдаги миллий қонунларга мувофиқ амалга оширадилар.

Томонлар фан ва технология, стандартлаштириш, метрология ва аккредитация соҳаларида идоралараро ҳамкорликни миллий қонунлар асосида рағбатлантирадилар.

Томонлар Ўзбекистон ва Сингапур халқларининг кўп асрлик маданий ва маънавий қадриятларига асосланган ҳолда маданий ҳамкорликни бундан кейин ҳам ўзаро ривожланишини давом эттирадилар.

Ҳар бир Томон ўз давлатининг резидентига бошқа Томоннинг маданий ютуқларидан фойдаланишга имконият яратиб беради.

Томонлар ўзларининг маданий муассасалари ва жамоат ташкилотлари ўртасида бевосита ҳамкорликни ва алоқаларни ривожлантиришга, мустаҳкамлашга ва кенгайтиришга ҳамда улар ўртасида тажриба алмашишга кўмаклашадилар.

Томонлар ушбу Битимда назарда тутилган масалаларни тартибга солишга йўналтирилган янги қонунлар бўйича маълумотларни ҳамда бошқа ўзаро манфаатли маълумотларни ўзаро алмашадилар.

Томонларнинг ўзаро келишувига мувофиқ, ушбу Битимнинг ажралмас қисми ҳисобланадиган алоҳида баённомалар билан расмийлаштириладиган ўзгартириш ва қўшимчалар Битимга киритилиши мумкин. Бу каби баённомалар ушбу Битимнинг 16-моддаси 1-бандига мувофиқ кучга киради.

Ушбу Битимнинг қўлланилиши ва талқин этилиши билан боғлиқ низолар музокара ва маслаҳатлашувлар ўтказиш йўли билан ҳал этилади.

1. Ушбу Битимнинг кучга кириши учун давлат ички процедураларини бажарганликлари тўғрисида Томонлар томонидан охирги ёзма хабарнома олинган муддатда кучга киради.

2. Ушбу Битим чекланмаган муддатга тузилди.

3. Исталган Томон бошқа Томонни ёзма шаклда хабардор қилганидан сўнг Битимни тўхтатиши мумкин. Бу ҳолатда Битимнинг амал қилиши иккинчи Томон ушбу ҳақида хабарнома олган ойдан сўнг келувчи олтинчи ойнинг биринчи кунида тўхтатилади.