Vazirlar Mahkamasi qaror qiladi:

1. Oʻzbekiston oziq-ovqat sanoati davlat-aksionerlik konserni (“Oʻzoziqovqatsanoat”) ning ilova qilinayotgan Ustavi tasdiqlansin.

2. Oʻzbekiston oziq-ovqat sanoati (“Oʻzoziqovqatsanoat”) konsernining Vazirlar Mahkamasining 1991-yil 1-apreldagi 79-son qarori bilan tasdiqlangan Ustavi oʻz kuchini yoʻqotgan deb hisoblansin.

1. Oʻzbekiston oziq-ovqat sanoati davlat-aksionerlik konserni (“Oʻzoziqovqatsanoat”), keyingi oʻrinlarda konsern deb yuritiladi, Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi oziq-ovqat sanoati (Oʻzoziqovqatsanoat) konsernini Oʻzbekiston oziq-ovqat sanoati davlat-aksionerlik (“Oʻzoziqovqatsanoat”) konserniga aylantirish toʻgʻrisida” 1993-yil 5-maydagi Farmoniga hamda Oʻzbekiston Respublikasi Vazirlar Mahkamasining 1993-yil 24-maydagi 245-son qaroriga muvofiq tashkil etilgan.

2. Konsern yogʻ-moy, qandolatchilik, choy, tamaki, pivo-alkogolsiz ichimliklar, oziq-ovqat konsentratlari sanoati korxonalarini, shuningdek, Oʻzbekiston Respublikasi hududida joylashgan ularga xizmat koʻrsatuvchi korxonalarni va muassasalarni birlashtiruvchi ishlab chiqarish-xoʻjalik kompleksi hisoblanadi.

Konsern tarkibiga mulkchilik shaklidan qatʼi nazar, oziq-ovqat sanoatini rivojlantirishdan manfaatdor boʻlgan boshqa korxonalar va tashkilotlar ham kirishi mumkin.

3. Konsern Oʻzbekiston Respublikasi Vazirlar Mahkamasiga hisob berib turadi va oʻz faoliyatida Oʻzbekiston Respublikasi qonunlariga, Oliy Kengashning boshqa qarorlariga, Prezidentning farmonlariga, Oʻzbekiston Respublikasi Vazirlar Mahkamasining qarorlari va farmoyishlariga, amaldagi qonun hujjatlarining boshqa aktlariga hamda ushbu Ustavga amal qiladi.

4. Konsern yuridik shaxs hisoblanadi, oʻzining alohida mol-mulkiga, mustaqil hamda yigʻma balanslarga, bank muassasalarida hisob-kitob, valyuta va boshqa schyotlarga, Oʻzbekiston Respublikasi Davlat gerbi tasvirlangan hamda nomi yozilgan yumaloq muhrga, shtamplarga, firma blankalariga ega boʻladi.

5. Konsern Oʻzbekiston Respublikasi Vazirlar Mahkamasi huzuridagi Oziq-ovqat sanoati konserni (“Oʻzoziqovqatsanoat”) ning huquqiy vorisi hisoblanadi, oʻz majburiyatlari boʻyicha amaldagi qonunchilikka muvofiq oʻziga tegishli mol-mulk bilan javob beradi. Ushbu mol-mulkdan toʻlov undirib olinishi mumkin. Konsern davlat va uning organlarining, shuningdek, konsern qatnashchisi boʻlgan korxonalarning majburiyatlari boʻyicha javob bermaydi, xuddi shu kabi qatnashuvchi korxonalar ham Konsernning majburiyatlari boʻyicha javob bermaydi.

6. Konsern bilan uning tarkibiga kiruvchi birlashmalar, korxonalar va tashkilotlar oʻrtasidagi iqtisodiy hamda huquqiy munosabatlar Oʻzbekiston Respublikasining amaldagi qonun hujjatlari, boshqa normativ hujjatlari, ushbu Ustav va taʼsis shartnomasi bilan belgilanadi

7. Konsern joylashgan manzil: Toshkent shahri, Navoiy koʻchasi, 7.

1. Konsernning asosiy vazifalari quyidagilardan iborat:

tarmoqning ishlab chiqarish hamda ilmiy-texnikaviy rivojlanishi sohasida yagona siyosat ishlab chiqilishi va amalga oshirilishini taʼminlash, konsern tarkibiga kiruvchi korxonalar va tashkilotlarning investitsiya hamda tashqi iqtisodiy faoliyatini muvofiqlashtirish, vazirliklar va idoralar bilan oʻzaro munosabatlar masalalari ham shu jumlaga kiradi;

davlat ehtiyojlari uchun topshiriqlarni bajarish, markazlashtirilgan holda ajratiladigan moddiy-texnika resurslarini hamda sarmoya mablagʻlarni taqsimlash;

tarmoqni iqtisodiy va ijtimoiy rivojlantirishning uzoq muddatli istiqbollarini, maqsadli ilmiy-tadqiqot dasturlarini ishlab chiqish, investitsiya sohasida yagona strategiyani amalga oshirish;

oziq-ovqat sanoati tarmoqlari obyektlarini kengaytirish, qayta qurish hamda texnik qayta jihozlashni taʼminlash, oziq-ovqat mahsulotlarini ishlab chiqarishning meʼyoriy va texnologik reglamentlarini ishlab chiqish,

konsern tarkibiga kiruvchi korxonalar va tashkilotlarga bozor munosabatlariga oʻtishda koʻmaklashish, ularni aksionerlik va boshqa tashkiliy-huquqiy shakllarga aylantirish;

oziq-ovqat mahsulotlari bozor konyunkturasini oʻrganish, firmali savdoni rivojlantirish, xorijiy mamlakatlar bilan savdo-iqtisodiy hamda ilmiy-texnikaviy aloqalarni yanada rivojlantirish va takomillashtirish chora-tadbirlarini amalga oshirish;

korxonalar va tashkilotlarning moliyaviy-iqtisodiy xoʻjalik hamda ijtimoiy faoliyati masalalarini muvofiqlashtirish, Konsern Kengashining qarori bilan markazlashtirilgan sugʻurta, zaxira jamgʻarmalarini va boshqa jamgʻarmalarni tashkil etish.

2. Oʻz oldida turgan vazifalarni hal etish uchun Konsern:

taʼminot, tijorat, kredit, mintaqalararo, tashqi iqtisodiy va boshqa faoliyatlarni, shuningdek, ilmiy-texnikaviy, ishlab chiqarish va ijtimoiy rivojlantirish vazifalarini markazlashtiradi;

davlat ehtiyojlari uchun mahsulotlar ishlab chiqarish topshiriqlarini joylashtirishni hamda markazlashtirilgan holda ajratilgan moddiy-texnika, pul resurslari taqsimotini amalga oshiradi;

moddiy-texnika resurslarini hamda tayyor mahsulotni yetkazib berishga doir shartnomalar tuzish boʻyicha ishlarni tashkil etadi, eksport-import operatsiyalarini qimmatli qogʻozlar bozorida qatnashishni amalga oshirish boʻyicha hisob-kitoblarni yuritadi;

Konsern uchun belgilangan nomenklatura boʻyicha oziq-ovqat mahsulotlarining ayrim turlarini chetga chiqarishga litsenziyalar taqsimlanishini amalga oshiradi, hamda ularni belgilangan tartibda beradi;

yogʻ-moy, qandolatchilik, choy, tamaki, pivo-alkogolsiz ichimliklar, pishirishga tayyor qilib qoʻyilgan oziq-ovqat konsentratlari sanoatini hamda faoliyatning boshqa turlarini rivojlantirishni muvofiqlashtiradi, xoʻjalikni yuritishning yangi shakllarini rivojlantirish ishlarini tashkil etadi;

meʼyoriy-texnikaviy hujjatlar va texnologik reglamentlar ishlab chiqilishini, mehnatni tashkil etishning ilgʻor usullari joriy etilishini, oziq-ovqat tarmogʻi, ijtimoiy va boshqa sohalar obyektlari loyihalashtirilishi, qayta qurilishi, texnika bilan qayta jihozlanishi va yangidan qurilishi ishlarini tashkil etadi;

bozor konyunkturasini, mollar va xizmatlar narxini va ularga narx belgilanishini oʻrganadi, firmali savdoni rivojlantiradi, marketingni tashkil etadi, talabni, tarmoqning bozor imkoniyatlarini oʻrganadi;

xorijiy sheriklar bilan savdo-iqtisodiy hamda ilmiy-texnikaviy aloqalarni yanada rivojlantirish chora-tadbirlarini amalga oshiradi, ishlab chiqarishni oqilona ixtisoslashtirish va kooperatsiyalashtirishni, oʻzaro foydali toʻgʻridan toʻgʻri aloqalap oʻrnatilishi, shuningdek, qoʻshma korxonalar barpo etilishini va ularni rivojlantirishni tashkil etadi;

oziq-ovqat mahsulotlarini ishlab chiqarish hamda isteʼmol qilish hajmlarini oldindan belgilashni tashkil etadi, konsern qatnashchisi boʻlgan korxonalarning bir meʼyorda ishlashini, texnologik jarayonlarni takomillashtirishni taʼminlaydi;

konsern qatnashchisi boʻlgan korxonalarning vaqtincha boʻsh turgan ishlab chiqarish quvvatlaridan foydalanish, texnikadan, moddiy resurslar zaxiralaridan foydalanish yuzasidan hamkorlikni muvofiqlashtiradi;

Konsernning, uning korxonalari va tashkilotlarining mintaqalararo faoliyatini tubdan yaxshilashni taʼminlaydi, oziq-ovqat sanoati korxonalarini tezkorlik bilan texnologik qayta jihozlash chora-tadbirlarini amalga oshiradi;

konsern qatnashchisi boʻlgan korxonalarga xoʻjalik yuritishning bozor mexanizmini joriy qilishda koʻmaklashadi, mulkchilik hamda xoʻjalik yuritish shakllaridan qatʼi nazar, ishlab chiqaruvchilar uchun teng iqtisodiy shart-sharoitlar yaratadi;

respublika oziq-ovqat sanoatini rivojlantirish uchun chet el investitsiyalarini jalb qilishga qaratilgan ishlarni olib boradi;

kadrlar rezervini shakllantirish, korxonalarning rahbar xodimlari va mutaxassislarining malakasini oshirish va ularni tayyorlash boʻyicha kadrlar siyosatini faol amalga oshiradi;

konsern qatnashchisi boʻlgan korxonalarga qonunchilikka rioya qilishni tashkil etish va taʼminlashda mehnat intizomini mustahkamlashda, korxonalar mol-mulkni saqlashning huquqiy va boshqa xil vositalarini taʼminlashda, noishlab chiqarish xarajatlariga qarshi kurashda, shuningdek, huquqiy ishlarda amaliy va uslubiy yordam koʻrsatadi.

Oʻz oldida turgan vazifalarni bajarish uchun konsern:

oʻzining ishlab chiqarish-xoʻjalik hamda tashkiliy-boshqaruv tuzilmalarini mustaqil shakllantirish, mulkni belgilangan tartibda ijaraga berish, korxonalar va tashkilotlar tashkil etish, qayta tashkil etish, tugatish;

mehnat jamoalarining fikrini hisobga olgan holda tarmoq davlat korxonalarini mulkchilikning boshqa shakllariga oʻtkazish boʻyicha bunga vakolatli boʻlgan organlarga takliflar kiritish;

oʻz nomidan shartnomalar, kontraktlar va bitimlar tuzish, yuridik va jismoniy shaxslar bilan Oʻzbekiston Respublikasining amaldagi qonun hujjatlari bilan taqiqlanmagan huquqiy munosabatlarga kirishish, sudlarda daʼvogar, javobgar boʻlish hamda sud jarayoni qatnashchisi sifatida qatnashish;

butlovchi buyumlar, materiallar, jihozlar, asbob-uskunalar va boshqa mahsulotlar ishlab chiqarish, konsern qatnashchisi boʻlgan korxonalar manfaati yoʻlida materiallar va xomashyolarni, shu jumladan qishloq xoʻjaligi xomashyolarini tayyorlash; konsern qatnashchisi boʻlgan korxonalarga qurilish, transport, texnologik, tijorat, loyiha-konstruktorlik, tashqi savdo, yuridik, axborot, maslahat va boshqa xizmatlar koʻrsatish uchun xoʻjalik hisobida shuʼba korxonalar tashkil etish;

tashqi iqtisodiy faoliyatni amalga oshirish, amaldagi qonun hujjatlari bilan taqiqlamagan tashqi savdo, kredit, veksel va boshqa bitimlarni tuzish, Oʻzbekiston Respublikasi hududidan tashqarida oʻz filiallarini hamda vakolatxonalarini ochish, banklarda oʻz schyotlarini ochish, belgilangan tartibda eksport-import operatsiyalarini amalga oshirish;

xalqaro yarmarkalarda va koʻrgazmalarda qatnashish, shuningdek, ixtisoslashtirilgan koʻrgazmalar, kimoshdi savdolarida, simpoziumlarda qatnashish va ularni tashkil etish, reklama adabiyotini nashr etish;

texnika, asbob-uskuna, texnologiyalar, patentlar, “nou-xau” dasturlari sotib olish uchun, shuningdek, mutaxassislarni xorijiy ilmiy, tijorat, reklama va boshqa tadbirlarda ishtirok etish uchun xizmat safarlariga yuborish sarf-xarajatlarini toʻlashda oʻz ixtiyoridagi rubl hamda valyuta mablagʻlaridan belgilangan tartibda foydalanish;

rais, uning oʻrinbosarlari hamda Konsern apparati xodimlariga mehnat haqi toʻlash shartlari bilan (mansab maoshlari, mukofotlar koʻrsatkichlari hamda shartlari bilan) bogʻliq masalalarni mustaqil hal etish, shuningdek, Konsern apparati xodimlarini ijtimoiy himoyalash maqsadida ularga qoʻshimcha haq toʻlash hamda tovon toʻlovlarini belgilash;

aksiyalar hamda boshqa qimmatli qogʻozlarni chiqarish va ular boʻyicha dividendlar olish;

ijtimoiy rivojlanish, Konsern tarkibiga kiruvchi korxonalar hamda tarkibiy boʻlinmalar xodimlarining ijtimoiy-maishiy sharoitlarini yaxshilashga qaratilgan chora-tadbirlarni amalga oshirish;

bozor sharoitlarini hisobga olgan holda Konsern korxonalari tomonidan ishlab chiqarilayotgan oziq-ovqat mahsulotlariga meʼyoriy-texnikaviy hujjatlarni mustaqil ravishda tasdiqlash huquqiga ega boʻladi.

1. Konsernni boshqarishning yuqori organi Kengash hisoblanadi. U boshqaruvni hamda taftish komissiyasini saylaydi. Konsern rahbariyati (rais va uning oʻrinbosarlari) Konsern Kengashi tomonidan saylanadi hamda Oʻzbekiston Respublikasi Vazirlar Mahkamasi tomonidan tasdiqlanadi.

2. Konsern Kengashi tarkibiga korxona va tashkilotlarning rahbarlari, Konsern raisi, uning oʻrinbosarlari, boshqaruv aʼzolari kiradilar. Kengashga va boshqaruvga Konsern raisi boshchilik qiladi.

3. Vazirlar Mahkamasining 1993-yil 24-maydagi 245-son qaroriga muvofiq konsern raisi maqomiga, maishiy, tibbiy, transport xizmati koʻrsatish sharoitlariga koʻra respublika vaziriga, raisning birinchi oʻrinbosari — vazirning birinchi oʻrinbosariga, raisning oʻrinbosarlari — vazirning oʻrinbosarlariga tenglashtiriladi.

4. Maqom hamda Kengash ishi Konsern Kengashi tomonidan tasdiqlanadigan Konsern Kengashi toʻgʻrisidagi Nizom bilan tartibga solinadi. Konsern Kengashi tomonidan belgilangan tartibda qabul qilingan qarorlar konsern qatnashchisi boʻlgan korxonalar uchun majburiy hisoblanadi.

5. Konsern Kengashi majlislari yiliga kamida ikki marta chaqiriladi. Kengashning navbatdan tashqari majlislari qatnashchilarning kamida uchdan bir qismining arizasiga koʻra konsern faoliyati jarayonida paydo boʻladigan zarur masalalarni hal etish uchun chaqiriladi.

Konsern qatnashchilari Kengash chiqarilishi toʻgʻrisida u oʻtkaziladigan kundan kamida ikki hafta oldin xabardor qilinishi kerak. Xabarda uning koʻrib chiqishi uchun kiritilayotgan masalalar koʻrsatiladi.

6. Kengashning huquq doirasiga quyidagilar kiradi:

oziq-ovqat sanoati davlat korxonalarini mulkchilikning boshqa shakllariga oʻtkazish boʻyicha tashkiliy chora-tadbirlarni amalga oshirish;

Konsern Ustavini qabul qilish, unga oʻzgartirish va qoʻshimchalar kiritish, shuningdek, boshqaruv tarkibini saylash;

Konsern tarkibiga yangi qatnashuvchilarni qabul qilish va undan chiqarish;

Konsern qoʻshma faoliyatining va dasturlarining yillik va istiqbol rejalarini koʻrib chiqish va tasdiqlash;

jamgʻarmalarni toʻldirish hamda Konsern ishtirokchilari oʻrtasida konsern daromadlarini taqsimlash;

Konsernning boshqaruv tarkibini, taftish komissiyasini hamda yuqori rahbarlarini saylash, ularga mehnat haqlari toʻlash shartlarini belgilash;

yillik xoʻjalik faoliyati yakuni boʻyicha boshqaruv tarkibini taqdirlash boʻyicha takliflarni koʻrib chiqish va tasdiqlash.

7. Konsern Kengashi qarorlari Konsern boshqaruvi hamda konsern qatnashchisi boʻlgan korxonalar bajarish majburiy boʻlgan qarorlar bilan rasmiylashtiriladi.

8. Konsern Kengashi ijro qiluvchi organni — konsernning boshqaruvini tashkil etadi. U Konsernning ishini tashkil etadi, Kengash tomonidan qabul qilinadigan qarorlarning oʻz vaqtida bajarilishini taʼminlaydi.

Boshqaruv konsern qatnashchisi boʻlgan korxonalar bilan birgalikda ilmiy-ishlab chiqarish, tashqi iqtisodiy, investitsiya va boshqa faoliyat dasturlarini ishlab chiqadi va ularning bajarilishini tashkil etadi; manfaatdor korxonalar bilan birgalikda yangi ishlab chiqarish quvvatlarini rivojlantirish, korxonalarni texnik qayta jihozlash va qayta qurish boʻyicha takliflar tayyorlaydi; Konsern Kengashida koʻrilishi lozim boʻlgan masalalarni tayyorlaydi, raisning, uning oʻrinbosarlarining, boshqaruv aʼzolarining hamda konsern apparati xodimlarining axborotlarini eshitadi, tegishli qarorlar qabul qiladi;

Boshqaruv Konsern faoliyatining Kengash vakolatiga kiradigan masalalaridan boshqa barcha masalalarini hal qiladi.

9. Boshqaruv qarorlari majlis bayoni bilan rasmiylashtiriladi hamda Konsern raisi tomonidan imzolanadi. Boshqaruv oʻz vakolati doirasida qabul qilgan qarorlar Konsern qatnashchilari boʻlgan korxonalar va tashkilotlar tomonidan bajarilishi majburiydir.

10. Konsern Kengashi boshqaruvga ushbu Ustav bilan Kengash vakolatiga kiritilgan ayrim masalalarni hal etish huquqini berishi mumkin.

11. Kengash hamda konsern boshqaruvi qarorlarini hayotga tatbiq etish uchun Konsern raisi boshchilik qiladigan boshqaruv apparati tashkil etiladi. Boshqaruv apparati, shuningdek konsern boshqaruvi organlari qarorlari loyihalarini tayyorlash bilan bogʻliq boʻlgan tahliliy, muvofiqlashtiruvchi va rejadagi ishlarni olib boradi.

12. Konsern raisi:

Konsern tarkibiga kiruvchi korxonalar va tashkilotlar faoliyatiga belgilangan tartibda rahbarlik qiladi, ishonchnomasiz Konsern nomidan ish koʻradi, Oʻzbekiston Respublikasi va boshqa davlatlar hududidagi barcha korxonalar, muassasalar, tashkilotlar va firmalarda uning manfaatlarini ifodalaydi;

konsern vakolatiga kiruvchi masalalar boʻyicha qonunchilik va boshqa normativ hujjatlar loyihalarini Oʻzbekiston Respublikasi Hukumatining koʻrib chiqishi uchun belgilangan tartibda kiritadi;

konsern qatnashchisi boʻlgan korxonalar rahbarlari tomonidan Oʻzbekiston Respublikasining qonun hujjatlariga va boshqa normativ hujjatlariga, shuningdek Kengash hamda konsern boshqaruvi qarorlariga zid boʻlgan oʻz vakolatlari doirasida chiqarilgan buyruqlar va boshqa aktlarni bekor qiladi;

qonun hujjatlari bilan belgilangan tartibda Konsernning mol-mulkini boshqaradi va unga egalik qiladi, banklarda hisob-kitob va boshqa schyotlar ochadi, oʻz vakolatiga kiritilgan barcha masalalar boʻyicha mustaqil ravishda qarorlar qabul qiladi, shu jumladan Kengash va Konsern boshqaruvi nomidan ishonchnomalar beradi, shartnomalar, kontraktlar, bitimlar tuzadi;

Konsernga berilgan huquqlar doirasida davlatga mansub aksiya paketlariga muvofiq aksionerlik korxonalari faoliyatiga rahbarlik qiladi;

Konsernning barcha mansabdor shaxslari va xodimlari tomonidan bajarilishi majburiy boʻlgan buyruqlar chiqaradi, koʻrsatmalar beradi, schyotlarni hamda toʻlov topshiriqlarini, Konsern hisobotlarini imzolaydi, Oʻzbekiston Respublikasi hududida va uning tashqarisidagi yuridik va jismoniy shaxslarga nisbatan Konsern nomidan eʼtirozlar va daʼvo qilish toʻgʻrisida qarorlar qabul qiladi;

qatnashuvchi korxonalar va tashkilotlar rahbarlarini tayinlaydi va ularni egallab turgan lavozimlaridan ozod qiladi. Lavozimga tayinlash chogʻida rahbar bilan kontrakt tuzadi, undagi shartlar Konsern Kengashi bilan kelishib olinadi;

taftish komissiyasi taqdim etadigan materiallar asosida undirib olishga umid qolmagan qarzlar summasini, maʼnaviy va fizik jihatdan eskirgan mulklarni, toʻxtatilgan yoki amalga oshirilmagan ishlar boʻyicha xarajatlarni qonunchilik bilan belgilangan tartibda Konsern balansidan chiqarish toʻgʻrisida qaror qabul qiladi;

Konsern boshqaruvi apparati shtat jadvalini, uning tarkibiy boʻlinmalari toʻgʻrisidagi nizomlarni tasdiqlaydi, apparat xodimlarini lavozimga tayinlaydi va lavozimdan boʻshatadi, ularning mansab maoshlarini va ularga ustama haqlarni, shuningdek, apparat xodimlarini ijtimoiy himoyalash maqsadidagi turli koʻrinishdagi qoʻshimcha haqlarni hamda kompensatsiya toʻlovlarini belgilaydi;

qatnashuvchi korxonalar va tashkilotlarning moliyaviy-xoʻjalik faoliyatini taftish qilish toʻgʻrisida qarorlar qabul qiladi, ularning natijalarini koʻrib chiqadi hamda aniqlangan kamchiliklarni bartaraf qilish yuzasidan chora-tadbirlar koʻradi;

amaldagi qonunchilik bilan belgilangan tartibda Konsern tarkibiga kiruvchi korxonalar va tashkilotlarning rahbarlariga nisbatan ragʻbatlantirish hamda intizomiy jazo choralarini qoʻllaydi.

1. Konsernga biriktirilgan mol-mulk, shuningdek, unga budjetdan ajratilgan mablagʻlar toʻliq xoʻjalik yuritish huquqi asosida unga tegishli boʻladi.

2. Konsern oʻziga biriktirilgan mol-mulkdan, pul mablagʻlaridan, daromadlardan, shuningdek, sotib olingan yoki qonunchilik bilan yoʻl qoʻyiladigan boshqa asoslar boʻyicha olingan boshqa mol-mulkdan foydalanish, ularni tasarruf etish va ularga egalik qilish huquqini amalga oshiradi.

3. Konsern korxonalari va tashkilotlari shartnomaviy normativlar boʻyicha daromadlardan (foydadan) bir qismini markazlashtirilgan jamgʻarmalarni hamda zaxiralarni tashkil etish uchun oʻtkazadilar.

4. Konsernning mol-mulki asosiy va aylanma mablagʻlardan, shuningdek, Konsern balansida oʻz aksini topgan boshqa mol-mulklardan hamda pul mablagʻlaridan tashkil topadi.

Konsernning mol-mulki va mablagʻlari quyidagi manbalar hisobiga shakllantiriladi:

ilmiy-texnikaviy, ishlab chiqarish va ijtimoiy rivojlantirishning aniq muammolari va maqsadli dasturlarini mablagʻ bilan taʼminlash uchun konsern qatnashchisi boʻlgan ixtiyoriy amalga oshiriladigan maqsadli badallar;

budjet mablagʻlari yoki boshqa markazlashtirgan mablagʻlar;

bank kreditlari va boshqa kreditlar;

Konserning oʻz ishlab chiqarish-xoʻjalik hamda moliyaviy faoliyatidan olinadigan daromadlar;

qimmatli qogʻozlar (aksiyalar va obligatsiyalar) sotishdan olinadigan daromadlar;

sotib olingan qimmatli qogʻozlar boʻyicha daromadlar, shu jumladan chet el kompaniyalaridan olinadigan daromadlardan, “Oʻzdavxazina” bilan kelishilgan holda Konsern qatnashchilari boʻlgan aksionerlik jamiyatlari tomonidan davlatga tegishli aksiyalar paketi boʻyicha olinadigan dividendlar;

Oʻzbekiston Respublikasi qonunchiligi bilan taqiqlanmagan boshqa manbalar.

Konsern quyidagi jamgʻarmalarni tashkil etadi:

zaxira (sugʻurta) jamgʻarmasi;

valyuta jamgʻarmasi;

konsernning konsern qatnashchisi boʻlgan barcha korxonalarning manfaatlari yoʻlida, shuningdek, moliyaviy qiyinchiliklarni boshidan kechirayotgan korxonalarni qoʻllab-quvvatlash maqsadida investitsiya, ilmiy-tadqiqot va boshqa dasturlarni mablagʻ bilan taʼminlash uchun Konsern Kengashining qarori bilan tashkil etiladigan ishlab chiqarishni, fan va texnikani rivojlantirishning markazlashtirilgan jamgʻarmasi.

5. Konsernning ustav fondi konsern qatnashchisi boʻlgan korxonalarning ajratmalaridan shakllantiriladi. Ustav fondining miqdori Konsern Kengashi tomonidan belgilanadi, konsern qatnashchisi boʻlgan korxonalarning ajratmalari miqdori shartnomaviy asosda belgilanadi.

Konsern Kengashining qarori bilan ustav fondi miqdori qatnashchilarning ulushlari hamda kirish badallari miqdorlarining tegishli ravishda oʻzgarishiga qarab koʻpayib yoki kamayib borishi mumkin.

6. Zaxira jamgʻarmasi ustav fondining 25 foizi miqdorida tashkil etiladi, ushbu jamgʻarmani shakllantirish foydadan har yili belgilangan miqdorga yetgunga qadar Konsern Kengashi tomonidan belgilanadigan miqdorda ajratish yoʻli bilan amalga oshiriladi.

7. Valyuta, markazlashtirilgan va boshqa jamgʻarmalarni tashkil etish uchun ajratiladigan har yilgi maqsadli ajratmalarning miqdorlari hamda ulardan foydalanish tartibi, shuningdek, ulardan foydalanishdan olingan foydani taqsimlash tartibi Konsern Kengashi tomonidan belgilanadi.

8. Maqsadli dasturlarni mablagʻ bilan taʼminlash uchun ajratiladigan maqsadli badallar miqdorlari, ulardan foydalanish va foydani taqsimlash tartibi ana shu dasturlar qatnashchilari bilan kelishgan holda Konsern Kengashi tomonidan belgilanadi. Zarur hollarda dasturlarni amalga oshirish uchun mablagʻlar foyda tegishli ravishda taqsimlangan holda aksionerlik asosida shakllantirilishi mumkin.

9. Konsern konsern qatnashchisi boʻlgan barcha korxonalarning manfaatlari yoʻlida oʻziga taalluqli mol-mulkdan hamda mablagʻlardan foydalanadi, Oʻzbekiston Respublikasida hamda uning tashqarisida belgilangan tartibda qayta qurishi, sotib olishi, turli koʻrinishdagi koʻchar va koʻchmas mol-mulkni ijaraga olishi, qonunga xilof boʻlmagan boshqa harakatlarni amalga oshirishi mumkin.

1. Oʻzbekiston Respublikasi oziq-ovqat sanoatini rivojlantirish ishiga oʻz hissasini qoʻshayotgan, Ustavni tan oladigan va uning talablarini bajaruvchi hamda Konsernning vazifalariga muvofiq ishlab chiqarish-xoʻjalik va boshqa faoliyatni amalga oshirish majburiyatlarini oʻz zimmasiga olgan birlashmalar, korxonalar tashkilotlar mulkchilik shaklidan qatʼi nazar, shu jumladan chet el korxonalari, Konsern qatnashchilari boʻlishlari mumkin.

2. Konsern oʻz tarkibiga kiruvchi korxonalarning davlat mulkini hamda davlatga mansub boʻlgan aksiyalar paketlariga muvofiq aksionerlik jamiyatlari faoliyatini boshqarishni amalga oshiradi.

3. Konsern qatnashchisi boʻlgan korxonalar kalendar yil tugashidan kamida 6 oy oldin yozma ravishda Kengashni ogohlantirgan, Konsern va uning tarkibiga kiruvchi korxonalar oldidagi majburiyatlarni saqlagan holda Konsern tarkibidan chiqish huquqiga egadirlar. Konserndan chiqish toʻgʻrisidagi qaror Konsern Kengashi majlisi bayoni bilan rasmiylashtiriladi hamda Oʻzbekiston Respublikasi Vazirlar Mahkamasi bilan kelishiladi.

Konsern qatnashchisi boʻlgan korxonaning konsern tarkibidan chiqishi toʻgʻrisidagi masala konsern Kengashi tomonidan hal etilmagan holda Konsern tarkibidan chiqish istagini bildirgan konsern qatnashchisi boʻlgan korxona ushbu nizoli masalani hal etish uchun tegishli xoʻjalik sudiga murojaat qilishga haqlidir.

4. Davlat tasarrufidan chiqarish va xususiylashtirish boʻyicha chora-tadbirlarni amalga oshirishda Konsern korxonalarni yopiq turdagi aksionerlik jamiyatlariga aylantirishning maqsadga muvofiqligidan kelib chiqadi, bunda ushbu aksionerlik jamiyatlarining davlatga mansub boʻlgan aksiyalarining ulushi kamida 51 foizni tashkil etish kerak. Konsern “Oʻzdavjamgʻarma” bilan kelishgan holda korxonalarni rivojlantirish uchun davlatga mansub aksiyalar boʻyicha dividendlarning bir qismini ularga berishga haqlidir.

5. Konsern tomonidan ishlab chiqiladigan maqsadli dasturlarni amalga oshirishda konsern qatnashchisi boʻlgan korxonalarning birgalikdagi faoliyati ixtiyoriylik, manfaatdorlik, foydani oʻzaro manfaatli shartlarda taqsimlash asosiga quriladi.

1. Konsern oʻz faoliyati natijalarining operativ va buxgalterlik hisobini olib boradi, shuningdek qonunchilik bilan belgilangan tartibda statistika hisobotini amalga oshiradi. Konsern moliyaviy-xoʻjalik faoliyatining natijalari yillik buxgalterlik hisoboti asosida belgilanadi. Konsern qatnashchisi boʻlgan korxonalar belgilagan tartibda oʻzlarining moliyaviy-xoʻjalik faoliyatlari natijasi toʻgʻrisida konsernga hisobot taqdim etadilar.

2. Konsernning, uning tarkibiga kiruvchi korxonalarning mol-mulkidan hamda mablagʻlaridan foydalanishni, uning moliyaviy-xoʻjalik faoliyatini nazorat qilishni taftish komissiyasi amalga oshiradi.

Boshqaruv hamda konsern tarkibiga kiruvchi korxonalarning moliyaviy- xoʻjalik faoliyati konsern qatnashchisi boʻlgan korxonalarning talabiga koʻra bir yilda kamida 1-marta taftish qilinadi, navbatdan tashqari taftishlar esa konsern qatnashchisi boʻlgan korxonalarning talabi boʻyicha oʻtkaziladi.

3. Konsern qatnashchisi boʻlgan korxonalarning davlat hisobotini buzib koʻrsatgan mansabdor shaxslari qonunchilik bilan belgilangan intizomiy, moddiy yoki jinoiy javobgarlikka tortiladilar.

1. Konsernning faoliyati quyidagi hollarda toʻxtatilishi mumkin:

konsern Kengashining qarori bilan;

Oʻzbekiston Respublikasi Vazirlar Mahkamasining yoxud qonun bilan belgilangan hollarda xoʻjalik sudining qarori bilan.

2. Konsern faoliyatining toʻxtatilishi uni qayta tashkil etish yoki tugatish yoʻli bilan amalga oshirilishi mumkin.

Qayta tashkil etilgan holda Konsernning huquqlari, majburiyatlari va mol-mulki uning huquqiy vorisi boʻlgan yangidan tashkil etilayotgan tashkilotga oʻtadi.

3. Konsernni tugatish qonun bilan belgilangan tartibda Konsern Kengashi tomonidan tayinlanadigan tugatish komissiyasi yoki tugatish toʻgʻrisida qaror qabul qilgan organ tomonidan amalga oshiriladi.

4. Kreditorlarning tugatilayotgan konsernga oʻz daʼvolari haqidagi arizalarini berish muddati Konsern Kengashi tomonidan belgilanadi, ammo bu muddat bir oydan kam boʻlmasligi kerak. Tugatilayotgan Konsernga bildirilgan daʼvolar amaldagi qonunchilikka muvofiq undirilishi mumkin boʻlgan unga qarashli mol-mulk hisobiga qondiriladi.

5. Konsern tugatilgan taqdirda uning mol-mulki bank, davlat budjeti, boshqa kreditorlar bilan hamda boshqaruv aʼzolari va apparat xodimlari mehnatiga haq toʻlash boʻyicha hisob-kitoblar qilingandan keyin qonunchilik bilan belgilangan tartibda taqsimlanadi.

6. Konsern qayta tashkil etilgan yoki tugatilgan taqdirda ishdan boʻshatilgan xodimlarning huquq va manfaatlari belgilangan tartibda kafolatlanadi.