Аттестация жараёнида тўпланган тажрибаларни инобатга олган ҳолда қарор қиламиз:

1. Ўзбекистон Республикаси Олий ва ўрта махсус таълим вазирлиги Ўрта махсус, касб-ҳунар таълими маркази, Вазирлар Маҳкамаси ҳузуридаги Давлат тест маркази, Меҳнат ва аҳолини ижтимоий муҳофаза қилиш вазирликларининг 2005 йил 24 мартдаги 05/Қ, 01-77 ва 01/1185-сонли қарори билан тасдиқланган Академик лицей ва касб-ҳунар коллежлари директор ўринбосарлари, педагог ва муҳандис-педагог кадрлари аттестацияси тўғрисидаги низомга (2005 йил 28 март, рўйхат рақами 1462 — Ўзбекистон Республикаси Қонун ҳужжатлари тўплами, 2005 йил 12-13-сон, 97-модда) иловага мувофиқ ўзгартириш ва қўшимчалар киритилсин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кундан кейин кучга киритилсин.

1. Низомнинг 5-банди қуйидаги таҳрирдаги учинчи хатбоши билан тўлдирилсин:

«Аттестация жараёнида маҳаллий ҳокимият ва жамоатчилик ташкилотлари вакиллари, касаба уюшма ходимлари овоз бериш ҳуқуқига эга бўлмаган ҳолда, кузатувчи сифатида иштирок этишлари мумкин.».

2. Низомнинг 16-банди учинчи хатбоши қуйидаги таҳрирда баён қилинсин:

«мансаб вазифаларида белгиланган масалалар бўйича тест синови ва суҳбатдан ўтказилади. Суҳбат жараёнида берилган савол ва жавоблар махсус (саҳифаланган, боғланган, муҳрланган) журналда қайд этилади.».

3. Низомнинг 18-банди учинчи хатбоши қуйидаги таҳрирда баён қилинсин:

«педагог кадрлар ўз мутахассислиги, лавозим вазифалари ва меъёрий-ҳуқуқий, маънавий-маърифий масалалар бўйича малака синови (тест, ёзма ёки ижодий иш) ва суҳбатдан ўтказилади. Суҳбат жараёнида берилган савол ва жавоблар махсус (саҳифаланган, боғланган, муҳрланган) журналда қайд этилади.».

4. Низомнинг 19-банди биринчи хатбоши қуйидаги таҳрирда баён қилинсин:

«Аттестация комиссияси директор ўринбосари ва педагоглар фаолияти ҳақидаги маълумотлар, малака синови (тест, ёзма ёки ижодий иш) ва суҳбат натижалари асосида умумий хулосани қабул қилади.».

5. Низомнинг 20-банди иккинчи хатбоши қуйидаги таҳрирда баён қилинсин:

«Комиссия аттестация натижаларига кўра:

директор ўринбосарлари ҳақида «Аттестациядан ўтди» ёки «Аттестациядан ўтмади»;

педагоглар ҳақида «Аттестациядан ўтди», «Аттестациядан шартли ўтди» ёки «Аттестациядан ўтмади» деб хулоса чиқаради.».

6. Низомнинг 22-банди қуйидаги таҳрирда баён қилинсин:

«Аттестациядан шартли ўтди» деб эътироф этилган педагоглар камида 6 ойдан сўнг қайта аттестациядан ўтказилади.».

7. Низомнинг 29-банди қуйидаги таҳрирда баён қилинсин:

«Директор ўринбосари ва педагоглар аттестацияси тўғрисидаги меҳнат низолари қонунчиликда белгиланган тартибда кўриб чиқилади.».