Ўзбекистон Республикаси давлат нотариал идоралари ва хусусий амалиёт билан шуғулланувчи нотариуслар фаолиятини янада такомиллаштириш, стажировка ўташнинг ягона услубини жорий этиш, стажёр фаолиятини ташкил этиш ва малакали кадрларни тайёрлаш мақсадида ҳамда «Нотариат тўғрисида»ги Ўзбекистон Республикаси Қонунининг 2-моддасига мувофиқ, Адлия вазирлиги ҳайъати қарор қилади:

1. Ўзбекистон Республикаси давлат нотариал идораларида ва хусусий амалиёт билан шуғулланувчи нотариуслар ҳузурида стажировка ўташ тартиби тўғрисидаги низом иловага мувофиқ тасдиқлансин ва у давлат рўйхатидан ўтказилган кундан бошлаб 10 кун ўтганидан кейин кучга киритилсин.

2. Қорақалпоғистон Республикаси Адлия вазири, вилоятлар ва Тошкент шаҳар адлия бошқармалари бошлиқлари:

барча давлат нотариал идораларида ва хусусий амалиёт билан шуғулланувчи нотариуслар ҳузурида стажировка ўталишини тўғри ташкил этилиши ҳамда мазкур Низом талабларига қатъий риоя этилишини назорат қилишни;

жорий йилнинг ноябрь-декабрь ойида мазкур Низомни амалиётга татбиқ этиш юзасидан барча давлат нотариуслари ва хусусий амалиёт билан шуғулланувчи нотариуслар ва стажёрлар иштирокида семинар машғулотларини ўтказишни таъминласинлар.

3. Нотариат, ФҲДЁ ва адвокатура бошқармаси (И.И. Юсубжонов):

жорий йилнинг ноябрь-декабрь ойларида ушбу Низом қоидаларини қўллаш бўйича семинар ўтказишни ташкиллаштирсин;

Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари, давлат нотариуслари ва хусусий амалиёт билан шуғулланувчи нотариуслар томонидан мазкур Низом талабларини бажарилишини мунтазам равишда назорат қилиб боришни таъминласин.

4. Идоравий меъёрий ҳужжатларни давлат рўйхатидан ўтказиш бошқармаси (С.У. Саттаров) ушбу ҳайъат қарори билан тасдиқланган низомни давлат рўйхатидан ўтказсин ва Ўзбекистон Республикаси вазирликлари, давлат қўмиталари ва идоралари норматив-ҳуқуқий ҳужжатларининг Давлат реестрига тегишли ёзув киритсин.

5. Қонун ҳужжатларини туркумлаш ва ҳуқуқий ахборот бошқармаси (У.Т. Аюбов) ушбу ҳайъат қарорини «Ўзбекистон Республикаси Қонун ҳужжатлари тўплами» — «Собрание законодательства Республики Узбекистан»да нашр этишни таъминласин.

6. Ўзбекистон Республикаси Адлия вазирлиги ҳайъатининг 2000 йил 28 апрель 33-сонли қарори билан тасдиқланган Ўзбекистон Республикаси давлат нотариал идоралари ва хусусий амалиёт билан шуғулланувчи нотариусларда стажировка ўташ тартиби тўғрисидаги низом ўз кучини йўқотган деб ҳисоблансин.

7. Ушбу қарорнинг ижросини назорат қилиш вазир ўринбосари Е.С. Каньязов зиммасига юклатилсин.

Мазкур Низом «Нотариат тўғрисида»ги Ўзбекистон Республикаси Қонунининг 2-моддасига мувофиқ, давлат нотариал идораларида ва хусусий амалиёт билан шуғулланувчи нотариуслар (кейинги ўринларда матнда хусусий нотариуслар деб юритилади) ҳузурида стажировка ўташ тартибини белгилайди.

1. Давлат нотариал идорасида ва хусусий нотариус ҳузурида олий юридик маълумотга эга бўлган Ўзбекистон Республикаси фуқароси стажировка ўташга тайинланиши мумкин.

2. Давлат нотариал идораларида зарур бўлган стажёрлар сонини ҳар уч йилда Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари (кейинги ўринларда матнда адлия бошқармаси деб юритилади) нотариал палаталар билан биргаликда (агар тузилган бўлса) аниқлаб боради ва улар захирасини тузади. Бунга иш ҳажми, мазкур ҳудудда келгусида қўшимча нотариусларга бўлган талаб ва ишдан бўшаб ёки бошқа ишга ўтиб кетаётган нотариуслар сони асос қилиб олинади.

3. Стажировка ўтаганлар тегишли адлия бошқармаси томонидан алоҳида китобда рўйхатга олиб борилади.

4. Стажёрга раҳбар этиб нотариуслик лавозимида камида уч йил ишлаган ва нотариал фаолият бўйича етарли тажрибага эга бўлган нотариус тайинланади.

5. Стажёр раҳбари стажёрнинг стажировка даврида нотариал фаолиятга доир масалаларни ўзлаштириб боришида масъул ҳисобланади.

6. Стажёрга раҳбар этиб яқин қариндошлар (ота-она ва болалар, эр-хотинлар) тайинланиши мумкин эмас.

7. Стажировкага раҳбарлик қилаётган давлат нотариал идораси нотариусининг ойлик маошига адлия бошқармаси томонидан қўшимча тўловлар белгиланиши мумкин.

8. Стажировка ўталишини адлия бошқармаси ўз ваколати доирасида ўрганади, умумлаштиради ва назорат қилади.

9. Давлат нотариал идорасида стажёрни ишга қабул қилиш адлия бошқармаси томонидан меҳнат шартномаси асосида амалга оширилади.

10. Хусусий нотариус меҳнат тўғрисидаги қонун ҳужжатларига мувофиқ стажёрни мустақил тарзда ишга қабул қилади ҳамда бу ҳақда адлия бошқармасини уч кун ичида ёзма равишда хабардор қилиши лозим.

11. Меҳнат шартномаси тарафлар келишуви бўйича меҳнат тўғрисидаги норматив-ҳуқуқий ҳужжатларга мувофиқ тузилади.

12. Стажёрни ишга қабул қилиш вақтида қуйидаги ҳужжатлар талаб қилинади:

а) ариза;

б) белгиланган шаклда тўлдирилган шахсий варақа;

в) паспорт нусхаси;

г) олий юридик маълумоти тўғрисидаги дипломнинг нотариал тасдиқланган нусхаси;

д) меҳнат дафтарчаси (биринчи маротаба ишга кираётган шахслар бундан мустасно);

е) охирги иш жойидан меҳнат фаолияти ҳақида тавсифнома (биринчи маротаба ишга кираётган шахслар бундан мустасно).

13. Давлат нотариал идораларида стажёрни ишга қабул қилиш адлия бошқармаси бошлиғининг буйруғи билан расмийлаштирилади. Хусусий нотариусда стажёрни ишга қабул қилиш хусусий нотариус буйруғи билан расмийлаштирилади. Буйруқ чиқариш учун стажёр билан тузилган меҳнат шартномаси асос бўлади.

14. Ишга қабул қилиш ҳақидаги буйруқ тузилган меҳнат шартномасининг мазмунига тўла мувофиқ равишда чиқарилиши ва стажёрга маълум қилиниши лозим.

15. Стажировка ўташ муддати, ишдан ажралган ҳолда камида бир йил бўлиши лозим. Стажировкани ўриндошлик асосида ўталишига йўл қўйилмайди.

16. Юридик мутахассислик бўйича камида уч йиллик иш стажига эга бўлган шахслар учун стажировка муддати тегишинча адлия бошқармасининг буйруғи билан камайтирилиши мумкин. Бундай ҳолларда стажировка муддати олти ойдан кам бўлмаслиги керак.

17. Нотариус ёрдамчиси, шунингдек Адлия вазирлигида ёки адлия бошқармасида бевосита нотариатга раҳбарлик қилиш вазифаларини амалга ошириш билан боғлиқ лавозимларда (раҳбарлар, мутахассислар) ишлаган шахсларнинг узлуксиз иш стажи бир йилдан кам бўлмаган тақдирда улар стажировка ўтаган ҳисобланиб, имтиҳон топширишларига йўл қўйилади.

18. Стажёрнинг ёхуд стажировкага раҳбар нотариуснинг узоқ муддат касаллиги ёки бошқа узрли сабабларга (бола туғиш, тарбиялаш, таътилда бўлиши, ишдан ажралган ҳолда малака ошириш кабилар) кўра стажировканинг маълум муддати ўта олмай қолган тақдирда, тегишли адлия бошқармаси бошлиғининг ёки хусусий нотариуснинг буйруғига кўра ана шу даврга узайтирилиши ёки бошқа нотариус ҳузурида стажировка ўташ учун бириктирилиши мумкин.

19. Давлат нотариал идораларида стажёрлар меҳнатига адлия бошқармасининг давлат нотариал идоралари фаолиятини маблағ билан таъминлаш бўйича махсус ҳисоб рақамидан, хусусий нотариусларда эса, улар ўртасида тузилган меҳнат шартномаси асосида ҳақ тўланади.

20. Стажёр меҳнат шароити, иш стажи, иш вақти, меҳнат таътили, ижтимоий суғурта ва бошқа меҳнат қонунчилигига оид масалаларда нотариуслар учун белгиланган барча ҳуқуқлардан фойдаланади. Стажёрларга нисбатан ички меҳнат интизоми қоидалари татбиқ қилинади.

21. Адлия бошқармаси бошлиғи ёки ўринбосари томонидан стажировка даврида ўзлаштирилиши лозим бўлган ва нотариал фаолиятга тааллуқли бошқа масалаларни ўзида мужассамлаштирган стажировка ўташ режаси тасдиқланади. Ушбу режа асосида стажёрлар ўз вазифаларини давлат нотариал идоралари ва хусусий нотариусларда амалга оширадилар.

22. Стажёрнинг нотариал фаолиятни мукаммал ўрганишини таъминлаш мақсадида адлия бошқармаси томонидан, иши намунали бўлган ва айрим мураккаб нотариал ҳаракатларни расмийлаштирадиган бошқа давлат нотариал идораларида бир ойдан ортиқ бўлмаган муддат мобайнида стажировка ўташи ташкил қилинади. Бошқа давлат нотариал идорасида стажировка ўталганлиги тўғрисида нотариус томонидан тегишли маълумотнома тузилиб стажёрнинг раҳбарига юборилади.

23. Стажёрнинг вазифасига қуйидагилар киради:

нотариал идорада иш юритиш;

нотариал ҳужжатларнинг лойиҳаларини тайёрлаш;

статистик ҳисоботларни тузиш ва таҳлил қилишда қатнашиш;

нотариал амалиётни умумлаштиришда иштирок этиш;

архив ишларини юритишни ўрганиш.

24. Стажировка даврида стажёр қуйидагиларни ўзлаштириши лозим:

Ўзбекистон Республикасининг нотариатга тааллуқли норматив-ҳуқуқий ҳужжатларини;

нотариал амалиёт ва нотариал ҳаракатларни амалга ошириш қоидаларини;

меҳнат жамоаси ва фуқаролар билан ўзаро муносабатларда мавжуд бўлган ахлоқий нормаларни.

25. Стажёр хизмат вазифасини бажариш вақтида нотариал идорада амалга оширилган нотариал ҳаракатлардан унга маълум бўлган ахборотларни ошкор қилмаслиги лозим. Бу ҳақда стажёрдан тегишли тилхат олинади.

26. Стажёр стажировка якуни бўйича стажировка режасининг ижроси ҳамда ўзлаштирилиши ва касбий малакасини ошириш борасида амалга оширган бошқа ишлари ҳақида ёзма ҳисобот тузади.

27. Стажёр раҳбари ушбу ёзма ҳисобот асосида стажёрга тавсифнома тайёрлайди ва стажировка якуни бўйича хулоса тузади. Ушбу ҳужжатларга нотариуснинг имзоси ҳамда муҳри қўйилади.

28. Стажёр раҳбарининг хулосасида қуйидагилар баён этилиши лозим:

стажировка ўталган давр;

стажировка режаси бажарилганлиги ҳақидаги маълумот;

стажёрнинг стажировка ўташ даврида олган амалий кўникмалари ва касбий билим даражаси;

стажёрнинг унга юклатилган вазифаларни бажаришдаги маҳорати;

стажёрнинг кейинчалик мустақил равишда нотариус бўлиб ишлашга умумий тайёргарлик даражаси;

стажёрнинг стажировка ўталган даврига умумий ҳисоботи.

29. Хулоса уч нусхада тузилиб адлия бошқармасига ва стажировка ўтаган шахсга берилади. Учинчи нусхаси стажировка ўталган нотариал идорада сақлаш учун қолдирилади.

30. Стажировка натижалари бўйича стажёр адлия бошқармаси қошидаги нотариат бўйича малака комиссиясига ҳисобот беради ва комиссия қарорига асосан малака имтиҳонига қўйилади.

31. Стажировка ўташ натижаси тўғрисидаги хулоса ва тавсифнома стажёрнинг малака имтиҳонини топшириш ҳақидаги аризасига қўшиб қўйилади.

32. Адлия бошқармаси ҳар йил стажёрлар тайёрлаш борасида амалга оширилган ишларни умумлаштириб боради ва бу ҳақдаги маълумотни кейинги йилнинг январь ойида Ўзбекистон Республикаси Адлия вазирлигига юборади.